Wira va klita ke Don Diliodaf Bost Luz01

{{TextQuality|100%}}
<div style="margin-top:1.2em;font-size:140%;"> <center>'''Don Diliodaf Bost'''</center></div>


{|width="100%"
|-
|rowspan="4" style="background:#FFFFF5; border:1px solid #F0F2CE; vertical-align:top; padding-left:1em; padding-right:1em; text-align:justify; width:72%;"|

==Taneafa neva, taneaf pak, taneaf luz==

Melexov diel arte wida tir. Tuvelam ke bonolxo lenteon fenkuwer, van Don bost. Tritafa kolliava dem anyustoy ''sajena'' lum wale yono afoltxo kusafo gu jebra aze domega tir : tcalist dem grujdukaf kuldoy, lukoptaf metrenaf bwetkeks dem dri kutcani gan runta aze, kaikeon, skaelaf lev suka, plozan, yeldabukaf, Don bost. Roneon, kadime yona gleida dem dzopokaal ke ralakuxo, xetman vawa : lukoptajaf krem, is bertraf bliedaf werd ke kelda, tel sistan gan intocka ke okol, is amudama bene gamdot, is kadimeon rijust italkan gan zekasa bra. Geon, afoltaf xed ke venta. Talteon, rem viga vawa jupasa va yono omafo werdxo.

Prokofi Melexov kazakik den wida tidi veyironokaf tawuk va Turka al dimpiyir. Male turkafa patecta va ayikya kojupayar, va ayikyama anamplekunyuna gu sedok. Inya va gexata palseyer ise va govitaf is poles iteem abicviele nediyir. Jonksevafa keyaxa ke lesof sedok dem sumufi is megrupeni kofigasiki va lickuca ke widaf ayikyeem al lulayar. Turkafa gralomenikya va gadikeem ke Prokofi taruteyer, nume guazaf Melexov pu nazbeikye va inafi kiewegaki wiluon ziliyir. Pu rin meviele di ixeyer aze medenlaniyison awalkeyer.

Prokofi kalion koirubayar : rentasik mu in va mona kolnayad, in va nukueem ke bonolxo miv kaltaplekuyur, aze bak muvugal ko warzafa oga va intafa ayatepesa diveikya kostayar. Viele do in va wida remlaniyir, kadime lima buresa va intafa kiewega, kottan, jotik ik milgik mo nuda va int kalpleyed. Ayikye koe lukast va kicera kagiyid, ayikya va sint powapayad, kadime in jontik ingajeyen rumeik zveriieyed, vexe in, ton fenkupuyuna kruja, vion laniyir, dum tel va bourga kenlanis, licason ko intafa ebeltafa nuba va rabetafa nuba ke yerumanik is oklon bureson va taka dem batakafa mitca ; fixu vamoe varenkeem deeyed ise tanamuyud ise furove wale mezekas raporwolteem mardtraspuyur.

Batvielu, in koe wida rion zo wiyir, dere va dolexo viga me nobayar. Koe intafa mona kene Don bost ezeon bliyir, dum snavol. Va yona cobaja mbi pwadeyer. Velik sus va jaftoloc koe werdxo espuyud da, konaksielon ba ironokafa awaltafida, va Prokofi bures va yerumanik koe meem kal tataraf tawarn al wiyid. In tide tawarn batlize daykeyer, ton ge keve witcokiraf rapor decemdon vibanaf, pok in debanyayar, aze kottol batinde zavzapayar disukes va rijust. Sin disukeyed vieli nom titfinyiyir, aze Prokofi ko ''zipun'' lioza va yerumanik anamplekuyur aze koe meem denon dimbureyer. Wida ropegluyur, va pebura va bat volunaykaf tegireem aneyayar ; tre keyaksera ayikya va sintafa riftakozwira vulkuyud. Vil icde yerumanik ke Prokofi tiyid gedraf : konaktan espuyud da inya tiyir meviele wiyina listikya, artan volson kaliyid ; kotcoba tuaftaweyer viele lolaofa mantanya, kurenik ke sayakik yoltan gu Mavra, yontason va erura va kacasiki, va Prokofi denlaniyir. Edje Prokofi ko fuk va kacasiki aneyayar, Mavra va turkikya rindeyer nume malyeyer da inya tiyir ironokafa mecobikya.

Moimon, iste nuda, Mavra, kerafa, ton dozga dadeon, vanmiae jontiktanya ruyejeyer.

