Wira va klita ke Foredonesikya

== Foredonesikya ==

Mali gemelt, koe diremuk dem ralpeem soe kamadayan, mazdafa nefta canetalar. Rustayafa, melorason talar ise dimtalar, ciondanon. Janine ilwir, aze wir da ina va mezekasa nuba ke yerumanik bentalar. Fentar. Ba kot volont ke bixesuka awilesa kev ralpa nefta suster. Koe afimi ke fentugalriel, ton lorap ke zielt is elbom, direm kuncason tanamur ise tislar ise abdulapir. Janine va yerumanik disuker. Dem yon ksent ke tulukoptawes usuk omon taplekunaf bene jomo, is ton pezap is mebelaf art, Marcel nutir drus faunus tisik. Ba kota tsaxaxa ke vawa, ine pestaler da in kevon vagrabler. Azon isker da rusagaf kulor mo divpaklayan nimateem kaluber, modisukeson, in gire foyokaf is gracaf. Inaf imiskaf nubapeem, loon tutrelan gan lukoptafa rodaga kaike klaimewazalteem moe nubaskeem, ant nuzekar. Va zolpama kum stama, wale badeeem, popon licar eke va klabusa talara ke nefta me nupestaler.

Laizon, eviesa suka solwion zo gilder aze kawafa bra aname diremuk loeke tuvawer. Ben ralpeem, bixe jonnubacekon dure baliewer dumede merowina nuba kevmimad. Nefta va fentolaf wilt kalizir, moe inieem va int wayar aze tictalar. Diremuk tuviawer ise nutir fure vukis. Azon suka nutuvumeltawer, bra tuaftawemer ise direm gire tulokaliawer. Fe dem afi koe kogoparsan patectoy fenkuwed. Toloya ok baroya rabetafa is tubatakaweyesa pia, nutisa gaboteyena mal yanta, ko ralpa gepoyted aze davon griawid.

— Mana vema ! ~ Marcel kalir.

Diremuk tir kotraf gu arabik nujikenibes iste tilom. Konak mo starkot al nimatsoad nume remi liziwera ke direm loon dam kotar stibuskad. Sinafa amlitara is vurkuca va Janine turkon nugedad ; ine liter da mali konak viel do batyon apulvaf fuzodesik koyar. Wori, diremuk va artsarva ke impadimak gazdon al mallapir, aze, mali toloy bartiv moo gabentafa raporafa azekexa abdulakir. Icle vabdion, bata ina va rontif conyeem kale keramafa zida divatceyer. Vexe al toz sukar nume, abicabicon, va divatcepe al fixar. Batvielu, koyasik va betcoba mea wid ; bat az ban al stivawed ise iste batakafa mielinda amlitason al totad, dile bosolason va kutceem zunen gan bixe koespawese ko direm isu iteem.

« Janine !» Ine ba rozara ke kurenik vagrabler. Gire trakur eke bata yoltega tir kipeafa, yoke inafe ontine isu gije. Marcel djugruper lize inaf spertak tigir. Ine kan nuga va vlarde valeve starkot vestar nume va plek uzar ise gorar da in tir spertak. Mebelkumuson me rodefomagir, tire. Soe remi reilugal, tiyir taneafe gu altoura, dem meropuskena gaelera. Kas batcoba lekeon tiyir ? Weti tolsanalubda. Tolsanalubda tir mecoba larde, sedme ine, batcoba tiyir arinton viele ine wal nuyafa blira is yerumara klabuyur, ware arinton va evla poleson trakuyur viele, rotir, ant tuguazaweter. Me tiyir antafe, ise bat voldjubulus rokopavayasik keveon re tigir. Ine va in turkon al naleyer, beka in tiyir omamaf ise ine va inafa pegafa is tcilafa kipera is wexayerses ebeltaf iteem albansayar. Voxe va inafa takreluca ta blira albayar, i va pakana do francikeem ke bata patecta. Va inafa muteskafa tiva viele kona bifa va kera ke Marcel iku korik levcoeyed, dere albayar. Loeke, albayar da zo renayar, ise in va ine gu tiaskaca al levplawayar. Jontikviele askison da ine pestaleyer da mu in kruldeyer, in askiyir da ine en kruldeyer. Me, ine me tiyir antafe…

Diremuk, mamwalzepeson, va remlapira va yon merowin vakor anjer. Koe diremuk, wori, metan zekar. Laizon, Janine ve pestaler da zo disuker nume van dakis starkot kaike berla rwoder. Bantan me tir arabik nume zo gevar da mali mallakira me al katcalar. In va tantazukot ke francafa rumala ke Saxara diskir, is va magda kum vroltafa stama moe socelayan abrotcaf is uulaf lesay ke nopalol. Kan aftaf iteem va ine rinder, poliackon, modisukeson. Ine vere tukerawer nume van yerumanik ware lenton disukes koe bra is suka rwoder. Va int koliozapar. Vexe va francaf sayakik wan wir, i va ontinaf is tiguaf, tiguapaf, dem licekasa dirja, eke in nutir kum rodaf is nuligaf ug, i kum aotceks va bixe is niska. Milviele ine va mazdaf nubeem is anteyanafa gexata ke yon arabik kabdueon tigis wir, ise katcalar da sin, nekev tsokaf vageeem, moe starkot manton nutigid solve yerumanik is ine nemon giwed. Ine va bopieem ke lioza vanlicar. Wori, tir pwertansafe vox ontinafe is cotkirafe, tire cotfamafe is ware rojugemene ( gu ayikyefa disukera sopestalecker ), dem rumeamafa gexata is fedaf is aftaf iteem kevaxas va bato zakodafo is tildeso alto inton grupene.

