Wira va klita ke LaFontaine Kudeem Libakol is Imboza

==Libakol is Imboza==


Vultera me zanudar ede malvultejera tir.

Libakol is imboza vrutawed.

- Bet, bantel kalir, da batinde abdi jin

Me kalvultetel. - Abdion ? Til proyaf ?

Bagaf sulem ve dulzeyer.

- Gositik, va int gokarlel

Kan balemoy ariutolk.

- Proyaf ok volproyaf, tolon morbé.

Baton ve dilizeyer : aze ke kottol

Morbeks se pok enid ve zo rundayad :

Tok morbeks, me tir detce,

Meie kiblayan malhesik.

Libakol anton balemboron gonaskiyir ;

Jin gildá inde in askir viele riwe zo-zomer

Ta da va vakol se ilvulter,

Ise askir da sin va vayka koevulted.

Ostik, kalí, digis va ugal ta mulera

Ik kenibera ik terktara 

Va toklizafa suka, in isker va Imboza

Imbozalanigon lanisa.

Bantel mallanir ise blumtar ;

Vion tukaliawer.

Wori va mana cenhera battel vligur,

Va beks aliamon torigir,

Folir da porafa

Da gaveon mallanir. In muler ise va int tilder,

Ise kan arcoba dam beks relandewer.

Tidion viele in ve wiyir

Da art raporxo artol riwe kallaniyir,

Djobeson ve malvulteyer ; vexe intafa divkabura se 

Ve tiyid giopafa : Imboza taneon ve artlaniyir.

Ex ! pu in ve ieyer, me oveyé ?

Va tokcoba rinafa kaliada zanudar ?

Jin wá ! Tokcoba co-tir

Ede va mona rin co-burel ?


{{LaFontaineKudeem_krent
| kuda_vergumvelt = Libakol is Imboza
| kuda_abduekuda = [[LaFontaine_Kudeem_Moavatokirafa_Wilya|Moavatokirafa Wilya]] 
| kuda_radimekuda = [[LaFontaine_Kudeem_Krapol is Idatcol is Bresitol|Krapol is Idatcol is Bresitol]] 
}}

[[Loma:Kuda]]
[[Loma:Ezla]]
[[Loma:XVII-eafa decemda]]
[[Loma:FrancavaSuteroteem]]
[[Loma:La Fontaine (Jean de)|Libakol is Imboza]]
[[Loma:Sutesik-L|Libakol is Imboza]]
[[Loma:Kudeem ke La Fontaine|Libakol is Imboza]]