Wira va klita ke Bli is bali Luz49

== Taneaf pak, 49<sup>-eaf</sup> luz ==

&nbsp;&nbsp;&nbsp;Baliera va tan akolaf bondeem va egara imaxur : in zo goremburer ise zo gokabelcar ise stinaf skusik zo gotrasid ise kela zo gosuxad.

&nbsp;&nbsp;&nbsp;Sanelia ta bondstara ko baliexo is trasira va divvawayas bond va rictaga pomar, me golde bogara va jaftoloc ik jaftol vols viderawayedon.

&nbsp;&nbsp;&nbsp;Milinde, todon gu balierapa va ayik, sanelia va forteyfamafa bogara va awalkopetena ayikya iku guazik iku rumeik me satoler. Acum egara va balieratawuk va ayik tir pilkovon vrebafa. Viderawayeda, battode, mea staper, nume malnazbara va idara is bogara ko sanelia tir vrebaca.

&nbsp;&nbsp;&nbsp;Awalkopera va yudeikeem ke Ukraina is Belarusa koe man idarakiraf is bogarakiraf alpoz tagelton al zo egayar aze al zo skuyur. Moe milyona gola, remi intaf firday Stalin va tawuk kev kulakik « wetce pula » is kev sikesik is kev trotskievaf ik buxarinevaf vimek al stayar, va yatkuca ke flaveem al reduyur ise al tixayar.

&nbsp;&nbsp;&nbsp;Bagala al nedir da bak manyon tawuk lok ke sanelia va kota bazera ke roti wumodanon kalveger. Lek ke sanelia va redura va tawukalpoz staper : rotid korietodayan eskodik ik forteyfamik wives is daavajaf ik dere ayik laverkas va ilkafa fabura ik ladubies va arienta ik kraba ik lakoilkas va tunuyawes play. Lok ke sanelia, beka tuvirnayan gan klibupura, va intafa pestaka pu pokeikeem is int palser. Bat ayik va kota bonta adoned lize katanara ektuna gu awalkoperatawuk dilized, ise kore katanara tid nobafa ike bonta tid datafa, riwe metode kontan va amlitafa tanboyuca empayar. Ise ae konaktan itaskarayas gamdason va dildesa disukera ke tce akolaf vakol num va in ko intafa mona preyutayas kowupeson va kurenik is nazbeikeem dere tid loriaf, wori damo kotcoba ve tiyid man.

&nbsp;&nbsp;&nbsp;Taneaf lik ke XX<sup>-eafa</sup> decemda zavzatar sare dem opafa kosmarapa is yona artowara isu seltafa ropplekurapa is toloya tamavageja.

&nbsp;&nbsp;&nbsp;Vexe taneaf lik ke XX<sup>-eafa</sup> decemda dere va ayikafa izva kofitir ton rekola dem varafa awalkopera va yona granafa flava dem yudeafa sanelia, dem awalkopera rigavayana mo yona seltafa ik zaavafa rietoda. Noelafa tamava ton rogrupepena tixoluca stivar.

&nbsp;&nbsp;&nbsp;Tana locugunayakafa pilkaca ke ayikafa tuwava razdayana gan bata rekola tir levplekuwera. Kerematcap tadlewes kabdue klibuxo zo wiyid ise kosik va vura va man ematc miv ageltayad. Abdiwisa gadikya, grupeson da klibura bak idulaf vielcekap di zo goketer, va lavinoc is beg pu nazbeik vanbureyed. Konak celemoy volgunik, abdipestaleson va moifa sopera, va eruilt dem grita is fozdema egayad ise abdion doneyed. Konak celemoy ayik koe pemaxo miv vegeduyuno isu eninteno al blid.

&nbsp;&nbsp;&nbsp;Ise me tiyid konak kunoy ayik oku dace celemoy vols yona granafa flava meiraltodason tcokesa va awalkopera va yon volgunik. Vexe osk me anton tiyid trobindas vrutasik ; viele mancoba govotiyir, sin mu awalkopera klapayad, ton vanovasa prejara va dotrakura va yona donafa adjubera tcalayad. Bata cugunaykafa levplekuwera ke ayik va koncoba warzafa is mekena ve razdayar.

