Wira va klita ke Maldoror Dank01 Food01

==Taneaf dank, taneaf food==

Kelt, zo puver da belisik, tulaoweyes is gemelton tuzugaweyes dum belina coba, va gurafa is govitafa kelda mevodjuweson trasir, remo wedajeem ke batu orikafu is jivakirafu bu se ; kire vaxede in tir nustaf ovopaf belisik ise vaxede tir swavakalatces lidam rodaxapas, awalkedaf divdaakekseem ke bata neva, lidame lava va bota, va inafa gloga di co-plawuked. Volkiewafa da bettan va kaikef bueem di belir ; antaf konaktan va man pirilt wupeiskon fronatad. Acum, vazafa gloga, abdi da va mana mevestayana vayka loon koal, va buueem radimon vols abduon vodjul. 

Va jinaf kaliks en terktal : va buueem radimon vols abduon vodjul, dum iteem ke nasbeikye tarkason dantewes sol ilamkafa nhasera va gadikyaf lesay ; oke lodame, dum ematcap dem kobrapas fentolaf ipom se, bak fentugal koo amlit sukitalkiranhon vantalapas va elimaf zidolk lizu abdizivotcafa divulafa sukapa laizon malar. 

Tel loguazaf ipom tanon tadles va abduee, va batcoba wison, dum ovakirik va taka askir da widlar nume va oral askir da ermitar, me tir valeaf (dere ikaon me co-tí), voce da guazafa bruxiskamafa berga milugalafa do baroy ipomaf milklaikeem kaliziwer ton tunoglotana dzavera se abditasa va lolovanaso xefto. Kan bagalakiraf iteem, proyon tison taneaf (kire tir in dis va gogol ta nedira pu ar legruf ipom va aultbruxeem), konakviele wonton anamon disukeyeson, ise kan obrasa iera ke kexaf susik ta ilimpara va dof volnik, va uul ke darkaca plaxon niabetar (rotir bargentim, ke dan tel bareaf kril me zo rowir, gan mani akoydasi lamarasveri se bat darktazukayan), ont ronon ont talton, maninde deksaf redakik co-askir ; ostik, tiuson kan wilteem nuvelas melogijaf dam tel ke proklami, oye da me tir bonaf, va ara trakuropafa is loseptafa kelda baton kentalar.

{{Maldoror_krent
| dank_otuk = Taneaf
| dank_food = 1-eaf 
| dank_radimefood = [[Maldoror_Dank01_Food02|2-eaf food]] 
}}

[[Loma:Ezla]]
[[Loma:XIX-eafa decemda]]
[[Loma:FrancavaSuteroteem]]
[[Loma:Lautréamont]]
[[Loma:Sutesik-L|Lautréamont]]
[[Loma:Maldoror]]