Me, mecoba dilizer inde ine al foliyir. Viele Marcel al kuraniyir da ine remi bata flikoyara dositar, kevotceyer. In va bata koyara jontikedje trakuyur, mali tena ke geja tagelton, vielu arienta dimon al tupreksawed. Abdi geja, laykazarama dimnariyina gu gadikeem, vielu va rokopavayara al ebgayar, askiyir da sin roton lodam kiewon blidayad. Keve krimt, jotugal rotir kalaf. Vexe va altofa sugara albansayar nume, fure, mo piluda va ine mea vanstar. Diremam va sin anton ta gozara ke taneaviel gidivwidavar. Bak arak ke ugal, in va dolexe va yoni jonksevafi layi, izgon ice kojokeem ke bata likon patectotafa is europafa revava, sokabdualbar. Vamoe dolta, sin koe baroyi monaki yunkeyeni gu arabaf storn is Barbès guto blid. Va mek nazbeik al dikid. Tanda al tiskid, koe kiewagina riwizga kan likon buden telvungeem. Idulugalon, piluda is kona gozara is dace kelt sotid sumef. Inaf arienteem va Marcel anton nudulapad. Ine va inafa skeura tisa erba al fokosmar, voxe va batcoba me albar, grupenseson dume. Areldon, vaon sokimpavantar. In me tir totcidaf vox disaf volson, moekote dolge ine. « Ede volkaluca va jin co-vanolatar, ~ in kalir, ~ bravon co-tigitil. » Ise, tire va int gu olegara gobravat. Vexe gu arak, gu coba metisa tela lodopelafa olegara, liz robravat ? Va batcoba, ine dile gojon pestaler. Keson, va Marcel ta gedira va patak gipomar ise dene dolta dile ikakobar. Tela olgafa rekola tir idulugal edje idul va zijnafa pestaba ke arga dace gilatar.

Laizon, isti idulugal ae, geja, Marcel tixan az wagnun, derokaf lay, arienteem azavzan, nudeem letaf is idulaf. Ede koncoba co-sokir, re, ine mea bravon co-tigir. Batdume, mali dimnira ke layi den dolebela, Marcel al guzekar da va yona wida ke ontinazekexa is Geeka exuler enide va kon walik fiander ise pu arabaf dolekik rontion doler. Va ine al djudostar. Ine grupeyer da golebeemtid medrikaf, gigandijir, co-abdualbayar da ker. Vexe in tir mingasaf nume ine al naler kire ta vewara va slika fa co-gonixalayar. Sin re tigid ise, arse, mecoba va inaf gestiks vektar. Ine va idul ik neftaglemi ik saljakirafa gida kotrafa gu borizkorafa dakela kivayar. Va fent is gabesa suka is batyona naelkorafa azekexa kotrafa gu rakopa al me trakuyur. Va pia is bixenye al klokayar. Dure wir da letaxo me tir mano vox anton rapor, rapor kotlize, koe kelt lize antafa raporgopa awilesa is fentafa dere gazar milinde moe sid wale raporki rodaf webek anton atrir.

Diremuk laizon vukir. Stasik va konaka ewa jadion kalir, i va ewa ke bata ava kotvielu anamgildena vox somegildana. « Tokcoba tir ?» Marcel kalir. Stasik, francavon, batviele, kalir da bixe va carburateur de ape al riyur, ise Marcel va bata patecta gire rotapsar. Stasik kalkiper aze ravaldar da batcoba loxe tir, da va de fu griaretlar nume azon diremuk gire mallapitir. Va tuvelta fenkur, fentafa suka ko direm sunter, vere ayelason va kota gexata gu kunoy bixeolk. Kot arabik va pez kotilomar ise apcanyar. « Va tuvel budel !!» Marcel eviegar. Dimlanison van tuvelta, stasik kiper. Frendon, va konaka xeka valevu cuk narir, aze, pinapaf koe bra van lentak gire griawir, mebudeson va tuvel. Marcel repaler. « Lanel da in va melt mevieli al wir. » « Iskel !!» Janine kalir. Laizon vagrabler. Moe piexo, poke diremuk, konak dualtkirik mezekason tigid. Leve djimot ke tilom ise kake migexa dem italk, ant iteem zo wid. Apulvaf, lanis mal megrupeno xo, sin va koyasikeem disuked. « Namulolsusik », Marcel kalir.

