Wira va klita ke Biblia Koxelet Blokey02

==Koxelet neva, toleaf blokey==

<div class="text">
<ol>

<li> Koe takra al kalí : Tetce ! kan daava va rin posatá nume va kaluca grivutetel. Batse, ware tir greciaca. </li>
<li> Icde kipera al kalí va : Volpeztorafa ! is icde daava : Va tokcoba zanudar ? </li>
<li> Koe takra gorayá da va jinaf cot pu vor bildé, solve da jinafa takra va jin proyon co-statar, ise da va oviskuca mukotá kali da wí va tokcoba mu ayikoc leve kelt bak intafa blira tir kiewafa. </li>
<li> Va grabomap yo skuyú : tori int va mona se kolnayá ; mu int va centaal yo taplekuyú ; </li>
<li> mu int va matela yo is iltaalxo se askiyí, ise va jontika iltaalinda taplekuyú ; </li>
<li> tori int va tourka se reduyú, ta rustolera va aalxo lize aal yo laumad. </li>
<li> Va zanisikye se is zanisikya yo lusteyé, nume va sinaf nasbeik yo nasbalayas koe mona di diyí ; va jaftoleem se is namuloleem yo digiyí, loote dam bettan abdi jin koe Yerucalayim. </li>
<li> Mu int va erba is moava is kulaca yo ke gazik is winka se flavayá. Pu int va dankasik yo is jontikote ayikya se, pluktaca ke ayikoc, tiskayá. </li>
<li> Vanpiyí gijaf, logijaf dam bettan abdi jin koe Yerucalayim. Ise dace intafa proyuca do jin zavzatar. </li>
<li> Kotcoba djumeyena gan jinaf iteem, me bason zelayá ; pu takra va meka daava vewayá ; kire jinafa takra va jinafa kobara puvegupuyur, ise tir pak yofteyen pu jin. </li>
<li> Azon, va kot jinon skuyun grabom krafiayá, ise jinafa skusa puida ; voxe, kotcoba tir greciuca is sukonkara, ise mek gunt skun leve awalt tir. </li>
<li> Bam van proyuca is fituluca is oviskuca va disukera askarayá. Kire, va tokcoba ayik radimiatas va gazik askitir ? Coba ixam askiyina. </li>
<li> Ise wiyí da proyuca kapbure oviskuca zo guntar, dum afi kapbure mielak zo guntar ; </li>
<li> proyik bene taka tir itakiraf,
<br /> voxe volpeztorik koe mielak lanir.
<br /> Vexe dere kagrupeyé da kottol va mila diweda dir. </li>
<li> Ise koe takra kalliyí : Va mila diweda dam volpeztorik dití ; kle tokdume tiyí loproyaf ? Nume koe takra kaliyí da ware tir greciaca. </li>
<li> Kire nami ke proyik me tir lokotabafi dam teli ke volpeztorik, larde mali moif viel se, kotcoba zo vulkur. Ex, tokcoba ! proyik lidam volpeztorik awalked ! </li>
<li> Ise va blira al bogá, kire kotcoba askina leve awalt pu jin volpuveyer, kire kotcoba tir greciuca is sukonkara. </li>
<li> Va kobara jinon askiyina leve awalt is goniskena ta pojara ke tel radimiatas va jin al bogá. </li>
<li> Ise toktan gruper ede titir proyaf ok volpeztoraf ? Wori titir felias va jinafa kotrafa kobara isu ilt ke jinafa proyuca leve awalt. Ware tir greciaca. </li>
<li> Nume, golde jinon askiyina kotrafa kobara leve awalt, va jinafa takra pu volpokolera arldon bildeyé. </li>
<li> Kire mantan proyon is opon is kiewatcon al kobar, nume va ziliduks ke intafa kobara pu meviunsuyus ayik isker. Ware dere tir greciaca is rotacapa. </li>
<li> Keskeon, tokcoba pu ayik kan inafa kobara is abdikerelera ke takra, muka ke inafa cuera leve awalt, zilidur ? </li>
<li> Kot inaf viel anton tir kranav, ise inafa pakara anton tir niga ; dace mielon inafa takra me tildewer. Ware tir greciaca. </li>
<li> Anton tir ayikafa kaluca estuson is ulison is askison da inafa gloga va kiewati vanmiae kobara ropojar ; viele al wí da batcoba va nuba ke Lorik dere daner. </li>
<li> Toktan, keskeon, rotestur ise ropojar, vaxe jin ? </li>
<li> Kire in va proyuca is opa is daava pu ayik agralaf gu in zilir ; voxe va kobara ta kayestara is flavara pu trobasik zilir enide pu tan tis agralaf gu Lorik zilir. Ware tir greciaca is sukonkara. </li>

</ol>
</div>


{{Teza:Biblia_krent
| biblia_neva = Koxelet neva
| blokey_blokey = 2<sup>-eaf</sup> 
| blokey_abdueblokey = [[Biblia_Koxelet_Blokey01|Koxelet 1]] 
| blokey_radimeblokey = [[Biblia_Koxelet_Blokey03|Koxelet 3]] 
}}

[[Loma:Alkakrent|Koxelet Blokey02]]
[[Loma:Biblia|Koxelet Blokey02]]

[[ru:RU_Biblia_Koxelet_Blokey02]]