Wira va klita ke Izva va valpok

{{TextQuality|50%}}
<div style="margin-top:1.2em;font-size:140%;">
<center>'''Izva va valpok'''</center></div>
<center>''Vietnamafa vunda''</center>


{|width="100%"
|-
|rowspan="4" style="background:#FFFFF5; border:1px solid #F0F2CE; vertical-align:top; padding-left:1em; padding-right:1em; text-align:justify; width:72%;"|

Konviele koe abrotcafa gola ke Vietnama tiyir jotaf budaf is vonaf tawadayik yoltkiraf gu Ngoc Tâm. Kurenikya tiyir Nhan Diêp. Tiyir kafa is menpesa. Kevie kurenikye tise rabudafe is kobase, tiyir vungafa ise va tapega albapayar. Nekevon Ngoc Tâm va kurenik renayar nume ixepeyer. Volfikunton, bata kurera ve jijamayar kire ayikya gazdon laizon ve awalkeyer. Entufaxaweson, Ngoc Tâm me ve jugemeyer da va alto ke kurenik isker ise va kotawara ve tsuneyer. Moi da va intaf kiewegeem al doleyer, do nomulk gerbaltlapiyir ise va nianha megrupeson salton krabeyer.


Konviele, tit kusafa is kofigasa venta gerbalt va in ve vanstayar. Mosidayas, in va patctoy nedis va listuca golde riafa imwa se is aal yo dem jontik amidaf ilt ve kosmayar. Viele va vestara trenayar, va guazik dem abrotcaf batakaf usukeem isu lukastam laizon ve kakeveyer. Wiyapaca is gevasa segayera va guazik kouayad. Batcoba ve noveyer da in gildayar da lenteon tan Xonorlik tiyir. In titon ve pirileyer aze ve dildeyer ta da battan askir da kurenik dimblir. Va in sason, norlik ve kaliyir : « va rinafa fuxa fu rwavé kire rinafa renara isu kranav tid purafa. Vexe pokolé da win stekeon me batcetec ! ». Azon in pu tawadayik ve eruyur da in va nomulk fenkur aze va intaf geltnaav gaber ta da baroya forteybelaxa mo alto ke Nhan Diêp kurenik lubed. Boreon, battel ve itafenkuyur dum ede va modapara buluyur. Intaf poeem kaliapon dimpiyir. Levi mallapira, Norlik va kurenikya ve gukoeyer : « Va kureragonieem me vulkul. Va renara is abidara ke kurenik trakul. Kottol belcon til kalaf ! ».


Soriaf gu dimlapira va ebava, Ngoc Tâm tawadayik lwiyir da afizmielon detcer. Sielon konviele ta eksalustera ve govankriyir. Viele tiyir gracaf, tivap pok tel inaf va int ve ewalzeyer. Pedran gan listuca ke Nhan Diêp, dolekik doon toz prilayar nume tenon brostayar aze van warzafa nia ve vanstayar. Dimpiyis is yatkaf, Ngoc Tâm ve gorayar da va kulaf dolekik onkar. Kaiki konak abrotcif aneyaraf aksat ve kiewaskiyir da vaon katrasir. Va kurenik ve katrasiyir aze puon ve drageyer da in kazokever. Giltis va drikafa blira, battel va bata dragera ve vewayar. Acum icde intafa renara tawadayik ve zo fraskeyer nume pu kurenik ve kaliyir : « Rin til da va jin bulul. Vexe va tela baroya dimbliesa forteybelaxa gimayana mo rinafo alto godimzilil ». Tis kalaf da va intafe akoydafe kurenikye batinde drikapon rodakteyer, Nhan Diêp ve ekeyuyur da geltpuiler. Vexe viele fortey toz traspuyur, in ve awalkeyer. Bata foktafa zivolikya va varafa bulura va tamava me rotrobindayar. Koon ve dimtalayar, va int artazukayason ton bezama kotviele onkasa va Ngoc Tâm ta da va tela baroya forteybelaxa vanstatasa ko ayablira dubier. Kan valpok yolt bat bonolam stekeon zo grupeter.

|style="vertical-align: top;"|
{{Krent_Iyelt
| xanto_vergumvelt = '''Su tich con muoi'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Vietnamava Vietnamava]
| xanto_evla = -
| kalkotavara_vergumvelt = Izva va valpok
| kalkotavara_kalkotavasik = Jacques Nguyen Tanh
| kalkotavara_piskura = -
| kalkotavara_evla = 2004
| webesik = [[Favesik:Nguyen Tanh|Nguyen Tanh]]
| krentduga = [[Image:50%.jpg]] Gotuwadan
| kseva1 = #B79EDA
| kseva2 = #D9BBFF
}}
|}


[[Loma:Vunda]]
[[Loma:Vunda ke Vietnama|Izva va valpok]]
[[Loma:Ayoltaca yo|Izva va valpok]]