Wira va klita ke Dakteks va Lekik

==Jadifa koka==

Tolruyeson da tan mukotap ke Tanaraf Vedeyeem, sedme Efaya, tir abduaskira va tarkara va ayikrokeem is rigotaf nuyaceem mu kottan isu bristura, volkare kota soltrakura va zaava ik ikra ik ava ik alka,

Tolruyeson va intafa folira va rigotaf ayikrokeem, is va bagaliuca is voda ke ayilka, is va miltuca ke rokeem ke kotbet ayik is kotbet vedey,

Djumabduaskison va tarkara va nelkoteem dadin koe Efaya, ik Tamef Dakteks va Ayikrokeem, ik Agvava va Djira va Lospapisonara isu Rujara, ik Walvedeyafa Agvava va Deokara va kota Zaavafa Solkatcarinda, ik Walvedeyaf Diliuk icde Wideytaf Rokeem isu Gaderopaf, ik Walvedeyaf Diliuk icde Skapaf Rokeem isu Seltaf isu Arayaf, ik Dakteks va Deokara va kota Volgindesaca ik Solkatcara rigavana gu alka ok folira, ik Agvavava Rumeikrokeem, ik dere aryon ebokaf walvedeyaf gor tameon ok golon vanikatcuyun, ik ware aryon gor zolteyen wal konaka soka bewafa gu Tanaraf Vedeyeem Grustaks.

Malgrupeson va iksantukseem ke 27-eaf teliz ke Walvedeyaf Diliuk icde Wideytaf Rokeem isu Gaderopaf icde rokeem ke kotbet olkik tikis va mikraf ik alkaf ik avaf lek,

Torigison da abduaskira va rokeem ke kotbet olkik tikis va vedeyaf ik mikraf ik alkaf ik avaf lek isu bristura, va gaderopafa is seltafa bogruca ke soka lize in blir, webed,

Drigdason da gronafa abduaskira is kevskura va rokeem ke kotbet olkik tikis va vedeyaf ik mikraf ik alkaf ik avaf lek, en tison ki ke towara ke dokotaf selt is pakeson va sanerotifa xuta rigavana gu mwuca, va tupoara va nuca is dotegira wal saneeem is sokeem co-webed, 

Torigison da Tanaraf Vedeyeem Grustaks va nendara va kot lek goyordar,

Modovason va kota kobara ixam skuyuna dene bolk ke Tanaraf Vedeyeem, tulon gan Tuzda va Ayikrokeem, is gan Tuzdama va Lyumara va Solkatcas Sabegareem is Nendara va Lek, is gan yon viley reduyun rewason va yon walvedeyaf diliuk va ayikrokeem, is gan aryon ebokaf walvedeyaf gor va ayikrokeem, ta abduaskira is nendara va rokeem ke kotbet olkik tikis va vedeyaf ik mikraf ik alkaf ik avaf lek,

Nyurnason va kobarapa skuyuna gan yon walboweref grustaks isu mewalboweref ta nendara va rokeem ke kotbet olkik tikis va vedeyaf ik mikraf ik alkaf ik avaf lek,

Jilafa gu goravaldara va lokeskotafa koskura va walvedeyaf ayikrokeemaf loreem va rokeem ke kotbet olkik tikis va vedeyaf ik mikraf ik alkaf ik avaf lek,

Va bat Dakteks va rokeem ke kotbet olkik tikis va vedeyaf ik mikraf ik alkaf ik avaf lek etimar :


===I<sup>-eaf</sup> teliz===

:1.	Kota soka va kruldera is vedeyafa ik mikrafa ik arayafa ik alkafa ik avafa pilkoma ke kot lek moe intafo tawavo gonendar, ise va kota gropa ronovabduaskisa va bata pilkoma djupropender.
:2.	Kota soka va mwafa ik ara gosabegara batenide govanikatcur.


===II<sup>-eaf</sup> teliz===

:1.	Olkik tikis va vedeyaf ik mikraf ik alkaf ik avaf lek (vleveon yoltan gu « lekik »), va pojara va intafa araya is ksubera va intafa alka iku era is va kottode intafa ava favera, nuyon sorokar, a beta fornara iku solkatcara.
:2.	Lekik va kotron pakera va arayafa ik alkafa ik seltafa ik skapafa ik sanegafa blira sorokar.
:3.	Lekik emon gu vedey is konkase gola va pakeckera va gorara icde intaf lek ik intafa blirafa gola, sedme kon tazuk katis va vedeyaf mweem, sorokar.
:4.	Lekik va redura va pilkafa gesia ik pojera sorokar.
:5.	Lekik va exonera is kiewagira va nuyafa is diliokafa uzerara do kot artan ke intaf ok ar lek, is do dere memilsokaf wideyik tikis yoke vedeyafa ok mikrafa xanta ik alka ik ava kaike jowa, mesolkatcanon sorokar.


