Wira va klita ke Hans Christian Andersen

<div style=''margin-top:1.2em;font-size:140%;''><center>'''Hans Christian Andersen'''</center></div>
<center>'''1805-1875'''</center>
<center>''Danmarkavaf reizsutesik isu ezlopik''</center>

{|width="100%"
|-
|rowspan="4" style="border:0px solid #F0F2CE; vertical-align:top; padding-left:1em; padding-right:1em; text-align:justify; width:72%;"|


Hans Christian Andersen tiyir danmarkavaf sutesik isu ezlopik, kotgrupaf gu yon warzot isu reiz.

In tiyir nazbeik ke akolaf jotaf vukudiasik is loklaafa kurenikya. Yasa koe olkobama koe Odense bliyir. Hans Christian va abditcafa gestera bristuna gan driuca ke gadikeem is broyesuca ke gadikya. Gadikye bak 1816. In ko bema ten laniyir. Va vefasikifa wenyama miv vegeduyur ise deneon zavzayar lize va yone vage tori dotc iayar, belison va kot robeitun suteks, va tulon yona neva ke Ludvig Holberg isu Shakespeare. Setikeson va volkalaf rumeugal ke gadikya koe wawafa yasa, va ''[[Velikya dem vanteyasiki]]'' belir. Djupis kaleynusik, bak 9<sup>-aksat</sup> ke 1819 ko København laniyir. Batlize gu oviskik zo krupteyer ise zo divwenyayar ise riwe zo tucopayar, vexe Christoph Weyse lexusik isu Sibonu az kaikion Frederik Hoegh Guldberg va in tunayad. Inafa puda ve konjoteyer vexe wetce raves stutesik ko Gazawenya zo dosteyer. Mekon askison, va progera ke Guldberg ve drasuyur, vexe va Jonas Collin warzaf tilik bliron tunawetes trasiyir.

Frederik VI gazik, dulapes va bat divulaf yik, vajuleyer nume bak konaka tanda ko pulviropafa bema ke Slagelse stakseyer. Abdi vayaratena in va taneafa karba, va ''Tacedik ke naboxa ke Palnatoke'' (1822), sanegayar. Rotakapaf is ugdiskaf vayasik, koe ara bema ke Slagelse az koe Helsingør kali 1827 zavzayar ; bata tanda, ~ kaliyir, ~ al tiyid tela lodorikafa ke jinafa blira. Collin adim fineyer da Hans Christian al vanpiyir gaayan nume in ko København stakseyer.

Bak 1829 va kiewatcapa tuke tacukaf berpot semekkiraf gu ''Lanira mal Holmen narilt kal Amager'' seotayar, ise va liona is ezlaxak miledje sanegayar. In toz tiyir fiuntamaf viele nik toz gripokoleyed trakuson da meka kiewaca mal inafa diveavuca is abditcafa blieduca co-vantukeyer. Bak 1833, va erbama gu gazik kazawayar ise va taneafa koyarapa koo Europa sopuyur. Koe Le Locle koe Swiza, va ''Agnete og Havmanden'' beliyir aze bak 10<sup>-aksat</sup> ke 1834 ko Roma artlapiyir.

Bak 1835 taneaf berpot ''Luwisik'' awiyir ise kiewatcapayar. Miltandon, taneafa zixa ke kruldesaf ''Reizak'' (danmarkavon Eventyr) zo sanegayad. Ari ki tukotrasi va taneafa karba bak 1836 is 1837 awiyid. Voda ke batyona rupa me davon zo remwiyir, nume sin zo lustemeyed. ''O.T.'' berpot (1836) is ''Koe Sveriga'' foriskak loon kiewatcayad aze bak 1837 in va ''Anton letcasik'' tel lokiewaf warzot warzeyer.

Van wenya vodjuweyer lize va sedielafa kiewatca anton seotayar, vexe koe ''Ewaviskaf burey'' mempesa deasera ke 1840 va geltrafa norluca kowazdeyer.