Koe direm, amlit tir kotaf. Kot koyasik, takomas, va puda ke suka nuterektar, nuyon nyun mo batyona teniskafa azekexa. Janine gan vugak ke tuksa, laizon, zo pedrar. Koe artsarva ke kelot, stasik va sinafa biloxa is konak welor mo kepaita al ticapter. Koe diremuk, koe yona tuksadona, argistafa peya is azekafa kita anton zo wid. Kotbat korik ke Geeka ton vlardaf nubeem nukoyad.

Vexe stasik dimlanir, ware kireptaf. Inaf iteem ant kiper, vamoe italk xatcas va dere inafa gexata. In dakter da sin fu mallapid. Va tuvelta buder, suka stivawer ise bixemuva mo ralpa loeke zo gilder. Melt bobar aze divgaelaweyer. Yanepen gan runmeltasiki, adim anamenir aze keyupuson stasik eviesir. Ton krumkarapa, diremuk gire mallapir. Vanmiau flormakirafa flava dem namulolsusik ware mezekas, nuba madawer aze koe bra kadimeon krezer. Riwe fure, moe loon turotaweyesa vawa direm toz grabler. Botcen, arabik dun stibuskad. Janine va wasa modara soe pestaler viele blafotaf boram dem casekefage kabduon gepoyter. Nopalolkoraf sayakik pu ine kicegar. Ine klabur aze narar aze grewar. Nopalol va bor koucomar ise va intafa kicera ve fixar. Dure va vawa modisuker, rontion kabduon ; Janine van Marcel rwoder voxe va delaf kapray anton wir. In rem ralpa va lodekemafa bra ticnisa va nuligafo piexo disuker.

Sin mali konak bartiv lapid nume cu va kota blira koe direm al tenanteyar viele ie diveon tauled. Tilomkiraf rumeik, banges dum onda, grables, nubadendas, anam diremuk toz vulted. In koo vawilapa dem keneon omafa mona dure lapir ; va dwag kolapir. Wan sukar, vexe rebava va bixeolk mea tutapedas va afi azavzad. Wori, kelt wan tir akraf. Vanmiae iera, remi evierapa ke daney, diremuk kabdu zirkaf kojokeem ke gida dem zionaf ralpeem vukir. Janine titlanir voxe koe vawila pester yolkase. Vamoe moneem va blafotaf is froxaf tuksuest kozwir. Taneafa pia ke dwag lenteon ixam gabotewed nume vanon co-djulanir. Vexe beka riwe tir miafiz, fent tir puiles ; suka sustesir. Ine van Marcel rwoder, voxe va tel sayakik kevlanis taneon wir. Va inafa kicegara ok grewara ker. In medisukeson kaiklanir aze griawir. Marcel, in, viunsur enide biloxa dem tayi di zo titplekur, i ebeltaf yultap wanes moe kepaita ke diremuk. Batcoba me fu tir drikafa. Stasik va tukseem ant viunsur aze ixam vukir, madagis moe kepaita, enide pu ivamu dem tilom kabelcan aname diremuk dewitcar. Janine, vanmiae gexata nuvilbodeyena kum niska is lelt, deblamene gan yone laridafe ie va cuera vere pestaler. « Ticlaní », pu Marcel braldeson powas va stasik kalir.

Va gida kolanir. Tilik, mazdaf is mustaf francik, vanon lanir. Mo taneaf vegem star, mo lupaxa felisa va vawila, ko mawa lize azililava is rova batakon lingeyena is marwidiskaf gemak is kadime edgardafa nwada bletig besanaf gu gemafa bixegopa anton nutigid. Moida tilik va tuvel al buder, Janine va fent mal lebaf rebaveem batakayan gu kalka almar. Me gruper liz va eyelt rotaykar, liz va int rotaykar. Gosenyar oke goranyer, ise kottode gosuster. Ranyer, do eyelt bene nuba, modisukeson va vwepafa dilkinda vane kelt, poke pij. Ker, vexe me gruper va tela coba. Va intafa antiuca is kolus fent is lorusagafo aldo bene takra anton pestaler. Ae kloker, riwe xadafe gu lor titustis va vawila do vinustara ke puda ke Marcel, volson loon jilafe gu batu bostkorafu nisu remu dilkam, i gu daskinu gan suka vanmiau dure nuve pokepafa pia. Azon loeke sukar, lorany ke lava vanpir azdara ke runta. Ine va bira dem pia rontafa is tastafa dzavesa koe zivotc kadime rebaveem gestar. Mecoba va inaf rietaks vektar, vexe bata merowina runta va inaf cues iteem tufedad. Ine ranyer, gamiafe, ton rumkawes meem, galzakoramafe, ise fent ken inaf rusagaf nimateem ticstir. Ine va rontafa is tastafa pia klokar, is va int tiyis yik.