&nbsp;&nbsp;&nbsp;Ae acagira sokiyid, takreluca is giuca ke lanyanik, yona kevmadara, yona wetawera, viele ta giwara va kon megrupenik, ayik va intafi bli is teli ke pokeik arpumayad. Vexe nekevon, levplekuwerapa zavzar merotaklen askiks.

&nbsp;&nbsp;&nbsp;Va tokcoba pu min taver ? Kas warzafa is akoyesa kerdela ke ayafa tuwava tir ? Me, bata levplekuwera pu min razdar da warzaf is mayakaf tegiramergil varze ayik krulder. Tizuca is stegera sopuna gan yon torkaf seltaf bolk va swava ke ayik koe yona varafa tadava al rodefaliziyid.

&nbsp;&nbsp;&nbsp;Va fascieva kozanison, gloga ke ayik etimar da levetiruca, bat bellikaf rotok bures va volkaluca is awalk, tir tela antafa kiewega. Ayik va ayafa pestaka me kalebgar voxe etimar da gomilara raplekuna gan fascieva tir vamoef tazuk ke ayeva, ise va solparsara va olkikeem wal karik is volkarik, wal bagaliik is volbagaliik, finer. Cugafa djukumoblira va rotplekura ke gloga do wayeda tudanesayar.

&nbsp;&nbsp;&nbsp;Wayeda va pomara ke wumodasa gijarotiuca ke yon sopus kotoraf rietodaf bolk kazawar. Sin va kota wetara rozed, va favera va kot mergil yoltoe ilamaf enid moganed : stekefa gijuca ke guga, tamavafa abduxoa, kaluca ke ayikeem ik vedey ik pula. Poke bato toloyo taneafo po (viderawayeda is wumodasa gijarotiuca ke rietapa), bareafo tir : kovudara lazavana gan kimiskafa tizuca sopuna gan gijarotifa soka, kan pisonara renyana ton bowesiki.

&nbsp;&nbsp;&nbsp;Tizuca sopuna gan torkasoka tir gijafa maneke ilpir mergil voxe vanpir mukara va warlindafa is ujakorafa sontera.

&nbsp;&nbsp;&nbsp;Edeme, tokinde ropebut da gruf yudeaf trakusik roruyeyed da atara va yudeikeem ta kevskura va kaluca ke ayikeem en gosokiyir, ise da va nazbeikeem ko baliexo djuprostayad, da va wetara ke Abraxam ta kaluca ke guga djuprotolaskiyid ?

&nbsp;&nbsp;&nbsp;Edeme, tokinde ropebut da ezlopik, ovakiraf is fitckiraf nazbeik ke tawadayik, va purapafa ezla tualiasa va sare dem forteykirafa mejera ke tawadayikeem vumbeyese va gadik, va telaf is opelaf tawakobasik, suteyer ?

&nbsp;&nbsp;&nbsp;Tan mergil sopun gan fascieva mo varze ayik tir tuwiiskara. Ayik me sofolir da gu awalkopera zo siofar. Nedina kiewatrakureva ke korik vamoe naboxa sogevar. Oviskafa pokolera, konakviele parodjafa ok nyukafa, va milindafa levplekuwera malnazbayar, va kimtafa levplekuwera, konakviele parodjafa ok nyukafa. Kevmadara ke ralom ke Warszawa, kevmadara ke Treblinka, kevmadara ke Sobibor, yona tarlerama ke « brenner » lospa mal volpokolera nazbalayad.

&nbsp;&nbsp;&nbsp;Vexe, ae, gwidafa is varafa volpokolera osk va yona kevmadara is acagira nazbayar voxosk va espura mekena ke preksaf ayik va tela lokaliafa atawera dere nazbayar.

&nbsp;&nbsp;&nbsp;Ta grupera va toktan dan va kerematc kabdue forteykiraf kelor taneon di vabdulaniyir, ayik mijeyed ; iesa puda, ilamsiskewesa, oviskafa, dace daavapafa, ve zo gildeyer :

&nbsp;&nbsp;&nbsp;– Yidn, me vudec, mecoba eaftafa, aluboya wexa aze tena !

