Wira va klita ke Tcabanesik is kurenikyadubieso swaviko

{{TextQuality|75%}}
<div style="margin-top:1.2em;font-size:140%;">
<center>'''Tcabanesik is kurenikyadubieso swaviko'''</center></div>
<center>''Wolofavafa vunda (Senegala)''</center>


{{Teliz_toza}}

Reiz.<br/>
Pu min reizul.<br/>
Konviele lekepon.<br/>
Wan tir.<br/>

Tiyir swaviko dubieso va kurenik ke kote warzafe kurenikye.

Bettan kures gu warzafa kurenikya zo zelayar, gu kigdena gan swaviko.

Budaf is rulokaf tcabanesik va warzot raveyer nume dakteyer da va kurenikya ko bata patecta di aneyayar enide di grupeyer kase banlize ayikye tid vodiskafe.

Va batcoba kaliyison, egadayar aze mallaniyir. Viele ko wid artlaniyir, riston zo emudeyer. Gazik va danda ke inafa worara eruyur. Tcabanesik kaliyir da ta kurera piyir.

Gazik kaliyir :

— Batlize va kurenik me rokoseotal, lecen kote ayikye ziliyimbe va kurenik gan swaviko al zo dubier, nume kotbata kurenikya tir mevieli kaldrasunafa.

Yikye pu gazik dulzeyer :

— Jin, tí tcabanesik. Swaviko, buduca inon nedina… ede va rinafa nazbeikya ta kurera zilil ise ede ino sol jin di konarir, pune vaon kallyumatá. Rin, va jin dizveckel, va jin anton dwil.

Gazik kaliyir :

— Va coba kalil, kas lanafa ?

Ayik dulzeyer :

— Lanafa.

Gazik va kurenikya pu in ziliyir. Kurera barkon zo fiptayar.

Viele ganenik al mallaniyid, yikye do kurenik va sinafa maga kolaniyir.

Vielu sin senyayad, koe tapeduca kurenikye va in laguzayar voxe va mecoba trasiyir. Dwiyir. Ranyayar va gadikye ke kurenik kevlaniyir. In kaliyir da tire ine oveyer. Swaviko al piyir ise va kurenik al dubieyer !

Regazdon, in va alkik kevlaniyir aze kaliyir :

— Va kurenik al kuré voxe swaviko sol jin al plekur.

Alkik va sugdeem disukeyer aze kaliyir : « Swaviko, kot korik batlizu kigdeyen, kaik bost gan ino al zo divbured. Ede va bost lajukaiklanil pune va swaviko rotatatal. Swaviko koe putcolokol tigir. Koe bat putcol, putcoloc tigir. Koe bat putcolam, razama tigir. Koe bata razama, ato tigir. Va bato ato, ede selul, pune kurenikya dubieyesa gan swaviko awitid ».

Alkik ware kaliyir :

— Koba putcol moni san-tane bartiv va intaf vask gibulur aze ta ulira tit pist iste bost lanir. Luti tir inaf yolt.

Tcabanesik va wivgak nariyir, va sinka plekuyur, aze dositon gu vakol mallaniyir. Moida sin va widava al divlaniyid, krapol va sin wiyir, ieyer aze vanvulteyer.

Ayik ta zeltara abadeyer, nume krapol eruyur :

— Va tokcoba fu askil ?

Tcabanesik kaliyir :

— Va kurenik al mbi dubié, vaon aneyá ; ede va jin djudilful, pune va rin di atá !

Krapol kaliyir :

— Nume mallanit, va rin fu pomá. Va coba tanoy olkik oku toloy rotaskid, baroy lokiewon askitid.

Sin jontikedje avlayad ; kiiz melizu talas vamo tcabanesik azenteyer. Ayik va in djumatayar, nume kiiz kaliyir :

— Va tokcoba tove jin fu askil ?

— Va kurenik al mbi dubié, vaon aneyá ; ede va jin dilful, pune va rin vere atá !

Kiiz kaliyir :

— Lanit, va rin fu pomá. Va coba toloy olkik oku baroy rotaskid, balemy lokiewon rotaskitid.

Ayik, do baroy sulem, koe molda keldonayar. Artlanison va kuksadom, krapol va fepe suxayar aze sin va int koeon preyutanyayad.

Moni san-tane bartiv, koba putcol ta ulira va pistok ke bost artlaniyir. Krapol ve welveyer nume moon lubeyer ; vaon jivotgabeyer. Putcoloc va jivot ve divlaniyir aze toz vulteyer. Vakol kadimelaniyir. Sin solumapon vulteyed, vakol ebiduyur aze jivotgabeyer. Razama vaon ve divlaniyir aze tidtalayar. Kiiz koe rid kevtalayar aze poldeyer ; razama lubeyer, kiiz jivotgabeyer. Ato ve divniyir aze moe sid tanamuyur, tcabanesik seluyur.

Kreme kaiku bost, ie ke jontiktanya ve tauleyed.

Ayik va widava dimlaniyir enide va irubasikeem di rozayar. Kottan va guema nariyir, tcabanesik, in, kan krapol lakiyir ; sin va bost remlaniyid. Banlize, va kurenik kagrupeyer, dimnariyir aze doon mallaniyir.

Batlize reiz va bira kevstiyir ; kontan vaon senges pune va fuda kofitir.

|style="vertical-align: top;"|
{{Krent_Iyelt
| xanto_vergumvelt = '''Le chasseur et le génie voleur de femmes'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Wolofava Wolofava]
| xanto_evla = -
| kalkotavara_vergumvelt = ''Tcabanesik is kurenikyadubieso swaviko''
| kalkotavara_kalkotavasik = Marjorie Waldstein
| kalkotavara_piskura = -
| kalkotavara_evla = 2013
| webesik = [[Favesik:Marjorie|Marjorie]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}


[[Loma:Reiz|Tcabanesik is kurenikyadubieso swaviko]]
[[Loma:Senegalaf reiz|Tcabanesik is kurenikyadubieso swaviko]]
[[Loma:Wolofavaf reiz|Tcabanesik is kurenikyadubieso swaviko]]
[[Loma:Ayoltaca yo|Tcabanesik is kurenikyadubieso swaviko]]