Wira va klita ke Anna Karenina Pak01 Luz01

==Taneaf pak, taneaf luz==

Kota kalafa yasa yo va sint vektad. Kevoke kota volkalafa yasa tir intafa.

Kotcoba tiyir trovgayana koe Oblonski yasa. Sersikya, grupeyenon da intaf kurenik va francafa gaasikya paskaleyer, pu sersikye al dakteyer da koe milafa mona dam in mea robliyir. Bata debala ixam jijasa mali baroy viel tiyir portafa tori kurenikeem is yasikeem is monazanisikeem. Vuwik se is yastik yo peztaleyed da doirubara vaon mea dulapayar. Diveik se va sint xuyavon kakeves koe yorida sinton gluyawed loon dam noelkeon tiyir bewikeem ke Oblonski yasa. Monokilikya va mawa mea buluyur ; kurenikye mali baroy viel tiyir gracafe ; dum jovlenik nasbeik se olkobolkobon krabeyed ; va gaasikya al motcayar aze pu nik ta da va warzaf rundak battelya pu in trasir al suteyer ; eldeon ba sielestura burmotasikye al gracaweyer ; burmotasikya is diremstasikye djubuluyud.

Bak bat bareaf bartiv radimi motcara, Stepan Arkaditc Oblonski sersik, Stiva dum koe seltom zo yoltayar, ba intaf giltaf bartiv trabe ba gazdaf anhusteaf bartiv ve divmodeyer, me koe kurenikafa mawa vexe koe kobaxo moe leltkirafa saxatca. Moe ilava va intafo gijarotifo is ropenheno alto Stepan ve toltaceyer, dum ede al djuxialayar da abrotcipon tolkokenibewer. Kolicapason va takak va tcor in ve windeyer. Vexe laizon, ve tolvankedayar aze mo saxatca ve debanhayar ise ve itafenkuyur.


« Tokon tiyir ? setikeson va klok ve eruweyer. En, tokon tiyir ? Batse. Koe Darmstadt va sielestura Alabin firviyir. Me, me koe Darmstadt, konlize koe Amerika. Moe trivazega va sielestura Alabin kle firviyir ise ganenikeem dankayar va : il mio tesoro. Me, me batcoba, lokiewafa lokiewapafa koncoba. Moe bata azega tiyid ayikyakorafa tupama se... »

Iteem ke Stepan Arkaditc daavon ve jebeyer ise levkipeson ve modovayas : « En tiyir kiewafa ! Koe bat klok mafelafa jontikcoba ware tiyir, vexe va mancoba pulva se is dere rieta se me rodimziliyid. Batcoba me zo romuxar. »

Kozwison va afiolha espasa reme fenkumura ke tanoy bortc, va nugeem blion ve divdualtayar, aneyason va moavayaleltaf guvengeem fideyen gan kurenikya tori intaf ironokaf ilanuk. Va int ve vulkuyur aze, kan lerddafa gildaca, va int me madason ve matceyer liz koe intafo kenibexo intaf jeg modemaweyer. In bam ve setikeyer tokkane is tokdume koe kurenikafa mawa vols intafo kobaxo me kenibeyer. Sol gexata va levkipera in ve relvayar ise inafo jo ve soakseweyer :

- Ax, ax ! in ve breyer, setikeson va sokiyisa kotcoba. Gestason, va kota menaavdasa pinta se ke nhaleks va kurenik in tolwiyir. Vexe en tiyir rola ke Stepan ; beka mefakon in kagrupeyer.


« In me ixeter, me rotixer. Ise lodeaftafa tir da kotcoba anton tir golde jin. Tir golde jin, vexe me tí gunaf. Batlize tir piza ! »

- Ax, ax ! volpokoleson ve tolkaliyir, setikeson va loportaf lit yo isken gan bata motcara.


Taneaf gemelt al tiyir tel lodolgaf. Viele, dimpison va wenha, tison daavaf is keldaskin, gison va granafa efta tori kurenikya, koe bonta mei kobaxo vols adim kenibexo me al trasiyir. Koe nuba va razdusa rotapstana twa inya giyir…

In – bati Dolly tanion levkipesi is tegirafi, afalansafi sedme in, melizison debanheyer, do twa koe nuba ; ise ton volpokolesucakirafa is zilidukirafa aklucamuxasaca va kurenik disukeyer.


- Tokcoba tir ? Tokcoba tir ? nedison va twa in eruyur.

Setikeson va batcoba, Stepan Arkaditc, acum dam fereon sokir, gan tel askiks loon dam intafa dulzerafa kaneaca pu kurenik.

Sokiyir coba gubeon dilizesa dene tolsugdalon akoyen ayik. Pu int al me rotegayar va gexata dojeniasa va intafa warzafa debala mali da gan kurenikya gomilara al zo kosmayar. Kantawera ok meura ok tumalhara va int ok ixererura ok gonafa brunuca, kotcoba co-tiyir lokiewafa dam inaf askiks. Inafa gexata, en volkuranon –« keravasundon » Stepan Arkaditc dan icde swavopa milmuweyer ve trakuyur – laizon levkipeson ve koafiweyer. Inafa gubefa levkipera, kiewafa is trawafa…

Bata voldojeniasa kategira, pu int va tela me rotixeyer. Ba bata levkipera, Dolly al skotcotayar dum ede pokranavon al zo iwazayar. Aze golde intafa giltafa stiruca va soist dem udutaf ravlem se al wupteyer aze div mawa al otceyer. Malion va kurenik me al djutolwiyir.


« Lazava ke kotcoba, tir bata bonafa levkipera, pu int Stepan Arkaditc kaliyir. Vexe tokcoba zo co-rotaskir ? Va tokcoba rotaskí ? » volpokoleson voltcineson in tolkaliyir.

{{Anna_Karenina_Iyelt}}
|}


{{Anna Karenina_krent
| pak_otuk = Taneaf
| luz_luz = 1-eaf 
| luz_radimeluz = [[Anna Karenina_Pak01_Luz02|2-eaf luz]] 
}}

[[Loma:Anna Karenina]]
[[Loma:Berpot]]
[[Loma:XIX-eafa decemda]]
[[Loma:RossiavaSuteroteem]]
[[Loma:Tolstoy (Lev)]]
[[Loma:Sutesik-T|Anna Karenina (pak 01 luz 01) (Lev Tolstoy)]]