Wira va klita ke Germinal Luz01

==Taneaf pak, taneaf luz==

Moe drumefa azeka, vleve bitejiskaf is sidukatapedaf is vaf miel, va vawapa mal Marchiennes kal Montsou tanoy ayik moolaniyir, va lumef sanoy decitmetrolk ronton remas, reme rezaxo se. Kabdueon, va ebeltaf sid in volwir, ise va azekafa zidapa anton peztaleyer kan bareaksatafa sukara se, mantafa dum birakoraf volont se, oprayasa tsenteyeson va wedaxopo yo is lebaxopo se. Va kelt meka aalizga kretsayar, ton rontuca ke duzuma lume gritanameweyer, vanmiae tuwiiskasa rubixa ke mielak.

Moni 2<sup>-eaf</sup> bartiv va Marchiennes ayik al mallaniyir. Tcotason koe tigafa kiltayafa gemla is piakofa rija lanipiyir. Eruiltam, webokayan koe lujoroykirafi tiojesiki, va in funhepeyer ; ise va in licayar keve eliweem, kan onton tana ok ara lodava, fargieson va nubeem aludevon ko ucom, va glagaf nubeem asforteyan gan taltusukarefema se. Va inafa vlardafa taka ke mekobas is ogiskaf dodelik tanoya rieta kereleyer, pokolesuca da fent kaiki vanafiz co-tuleblitir. Mali tanoy bartiv, in baton abdulaniyir, viele talteon arte toloy decitmetrolk abdue Montsou, va keraf tey se ve awiyir, va baroy gaelanteyawes is dumon mokolliawes reliezak. Taneon, in ve klabuyur, kivaweson ; aze va kranavafa olegara da nubeem oulon zo tuidulad me ve rotacagiyir.

Baya vanludevaweyer. Kotcoba griawiyir. Roneon tiyir nukuk, kona azebrebavapa budesa va kelot ; solve da talteon vleve gojafu ragu se werdmanni tidaweyer, wira va wida dem omaf is tanzukaf kepaiteem.

Art mon 200 bora ve avlayar. Glirbon, koe keldalodava, pokeon tey se ve tolawiyid, teka in loon grupeyer kane lidontinon koe awalkaf kelt anteyaweyed, dum vikizes tael se. Vexe, drume sid, ara disukexa va in su azavzayar. Tiyir gamiafa flava, omafo kolnaxo, lizu brucka ke iaxekeldega rontagiweyer ; va saljaf dilk yo riafa afida se divayad, aluboya ok tevoya gabenafa gumka se diveon kolliaweyed, male renta ke dana se tuebeltaweyesa inta yo va liota se ke gulaf grest yo klubon vanconhayad ; ise, male bata tacukafa tuwinawera, wizuwesa koe miel is vikiz, tanoya puda tidayar, pwertafa is abrotcifa kagaelara ke gantadivara, dana me zo rowiyir.

Bam, va kawaxo ayik ve kagrupeyer. In tolon ve tiyir kinokaf : kas fistir ? me di co-tir kobara. Ute da van kolna se in ve laniyir, adim ve arskaweyer da va yeldkesi lize baroy yeldtey anteyawed vantidlanir, koe jenukafa badona se, ta koafira is tulodidulara va ol. Sidgabes dodelik se lanon gaveon al kobayad, volfavlaf empaks yo ware zo divkawodayad. Noelkeon, se va glefasik platis va impadimak mo grest in gildeyer ; solwiyir va blisa izga trankesa yo va tsema se, poke kot tey.

- Kiavá, va tana badona in vanlanison ve kaliyir.

Gee reliezak, limik ranheyer, kadulabaynvookekiraf is libolimatsotkiraf guazik ; remi da inaf okol, pwertaf blafotaf okol, en melizison keyer da intafa tevoya titplekuyuna tsema se zo di tuvlardayad. Nubadodelik kobaves va trankesiko, blakeraf is mazdaf godjik, me keyupuyur ise mo madasiki kenibemeson aldoayar. Titepon, loloon sukayar, fentapafa lentusuka ke dana vertaf gaeloyap se dolistepeson remayad.