Vani tcatera, sin va estuxo titlanid. Welmon ice lebafa rebava wegidol wizun koe raltadukafa is kadulafa boteda isu pia al zo lingeyed. Kojokdilk isked da ridolafi afi konir. Marcel va dolekikeem gu tilik ke gida abrer. Azon guazaf arabik diskis va sayakafa wizbuxa bene dirja va sin zanivar. Marcel abdikerelewer nume va beg sollipar. Tatcer da yerumanik va lava ulir. « Ina me al zo lembier. Va vor naral !!» Ine va mancoba me albar, vor va ine soturusagar. Ison, bulolxa moe rude tigir. « Coran neva sokalpour. Vexe Coran neva me grupeyer da burmeckeyena bulolxa va akola somedaskir. Min, gruburmotat. Va tokcoba trakul ?» Janine va mecoba trakur, ok rotir va bata cenyera ke burmotasik kev katcilik. Vexe gonampur. Sin diregazdon gire gomallapid, ware loon geon : va kot zolonaf dolekik remi kiel gowid. Marcel keyur enide guazaf arabik va fadxa vanburer. Bantan takumason vanovar, mekiceson, aze boramon divlanir. « Vumelton rielon, mekaliarson sielon », Marcel kipeson kalir. Turkon fadxa soe zo vanburer. Sin wilupon fixad aze ko gopaf is fentaf kusk divlanid. Marcel va jotaf arabik rozar vox nelkoton keyakseson va viroyara, enide in va burera va biloxa di pomar. Inaf vil, gire tolkalin pu Janine, koe bat tapedaf nelkot ae giwer mandume sin va jontole sokerud enide va amu mbi djuprozilid. Janine, me trabiangafe, va toloy buresik kadimelanir. Va baynafe vage lev pwertafa lioza al plekur, va lea runda co-kereler. Bulolxa, nekon burmeckeyena, is abic uliyin vor va ine dere tokted.

Sin va gerdam dem gopaf aal kenolanid. Arabik va sin gamdad ise va int fistuned, numewison, vanlicason va bopieem ke tilom. Ine krupter da, nek nomtakiraf, tid olukaf loon dam arabik ke inafa widava. Janine va biloxa fenkusa va kelda rem tari kadimelanir. Sin va tuvel ke migexa kum varkukafa tawa kaiklanid, aze va vigama taplekunafa gu milaf kawaf aal is kimanafa gu yon kojok is yona dolta kene tele mantepe artlanid. Vexe moe viga, kabdu gasizakorafa kolnama lingeyena gu faltafa kalka vukid. Koeon, koe teli tanafi monaki anton koafini gan kolaniratuvel, kadime azeb kum afigasa inta, guazaf arabik dem batakafa nyoxa tigir. In va yelada zanivar, madason is omason va yeladak vamo baroya jonksevafa galemama. Levida va koncoba koe riwizga ke dolta rosolwid, fedafa dakela ke yelada dem eskaxa va Marcel is Janine moe pikay emuder. Moi kolanixo is inyona tervasa bakiola dem vopelaf yeladak is bilaga is azekot vanmiae konaki tacesiki dem piuteliwa, Marcel keve bexa tigir. Janine iste kolanixo zavzagir. Mangimir enide va afi me remazavzar. Vere, kadime guazaf dolekik koe riwizga, va toloy disukes is kices arabik debanyes moe yon adeenaf eyelt udarsas va ludev ke dolta kozwir. Yon keraf is ebeltaf tcalist is jontika fidenafa djova keve rebaveem rumkawed, sid tir tervanaf gu eyelt is yultam kotraf gu droyaf fay. Moe bexa, aname sespasiki dem yozdas leltaf azekot is guazaf metrolk dem relvaweyes gretcaks, botakipi al zo emaved ; tani, bascualayani gu nuzexa kum faltafa eluxapa, ticeon al zo vangaber. Dakela ke bayna is awolba ezasa koe bonta moi kofigaxa ke yelada awir viele guazaf dolekik va yeladak mo bexa al aykar ise al kiavar.

Marcel ampuson pulvir, kan bata omafa puda unena pulvison va arienta. Azon va biloxa fenkur, va layi is djova nedir, aze va sespasiki is metrolk platir enide va intaf doleks kabdu guazaf dolekik rostoker. Nyatewer, pudamadar, kipedar, nujitir ayikya djupuvesa vox melanesa va int. Dure, nubafenkupuson, va dolera is lustera zatcezar. Guazik takabotcer, va azekot pu toloy arabik kadimeon dear aze va konaka ewa nudivtakrelasa va Marcel anton kalir. In va layi dimnarir, ko biloxa krepkar, aze va metirodafe furove moe jo bosolar. Va buresikam rozar aze van kojokeem sin dimlanid. Koe taneafa dolta, beka dolekik va milafa vamoekafa tiva taneon vanklar, tid lofikuntaf. « Sin folkid Lorik, ~ Marcel kalir, ~ vexe dere doled ! Blira tir olgafa gu kottan. »

