Wira va klita ke Riquet dem gapuxa

== Reiz : Riquet dem gapuxa ==

Konviele lekepon lana gazikya va nazbeikye radekayar, i va evakapafe is soregrapafe eke kottan jontikedje iltrakuyur kase ine va ayatazuk diyir. Diolikya tigisa ba koblira ravaldayar da ine di tiyir neciafe kir taskapafe ; ina dace loplekuyur da, nope ganon getcana gruta, ine va taskuca liote dam intafa pu tela lorenatana ayikya di roziliyir.

Batcoba va kimtafa gazikya vinumuyur, i va vanmanapana golde nazbara va man evakapik. Ae bat rumeik, biwe toz pulvis, va kunoya ewanya kaliyir, ise va kotcoba taskapon askiyir eke kottan zo mempeyer. Vulkuyú da gokalí da ine dem usukafa gapuxama moe taka kobliyir, nume batdume gu Riquet dem gapuxa di zo yoltayar ; Riquet tiyir yasayolt. Arti perda ok anyustda, gazikya ke vegungafo gazaxo va toloya nazbeikya radekayar. Bata kobliyisa tiyir listafa loon dam afiz ; gazikya tiyir sensapafa eke kottan cubeyer da daavapa va ina di co-rotuyur. Mila diolikya tcokeyesa va koblira ke velaf Riquet dem gapuxa tiyir tigisa, nume ta luntera va daava ke gazikya, dakteyer da bata sersikyama di tiyir voltaskafa is akoydafa lidam listafa. Batcoba va Gazikya kranavesipiyir ; vexe fure loeke ve nigeyer kire bana radekayana nazbeikya tiyir evakapafa.

— Maneke me zo vanmanal, Weltikya ! ~ diolikya kaliyir ;~ rinafa nazbeikya arinde zo gableter, nume tiyir taskapafa eke vugtan sonkeyed da ina va listuca gracir.

— Lorik gorar ! ~ Gazikya dulzeyer, ~ vexe me kaskane taneafa listapafa co-tir taskamafa ?

— Va mecoba icde tarkuca gonaskí, ~ diolikya kaliyir, ~ vols va kotcoba icde listuca ; nume larde va rin djukeldaskipí, pu ina va grita grutulistasa va kottan fu getcá.

Darpeda toloya sersikya atriyid, sinaf kotunaceem dere miledje laumayad, nume kotlize korik va listuca ke taneaf nazbalik is taskuca ke toleaf anton pulviyid. Ae dere sinaf afreem milklaon tugijawepeyed. Toleik kotgazdon tuevakaweyer, ise taneik loeke vielvielon tuakoydaweyer. Ont gu kona erura mekon dulzeyer, ont va fitulaca kaliyir. Ostik tiyir voloblipaf eke va balemoya rigelaxa mo keldegadoma meempason me co-rotemayar, meie va lavagalemacek mepleson va lik mo vage co-rotuliyir.

Beka listuca tir impavantapa joke yikya, soe dene kota dosita toleik tove taneik cugviele kevwayar. Cugtan va tel listik taneon kevlaniyid enide di wiyid ise di mafelayad, vexe kottan van tel taskik fure mallaniyir enide va decemoya inafa kalina plinaca di gilder, ise tcokesikeem zo gevayar da arti leu bartivamu metan poke battel ware tigiyir, solve kottan aname bantel tigiyir. Taneik katcalackayar neke tiyir akoydapaf, nume va kotafa listuca ika taskacku ke berik mebatceson co-ziliyir. Gazikya, beka tiyir utcorapafa, va inafa bonuca konakviele me roveculimeyer, batdume bata kimtafa sersikya trakuyur da fu kranavawalkeyer.

Lanviele edje koe aalxo ta temera va intafa volkaluca tigiyir, va vanlanis evakapaf is plinansaf vox cuisapon vagekiraf ayikam wiyir. Jotafe Riquet dem gapuxa sersikye tiyir. Korenayase va ina nope konak delt kotlizo pridus, va gadafo gazaxo al buluyur enide va ina djupowiyir ise djupopulviyir.

Felbenon da va antafa ina batinde kazokeyer, tarkapason is dolackon domuyur. Katcalayason, moi intyona cpackara, da ina tiyir kexapafa, kalir :

— Me gildá, Weltikya, inde kontan listaf lieke dam rin tire tir gabentapaf lidame nutil ; lecen, beka va int romilmú da va jontika listapikyanya al wí, ruyé da va kontanya tisa listafa lieke dam rin meviele al wí.

— Man kalira va rin puver, Weltikye, ~ Sersikya dulzer, ~ voxe batliz vukil, vay ?!

— Listuca, ~ Riquet dem gapuxa dakiyir, ~ tir impavantapa eke ika kotcoba sovodar ; ise viele kontan vaon dir, me wí dacoba co-rovanmanapar.

— Co-abdualbá, ~ Sersikya kaliyir, ~ da co-tí evakaf lion dam rin, is taskackaf lodam listaf is bonapaf inde tí.

— Mecoba, Weltikya, va taskik sotcalar loeke in fogemetir, nume tana pilkaca ke taskuca sotir da kontan loon vaon dis, pune loon fogegracir.