- Kiavá, guazik ve dulzeyer.

Ve amlitayar. Ayik, peztales da rodaxason zo disukeyer, va intaf yolt davon ve kaliyir.

- Jinaf yolt tir Etienne Lantier, jin foalkik. Kas batlize kobara tir ?

Teykeem va in koafiyid, in lanon tiyir 21<sup>-daf</sup>, bertrapaf, listikye, fotivakiraf nekev intaf tiguaf beweem.

Karavalduyun, limik tidtakayar.

- Kobara tori foalkik, me, me. Toloy arinton ware al frubded. Mecoba tir.
Volont ve pulvagabeyer. Aze, Etienne ve eruyur, nedison va orikafo kolnaxo, tite yeldkesi.

- Tir kawaxo, mex ?

Batviele guazik me ve rodulzeyer. Tizafa bobara va in telomtayar. Adim in ve putceyer, aze va tukeran sid putceks ebelton ve kretsayar.

- En, kawaxo, Vumbexo (Voreux). Djay ! palka tir pokepafa.

Ba siluk, kan sotcewesa ma, koe miel va wida ke dana kepaiteem gan yik zo diepileyer in dasugdayar. Vexe tevoy grest tiyid vlardaf, in va sin meutcason ve radimelaniyir, ton intaf sfiannukirapaf nimateem, solve da tel pwertaf okol anton mallaniyir, wale witokeem rusagon impayar, leve warzafa imbroesa waxa.

Vumbexo, batoulon, va klokera divayar. Etienne, vulkuwes kabdue reliezak tuidulason va intaf forteyas nubajeem, va koti kawaxoki is wixakirafo ayelaxo is lirdrasek is xepe ke divoksesiko is lujoraf rasekam ke lejasiko disukeyer ise dimtrasiyir. Bato kawaxo, tite suxaca, do intafe alnafe norkaxe se, rontagiso va intafa keldega dum dratcesa nola, sedme in nuvelayar tivakirajafo dum pegik, batlize kurdaweso ta da co-estur va korik se. Miloulon dam in va in rindeyer, va int is gondulesa kruldera modovayar, mali anhustoy viel da va rundak aneyayar ; in va int dimwiyir koe kelotnubakobaxe, va okilik kavalkus, kou Lille is kotlizu aloyayan ; ba teveaviel ko Marchiennes al artlaniyir, lize zo kaliyir da kobara tiyir, koe Aziliaxe ; vexe mecoba koe Aziliaxe mei dene Sonneville, va pereaviel in al gopazeleyer preyutaweson leve trinkeem ke limapradj, ke dan enintesik va in su divbelgayar, ba toleaf mielaf bartiv. Mecoba, mea tanoy talolk, milon me tanoy mit : va tokcoba moe kelda se in baton fu askiyir, enidiskon, milon me grupeson lize sol lentesuka  co-bravayar ? En, tiyir kawaxo, va kawaxolusk riafa gumka se koafiyid, kan tizon fenkun tuvel va teyxo se ke tralasiko in aftapon al rowitayar. In dere vangrupeyer va divtiewera ke lejasiko, va bata pwertafa is abrotcifa kagaelara elubkon sukesa, tison dum onjewesa sukara ke rostaza.

- Tid iaxe se koe Montsou, yik ve eruyur.

Guazik ve ebeltaputceyer, aze koe suka ve dulzeyer.

- Ox ! Tid konake iaxe. Rin co-rowiyil, weti baroya ok balemoya tanda. Kotcoba iptokayar, ayik se me zo rotrasiyid, meviele lion zo wayav. Noelkeon cin tolon zo jivotlicav. Sepuca koe gola, korik se zo dimstaksed, iaxe se tantanon zo buded. Rotir me tir rola ke ginik ; vexe tokdume ta doaliera ko Amerika in lapir ? Me patason da bonol se beyolakolon awalked, dum korik yo.