Janine medulzeson kadimelanir. Riwe mea sukar. Kelt konaklize nisawer. Fentafi is jebesi afi va faltaf lird suxawes vanmiae vaf rujod ticunir. Sin va viga dure bulud. Koo yona vawilama lanid, va tawarebava kenelanid lize zaxayana raltada ke santoleaksat ik dile kone rodafe is leskokirafe kuvime vamoeon rumkawed. Kofigaxa ke gopa is fadxa, vikiz ke almuktey, dakela ke rapor ik namulol koe bata revava ezad. Dolta, suxayana ko rebavaki, tid sinton ilefa ; Janine pestaler da nimateem turusagawer. Vexe yerumanik tuwiyawemer, toz doler nume loon tunepalesawer ; va Janine gu « jotik » giyoltar ; koyara me titir mefavlafa. « Tire, ~ Janine kalir, ~ rontifa gildura do sin tir lokiewafa. »

Sin koo ara vawila dimlanid, van istak. Kielcek tir apuon, kelt re akrapaf. Moe viga vukid. Marcel nubapragar, va biloxa kabdueon krennugon nyaser. « Disukel !!» Janine kalir. Ontinaf arabik, mazdaf, diskis va keltukaf tilom, vukudakiraf gu blafotaf plaxaf stazeem, ton tobakiraf nubeem, is nedis va oralkorafa is nadafa ontinafa gexata, artu bani vigaki pir. Chèche delor ant nover da in gu batyon francaf fayik ke Patectolafa Ristula, i gu dile mafelan gan Janine, zo solwir. Van sin belon abdulanir, voxe kaik sinafa lospa nudisuker, vion bastobason va nuba. « Kle, ~ Marcel epitumason kalir, ~ battan fogetir jadiwik. » En, kot sin batlize sotid intotcackaf, voxe battan ebdeer, arse. Azon solparsasa soluma kalion kastawer nume arabik va sin artlanir. Marcel va nubay ke biloxa vere vannarir aze radimon impar. Battan remlanir, nukatcalason va mecoba, aze va migexa milboron vanlanir. Janine me dulzer. Va akoydafa krumtuca ke bat arabik akladar ise vere pester volkalafa. Djumallanir, va intafa krabama trakur. Guzekara va dimlanira ko gida, ko bata fentapafa mawa va ine divtakrelar. Ine laizon modovar da tilik al pirdar da ine va tawetc ke folk co-roticlanir lizu letaxo zo wir. Ine pu Marcel kalir da va biloxa koe gida rotisked. Vexe in cuer, abdi sielestura djukenibemer. « Vay ?!» Janine kalir. In vere obras va ine disuker. « Efe, abegya, » kalir. Ine kabdue gida koe vawila va in ker. Batakon vagekirafi tari loloon laumar. Meka ayikya vanmiaeon ise Janine sedme int va manote ayikye ape mevieli al wir. Wori, meke va ine disuker. Konake, numewison, van ine va bata mazdafa is socelayana vola vion atoed, i va askisa da kot sin va vola ke francaf sayakik koe diremuk ik tela ke arabik dem tobeem vektad, i va vepokafa is oklafa gexata. Sin van volvoik va bata gexata askarad, va ine me wid aze, bagaf is amlitas, anamelanid. Inaf mewayeem adeer. Ise akoluk, olegara va mallanira ticfir. « Tokdume al pí ?» Vexe, ixam, Marcel dimon titlanir.

Ba ticlanira va fogelom ke folk, alube bartiv kielon tir. En al ten sukar. Kelt, koton volakraf, dure tir adezugifaltaf. Fent, re lorodaf, va tcor puiler. Isti fogelom, guazaf arabik, senyes keve rebava, erur kase sin zo djunyaped, vexe mezekason dumede va sinafa vewara abdilané. Fogelom tir abrotcaf is guraf, nekev konak tawedaf frilt. Darpeda ticlanid, darka tumantawer, koe loloon datafi is fentafi is rodafi afi lize kot lor ke dwag ton solwifa karuca artstir. Koafin gael anameon nuyarter, ton loloon abrotcifa yartera darpeda abdulanid, dumede sinafa kenelanira askir da mamaf tumantawes rukom ben afivewuk nazbalar. Ise viele mo tawetc artlanid, sinafa disukera kaik piaxo ko zidapa vere eglur. Janine liter da kotaf kelt tauler, kan tanoy vinustas is liaf mamolk dem kro abicabicon tukotraso va vamoef rid az levgon stivaweso, iskeson da ine lente kimiskuca amlitar.

