Wira va klita ke Kev edegaora 08-08-1945 Camus

{{TextQuality|75%}}
<div style="margin-top:1.2em;font-size:140%;">
<center>'''Kev edegaora : felavil ba 8<sup>-e</sup> ke anyusteaksat ke 1945'''<br/>dene ''Combat'' fela gan Albert Camus</center></div>


{|width="100%"
|-
|rowspan="1" style="background:#FFFFF5; border:1px solid #F0F2CE; vertical-align:top; padding-left:1em; padding-right:1em; text-align:justify; width:72%;"|

'''Felavil dene ''Combat'' fela'''

Tamava tir inde tir, trabe abiccoba. Va batcoba, kottan mali arinton grupecker, kan pelkafa dolpa sure tuyena gan olyak is feleem is givalafageem icde edegaora. Tire grupet, vanmiae jontika seramafa senura, da beta zolonamafa widava kan aora dem pwerte vas nugaviputivipot zo rokalvilar. Yona amerikafa fela isu englafa isu francafa  divgoled ise va direkeugal is darekeugal is droka is dilifamafa kubla is gejaf keskeem is gaderopaf danekseem is dace volruptesa adala ke edegaora glabon arbad. Jin, kan tanoy blayak vildeté  : foalkaf seltay va bocafa eka ke govituca su artfir. Va dofa ksera ok grufa favera va opaf olgalicukseem mon stekeon fu gonarat.

Keson, gonotrakut da kotgrupera va man kosmaks taneon kozanis va tela lopelkafa vilasa riyomera exaksana gan ayik mali konaka decemda, tir volxariaca. Dene tamava bildena gu kota tizafa gosara, merotisa va beta stujera, brunafa gu malyerot is kaluckacka ke ayikeem, opa va grustana pisonara ektudar, voxe metan, vaxe rotir elupkaf klokedjik, fu modovar da co godestar.

Kosmaks kare intafa tira zo koverted ise zo gosenud, ise pu tamava zo godakted enide ayik va rieteracka va intafi bali di dadir. Vexe anamplekura va batyona razdara gu loskaf ok braf suteroteem en tir rotabina.

Ixam, dene nakena tamava figon gaeleyet. Re warzafa polera pu min zo drager, i polera kotkase tisa parmafa. Va bocafa fala pu ayikeem ape zo firvir. Nume batcoba turkon rotir yonta ta manafa piskura. Vexe arse co gotir detce ta konaka undera is jontik amlit.

Ison, va abditrakus berpot dragen gan feleem ardume fentalon gonemudet. Viele wit da dobulaf sutelasik ke Reuter Lafaga dakter da bat ganduks va biogeem tutinar oke va dace gorakseem ke Potsdam mudzesir, ise  katcalara va tigira ke Rossia koe Koenigsberg ok Turka kene Dardanos vedil co tir brunaca, volins rovelevaykat da bata dolpaja sume opafa fastuca lanon xialar.

Zo gildecké !! Ede niponikeem nope kalvilara va Hiroshima fidwayanon fu dunur, wauneté. Vexe va arcoba dam gorara va alutara gu man astirbaf warzot vol djuprozulté, i va alutara loon votcukafa mu ageltucaf walvedeyaf selt lize kona nelkafa gijarotiaca va roka vamoefa gu tela ke cosam ik mialukaf cos me daditir, lize geja, i ralaku tuparmayanu gan antafa keska ke ayagruuca, va mola ok enilt ke mana ok ara soka mea rupteter.

Lente tueaftasa siakeem fenkus lent ayikeem, ware lokiewon kozwit da dili tir antafa lyumara vodasa va jupara. Mea tir blikera vols benplekura goticnisa mal saneeem kal bowereeem, i benplekura ta kotvieli narara va kusto ok ova.

|style="vertical-align: top;"|
{{Krent_Iyelt2
| xanto_vergumvelt = '''Journal Combat : éditorial du 8 août 1945 par Albert Camus'''
| xanto_sutesik = [[Albert Camus]] [[Image:ACamus.jpg|40px|right]]
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Francava Francava]
| xanto_evla = 1945
| kalkotavara_vergumvelt = ''Combat'' fela : felavil ba 8<sup>-e</sup> ke anyusteaksat ke 1945 gan Albert Camus
| kalkotavara_kalkotavasik = Damien Etcheverry
| kalkotavara_piskura = 
| kalkotavara_evla = 2014
| kalkotavara_klita = 
| webesik = [[Favesik:Troubadour|Troubadour]]
| krentduga = [[Image: 75%.jpg]] Gotolbeliyina
| kseva1 = #FFFF80
| kseva2 = #FFFFC0
}}
|}

[[Loma:Gaderopa]]
[[Loma:GaderopaRijna]]
[[Loma:Camus (Albert)]]
[[Loma:Ugalpulasiki]]