Wira va klita ke Gleba alieyesa va xanik

{{TextQuality|75%}}
<div style="margin-top:1.2em;font-size:140%;">
<center>'''Gleba alieyesa va xanik'''</center></div>
<center>''Mongolafa vunda''</center>

{{Krent_Iyelt
| xanto_vergumvelt = '''La foudre qui a battu le khan'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Mongolava Mongolava]
| xanto_evla = -
| kalkotavara_vergumvelt = Gleba alieyesa va xanik
| kalkotavara_kalkotavasik = Sabrina Benkelloun
| kalkotavara_piskura = -
| kalkotavara_evla = 2007
| webesik = [[Favesik:Sab|Sab]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}

Lekepon, xanik ke greltam tuke kaza al vanpiyir kulapaf. Bat xanik tiyir kulaf voxe dere tiyir ikorapaf ise va intaf ilkaf zanisik gilalieyer. Ikoruca me tiyir intafa antafa afra, dere tiyir nhukapik.

Konviele koyason koo rijust, do intaf kwik, sin gan xefto zo akoyed. Koafima se va kelt feyed ise edi buuyur ise mo mevtava kroayar. Meko bravakirafo xo tiyir. Bam crakepenon, tidu okol grableson, xanik besason va intafa taka kan lioza mo sid va int kabur ise va int kurdar.

Va batcoba wison, kwik va peya vannarir nume mo dey va feliik toz alier. Ba kota ediara kwik peyayar. Ware ise tolon ise baron.

Xefto jijamar, vexe xanik va aliepera levgar.

Voce da zivotc tuvumeltawer, kwik silukon senhayar, kan lioza va taka besar aze mezekason baton zavzar.

Arti gemelt xanik ranhar beka nemon rozekas yoke da koe kota bewa rotepeyer.

Va zanisik ware moe sid wir nume ier :

- Ex ! vungik, va int ranhel, xefto al tenuwer.

- Jin me rotí, zanisik dulzer. Gleba va jin al alier nume koe varafo alto roté.

- Benje, benje, nhukik ! xanik dulzer. Va jin dere, gleba al alier ise lanon loeke voxe vol ebdeé !


[[Loma:Kuda]]
[[Loma:Vunda]]
[[Loma:Vunda ke Mongola|Gleba alieyesa va xanik]]
[[Loma:Ayoltaca yo|Gleba alieyesa va xanik]]