Wira va klita ke Charles Dickens

<div style="margin-top:1.2em;font-size:140%;">
<center>'''Charles Dickens'''</center></div>
<center>'''1812-1870'''</center>
<center>''Englaf suterotik''</center>


{{Teliz_toza}}

Bak 1812 koe Portsmouth koe Engla Charles Dickens ve kobliyir. Kali san-tolda rumeuca tiyir kalafa. Va waberga jebetesa bak kotafa kaikifa blira bam ve levgayar. Golde yon erbadanuks gadikye zo koflintayar ; Charles va wawakluca grupeyer ise miv vanpison dodelik koe sebekasikiiaxe va eaftafi bali ke iaxekobas rumeik kosmayar. Bata bagala noveyer da icde wawikeem is copikeem in agelton di suteyer eke intafa nega va takra ke konak celemoy belisik tsedayad ise gretcayad. Batinde Dickens tel losanef ugalaf berpotik va yona seltafa artazukara bak Victoriugal koe Engla gorukon turestayar. Nekev tunuyara va gadikye, me davon ten mejeyer. Koe iaxe ware tandamon kobayar aze ko bema rodimpiyir. Gadikya en batceyer da in va viroyaks jovleyer.

Ba inaf 24<sup>-eaf</sup> ilanuk inaf negeem ko ''Lordekseem ke Boz'' karba zo katanayad. Neva tiyir davafa kiewatca aze askiyir da va zubi ta sutelara va atedafa neva pu in piskusik di drageyer. Ton skulta bak 20 aksat ''[[Yona eluxa ke Pickwick]]'' batinde kozwiyir. Bata neva tir klecafa nega va stuveem ke opelkaf vundnizdef gijanizdef koredik is Sam Weller inaf kwik is boxo dem yon anamef diveavik. Kiewatca va Dickens mea di buluyur ise koe Engla in va yon warzaf berpot verton sanegayar. Amerikikeem va yon inaf berpot satcon albayar. Tulon, tiyir tari viele tota vanstasa va ironakaf sanegaks komoltaweyer.

Dickens meviele ixeyer pu gadikya dana al yovayar enide in koe iaxe co-zavzayar, azon wetce teza ke akoyadafa is greciafa gadikya koe ''Nicholas Nickleby'' berpot va inya narayar. Koe sanefa bema Charles azon bardon zo uneyer aze va ar rundak di trasiyir, batviele wetce unenik koe mwopikaf ilput. Bata kobara tiyir argasa, batdume Dickens vanpiyir ugaldusik icde Dotamaga. Tison 23<sup>-daf</sup>, al vanpiyir grupen felusik ise gan Morning Herald vielfela zo segeyer. Levi seotara va bat play Dickens toz sorduyur. Bak 1833 va berpotaf teliz icde blira koe London ve stakseyer pu Monthly Magazine dane sanegatar ise va yonar erutur. Dickens va inafa keldaskira ekeyuyur acum yoltoe ''Boz'' batyon warzot zo sanegayad.

Radimi braf ''[[Yona eluxa ke Pickwick]]'', vanmiae berpotafa joya kan ''Oliver Twist'' bak 1838 is ''Nicholas Nickleby'' bak 1839 Dickens linveyer. Bata reizkoraca, vegeduyuna aname fereon mivizvaf istef koredik, va yon krilt ke savera va telyon lodacik (satcon va rumeik) ixam nedid. Koe ''Savsaciaxe'' bak 1840, tolon tir folvafi bali ke velikya dani va forendasa rankera va enmeayuca ke rabatamava gan sutesik nover.

Dickens va tulodaludevara va intafa seltafa is swavopafa luzdara dere kiewaskir. Vanmiae batyon suterot, ''Dombey is Nazbeik'' sanegayan bak 1848 tir akidaf delt va bat glastikeem ke dan tufa mo raba zo kolnayar. Vexe va ''David Copperfield'' inaf suterotap sanegayan bak 1849 nelkon zo gonamir. Bata mivizvafa nega nedisa va kobas is copaf London win gan velaf iteem zavzar tel lokotgrupaf is tel lobelin berpot ke Dickens.

Inafa bruca isu agraluca pu in va sanepuca vodayad. Ayevapaf purik, va intafa kotgrupapuca meviele vanpison radjaf impavantayar. Dickens dere tiyir gadesik va wenyasistu wenyuyusu bak 1851 kabdue gazik. Wori, va tozurafa waberga ke rumeuca mei ilaf zvakeem kotaf kiewatceem meviele rolumisayad. Skedapara va Ellen Ternan jotafa wenyusikya askiyir da in va kurenik is sintaf sanoy nazbeik bak 1858 buluyur.

In verton laxuyur ise va yon intaf suterot skeweson beliyir, acum batcoba va inafa saluca tuacayar. Puskenon, bak 1870 koe tawaday inkewer ta belira va ''Bula ke Edwin Drood'' titis berpot. Vexe vamosinon, ba 09/06/1870 koe Gadshill ve awalkeyer. Bata giva va kotafa tamava ve tugabenayar. Henry Longfellow amerikaf ezlik suteyer : « Va tanoya awalkera ke sutesik nazbasa va loa vanmanyasuca meviele al wí… Varafa patecta tir sugawalkafa. » Koe ezlikxo koe Wetsminster Ecey in al zo kotawar.

|style="vertical-align: top;"|
{{Suterotik
| yolt      = Charles Dickens
| ewava     = CDickens.jpg
| vunduk    = Charles Dickens
| blira     = 1812-1870
| ava       = [[:Loma:EnglavaSuteroteem|Englava]]
| suterinda = [[:Loma:Berpot|Berpot]]
| suterot   = <br>
*''[[Yona eluxa ke Pickwick|The Pickwick Papers]]'' (1836)
*''Oliver Twist'' (1838)
*''Nicholas Nickleby'' (1839)
*''The Old Curiosity Shop'' (1841)
*''Barnaby Rudge'' (1841)
*''Martin Chuzzlewit'' (1844)
*''Dombey and Son'' (1848)
*''David Copperfield'' (1850)
*''Bleak House'' (1853)
*''Hard Times'' (1854)
*''Little Dorrit'' (1857)
*''A Tale of Two Cities'' (1859)
*''Great Expectations'' (1861)
*''Our Mutual Friend'' (1865)
*''The Mystery of Edwin Drood'' (1870) 
}}
|}

[[wp-de:Charles_Dickens]]
[[wp-en:Charles_Dickens]]
[[wp-es:Charles_Dickens]]
[[wp-eo:Charles_Dickens]]
[[wp-fr:Charles_Dickens]]
[[wp-it:Charles_Dickens]]
[[wp-nl:Charles_Dickens]]
[[wp-pt:Charles_Dickens]]
[[wp-ru:Диккенс,_Чарльз]]
[[wp-sw:Charles_Dickens]]
[[wp-tr:Charles_Dickens]]

[[Loma:Berpot]]
[[Loma:XIX-eafa decemda]]
[[Loma:EnglavaSuteroteem|Dickens (Charles)]]
[[Loma:Dickens (Charles)]]
[[Loma:Suterotik (blirizvama)|Dickens (Charles)]]