— Va mancoba me grupé, ~ Sersikya kaliyir, ~ vexe grupecké da tí bonapaf, nume batlizu jinafa atasa nigera fir.

— Ede batcoba vanmanasa va rin anton tir, Weltikya, va rinafa kranavera drikon rotenutcé.

— Voxe tokkane askitil ? ~ Sersikya kaliyir.

— Va roti dí, Weltikya, ~ Riquet dem gapuxa kaliyir, ~ da va tel gotis renanik rotutaská liote djumé ; ise larde til, Weltikya, battel, va cuga taskuca ant rovodadil, wari va jin co-djukurel.

Sersikya zo woltendapayar nume me dulzeyer.

— Rabaté, ~ Riquet dem gapuxa dakiyir, ~ da bata dragera va rin puidar, ise me zo gevá ; batdume va tandarsu dozilí enide di gorackal.

Sersikya tiyir taskansaf lidame djutiyir taskamaf, eke gestiyir da tena ke bata tanda me di sokiyir ; batdume va askina dragera naleyer.

Pu Riquet dem gapuxa biwe su abdiplekuyur da arti tanda ba mil viel va in di kureyer, pune pesteyer ararsafa gu abdifa tira ; ve ruleyer drikarsafa inde va beta djumena ewa rokaliyir ise gedelon is fakon is tuwavon rokaliyir. Batvielu do Riquet dem gapuxa durimon is godjon toz prilayar, ise jebeyer maninde Riquet dem gapuxa foliyir da va loa taskuca pu ina al ziliyir lodame gu int al ickrileyer.

Vielu ina ko berma al dimlaniyir, varaf aboyikeem me grupeyer va coba icde levgapafa is zultapafa betara gotrakuyur, lecen ina va jontika volebokaca liote gelkeon kaliyir, va pestoraca is taskapaca liote dure kaliyir. Varaf aboyikeem merogestanon tiyir daavaf ; ant inaf nastolik me tiyir sensaf kir mea dagis va impavanta icde taskuca, nume kapbureon re nutiyir volplinapafa jidolya. Gazikye sedme inyona boyara linulayar, ise koe inafa kraba konakviele dace pirdotgiyir.

Yoke galbuweyeso kro ke bata betawera, kote jotafe sersikye ke yono vegungafo gazaxo lagapayar da gan ina di zo renayar, nume cuge sine kuredayad ; vexe ina va meke taskackafe trasiyir, ise mewalteson va int pu tane moterektayar. Wori lanviele gijarotipafe is kulapafe is taskapafe is ontinaxapafe sersikye awiyir, nume ina me tatceyer da nutiyir serolackafa gu ine. Sonkeyese gadikye kaliyir da iskeyer da ina va kurenik miv di ronarayar nume va int dure rodakteyer. Vexe bro taskapik voldrikon lajugorackas va mana arienta, grewayason va gadikye, va undes ugalam ve eruyur.

Ko aalxo, lize va Riquet dem gapuxa al trasiyir, xuye laniyir ise gozayar, enide va coba inton gonaskitina lodelvejon di klokayar. Edje gozayar, klokapason, va odjaf lor leve nugeem gildeyer, i va lor dumede konaktan lanid ise dimlanid ise tegid. Loeke anamterektayason, gildeyer da kontan kaliyir : « Va bata rekleda pu jin vanburel !» ; artan : « Va bat gantak zilil !» ; battan : « Va inta ko bat tey plekul !» Sid milviele fenkuweyer, nume ina, va burmotaxoindapa kotrafa gu burmotasik is rekledik is jontik amidaf zanisik adraf gu durganya, leve nugeem wiyir. Blay dem tol-sanoy ok bar-sanoy solzasik divlaniyir ; sin ko gaest ke aalxo anam abrotcapafa azega va int rundayad aze, dem remrusiki koe nuba is bresitolault moe oblaka, mamon gu tamafa danka formason toz kobayad.

Sersikya, gevana gan bata disukexa, pu sin eruyur mu toktan kobayad.

— Mu, Weltikya, ~ tel lolaviaf ayik ke blay dulzeyer, ~ mu Riquet dem gapuxa sersik, eldeon kuretes.

Sersikya, akoyena loon dam daretomon, is vere trakoduson da ba mil viel weti tanda va kurera pu Riquet dem gapuxa sersik al abdiplekuyur, fogeluberseyer. Viele batinde al abdiplekuyur, tiyir bonafa, ise wason va warzafa taskuca ziliyina gan sersik, va kota fitulaca al vulkuyur, batdume al ilsetikeyer. Arte lea baroya gozasa bora, Riquet dem gapuxa va int lenton atoeyer, i sintaaf is cuisaf is man kuretes sersik.

— Wil, Weltikya, ~ kalir, ~ da tí tageltaf gu bostarkara, ise lané da batliz lanil enide dere fu bostarkal, nume, gison va nuba, va jin di tukalarsal.

— Ronjon co-welidá, ~ Sersikya dulzeyer, ~ da icdeon men al kogorá, ise me folí da konviele rogoratá inde djumel.