Andersen tiyir koyapasik. Tela lodabrotcafa koyara, bak 1840-1841, remo Germana (lize ba taneafa toma kan impadimak lapiyir) az Italia az Malta az Ellasa kal Konstantinoupolis vanstayar. In koo Ebeltafa Bira az Duna bost dimlapiyir. Nega va bata bagala va ''Zalor ke ezlopik'' (1842) tadler, dan jadion gu inafa tela lokiewafa koyaraneva zo krafiar.

Wori sposuca ke inaf ''Reizak'' al tulogijaweyer ; toleaf enk bak 1838 az bareaf bak 1845 zo bokayad. Soe gotuelimat da bat reiz gu jotikeem me zo balikeyed, vexe maninde vamoion di zo remwiyid. Ae, damo gustapuca Hans Christian Andersen tori rumeikeem meviele bitonon djusuteyer.

Andersen re tiyir kotgrupaf koe varafa Europa, beka va lifa sposuca koe intafo vo me pojayar. Bak 6-aksat ke 1847 ba taneafa toma ko Engla lapiyir aze koeon va xult di grupeyer. [[Charles Dickens]] miv dositayar viele in mallapiyir. Vanion, Dickens va ''David Copperfield'' sanegayar lize Uriah Heep inaf koredik ton delt va Andersen zo wir.

In wan sanegayar, va int wetce berpotik is pizasutesik djuruyeson, iskedason va ''Reizak'' lize inafa norluca en nagewer, in va yon warzaf olkoy kle wan suteyer. Bak 1847 az 1848, toloya warzafa karba awiyid. Kaiki amlitap, in bak 1857 va ''Tira ok metira''ar warzot sanegayar. Bak 1863 radimi ara koyara, ''Koo Espana'' ara "koyaraneva" zo piskur.

Reiz kali 1872 zixazixon wan awiyid. Ba Kristnazbalaviel ke milafa tanda, inaf ironokaf reiz zo sanegayad. Bak radimif nazbalarugal, Andersen lubeson tidu ilava goreston bakaweyer. Me fraskeweyer nume ba 04/08/1875 koe intafa mona ke Rolighed poke København aulon awalkeyer.


|style="vertical-align: top;"|
{{Suterotik
| yolt = Hans Christian Andersen
| ewava = HCAndersen.jpg
| vunduk = Delt va Hans Christian Andersen, 1836, ke Christian Albrecht Jensen
| blira = 1805-1875
| ava = [[:Loma:DanmarkavaSuteroteem|Danmarkava]]
| suterinda = [[:Loma:Reiz|Reiz]]; [[:Loma:Ezla|Ezlopa]]
| suterot   = <br>
*''Improvisatoren'', berpot (1835)
*''Eventyr'', reizak (1835–1848)
*''O.T.'', berpot (1836)
*''Kun en Spillemand'', berpot (1837)
*''Den nye Barselstue'', buska (1845)
*''Ahasverus'' (1847)
*''De to Baronesser'', berpot (1849)
*''I Sverrig'', koyaraneva (1851)
*''Historier, Erzählungen und Märchen'' (1852)
*''Mit Livs Eventyr'', mivizva (1855)
*''Lykke-Peer, berpot (1870)
}}
|}

[[wp-de:Hans_Christian_Andersen]]
[[wp-en:Hans_Christian_Andersen]]
[[wp-es:Hans_Christian_Andersen]]
[[wp-eo:Hans_Christian_Andersen]]
[[wp-fr:Hans_Christian_Andersen]]
[[wp-it:Hans_Christian_Andersen]]
[[wp-nl:Hans_Christian_Andersen]]
[[wp-pt:Hans_Christian_Andersen]]
[[wp-ru:Андерсен,_Ханс_Кристиан]]
[[wp-sw:Hans_Christian_Andersen]]
[[wp-tr:Hans_Christian_Andersen]]

[[Loma:Ezla]]
[[Loma:Reiz]]
[[Loma:XIX-eafa decemda]]
[[Loma:DanmarkavaSuteroteem|Andersen (Hans Christian)]]
[[Loma:Andersen (Hans Christian)]]
[[Loma:Suterotik (blirizvama)|Andersen (Hans Christian)]]