&nbsp;&nbsp;&nbsp;Kotcoba va levplekuwera ik pokolera lidam volpokolera nazbayar. Korik ke mili bali me vrebon tid miltuwavaf.

&nbsp;&nbsp;&nbsp;Icde wira is ekera ke ayik kalakoron ablas kal kera va gemelt ke ilkafa klibuwera va int gokalerut. Ise taneon, yontan va int icdeon gokalerus, tid ayik luridaf gu pebura inde in al co-golyumar, koe batyona gropa volrietana gan batyon tavesik.

&nbsp;&nbsp;&nbsp;Exoneyeson da ayik va int gu lumiskafa stegera isu tizuca levplekur, va cugafa maltrakura zolter, va tela gorukafa gu grupera va ayik is inaf enid.

&nbsp;&nbsp;&nbsp;Kas tuwava ke ayik koe vuka ke torkasoka betukewer ? Kas ayik va espura va nuyuca drasur ? Diweda ke ayik is diweda ke torkasoka koe dulzera va batyona bibera soked. Artazukawera ke tuwava ke ayik va tamefa is parmafa xultura ke sokatorka co-askoayar, videra va wayeda va nuyuca ke ayik va lanyara va torkasoka co-askoayar.

&nbsp;&nbsp;&nbsp;Aliafa kevmadara ke Warszawa isu ke Treblinka isu ke Sobibor, is gulafa lizira va acagira vangiyisa va konaka sanoya patecta tulevetirayana gan Hitler, is kevmadara sokiyisa kaiki awalkera ke Stalin koe Berlin bak 1953 isu koe Magyara bak 1956 isu koe pemaxo koe Siberia is Cugafo Taltexo, is yona kotlafa tegira ta trakuranuyuca koe jontika widava, is yastera koe jontike iaxe, kotafa batcoba al danedir da nuyucawayeda ke ayik sotir merocenyena. Al zo belkuyur voxe kotugale kruldeyer. Ayik, levetiron lanyanan, tir balion vols tuwavon levetiraf.
Espura ke ayatuwava va nuyuca sotir merocenyena, zo roselur volse tir sorovanmecobana. Torkeva va tizuca me rotebgar. Ede ebgar, di xonukar. Trenafa rontifa ok xatcana stegera isu tizuca tid rigot ke torkeva. Ayik va nuyuca me erapon ebgar. Bata zoltera tir afi ke minaf ugal, afi ke enid.

|style="vertical-align: top;"|
{{Krent_Iyelt2
| xanto_vergumvelt = '''Жизнь и судьба'''
| xanto_sutesik = [[Vasili Grosman]] [[Image:VGrosman.jpg|30px|right]]
| xanto_piskura = L'Âge d'Homme, samizdat
| xanto_ava = [http://www.kotava.be/xadola/pmwiki.php?n=Rekluexo.Rossiava Rossiava]
| xanto_evla = 1980 (Swiza)
| kalkotavara_vergumvelt = Bli is bali
| kalkotavara_kalkotavasik = Mixail Kostov
| kalkotavara_piskura =
| kalkotavara_evla = 2008
| kalkotavara_klita =
| webesik = [[Favesik:Sab|Sab]]
| krentduga = [[Image:100%.jpg]] Tuenayana (2012)
| kseva1 = #A7803B
| kseva2 = #F5C36B
}}
|}


{{Bli is bali_krent
| luz_luz = 49-eaf
| luz_abdueluz = [[Bli is bali_Luz48|48-eaf luz]] 
| luz_radimeluz = [[Bli is bali_Luz50|50-eaf luz]] 
}}

[[Loma:Berpot]]
[[Loma:XX-eafa decemda]]
[[Loma:RossiavaSuteroteem]]
[[Loma:Grosman (Vasili)|Bli is bali_Luz49]]
[[Loma:Sutesik-G|Bli is bali]]
[[Loma:Bli is bali]]