Wira va klita ke Kudeem ke Aisopos : Okol

__NOTOC__
{{TextQuality|100%}}
<div style="margin-top:1.2em;font-size:140%;">
<center>'''Kudeem ke Aisopos : Okol'''</center></div>
<center>''Savsugalafa ellasafa kuda''</center>


{{Teliz_toza}}

== Okol is astol ==

Ayik va okol is astol digiyir. Lanvielon sin koyad. Moe kelda, astol pu okol kalir : « Va vajki ke jin naril, ede va jinafi bli lotil. » Okol oblakabuder, aze astol, cuerses, luber aze awalker. Bam feliik va kotcoba mo okol vajar, is va dace astolalma. Kle okol repaleson kalir : « Ax ! tí mefalaf ; mancoba ben jin batinde al sokir, kax ! Lecen va pornam me al djuvajá, kle re burersé, va kotcoba don dace alma. »


''Bata kuda nedir da, ede gijik va pinik vangluyar, pune sin va bli soravaldad.''


== Okol is jaftol is vakol is ayik ==

Viele Zeus va ayik reduyur, va krulderama anton doziliyir. Vexe ayik, malfaveson va gruuca, va mona miv vegeduyur aze koeon sokeyer. Okie, lanvielon, fent al tutizaweyer ise toz muvayar ; okol mezavzagis va ayik vanvulteyer aze eruyur da di zo bravayar. Vexe ayik dakteyer da anton kredeon di askiyir : okol va konaka intafa titisa tanda di co-goziliyir. Okol balte kserayar. Vanion, jaftol va int dere atoeyer : jaftol va sazaj dere me tabiyir. Ayik milinde dulzeyer da me di co-kazawayar vaxede va konaka inafa tanda mbi di co-ziliyir ; jaftol va pak ziliyir nume zo dosteyer. Adim, vakol fentawalkes dere artlaniyir, nume xaadason va pak ke intaf titis ugal, va brava seotayar. Batse daneks : viele ayik va ugal doziliyin gan Zeus kotaskir, pune sotir karaf is vonaf ; viele va Okol ilanacek artfir : sotir aliaf is calgaf ; viele va Jaftol ilanacek kofir : sodjukudirgar ; viele arti blira, bak Vakol ilanacek, sovanpir zidesik is buusik.


''Bata kuda gu zidaf is wareskaf guazik zo co-rewar.''


== Okol is okolropesik ==

Okolropesik va olyuba ke intaf okol gidubier aze doler ; kevoke afizcekon gibepragar ise gibefibastar. Okol pu in kalir : « Ede en djumel da tí listaf, pune va olyuba tori sinkara va jin mea dolel. »


''Bata kuda nedir da erbafamik va wawik kan brostasa dewitca is derbera merizer edje guon sokaldeswar.''


== Okol is sayakik ==

Sayakik, remi geja, va intaf okol gu olyuba al sinkar, va dositik bak kobara is wupe. Vexe, kaiki geja, okol ta levetirotaf ol is remburera va vajap zo uner, nume gu bapla daletoe anton zo gestur. Wori ara geja fu sokir, nume loron gu inestala feliik va okol fexar ise va int ervoar aze mallakir. Vexe poiskaf okol kotboron luber. Pu feliik kalir : « Va int vanmia nugervoliik fu aykal ; lecen va jin okol gu astol al betal. Tokkane va astol gu okol djudimaskil ?»


''Vuxiskugalon is tilderugalon, volkalugal zo gomevulkur.''

{{Kudeem_Aisopos_iyelt}}


{{Kudeem_Aisopos_krent
| luz_luz = Okol
| luz_abdueluz = [[Kudeem_ke_Aisopos_:_Wegidol|Wegidol]] 
| luz_radimeluz = [[Kudeem_ke_Aisopos_:_Deaxol|Deaxol]] 
}}

[[Loma:Kuda]]
[[Loma:Aisopos]]
[[Loma:Kudeem ke Aisopos|Aisopos]]