Wira va klita ke KanakafaVunda Ilava ke gadikeem

{{TextQuality|75%}}
<div style="margin-top:1.2em;font-size:140%;"> <center>'''Ilava ke gadikeem'''</center></div>


{{Teliz_toza}}

==II : Ilava ke gadikeem==

Gadikeem moe mevtapa senher.

Aludevon keniber, merolizis dum pistok.

Se vidiastutera is gejastutera va sin giopon pokoad ; lorara se ke grelt giopon titad, kotcoba kroiskon tenanteyawer. Kenibec, ey gadik yo ! blira tir kiewafa, modera tir lokiewafa.

Ilt tulukraweyes moe aal tir zijnaf dum izga ke wageyaal mielon ; lozijnafa tir vulkura.

Kenibec, ey gadik ! Abrotcion kenibec, klokera tir kiewafa ; kotviele kenibec, vlarde tir lokiewafe.

Va tokcoba askic, gadik yo, kotawayan ? ise toktan do win dayker ?

Toktan kal niska va winaf prantaf meem vibar ? Mea tir takra gandisa leve krimbeem : tiyir tul madason va kurt va inaf cot soltiolter.

Tok jebes flek va berga ka last titar ? Tir biraperake dem jebes maserkeem.

Me tid winaf iteem, ey gadik yo ! batinde keron tegulawes, tid kobelckanafo lesko se ! Vexe win va mecoba peztalic, ey gadik yo, mea wic, mea gildec.

Kenibec, ey gadik yo ! abrotcion kenibec, klokera tir kiewafa ; kotviele kenibec, vlarde, tir ilamafa kaluca.

Batinde moe ontinafa mevta dankayar, Tei ebeltikya, ke dana yolt va « borera » sugdalar, Tei yikya ke awalkikxo.

Afizon ugalzeyer, mielon ugalzeyer : Tei va gadikeem mea diyir aze awalkikeem al vanikatcuyur.

Batlize, tuke ilt lubes tit gama bliyir, ise koe werdapxo tanion dankayar.

Sielon konviele, yikya se al piyid aze ko stutera anameasa kal krant al dolizid.

Vexe sukayason ben mevtava, Tei kan wilteem toltidtalayar.

Inafa fentafa nuba va sinafa yo tuoprayar, sin iskeyed da in talar.

Arviele, Nahoa (gazda), nasbeik ke sveriokilapik pu in al kaliyir : djuvanpil nasbeikya ke jinafe gadikye ? Almukuling yo tiyid koe cinaf kiray se ; cinafa ayikya se va meviele isken furotamardaf flek bured, ise va « indidio » drak anton rokayestan wetason va tela lolistafa yikya ke grelteem jinaf gadikye se digipid.

Se cinafa gadikya isu yerumanikya tid sumgamiafa ; va tel lolistaf ilt yo ke aalxo is tel lokiewaf kabay se ke uzdapa estud.

Va gilanamba aname fonta is kralkaloitesiki koe usukeem bured.

Tid se nasbeikya is berikya ik yerumanikya is gadikya ke okilapik, ke sveriokilik.

Jin tí nasbeik ke okilapik, gazik mali koblira ise bene jinaf kiray rotikirucanuba dem kuldoy se tir rumkanafa.

Ey yikya ke awalkikxo, ko jinaf kiray djupil ?

Vexe Tei ve takabotcemeyer aze ludevon ic caxaalxo ve griawiyir.

Ise inafa puda va alban tsurk mielon dankayar.

Kenibec, ey gadik yo ! abrotcion kenibec, klokera tir kiewafa ; kotviele kenibec, vlarde tir lokiewafa.

|style="vertical-align: top;"|
{{Krent_Iyelt3
| xanto_vergumvelt = '''Le lit des aïeux'''
| xanto_sutesik = [http://www.kotava.be/xadola/pmwiki.php?n=Rekluexo.LouiseMichel Louise Michel]
| xanto_larminda = Vundak
| xanto_larm = '''Légendes et chansons de gestes canaques'''
| xanto_piskura = ''Les Petites Affiches de Nouvelle-Calédonie''
| xanto_ava = [http://www.kotava.be/xadola/pmwiki.php?n=Rekluexo.Francava Francava]
| xanto_evla = 1875
| kalkotavara_vergumvelt = '''Yona kanakafa vunda isu blokak'''<br>Ilava ke gadikeem
| kalkotavara_kalkotavasik = Bruno Cordelier
| kalkotavara_piskura = [http://www.kotava.org Kotava.org]
| kalkotavara_evla = 2005
| kalkotavara_klita = [http://www.kotava.org/fr/fr_suterot_Michel_LégendesCanaques.pdf Kalkotavaks]
| webesik = [[Favesik:Bcordelier|Bcordelier]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}
|}


{{Michel_KanakafaVundaSe_krent
| kuda_vergumvelt = II : Ilava ke gadikeem
| kuda_abduekuda = [[KanakafaVunda_Pu nikeem ke Europa|I : Pu nikeem ke Europa]] 
| kuda_radimekuda = [[KanakafaVunda_Sukera_se|III : Sukera se]] 
}}

[[Loma:Vunda]]
[[Loma:XIX-eafa decemda]]
[[Loma:FrancavaSuteroteem]]
[[Loma:Michel (Louise)|Kanakafa vunda : Ilava ke gadikeem]]
[[Loma:Kanakafa vunda se|Kanakafa vunda : Ilava ke gadikeem]]