– Vexe pu jin lakalic va toka kiewaca in dene inya trasir ? Ede leon tiyir ayikya, voxe battan… Me jivot, me penayeem. Kinokaca. Dene min, va losudafa yikya gobedjindat. Va inya mialon co-rotempat, dum vebra, koo fonta ; ise iteem : ebeltaf, granaf, ise inya dum Oretlikoc tanamer, Lorik va jin ixer ! Ise folí da in su radekar, boreon, vogá !

– Boreon ? Radekara ? ~ ayikya gevaweyed.

– Mea fotí pelfudik, va baroy nazbeik al gaá.

– Ise inafa vola, tir toka ?

– Vola ? Blafotafa. Inaf iteem tir gabenaf : denon, blira koe divexo vol tinyir. Ise ostik dere, ey listikya, in va rija ke Prokofi burer.

– Ox !...

Ayikya exukeson belcon divieyed.

– Jin miv al wí, va rijakiraf. Ape tir tana inafa vielafa rija narina. Moe int, in va klaimap is leveon rija koe omexeem burer. Viele va batcoba al wí, fogekrezeyé…

Yerumanik ke Prokofi tintenon co-diweduyur. Arnazbeikya ke Astaxov (Astaxov yasa arte wida poke mona ke Prokofi irubayar) pu Lorik vogayar da vanafizon ba Pentekoste taneaviel va yerumanik ke Prokofi ton lebaf usukeem isu nugeem vrodmimas tan jaftol ke inaf bonoleem al wiyir. Batvielu, mouvo ke jaftolya al turodaweyer eke vanpiyir nubokam, bonol ten vrodeyer aze moion mulufteyer.

Bonolakolapa battandon sokiyir. Kotvielon, bixefi tawovaki ke ulidinarak kene Don bost dem jaftolafa awalkoda iku jaftolocafa besaweyer. Azon, akola va yon okol zomeyer. Bonoleem ke stanitsa utca toz jeyed. Bam moxinaf lor va vawileem is nudeem remstiyir…

Konviele, moi widakoka, kazakik den Prokofi artlaniyid.

Monafeliik va rapsay divlaniyir, va int blagayar.

– Toka sukanya va win vanstar, savsafe weltikye win ?

Tari va rapsay vanlaniyir ise zavzayar pulviskafi.

Adim izakamafe guazikye ieyer :

– Pu cin va rinafa diwedikya vanstal, fu malyev.

Prokofi ko mona ipeyer, koo zeria zo vebiduyur. Ontinaf kaburervoliikaj, ikayoltan gu Renta, kev rebava va inafa taka dendayar ise fanyayar :

– Me zekal, me zekal, me kuncal ! Rin, me zo uzatal, tir yerumanik xonukatas. Va in zo sular lodame kotafa wida golde gracira va bonol xonukar. Vexe, me zekal oke kan rinafa taka va rebava tsaxá !

– Ko kusk va in impadimac, va vakolya ! ~ tari evieyer.

Vertegapusik ke Prokofi kan bata nuba ben usukeem va turkikya al vangiyir, kan bana va inaf art iepeson divimpan naroteyer ; vulteson koo zeria va in impadimayar aze tit tari mimayar. Opafe ie va pudalorap remstiyir.

Prokofi mo sid va tevoy ayik mimayar aze ko mawa welveyer aze benu rebava va intaf abalt solimpayar. Kazakik va sint seluson div zeria ipeyed. Dustason aname taka va yozdas is azdas abalt, Prokofi va avlakeem ke rapsay titvulteyer. Tari klaburexaksayar aze koe kusk va int tcastayar.

Prokofi kabdu baplaxe va Renta kaburervoliik logamiaf dam artan vebiduyur aze gu tanoya kadimufa abaltara, dadon mal taltefa epita kal anamba, ludzeyer. Kazakik, dun solimpas va nuk ke istayasiki, va ralakuxo remvulteyed aze van rijust otceyed.

Arti bartivmiala, tari tolon tulaowesi va kusk vanlaniyir. Toloy koafisik va zeria skotcason kolaniyid. Moe pikay ke burmotaxo, yerumanik ke Prokofi koe fortey kolavaweyer, ton fofkon trovganafa taka ; yoy inton bugdayan wale talgeem nisan gan mejera kaliziyir. Prokofi, ton skotcasa taka is titickafa disukera, va zveriiesa flavama anamplekuna koe intafa namulolxafa lioza giyir : va abditenaf rumeik.


Ayikya ba siel ke mil viel awalkeyer. Gadikya ke Prokofi, forendesa, va abdievlafe rumeikye koemudeyer.