Bam, blayakamon, gaeloygabenon, kottel lilion temeyer. Va mefavalafa lanira se mali tanoya safta Etienne ve kareizuyur, di gonawalkeyer ? Radimimon va jontik wipitesik vawa se co-wid. En, guazik kaliyir, batcoba co-tenuwejer, kire mo vawa li kristevik se me zo co-romimad.

- Me kotvielon tir atela !

- Icle tir beg !

- Ageltafa, icle va beg co-dit !

Kottanafa puda drasuyur, waxa se divbureyed va ravlem se ko kexafa eviera.

- Djay ! Ontinapon limik rwodeson geon ve tolkaliyir, Montsou batliz tir…

Ise, kan tolon sotcesa nuba, koe mielak va merowinu u se in ve dasugdayar, icsabe da va sin yoltayar. Banlize, koe Montsou, Fauvelle botiaxe ware guyundeyer, vexe Hoton botiaxe va unenikeem su illatrayar, anton tiyid acagise Dutilleul regeltagatcexe isu Bleuze wazdeliaxe va kawodaladay se. Aze, mantazatcon, in ve bazeyer, lenton, va kotafa zidamiala : Sonneville yantanhofaxe me al kazawayar va toloya bareaca ke giltaf jafareem ; fuxe baroya cadeka ke Marchiennes Aziliaxe, anton toloya tuafiaweyed ; adim, koe Gagebois triviaxe, yastera dratceyer, kire kubillatrara zo levykayad.

- Grupé, grupé, yik kotbazeron tolkaliyir. Malpí.

- Tori cin, batcoba kalion vir, limik ve loplekuyur. Va divoksera kawoda se wori al tulegijad. Dere, disukel, Victoire lenteon anton tid toloya teyewesa perkcadekaima.

In ve putceyer aze ve tollaniyir kadime intaf kenibaves okol, kaiki da va in al vansorkayar do vlardafa tsema se.

Noelkeon, Etienne va kotafa gola feliyir. Mielak zavzayar aludevaf, vexe nuba ke guazik va in dumon al tukotrayar kan copapaca yo, ise yik, mejilon, batbartivon anameon va sin peztaliyir, batlize koe ninkeiskaxo. Me tiyir aelakolie tanamene gan bareaksatsuka, vanmiae bat lebaf tawaday ? Volont se al riyomeyed, nuvelayad da vanbureyed va kobarawalk, va blotiskaca dana va jontiktan co-atatar. Ise, ton krabes iteem, in askifoayar va remrura va izga se, olhastenon gan djuwira is voldjuwira. Kotcoba tumecobaweyer voldrume megrupene ke tapedaf miel se, in anton kozwiyir, sumapon, va cadeka se is perkcade yo. Bate se, kaima yo dem decemoya keldega blaguton rontagiwesa, volconhayad va stirk se dem kerafa teyka se; solve da toloy rasek, lotalteon, ko kelt faltapon anteyaweyed, dum gulafa tilerda se. Tiyir firdgabentuca, wetce vanafizara anton tiyid se bat mielaf tey ke yeldxo is azilgola, koe dratcesa zida.

- Rotir til ke Belga ? kadime Etienne tolpiyis limik ve kaliyir.

Batviele, va baroya tsema in anton vanstayar. Bata se ixam zo rotrankeyed walta sokiyisa koe divoksexo, ariseyeno kilbo, va kobara bak bartivbalemeacapa fu azavzayar. Tite yeldkesi, daletoe amlitayar, va grest yo glefasik se mea abrotcibwevason tuwidlayad. Divlirdawes sumef lor ke mhelgasiko dendaso mo zielt anton zo gildeyer.

- Me, ke Geeka tí, yik ve dulzeyer.

Nubakobasik, kaiki da va tsema se al tuvlardayar, mo sid debanhayar, kalaf tuke walta ; ise va intafa pulviskafa govituca videyer, mo limik va sizuntiskaf itapeem opelon al madayar, dum funheyen gan li pulviks yo. Battel, keskeon, gilton me lion kaliyir. Gexata ke artan lanon al dojeniayar ise in odiaxon al zo omgayar, dum  konviele tanon pulvinhis guazik se.

