Wira va klita ke Anna Karenina Pak01 Luz02

==Taneaf pak, toleaf luz==

Stepan Arkaditc dolge int tiyir purik. Va int me rofingeyer meie va int buiveyer da va intafa linulara irglieyer. In me gomileson rotorigiyir, in 34-daf ayik, lujanhaf, da va kurenikya mea renayar, va tel nasbayasa va peroy nasbeik, demon toloy mulufteyes, ise letandafa dam in anton tiyir. In anton irglieyer da me lokiewon al palseyer ; vexe peztaleson va portanhe ke debala, va kurenik is nasbeikeem is int temayar. Rotir pu kurenik va bata derka in co-palseyer ede al co-abdipeztaleyer va keska puon warzeyesa gan man bif. Denon va bate bibe meviele sin al dokaliyid ; vexe in gestimiyir da malipon va inaf volsagaceem kurenik uculeyer ise da tiyir brunafa. In milon trakumuyur da Dolly, cukirafi is mea jotanhafi mei listafi mei katcalafi koe koncoba, tison opelon yasagadikyanha, di co-gotiyir driafi. Vexe va vole su kosmayar !

« Ax, en eaftapafa ! Ax ! Ax ! Stepan Arkaditc tolkaliyir, ise va tcinera me rotrasiyir. Wori, trenayar, kotcoba en kalion dilizeyer! Dumon tiyit kalaf ! Inya tiyir valeafa, kalafa do intaf nasbeikeem. Jin va in meinde funheyé, iskeyé ta da in va sin viunsunhur. Coba rotafa, keskeon, tir da icdefa yikya tiyir gaasa koe minafa mona. En, me tir kiewafa ! Tir koncoba zugiafa is entafa : nesara va intafa gaasikya !... Vexe dere toka ayikya ! (Ise in cuon tolwiyir va ebeltaf is blif iteem, va levkipera ke Rolland weltikya). Vexe remi da inya deneon tiyir, va mecoba al askí. Ise tela lorotafa, tir da inya… Tir dovoraca ! Ax, ax ! Va tokcoba rotaskí ? Va tokcoba ? »

Me tiyir ara dulzera dam tela vanburena gan blira pu tel lodesaf is lovolfakaf dotcinen bibereem : do anoelugal va int nepaler trabe vulkur. Koe modara vulkur, baon tiyir volrotisa, kali artif miel ; dimtrasira va lexa dankana gan tupakorafa ayikyama se koe klokera ke Stepan tiyir volrotisa.

« Artion, wití ! Stepan Arkaditc ve kaliweyer. Ranhason, va aftafaltukalesokiraf lukoptaf jeg in ve plekuyur, va anamba ve webokayar, ise va mantaf ast gaeldeeson, lanison dum gilton, acaf moe reltaf alteveem nekev aldo ke aldopo, va dilk in ve vanlaniyir aze va bortc ve levmadayar aze poon ve askiyir da in mamar. Davon guazaf mawazanisik Matvey ve awiyir, bures va vageeem is stazeem is sumesuteks. Kadime Matvey do intaf arn lukastgabesik piyir.

- Tid eluxaxa se mal gardaxe ? Stepan Arkaditc ve eruyur. Narison va sumesuteks, lent elzawa ve debanhayar.

- Sin tid moe azega, Matvey ve dulzeyer disukeson va intaf feliik eruson is forndason.

- Kadimion, gemon levkipeson ve loplekuyur : 

- Kontan den diremlizukedasik al pir.

- Va mecoba Stepan Arkaditc ve dulzeyer, vexe ko elzawa va Matvey ve disukeyer. Sintafa disukera va sint ve kakeveyer : va sint ve kagrupeyed. Disukera ke Stepan Arkaditc nuvelayar da kalir : « Tokdume va batcoba kalil ? Me grupel ?... »


Matvey ko ucom yo ke buxitca va nubeem ve plekuyur, ton divpaklawemes nimateem, ise amliton, levkipemeson, va intaf feliik vonamon ve disukeyer.

- Jin al benplekú pu diremlizukedasik ta da arti taneaviel in tolpitir ise da varze rin me titir volevartaf.

- Ostik me tir adrafa da ta mecoba in pir, battel ve kaliyir, denon tiyason va egayan blayak se.


Stepan Arkaditc ve grupeyer da Matvey djukrandeweyer ise zo djukatcalayar. Va sumesuteks ve fenkuyur aze ve beliyir, diepileson va ravlem se, bupilkan dum gilton ; davon inafa gexata ve koafiweyer.