In ko brada tuidulana kan ganta ve zo plekuyur, gu okolvrod zo sinkayar nume, arti tanoy aksat, viele lanuca tiyir da bat ebeltamaf turkikam blitir, ko uja ta ailkera zo bureyer. Gu Panteley dum veygadikye zo yoltayar.

Prokofi arti santolda mal xalta dimpiyir. Intaf ilbodeyen blakeraf lukast dem batakaf fem, is intafe rossiakorafe vage va in tudiveayar. Va nazbeikye dimnariyir ise koe diel toz tolkobayar.

Prokofi gu kazakikya (nazbeik ke vegungik) va in kureyer.

Malion, turkaf fortey gu kazakaf fortey va int wan aotceyer. Batcoba va yon Melexov dem livaf pez ton govitafa listuca nazbayar, dan gan wida gu « turkik » zo rozuyud.

Kaiki kotawara ke gadikye, Panteley va diel ektudayar : va mona gu warze besayar, aze va minjaxo dem tanoya mialafa desiatin welma gu intafa kiewega mon loplekuyur, aze va warzafa zieltkepaitakirafa glesta isu baplaxe tuvegedunayar. Eruyumbon, besasik va toloye wilye kum zieltark walgabeyer aze mo kepaita ke baplaxe titickayar. Sin ton medwisa tiva va Melexov diel tuitupayad ise va arboyafa is trigafa nedira ziliyid.

Arti milgugal, Panteley Prokofievitc tuvaweyer : tupwertawemeyer ise tugalzawemeyer voxe soe nutiyir delaf guazik. Va rantaf niskeem diyir, eteyer (remi jotugal bak okolvultera bak ingoyara kabdue Ginik intaf taltef nimat empaweyer), ise bene taltefa oblaka va zogiakorafa moavakenda, ise wan tiyir ebeltaf gu usukeem is lukast, ise zideson warjeyer, batinde tuguazapason va kurenik, va lekeon listafa pofa ayikya dem gexata nariyisa va plozdona.

Inafe taneafe nazbeikye, Petro, ixam kurenafe, va gadikya vektayar : omafe is pezamkirafe is lerkitakirafe is dem vaf lukradentukaf kendusukeem ; voxe toleafe, Grigori, en tiyir delt ke gadikye : lodontinafe gu takamiala dam Petro wori tise tevdon lojotafe, dum gadikye tiyir livapezkirafe is dem faltamaf soyor ke lujaf iteem kadime dademaf ludzeks, is dem wexayes varenkeem leve sotcenafa bertrapafa alma. Grigori tugalzaweyer, dum gadikye, nume, dace kiceson, battel va doaca diyid, va doaca lotisa va govitaf sulem.

Dere tiyid Dunyacka, renonan nazbeik ke gadikye, sardikya dem abrotcaf meem is itapeem, is Darya, kurenik ke Petro do sintafe velikyeme ; tiyir Melexov varafa yasa.

|style="vertical-align: top;"|
{{Krent_Iyelt2
| xanto_vergumvelt = '''Тихий Дон'''
| xanto_sutesik = [http://www.kotava.be/xadola/pmwiki.php?n=Rekluexo.MixailColoxov Mixail Coloxov]
| xanto_piskura = Oktiabr'
| xanto_ava = [http://www.kotava.be/xadola/pmwiki.php?n=Rekluexo.Rossiava Rossiava]
| xanto_evla = 1928-1940
| kalkotavara_vergumvelt = Don Diliodaf Bost
| kalkotavara_kalkotavasik = Mixail Kostov
| kalkotavara_piskura = [http://www.kotava.org/index.php Kotava.org]
| kalkotavara_evla = 2008
| kalkotavara_klita =
| webesik = [[Favesik:Sab|Sab]]
| krentduga = [[Image:100%.jpg]] Tuenayan (2011)
| kseva1 = #A7803B
| kseva2 = #F5C36B
}}
|}


{{Don Diliodaf Bost_krent
| luz_luz = 1-eaf
| luz_radimeluz = [[Don Diliodaf Bost_Luz02|2-eaf luz]] 
}}

[[Loma:Berpot]]
[[Loma:XX-eafa decemda]]
[[Loma:RossiavaSuteroteem]]
[[Loma:Coloxov (Mixail)|Coloxov]]
[[Loma:Sutesik-C|Coloxov]]
[[Loma:Don Diliodaf Bost]]

[[ru:RU_Don Diliodaf Bost_01]]