- Jin, ke Montsou tí, jinaf yolt tir Awalkanhik [Bonnemort].

- Tir toriyolt ? Etienne gevanon ve eruyur.

Guazik senson ve kipteyer, aze nedison va Vumbexo.

- En, en… Baron lipon batlizu al zo divimpar, kontomon ton tublakerayan im, artomon ton tawa kale uvoona, bareon ton lavakiraf jivot dum salma… Bam, viele sin al wid da me djumawalkeyer, va jin al rozad kan Awalkanhik, ta kipera.

Inafa itupuca ve jontolayar, dwera ke tusulajayana ruza, tittisa koe eaftafa kokobara. Teybadona, noelkeon, kotron koafiyir va inafa takapa, dem batakaf is riaf usukeem, dem azekaf lesay gebiazwaf is steldayan gan faltamaf krets yo. In tiyir pinaf ise digiyir va bergapa is divaf koelteem isu buueem is abrotcaf meem ke dan lujoraf nubeem lubeyed mo abadeeem. Ostik, milon dam intaf okol zavzas meliziwes moe nugeem, nuvelason sukamejes, nuvelayar raporaf, me nuvelayar abdigrupes va fent is waxa yo azdawesa moe oblakeem. Kaiki da in al bobayar, laringa solimpana gan aludevafa abovewera, tit badona ve putceyer, acum tawa di tuebeltaweyer.

Va in is baton kretsan sid Etienne disukeyer.

- Kas koe kawaxo malipon kobal ? in ve tolkaliyir.

Awalkanhik ve mafenkupuyur.

- Malipon, ax ! en ! Jin men tiyí 8<sup>-daf</sup> viele al titlapí, djay ! va Vumbexo, ise noelon tí 58<sup>-daf</sup>. Patavamal... Va kotcoba koeon al askí : va taneon galibotik az tsemasik viele al tí stapeson fof ta tanamera az baliesik bak 18<sup>-da</sup>. Aze, golde nimateemaj, jin al zo plekú mal gabexo kal sid wetce piesik az dimkiewasik, kali da div ludev al zo godivplekú, kire ropesik kaliyir da fu awalkeyé. Bam, weti 5<sup>-da</sup>, al vanpí limik… Eim ? Kiewafa, 50<sup>-da</sup> koe kawaxo is 45<sup>-da</sup> koe ludev !

Remi da in pulviyir, teykirafi yeldki kontomon lubesi kou badona va paokaf lesay tuafiayad ton forteyas tcazedaks.

- Sin kalid da va int gotildé, in ve trenayar. Jin, me kuraní, sin trakud da tí akoydarsaf !... Va tolda askinhití, kali da tití 60<sup>–daf</sup>, ta digira va turwi dem 180 franc. Ede va in batvielon co-divkiavá, pu jin va teli dem 150 co-vanzilid. Sin tid rovidaf, ilkajik yo !... Ostik tí delaf, vaxe nimateem. Wil, tir lava koluweyesa lev alma tre da zo sisteyé koe gabexo se. Lanviele va nimat me ieson me rokalizí.

Va in kobobara tolon ve waljoayar.

- Kas batcoba askir da rin dere bobal ? Etienne ve kaliyir.

Vexe va mee in ve takadulzeyer, tizon. Aze, viele ve rokaliyir :

- Me, me, al ermialawé, weti tanoy aksat. Meviele bobayá, daletoe mea azavzá... Atedafa, putcejé, putcejé...

Abovera va larida ve tituayar, in ebelton ve putceyer.

- Kas fortey tir ? Etienne ve eruyur, adim ebleson va inafa bibera.

Vion, Awalkanhik va art matrovgayon bosolayar.