Talturonon, ae, kakeveson va mek vakor, keno kotunafa livaca, inafa disukera vion stir. Valeveon, faltaf is batakaf tawetc ke arabafi widavaki traozewed, koforteyan gu yona orikakerafa kretsa ke rizo turodaweso lev awalt. Metan me zo rowir, vexe va cug koef kusk, do dakelakiraf vikiz ke pustawes fad, kipesa puda ik merogildana nugadara titustid. Kaikemon, piaxo, solzarteyeno gu memiltaf lujor kan kuritcafa rebava, ticeon lorar golde sukara mea almana moe tawetc. Ware kaikeon, is kale zida, lentak ke varkukafo is lukoptafo gazaxo dem rapor tigir lize meka blira awir. Arte solumama ke dwag, poke rionda talteon kene piaxo, ebeltafa brocapa zo kozwid. Anameon, milkava dem mezekas wegidol pinapaf male mana soluma, va yona orikafa sugda ke divulafa sutera govolbeksana gu sugdala moe sid tazukar. Vamoe letaxo, amlit tir dataf dum dark.

Janine, koton altogise va krast, zavzar pudiskaf, va int merosolimpase gu kabdueon fenkuwes mekak. Keveon, Marcel tegulawer. Fenter. Djutitlanir. Tokcoba kle batlize zo rovowir ? Vexe va kaldisukera gu zida me rogriiksantur. Ware loon geon, banlize kelt is siday ko karafa conya va sint kazokeved, ine trakur da banlize koncoba batvieli afanayana vox sogracena va ine ape ker. Remi abdufis rielcek, afi zijnon dimatcer ; ine male vewukuca tuplawawer. Miledje, koe takra ke ayikya batliz vanstana gan ant xuyava, weboka licayana gan tandeem is gubeuca is arga, vion ilgluyad. Ine va alizmonikafo pemaxo disuker. Va kon lospik batlize blis dace al me wir, ise mecoba wale ebeltafa brotca zekar, voxe, wori, va sin anton rotrakur, i va riwe grupen luxe kruldera. Moniskaf, ile tamava, sin tid abic krabes moo tawavopo disukenon kosmano, i moo anton tiso forgafi ki ke ware lodatafa darka dem fansilafa fira arte loon vageeon konak decitoy decitmetrolk anton tenuwer, lize taneaf bost va aala adim tunazbukar. Kotvielu, moe rodafa tawa, abovena kal niska, ke bata kimiskafa patecta, konak ayik dun keldonad, digison va mecoba vox zanison va metan, copaf is nuyaf jiomik ke divulafo gazaxo. Janine me gruper dume bata rieta va zijnapafa is datapafa gabentuca tukotrar nume itabuder. Anton gruper da bato gazaxo pu ine, kotvielu, al zo abdizilir, voxe mevielu titir inafo, meviele vaxeon ba bata otcesa vula, rotir, viele ine van levgon mezekas kelt is inaf oreem ke titickenafi afi dimon itafenkur, edje puda titustisa va arabafi widavaki levgon stilawed. Liter da salt ke tamava su vukir nume batvieli bettan mea tuguazaweter nume mea awalketer. Kotlize, re, bli tir vukinafi, vaxeon koe inafa takra lize yoke puidera is skebura kontel milviele borer.

Vexe afi koliziwer, cuf is iduliskaf awalt talton turaltadukawemeson illaumar, edje lukoptafa runta vion djuproberumkasa mo divatcepe, ronuon tazukawer. Taneaf vakol evier, ise bate ie va loon tufentaweyes gael ticstir. Janine bam sonker da talgermitar. « Slikeke, ~ Marcel kalir, ~ til akoydaf. Dimlanit !!» Vexe va inafa nuba fofkon narir. Dure algafe, ine kevu krast mangir aze va in radimelanir. Guazaf arabik koe fogelom, titickenaf, va sin titlanis va widava disuker. Wison va metan, ine lanir, badiese leve datafa is levgafa cuera, impadimasa va intafo alto dem aldo re nutiso tabiso. Ilamsiskewera va ine al bulur. Re, ine pester ontinarsafe ik viarsafa ik dere batakarsafe dolge bata tamava liz su kofir. Rumeik ok yikya ok rodaf ayik ok anyerkaf nopalol tid antaf tisik amlitason rosistas va bata siday. Va tokcoba re co-askir, edeme kal komodera va int co-impadimar, i kal awalkera ?

Tire kal voltaxe va int impadimar, kabdu yerumanik levgon mustaf ik kalis va intafa cuera, edje, int, va ermiala dem lolofa voza lyumamar. Azon van ilava va int impadimar, liz Marcel kazokever, aze mekon eruson fure artafir. Mawa tir fentapafa. Janine va kostis fent lidam laumasa vozera pestaler. Gaelejer, inaf fortey metuidulason aliewer ; crakerinda koeon tugijawer. Ine rwoder, golde inafo aldo guazafa azilafa ilava twawer. Me, ine me djumakoler. Yerumanik ixam keniber, ine dere godekeniber, fiste. Odjafa lorara ke widava rem dolkam kal ine artstid. Guazafo lexasiko ke arabafa zazda va yona klubon kagrupena evluba pezkalid. Bata evluba artstid, burena gan viafi tari. Ine godekeniber. Vexe va ebeltafa broca patar ; kake guteem mezekas wegidol basped ; datafa antaca koe ine banged. Efe, tokdume ine al pir ? Moe rieta komoder.