- Matvey, jinafa berikya Anna Arkadievna eldeon artpitir ! ve kaliyir, oulon azavzason va afigara is vafa nuba ke lukastgabesik, dana koo kendaf lukast va raltukafe tride conhukayar.

- Tuke Lorik ! Matvey ve kaliyir, kan bat divieks nedison da dum intaf feliik va zolone ke bat warzot kagrupeyer.

- In grupeyer da Anna Arkadievna, tela lorenana berikya ke Stepan Arkaditc, co-ropomatar ta tolnepalera va kurenikeem.

- Kas anton ok do kurenikye pir ? mawazanisik ve eruyur.

-Stepan Arkaditc mea ropulviyir, kire va in lukastgabesik kobapason tatceyer. Va gelt in ve madayar. Ko elzawa Matvey ve tidtakayar.

- Anton ! ve kaliyir. Vamoefa mawa zo gonegar ?

- Pu Daria Aleksandrovna va warzot walzel. In pu rin benplekutur.

- Pu Daria Aleksandrovna ? Matvey etrakason ve tolkaliyir.

- En, ta inafa walzera lanil. Djay, va sumesuteks naril. Pu in vaon zilil, va inaf kaliks gildetel.

- « Va yovara in djumarskar », Matvey ve trakuyur. Aze opelon ve dulzeyer : - en, weltik.


Stepan Arkaditc ixam tiyir tcateyen is loiteyen ise va int egayar ta intafa vagera viele Matvey, ke dan stazeem dweyer, va mawa vion ve kolaniyir, do sumesuteks koe nuba. Lukastgabesik al divlaniyir.

- Daria Aleksandrovna pu jin al dirgar da kalí da fu divpir ise da rin di tegil dum baltanitil, Matvey ve kaliyir, itakipeson is nubakoucomason, ton krilon titalawesa taka is disukera titickasa va feliik.

- Stepan Arkaditc ve stivaweyer. Azon viafa is gabenafa levkipera ve awiyir moo inafa menpesa gexata.

- Ax, Matvey ! tidtakason ve askiyir.

- Tir mecoba, weltik, kotcoba vanvuweter.

- Va tokcoba baton kalil !

- Icdeon lanaf tí, weltik.

- Folil ?... Toktan batlize tir ? Stepan Arkaditc ve eruyur. Kadime tuvel va lupura va ayikyaf gem gildeyer.

- Tir jin ! acafa is plinafa ayikyafa puda ve dulzeyer.

- Koe tuvelfenkuks boksafa is brinkakolafa gexata ke Matriona Filemonovna tela guazafa zanisikya ve awiyir.

- Bam, tokcoba tir ? Matrioca ? van tuvel lanison Stepan Arkaditc ve eruyur.

- Beka in tiyir engunaf varze kurenik ise miv welidayar, kotafa mona, don guazafa zanisikya nik ke Daria Aleksandrovna, tori in tiyir.

- Bam, tokcoba tir ? gabenon ve tolkaliyitir.

- Lanil, weltik, lanil ta da va Daria Aleksandrovna wil ! Lorik rotir titir segayaf. In me azavzar da irubar, puidar. Ise koe mona, noelkeon kotcoba sokijiyir. Tori rumeikeem va sa dit, weltik. Irgliel, weltik. Va tokcoba rotaskí ?... Va rola govugdá...

- Vexe, in va jin me kazawatar...

- Neke va goni askil. Lorik tir segayaf. Va in blikel, weltik, blikel.

- Kiewafa, kiewafa, lanil ! Stepan Arkaditc tukeraweson laizon ve askiyir. Tetce, va jinaf vabeeem zilil, pu Matvey ve kaliyir. Aze elvazatcon, va jeg ve tiolteyer.

- Matvey, sukeson mo gestafa gopa, va klaim dum flek giyir. Denatcion, va ropeyeno alto ke feliik doon ve kavageyer.

{{Anna_Karenina_Iyelt}}
|}


{{Anna Karenina_krent
| pak_otuk = Taneaf
| luz_luz = 2-eaf 
| luz_abdueluz = [[Anna Karenina_Pak01_Luz01|1-eaf luz]] 
| luz_radimeluz = [[Anna Karenina_Pak01_Luz03|3-eaf luz]] 
}}

[[Loma:Anna Karenina]]
[[Loma:Berpot]]
[[Loma:XIX-eafa decemda]]
[[Loma:RossiavaSuteroteem]]
[[Loma:Tolstoy (Lev)]]
[[Loma:Sutesik-T|Anna Karenina (pak 01 luz 02) (Lev Tolstoy)]]