- Tir yeld... Jonte vaon digí koe altojo da va int tukeon rotuidulá kali blitena. Mali 5<sup>-da</sup> ko ludev mea tollaní. Va batcoba koeon digiyí, nuvelar, skre me vantrakuson. Bax ! batcoba vider.

Ve amlitayar, ilefo mhelgasiko koe kawaxo verton alieyer, suka temeson remayar dum ie ke ael is leguca piyisa mal mielap. Kabdue relvawesa teyka se, guazik lodomon trenayar, va setikera tolroxanhason. Ax ! denon, in is intikeem va kawodalitca malipon dendayad ! Yasa kobayar tori Montsou Kaweem Sistu, mali redura, ise batcoba malipon evlayar, weti 106<sup>-da</sup>. Inaf abdigadik, Guillaume Maheu bam 15<sup>-daf</sup> velik, al trasiyir va sudayeld koe Requillart, taneafo kawaxo ke Sistu, batvielon jovleyeno guazafo kawaxo, banlize, poke Fauvelle botiaxe. Kotrafa gola grupeyer, wazdesiki tisi da kosmayana litca zo rozayar kan Guillaume litca, yoltega ke inaf veygadik. In va in me  al grupeyer, pwertik sedme kalikseem, foikap guazawalkeyes arti 60<sup>-da</sup>. Aze, inaf gadik, Nicolas Maheu yoltayan kan Kerik, penon 40<sup>-daf</sup>, al zavzayar koe Vumbexo, dano banugale zo ludevayar : kikawera, varafa tuazekawera, ulin fortey is niskeem fixas gan pisteem. Toloy inaf ziavik is inaf baroy berik, logaveon, dere al blidrasuyud. In, Vincent Maheu, rembliyis tison riwe dokotaf, ton xujaf nimateem, va rovidik bevulayar. Va tokcoba co-askiyir, ostik ? Gokobayar. Gadiknasbeikon batcoba zo askiyir, dum arcoba. Nasbeik, Toussaint Maheu, noelkeon koeon semaweyer, ise veynasbeikyeeem is intikeem, lenteon vistalewes koe palka. 106<sup>-da</sup> ta baliera, pinikeem radimi guazikeem, tori milaf tilik : eim ? Jontik glastik va intafa izva me likiewon al co-negayad.

- Icle, viele estut ! Etienne tolon ve prejayar

- Tir jinaf kaliks, ede rotestun beg tir, blira rotir

Awalkanhik ve stivaweyer, iteem mo palka, lize afida se tantanon anteyaweyed. Balemeaf bartiv mamayar mal biot ke Montsou, fent tulobliweyer.

- Vexe in tir kulaf, Sistu ? Etienne ve tolkaliyir.

Guazik ve guepitayar aze vol, dum anhayanon gan atitsura ke talolk se.

- Ax ! en, ax ! en... Rotir lekulaf dam intaf vegungaf, Anzin Sistu. Wori celema is celema. Cin mea patav... San-lerdoyo kawaxo, ke dano san-baroyo ta savera, Vumbexo is Victoire is Crevecoeur is Mirou is Saint-Thomas is Madeleine is Feutry-Cantel is dere aro se, is tevoyo ta baslavara ok gaelara, dum Requillart... Kunoy dodelik, kaxaaxo yo moe 67<sup>-oya</sup> dota, vielon soloksen alub-decitoy celemgramolk, kelot kagluyas va koto kawaxo se, is nubakobaxe yo is askedaxe se ! Ax ! en, ax ! en, tir erba !

Tsematanamera, mo grest yo, va oblakeem ke blafotaf pwertaf okol ve vanmadayar. Titeon, riba zo gotolgodeyer, glefasik se va intafa kobara al toltozuyud. Remi da va bonol in vansorkayar, ta toltitlanira, limik zijnon ve loplekuyur, va in gukoeson :

- Me toz giltil va ginelara, vungajik !... Ede Hennebeau Weltik co-gruper va coba dana va rinaf ugal drasur !