===III<sup>-eaf</sup> teliz===

:1.	Lekik va kota intafa roka, va tulon kona slemana koe bat Dakteks, ant lidam volant do ar millekik mesolkatcanon roksuber.
:2.	Lekik yoke ksubera va kona roka slemana koe bat Dakteks iku meksubera meinde gomejer.


===IV<sup>-eaf</sup> teliz===

:1.	Kota soka konkase gosabegar enide lekik va kota ayikroka is kota rigotafa nuyaca, mekon solkatcanon is gropon gu miltackuca lente mwa, dokoton is riron roksuber.
:2.	Kota soka gosabegar enide redur va kota gropa novesa da lekik va kota pilkovaca romuxar ise va araya ik ava ik prostewa ik orpa rovoner, rade aptolafa ksubera tadlesa va vedeyafa juklotera is tisa volsafa gu walvedeyafa preksa.
:3.	Kota soka fudjeson co-gosabegar enide, kimon gu rotira, lekik va gadava roraver ike gadavuson mbi rotaver.
:4.	Kota soka koe gaarind konkase co-gosabegar enide va grupera va izva is prosteweem is ava is araya ke lek blis moe tawavo bristur. Lekik va roravera va grupera va dokotaf selt co-godadir.
:5.	Kota soka va fudjesa sabegara co-goguzekar enide lekik va abduxoa va patecta isu skapafa vonera ropakecker.


===V<sup>-eaf</sup> teliz===

:1.	Nyurnackason va mwedaf dulapeem ke lekikeem, vedeyafa gaderopa isu talpey zo gobuned.
:2.	Nyurnackason va mwedaf dulapeem ke lekikeem, dotegiraf talpey isu tciceraf zo gobuned.


===VI<sup>-eaf</sup> teliz===

:Kota soka icde uumeem tikis va lekik co-gotegid, tulon walzilison va giva is bagalorig, enide va belcelafa gildura is dirnura abduaskid.


===VII<sup>-eaf</sup> teliz===

:Kota soka volant co-gotegir enide va tarkara va rokeem sleman koe bat Dakteks enabduaskir.


===VIII<sup>-eaf</sup> teliz===

:1.	Mek iksantuks ke bat Dakteks roweyonar da kota soka va intaf walvedeyaf movebareem tove lekik verkar. Pilkovon, soka va movebareem is viltereem zornan vey kota pakena bioga isu walvedeyaf dotrak fonkon goverkar.
:2.	Ksubera va kona roka slemana koe bat Dakteks va pojara va tameon kagrupen ayikrokeem isu rigotaf nuyuceem gan bettan me vetuigar.
:3.	Sabegara ke soka ta ravaldara va enpojara va rokeem sleman koe bat Dakteks abdibagalon me zo krupted da co-tid volsafa gu miltucanelkot ke Tamef Dakteks va Ayikrokeem.
:4.	Mek iksantuks ke bat Dakteks me zo ronarur da va beta tegira volsafa gu kon mukot ke Tanaraf Vedeyeem isu nelkot, don nafalafa miltuca is tawavofa dokotuca is gaderopafa volruptesuca ke soka, co-levrictar.


===IX<sup>-eaf</sup> teliz===

:Aptolaf kizey is kotar viley ke Tanaraf Vedeyeem, kot dene intafo stinaxo, va kalskura va rokeem sleman koe bat Dakteks isu nelkoteem webed.

|style="vertical-align: top;"|
{{Krent_Iyelt2
| xanto_vergumvelt = ''' ''Déclaration des droits des personnes appartenant à des minorités nationales ou ethniques, religieuses et linguistiques'', 18/12/1992'''
| xanto_sutesik = Tanaraf Vedeyeem
| xanto_piskura = Tanaraf Vedeyeem
| xanto_ava = [http://www.kotava.be/xadola/pmwiki.php?n=Rekluexo.Francava Francava], [http://www.kotava.be/xadola/pmwiki.php?n=Rekluexo.Englava Englava]
| xanto_evla = 1992
| kalkotavara_vergumvelt = ''Dakteks va rokeem ke kotbet olkik tikis va  vedeyaf ik mikraf ik alkaf ik avaf lek'', dakteks ke Tanaraf Vedeyeem
| kalkotavara_kalkotavasik = Daniel Frot
| kalkotavara_piskura = -
| kalkotavara_evla = 2013
| kalkotavara_klita = [http://www.kotava.org/fr/fr_remsuteks_1992Lekik_dakteks.pdf Kalkotavaks]
| webesik = [[Favesik:Troubadour|Troubadour]]
| krentduga = [[Image:Compare.jpg]] Tuenayana
| kseva1 = #FFFF80
| kseva2 = #FFFFC0
}}
|}

[[Loma:Rokopa]]
[[Loma:Tamef dakteks yo]]
[[Loma:Ayevaf krent yo]]
[[Loma:Ugalpulasiki|Lekik]]