— Va jin geval, Weltikya, ~ Riquet dem gapuxa kaliyir.

— Folí, ~ Sersikya kaliyir, ~ ise tire ede va fikik, i va metaskik, co-zolkomé, pune zo co-toktepé. Sersikya va bos anton sodadir, in co-kalir, ise va jin gokurel kire al abdiplekuyul ; vexe larde bat pulvimbik tir tel taskik ke tamava, lané da rekieweter. Grupel da, viele tiyí bonaf, va kurera va rin wori me gorayá ; tokkane gestil, larde golde rin re tí taskaf num volfakapaf icde nobanik loon dam gelkeon, dure co-gorá arinde banugale me al rotaskí ? Ede va jin en fokureyel, gribonayason va jin is askiyison da loon dam abdion gruwickí, al kiovepel.

— Ede metaskik, ~ Riquet dem gapuxa dulzeyer, ~ co-tir pestoraf, inde su kalil, da va rinafa mebostarkara culimel, tokdume, efe Weltikya, icde koncoba lize kotrafa kaluca ke jinafa blira tigir, milinde me co-askí ? Kas co-tir malyaca ede gropa ke kon taskik co-tir lorotafa dam tela ke metaskik ? Kas va mancoba rotespul, rin taskapaf is jontikote djutiyis ? Vexe rueckec, vay ?! Kas, vaxe evakuca, koncoba ke jin va rin volpuver ? Kas til mevaleaf gu jinafa koblira iku swava iku aflicera iku andeem ?

— Meinde, ~ Sersikya dulzeyer, ~ ke rin va kotcoba kaliyina albá.

— Battode, ~ Riquet dem gapuxa dakiyir, ~ fu tí kalaf larde va jin rotuneciarsal.

— Tokkane co-tir ? ~ Sersikya kaliyir.

— Batcoba sokitir, ~ Riquet dem gapuxa dulzeyer, ~ ede va jin renal umeke djuskul ; ise enide, Weltikya, me etrakal, grupel da mila diolikya ziliyisa pu jin va gruta ta tutaskara va bet djumeten korik, pu rin va gruta ta tulistara va blovaf renanik dere al zilir.

— Ede batcoba tir mana, ~ Sersikya kaliyir, ~ jugemersé da vanpil tel lolistaf is loneciaf sersik ke tamava ; nume va bata gruta pu rin zilí lidame ina tir ke jin.

Moida Sersikya va batyona ewa al tiyayar, Riquet dem gapuxa sedme ina nuvelayar tele lolistafe is lotamafe is loneciafe ayikye ke tamava, i mevielu wiyine

Konaktan ravaldad da mempera ke diolikya me sopuyud, volse ant renara va bata artazukera raplekuyur. Kalid da Sersikya, undeyesa va mingara ke inaf renasik is kota inafa duganya ke gloga is swava, va soregruca ke alto is evakuca ke vola mea wiyir, ise inaf ralk va tivacka ke geomas ayik sopron loon vektayar ; nume solve batvieli va in eterses al wiyir, re anton krupteyer da in tiyir mempeson xowamas ; dere kalid da inaf abdion rodjegas iteem re nuvelayar loon jebes, da inafa tirkaja sedme ina bevulayar tcala ke tizafa renararsa, ise adim inaf keraf pezap va kona oklaca iku gradilaca vektayar.

Ae, Sersikya va kurera pu in vere abdiplekuyur, wari in va finera ke inafe gazafe gadikye di co-seotayar. Gazikye, grupeyes da nazbeikya va Riquet dem gapuxa karolapayar, i va taskapaf is utcorapaf sersik ostik inon grupen, va in wetce arnazbeik puveguson emudeyer. Mali eldeviel vidia dilizeyer, milinde Riquet dem gapuxa al abdiwiyir, is kare inyona valevifa benplekura.



'''LIDOK'''<br/>
Ko bat suteks wit,<br/>
Da in me tir foktaf reiz vols ageltucacka ;<br/>
Kotcoba ke renaks tir listafa,<br/>
Kotcoba renana tir taskafa.<br/>



'''AR LIDOK'''<br/>
Koe coba lize Tuwava,<br/>
Va kolmanya al plekur, ise ksevapa<br/>
Ke kon biak liz yamba someartfir,<br/>
Kotbata gruta ta tugustara va takra<br/>
Leon dam tanoya merowina adala<br/>
Rotrasitina gan Rena, askid.

{{Krent_Iyelt_Goyolyanya_1
| reiz_vergumvelt_FR = Riquet à la houppe
| reiz_vergumvelt_AVK = Riquet dem gapuxa
}}
[[Image:Riquet_(Gustave_Doré).jpg|right|220px|alt=Riquet dem gapuxa|Yunkeks ke Gustave Doré]]
[[Image:Riquet_(Gustave_Staal).jpg|right|220px|alt=Riquet dem gapuxa|Yunkeks ke Gustave Staal]]
{{Krent_Iyelt_Goyolyanya_2}}
[[Loma:Perrault (Charles)|Riquet dem gapuxa]]
[[Loma:Sutesik-P|Riquet dem gapuxa]]