Vanion divmoder. Amlit anameon tiyir varaf. Vexe, cane widava, ceges vakol koe apulvafa widava evied. Janine suster. Van int ware rwoder, keve epita va tela olgafa ke yerumanik pestaler, aze, vere, kenibeson kevon ayater. Moe moda meestobason dantaler, kan mejilafa peguca va bata epita dum musapaf molt geltgir. Pulvir, vexe inaf art va mek mam divplekur. Pulvir, voxe va int nemon gilder. Va idul ke Marcel anton pestaler. Mali loon tolsanda, kotmielon, batinde, koe inaf idul, kottel kotviele, dace akolaf, dace koyas, dum dure… Ison, va tokcoba co-askir, antafe koe mona ? Mek nazbeik ! Kas batcoba somegracer ? Ine me gruper. Va Marcel soradimefir, ae, valeafe gu pestalera va kontel olegas. Sotir adrafe gu in, batcoba tir inafa antafa zilina coba. In va ine ape me renar. Rena, dace bogafa, va mana ilkipesa gexata someatoer. Vexe toka tir inafa gexata ? Sin koe mielon va sint sorenad, mewison, geltason. Kas rena arafa gu tela ke mielak krulder, kona rena afizapon co-iesa ? Ine me gruper, volse sogruper da Marcel va ine olegar ise va bata olegara sokolegar ise afizon is mielon vaon soblidar, moekote mielon, kotmielon viele in me djutigir antaf meie djutuguazawer meie djumawalker, ton bata avinkuca dile inon pilkomodana moe aryona ayafa gexata, antafa tiva dofa gu kot oviskik va int gipreyutas lev ovinda kalida yokara va in vangir aze van kono ayikyafo alto gripokoleson kevmimar enide, va kovudaks nedin gan antiuca is miel, megalpeson kosuxedar.

Marcel kaliziwemer dumede djumilteriger. Me, in va ine somerenar, va kotcoba me tisa ine craker, ae, acum sin va sint wetipon co-gosolyerumayad enide kali tena ant kenibed. Vexe toktan kotedje ant rokeniber ? Konaktanye askid, ezuayan gu artan, nume kotsielon koe ilava do awalk bam kenibed. Marcel, in, someaskitir, in en, axaf is ervoiskaf rumeik ciwan gan kranavera, efe inaf rumeik olegas va ine ; milviele va brerinda daskir. Ine va int loon kevon licar, va nuba mo inaf ast aykar. Ise, koe int, va in gu renayolt rozar, i gu lekeon zilin is wal sint dile ware unen vox re mea jilaf gu sugdala.

Va in kalrozar. Tire ine dere, va in olegar, va inafo po, va inyone nizdeme, dere va awalkera craker. « Ede va bata kivara co-kaikfí, pune co-tí kalaf… » Kreme, yoltiskafa polera tolgenir. Ine va Marcel mangir. Volgue, va mecoba kaikfir, me tir kalaf, ae metunuyayanon fu awalker. Takra rotur, ine leve aldopo belkur, kosmason da mali tolsanda va ino impadimar, leveon re kuzursur. Zo djutunuyar, kore Marcel, kore kot artan zo sometunuyad ! Divmodayane, ine koe ilava madagir ise van nupokustisa rozara oblakasotcer. Vexe male artmiel ciondayana is merotucuana puda ke vakol ke dwag kal ine ant artstid. Toz sukamar, dum bagafa lava traspusa koe piaxo. Geuon sukar, mal letaxo is miel lize sin leve gire titickaf kelt va sint dure aotced, liz bli sovukir, lize metan tuguazawer ike awalker. Aze laveem ke suka griawir nume ine dace mea laner da va koncoba al gilder, vaxe rotir apulvafa rozara, inton rostilana oku ropestalena voxu mevielu rogrupena gu sugdala vaxede vaon vere dulzar. Vere, en, batcoba icle tir lanafa !

Ine zijnon ranyar aze poke ilava mezekason zavzagir, obrase va gandira ke yerumanik. Marcel keniber. Moion, idul ke ilava va ine jovler, fent konarir. Ine va int vion blucter, uzeustason aneyason va vageeem koe afimi malstisi va gum ke vawila rem lentoraf dilk. Dem perfejuleem bene nuba, va tuvel vanlanir. Ware kemer, koe tapeduca, aze xelkason fenkur. Arelta dwedar, ine vukir. Takra gandirsir. Ine oblakasotcer aze, karavaldune gan amlit, va nuba wan tacemer. Bangera ke arelta nutir teniskafa. Ine adim fenkur, divon anjer, aze va tuvel milinde obrason dimbuder. Aze, kevplekuson va tcor gu inta, wan ker. Fure, va sumefa gandira ke Marcel gilder. Rwoder, kev gexata va tuopras gael ke miel kazawar, aze keno lupaxa vulter. Tuvel ke gida tir budeyen. Edje va ixatca tiur, ton selenafa vola mielsusik tice fogelom awir aze arabavon pulvir. « Fure dimlaní », Janine Kalir aze ko miel iper.