Etienne, modovas, va miel disukeyer. Ve eruyur :

- Bam, va Hennebeau Weltik kawaxo pasur ?

- Me, guazik ve diveyer, Hennebeau Weltik anton tir jadif gadesik. In zo doder dum cin. 

Tanzatcon, va mielakdatuca yik ve nediyir.

- Va toktan kota batcoba pasur ?

Vexe Awalkanhik ve zavzamayar personen gan warzafa deona, jonte tizafa da va gaeloy me rotolnariyir. Adim, kaiki da al putceyer aze mou kutceem va ebeltaf skael al bosolayar, koe jontolawesa suka ve kaliyir :

- Eim ? Va toktan kota batcoba ? Metan gruper. Va korik se.

Ise, kan nuba, va klubafo xo koe izga in dasugdayar, va afanano is sumefo xo, lize ban korik se irubayad, torion Maheu se mali lo decemda litcavordayad. Inafa puda tiyir dumon alkavudafa, tiyir dum ede al pulviyir va merovansan truduak lize preyutawer divaelawes is kurdas lorik, pu dan va intaf cot kottel ziliyir, ise va dan meviele al wiyir.

- Icle ede va beg min stapeson co-rotestut ! Etienne ve barkaliyir, volzeviandason.

- Ax ! en ! Ede va beg min kotviele co-rotestut, co-tir kiewarsafa !

Okol al mallaniyir, limik silukon ve griawiyir, ton boraja ke megalucik. Poke trankesiko, nubakobasik me al zekayar, fixuon, wale abadeeem va itowa vanludevason, mo vlarde va tenanteyaweyes itapeem titickason.

Viele va intaf eruilt di dimnariyir, Etienne men ve illaniyir. Peztaleyer va geopras volont se, remi da ast anteyaweyer, kabdue teyap. Rotir, skre, va kawaxo in rotir dogukoeyer : guazik rotir me grupeyer ; aze in trobindaweyer, va bet ol co-naleyer. Tokliz rolanir ise rovanpir, koo bata gola tuaelana gan stilara ? Kadime rebava va alto ke drasun okol in djumisker ? Wori, va in klabura skalteyer, vudera va Vumbexo, iste bata drumefa azeka, wizuna leve livaf miel. Kotwaxon suka nuvelayar tulogijasa, dum ede mal tulomantawesa zida al sukayar. Mek vanafiz koe awalkaf kelt tubatakaweyer, antafa cadeka se teyeweyed, dum perkcadeka se, koforteyasa va mielak, va megrupene me koafison. Ise Vumbexo, tite intafe ye, dum ikoraf bonol, loon seluweyer ise lopwerton is lodabrotcion kagaelayar, gael funhen gan intafa portafa logara va ayacot.

|style="vertical-align: top;"|
{{Krent_Iyelt2
| xanto_vergumvelt = '''Germinal'''
| xanto_sutesik = [[Emile Zola]] [[Image:EZola.jpg|30px|right]]
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Francava Francava]
| xanto_evla = 1885
| kalkotavara_vergumvelt = Germinal
| kalkotavara_kalkotavasik = Laurent Lermigny
| kalkotavara_piskura = [http://www.kotava.org/index.php Kotava.org]
| kalkotavara_evla = 2003
| kalkotavara_klita = [http://www.kotava.org/fr/fr_suterot_EZola_Germinal.pdf Kalkotavaks]
| webesik = [[Favesik:Kotavafamik|Kotavafamik]]
| krentduga = [[Image:100%.jpg]] Tuenayana
| kseva1 = #A7803B
| kseva2 = #F5C36B
}}
|}


{{Germinal_krent
| luz_luz = 1-eaf
| luz_radimeluz = [[Germinal_Luz02|2-eaf luz]] 
}}

[[Loma:Berpot]]
[[Loma:XIX-eafa decemda]]
[[Loma:FrancavaSuteroteem]]
[[Loma:Zola (Emile)|Zola (Emile)]]
[[Loma:Sutesik-Z|Zola (Emile)]]
[[Loma:Germinal]]