Wira va klita ke Astopol is Razama is Idatcol

{{TextQuality|75%}}
<div style="margin-top:1.2em;font-size:140%;">
<center>'''Astopol is Razama is Idatcol'''</center></div>
<center>''Mongolafa vunda''</center>


{{Teliz_toza}}

Lekepon konviele tiyid Astopol is Razama is Idatcol, belcon blis wetce berik.


Konviele, ta trasira va warzafo rotiso sokerafo xo mallaniyid ise Razama kaliyir :

— Tir xo lize kot min va rotestuna jontikcoba trasitit. Vexe bagalakirapaf tcabanyesik dem tra is ikse batlize blir. Ikse co-tid wupe tove min.


Idatcol trakuyur : « Ede Astopol ko kone tcabanyese ikse zo co-ebidutur, co-rotestutú liote co-djumestú. »

Bam kaliyir :

— Van bato cuisafo xo lanit nume batlize blitit. Oke kas gan bat tcabanyesik zo kovudac ?


Acum baroy nik koe bato xo va int inkeyed aze konakedje dilion di bliyid.

Vexe konviele, Astopol ko ikse zo ebiduyur. Grupeson va batcoba, Idatcol vere ampuyur ta trasira va ebiduyun sulem abdi Razama. Viele adim artlaniyir, Idatcol pu Astopol eruyur :

— Tokinde batcoba al sokir ?

— Tokinde al zo iksé ? Me grupé, arse. Opelon laniyí viele laizon koon al lubé, ~ Astopol dulzeyer. Tokkane va int rotunuyá ?

Idatcol kaliyir :

— Grablel, grablel ! Va int miv grutunuyatal !

Aze mallaniyir, guantason va Astopol. Trakuyur da kemeson lokiewon co-askiyir aze va in di co-estuyur, nume kadim amna va int preyutayar.


Vexe milviele Razama arttalayar, nume wison va Astopol pu in eruyur :

— Tokdume batinde grablel ?

— Tokdume ? Ko tane tcabanyese ikse al zo ebidú aze Idatcol batliz al lanir ise al kalir : « Grablel nume va int miv grutunuyatal. » Batdume grablé. Vexe dure nimatroté ise cué, ~ Astopol kaliyir.


Bam Razama va in batinde pirdayar :

— Ten grablel ! Va nimateem volins fu empal nume kaliapon awalketel. Vol zekal ! Bevulal awalkaf ! Viele tcabanyesik folitir da ixam al awalkel, va rin tunuyatar. Ise viele askitir, bam gonotcetel.


Astopol kle askiyir inde Razama al kaliyir. Razama bam tidtalayar aze vamoe skiderna ke tcabanyesik, ieson ta koobrara ke ayik, toz anametalayar. Bagalakiraf tcabanyesik trakuyur :

— Ox, sulem ko ikse ape al zo ebidur.

Nume va tra is tcekak nariyir aze ta kodisukera laniyir.


Miledje Idatcol trakuyur :

— Argesa, Razama al pir ise va Astopol al itafenkusir.

Fu upenyayar aze van Astopol wan iksen dimpiyir viele va vanlanis tcabanyesik ve wiyir. « Dure bartiv ta tukotrara va jivot », Idatcol pu int kaliyir aze kadime amna wan kurdayar.


Viele tcabanyesik wiyir da astopol al zo ebiduyur, tiyir kalapaf. Ise viele foliyir da sulem tiyir awalkaf, va in tunuyayar. Aze ta plovikizara debanyayar.


Tcabanyesik va in jonon tcekayar. Vexe lecen van amna lize Idatcol va int preyutayar, Astopol al vulteyer, tceka va in vols Idatcol me uzayad. Ban awalkeyer viele tana tceka ben taka ve tazeyer.

|style="vertical-align: top;"|
{{Krent_Iyelt
| xanto_vergumvelt = '''L'Onagre, le Corbeau et le Loup'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Mongolava Mongolava]
| xanto_evla = -
| kalkotavara_vergumvelt = ''Astopol is Razama is Idatcol''
| kalkotavara_kalkotavasik = Sabrina Benkelloun
| kalkotavara_piskura = -
| kalkotavara_evla = 2013
| webesik = [[Favesik:Sab|Sab]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}
|}


[[Loma:Kuda]]
[[Loma:Vunda]]
[[Loma:Vunda ke Mongola|Astopol is Razama is Idatcol]]
[[Loma:Ayoltaca yo|Astopol is Razama is Idatcol]]