Wira va klita ke Ivan trawik

== Rwaltreiz : Ivan trawik ==

'''Lanugale darekeon'''. Lana guazafa tolonga va baroye nazbeikye dikir ; toloye tid grufe voxe Ivan bareafe tir bonapafe. Toloy taneik koe werdxo namulolsud, edje trawik gibekliwur, senyejeson moe bending. Lanviele, guazikya va ricafixu egar aze pu trawik kalir :

— Va estuks pu berik burel ‼

Va furutsa gu fixu tukotrar aze bulkar. In van toloye berikye impuson mallanir. Afizcek tir awaltkiraf, nume divlanison va wida va intafa izga moe sid kozwir nume pu int erur :

— Tok tir bat fanik dure pokelanis va jin ? In va konu fixu tce djumer ?

Kle va sinu mo izga tantanon mimar. Wori izga wan fuzoder.

— Man estupusik ! ~ trawik diviegar, kabuson va furutsa empawetesa.

Va toloye berikye kevlanir, ton vlardaf nubeem ; bantel erud :

— Tokdume batliz lanil, trawik ?

— Va estuks pu win vanburé.

— Ax, ae ! Kalion zilil ‼

— Terektac, berye ‼ Lan megrupenik gu jin va int al titickar nume va kotcoba al vumber !

— Toktan ?

— Battan, wic ‼ In wan tigir !

Berikye va in vorced ise alied ; azon kalid da in va namulol ikaon di gosur aze ko mona estutuson mallanid. Trawik, wison va namuloleem eglus art werdxo, radimvulter aze adim va kot bonol basitar. Ebiduyuson va kot isu basitayason, ezbon belcar aze karmer. Berikye estuyuse dimlanid :

— Ex trawik ! Tokdume bonol re tid wiiskaf ?

— Kas va ita olegad ? Moi winafa mallanira, berye, al tcastawed ; acum al rieté, va sin al belcá aze al basitá. Tí ciondayan !

— Loeke fu til ! ~ kalid nume va in nubokason myelgad.

Vanion, gadikeem va trawik ko kazaxo koe widava ta lustera stakser. Ivan va jontikcoba luster : va azega is yona foria isu bilaga is eip, vas kotrafa lima. Dimlanison, oreftaf okol kuncapar.

— Benje ! ~ trawik pu int kalir, ~ okol tir baleminiaf, voxe azega dere ; miv ronir ‼

Nume va azega mo vawa daykar. Kaikemon, va vamoeon yon razamuk anametalas is ies wir.

— Maneke sin ieped, i ekoltaf sulem, ape aeled ! ~ trawik trakur. 

Va estuks dem sinka mo sid aykar aze va zveri ganer :

— Va int voltac, ekoltaf sulem ‼

Azon gin lanir. Va mikaci dem tuyeldayan kros kene vawa remlanir.

— Ae, ~ pu int kalir, ~ fanik tid edjiskaf ; fu fented, abegik.

Nume va kros gu furutsa besar. Artlakiyison va kuksa, va okol voldjukurulis djumulidinar.

— In va eip imaxur, morbé !

Nume in va lava toz eipar. Va eyelt dem eip tuvlardar. Vexe okol wan meulir.

— Tokdume dun tairdal, ikoraf okolaj ?! Kle va eip su grebé !

Ivan va okol ben taka gan flag alier nume sagonder. Eyelt dem foria anton tigir. In mo ge vajar. Edje lanir, foria kadimeon zanolad : kliyk, klayk, kliyk, klayk, kliyk, klayk ! Gu ermitanik ganon zo folaskiper, batdume va sina mo sid mimar aze nugaper, puskacegason :

— Va win gu ermitanik askipeté ‼ Va man yoromik !

Dimdenlaniyison, pu toloye berikye kalir :

— Va kotcoba al lusté, berye !

— Va trawik grewá, vexe toklize lusteks tigid ?

— Azega sorer voxe kagaver ; sinka va ekoltaf sulem gestur ; furutsa tid edji tori fanik ke mikaci ; eip va lava ke okol al kurnar ; foria va jin al nuled, acum al ilmimá.

— Mallanil, trawik, aze va kotcoba mimayana remi koyara tredul ‼

Ivan ko mikaci lanir, va kota furutsa plekuyuna moe tuyeldayan kros kayestar, aze tsaxar aze va peya remon sardur. Va sina batkane vanburer. Berikye va in alieped, aze miv lusteteson ko widava lanid ise isked da in va ebava di viunsur. Trawik, anamterektas, va ekot kacawes koe blet gilder.

— Ekot, ekot, me til yoromaf ‼ ~ kalir. ~ Ekot wan kacawer. Bam in va blet tuvlardar, koon debanyar aze koe mona gozar, namusteson.

Ba dimlanira, toloye berikye yatkafe va in konubad aze ko eyelt kobuded aze kal opranafa kuksa impadimad. Banlize, va eyelt mo domega aykad aze aneyatason va fe va opra molanid. Lan jiomik moe impadimot sorkakiraf gu baroy beretraf okol moolakir. Ivan pu in iegar :

— Gu malyesik is dirgasik va winka al zo koflí, beka vol rodemalyé ise vol rodedirgá !

— Va vula, trawik, ~ jiomik kalir, ~ jin rodefaskí. Kle va eyelt divlizil ‼

Ivan va eyelt divlizir, aze va jiomik koon kobuder, aze va impadimot rundanyar aze griawir. Toloye berikye dimlanid, va eyelt lev opra levlavekad aze va lava elniesa terektad.

— In va art eskelar ! ~ dimlanison kipted.

Vexe trawik moe barokolaf impadimot kevlakir.

— Wic, ~ fuglar, ~ va manyon cuisaf okol jinon trasiyin wic ‼ Tanoy banlize tigir, i cuisaf lukptaf okol !

Toloye berikye, vigrokane, kalid :

— Va cin ko eyelt siluon kobudel aze ko fe kalion mimal ‼ Va ban lukoptaf ebiduv… !

Ivan trawik va sine wizur aze dimdenlakir, aze va ekot tenuker, ulison mu dili ke sinafa gloga.

Koe kusk aludevaf lird tigir lize tanoy kabay dun pujer, ise ba bat neguum tenuké.

{{Krent_Iyelt_RossiaRwaltreiz_1
| reiz_vergumvelt_RU = Иван-дурак
| reiz_vergumvelt_AVK = Ivan trawik
}}
[[Image:IvanTrawik_1.jpg|right|220px|alt=Ivan trawik|Yunkeks ke Ivan Bilibin]]
{{Krent_Iyelt_RossiaRwaltreiz_2}}
[[Loma:Rwaltreiz ke Rossia|Ivan trawik]]
[[Loma:Ayoltaca yo|Ivan trawik]]