Wira va klita ke Digdatol is wiiskik

{{TextQuality|75%}}
<div style="margin-top:1.2em;font-size:140%;">
<center>'''Digdatol is wiiskik'''</center></div>
<center>''Sereravafa vunda (Senegala)''</center>


{{Teliz_toza}}

Digdatol batlize tigiyir, va koncoba mea dadiyir. Aelepeyer eke tabiyir. Koe nuda ke wida, kotviele koolaniyir pune lente kolanixo ke kota mona va ranyes wiiskik kalis va yon diolatazukoy wiyir. Korik va sinka ko yon tukotran num riwe twawes eyelt pu in ziliyid.


Digdatol va batyon eyelt disukeyer. Kotliz laniyir, zo aloyayar. Va bat wiiskik kotvielon toz disukeyer, viele in kaliyir : « Laxi la la ! », va sinka ko konak cugote tukotran eyelt mbi ziliyir. Azon dimdenlaniyir.


Digdatol pu wiiskik kaliyir :

— Ex ! Va witca djudimdil ?


Wiiskik kaliyir :

— Va anton batcoba pu felis Lorik en erú !


Sulem kaliyir :

— Luxe jin, djutí wiiskik !


Digdatol loplekuyur :

— Gu jin djumikazilil ise va rinyona diolatazukoyera djutavel ?


Wiiskik dulzeyer :

— Gue, va diolatazukoyera taveté, nume batkane roburiefadatal !


Digdatol ve vanpiyir wiiskik ise wiiskik va witca ve dimdiyir. Wiiskik va diolatazukoyeem bulkayar. Remi taneaf viel, va kot diolatazukoy negayar nume va inyon eyelt dem sinka cugote tukotrayar.


Digdatol koe kiray senyayar aze toz pulvidayar. Vanion toz aeleyer nume va toloy eyelt gu epiteem rumkayar. Laniyir voxe ba keldalik va tazukoyeem al ilsetikeyer ! Va diolatazukoy mea grupeyer, ostik mea rodegrupeyer da toktan tiyir wiiskik.


Acum, batlize zavzayar, bonaf !

|style="vertical-align: top;"|
{{Krent_Iyelt
| xanto_vergumvelt = '''L'hyène et l'aveugle'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Sererava Sererava]
| xanto_evla = -
| kalkotavara_vergumvelt = ''Digdatol is wiiskik''
| kalkotavara_kalkotavasik = Marjorie Waldstein
| kalkotavara_piskura = -
| kalkotavara_evla = 2013
| webesik = [[Favesik:Marjorie|Marjorie]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}


[[Loma:Reiz|Digdatol is wiiskik]]
[[Loma:Senegalaf reiz|Digdatol is wiiskik]]
[[Loma:Sereravaf reiz|Digdatol is wiiskik]]
[[Loma:Ayoltaca yo|Digdatol is wiiskik]]