Bitejafa bakiola va ebeltaf kelt vamoe piaxo is widava titnid. Ine keno dure letafa ikpama stasa vane folk vulter. Fent, mea golyumas va awalt, va miel al tolgenir ; tuopras gael va inaf rizeem anteyar. Vexe ine wiiskamafe koe tapeduca vulter. Tice ikpa, wori, afi awid, aze van ine beetcuson titstid. Ine vukir, va wiltlor gildemer aze, kadime yoni tupwertawesi afi, va yon tilomap, lize rantaf krafol ke tolkrafol leveon yozdad, adim wir. Tilom va ine drumlanid ; baroy keraf afiak ko ebelte kadime ine gepoyted aze fure griawid. Ine van folk gire vulter. Isti fogelom, anteyara ke gael ko rizeem gabeper eke ine djuvukir. Va tawetc, kev krast dure xuvas va jivot, ironokon volins iper. Cepiter nume kotcoba kabdue iteem selewer. Vultera me al tuidular, ine koe kota bewa wan skotcar. Vexe fentaf gael baybayon fixan, koe ine fure belon traspur, vazaf idul isti sustera toz koblir. Ine van darkeem ke miel adim itafenkur.

Meka sukara, mek lor, vaxe dile odjafa zagdara ke raporki tubixeani gan fent, va antiuca is amlit aname Janine skalter. Arti vula, wori, rusagafa dustarinda va kelt vamoe ine nuvimpadimar. Koe vaceem ke rodaf is fentaf miel, konak kunoy bitej teniskaf sotazukawed nume yozdasi opraki, vere divgiwesi, van zida vion kildeson toz nid. Janine va batyon dantales tey dun nyaser. Doon banger ise mila mezekasa keldonara abicabicon va ine gu tele lokoekafe tise kabelcar, lize fent is jugemera va sint dure lyumad. Kabdue ine, bitej tantanon lubed aze vanmia raporki ke letaxo artafiwed, ise kotviele Janine va int gu miel fenkur. Kagaelar, va fent is alto ke tisik is bakestafa ok titickafa blira is polerapa golde blira is awalkera ilsetiker. Kaiki jontika tanda edje, otceson golde vudera, oviskon al vulter, meenide, adim vukir. Miledje, va zaeeem nukatrasir ; jaxipa va inafo alto mea skotcaso gire ticnir. Ton varaf jivot keve krast, sotcewese van liziwes kelt, ine anton ker da romplekuyuna takra silukon di vandiliwer ise amlit koeon fu dilizer. Ironokaf bitej isked da intaf zul loon tit zida ke letaxo lubed aze vukid. Bam, ton beomana zijnuca, lava ke miel va Janine toz tukotrar, va fent levplawar, va tapedaf istak ke tise abicabicon titunir aze ton teniskafa ora kal art kotraf gu brera divdomawer. Direvulon, dokotaf kelt vamoe ine senyese moe fentaf sid divlizer.

Viele Janine milinde obrason dimlanir, Marcel me al divmoder. Vexe bular viele ine senyar aze moion levgon madagir. In pulvir voxe ine va inaf kaliks me gildar. In ranyar, runafir nume inafa gexata zo kavalkur. In va bletig tislason vanlanir aze va tigis tirac dem lavay ulipir. Lev dualt fu anjer viele, ton bade moe ilava, va ine megildason disuker. Ine borerser, volins roveborer. « Loxe, abegye, ~ kalir, ~ loxe. »

|style="vertical-align: top;"|
{{Krent_Iyelt2
| xanto_vergumvelt = '''L'exil et le royaume ; La Femme adultère'''
| xanto_sutesik = [[Albert Camus]] [[Image:ACamus.jpg|30px|right]]
| xanto_piskura = Editions Gallimard
| xanto_ava = [http://www.kotava.be/xadola/pmwiki.php?n=Rekluexo.Francava Francava]
| xanto_evla = 1957
| kalkotavara_vergumvelt = [[:Loma:Divblira is gazaxo|Divblira is Gazaxo]] ; Foredonesikya
| kalkotavara_kalkotavasik = Daniel Frot
| kalkotavara_piskura =
| kalkotavara_evla = 2013
| kalkotavara_klita =
| webesik = [[Favesik:Vieux Daniel|Vieux Daniel]]
| krentduga = [[Image:Compare.jpg]] Tuenayana
| kseva1 = #A7803B
| kseva2 = #F5C36B
}}
|}


[[Loma:Warzot]]
[[Loma:XX-eafa decemda]]
[[Loma:FrancavaSuteroteem]]
[[Loma:Camus (Albert)|Foredonesikya]]
[[Loma:Divblira is gazaxo|Foredonesikya]]
[[Loma:Sutesik-C]]