Wira va klita ke Nasbeikya ke wawaf wiiskik

{{TextQuality|75%}}
<div style="margin-top:1.2em;font-size:140%;">
<center>'''Nasbeikya ke wawaf wiiskik'''</center></div>
<center>''Koreaf reiz''</center>


{{Teliz_toza}}

Lekepon koe Korea wawaf wipitesik yoltkiraf gu Shim Hakkyu bliyir. In is sagafa kurenikya malipon tiyid nasbeikiskaf, voxe oxam arti konaka abrotcifa tanda va blikera va swavikeem va listapafa pintikya ton Shimchong sinon rozayana ve nasbayar. Vexe kax, koblira va gadikya ve tubaliayar nume in ve awalkeyer. Guazaf Shim antaf va nasbeik cugon rotison gaayar voxe sin va yona eaftafa duxara ekeyed.

Shimchong tiyir kalveges is kalobras velik, va gadikye dositas mali grupavlara is doon wipites mali grupulvira. Boreon vanpiyir listapafa yikya. Konviele guazaf Shim antion wipiteyer voxe ve ardeotayar aze ko aludevaf anduranarilt. Viele koe lava tiyir, giopon sugason va dimtidlanira is belcon daboreson va volfala is wanda, va kalisa titufa puda ve gildeyer :
:− Guazik, su terektá da va rinafa wiiskuca arutal. Va 300 eyeltcek dem zaday wetce firviks pu Buddha feliasik ko dopewa nume cin gableson bliketev enide rinafa wia dimar.

Zijnaf vox pof nubeem nuvelas tidu kelt va skotcas meem ke guazaf Shim bam ve vangiyir nume divu narilt divimpayar. Shim tiyir nhardepes is kalpokoles maneke va debalaja ugaloron ve vulkuyur ise meundeson ve abdiplekuyur :
:− Va agralaf eceyik rin grewá. Grewapá ! Va bat 300 eyeltcek dem zaday firvití, abdiplekú !

Vanion, radimi kalubera ke saipuca, guazaf Shim ve vofayar da va baroy ekedacek dem zaday ledam 300 eyeltcek pu dopewa mekane dace rofirviyir.

:− Shimchong, pwadeson va rupaja pu nasbeikya sielon ve kaliyir. Va tokcoba gonaskí ? Tiyí daavapaf ise tamava jinon nuvelayar ribiegafa. Lan ayik va jin al nokied ise ar sol nubeem va erba al solimpad voxe eceyik tiyir agralaf. Va inafa agraluca opelon djugrewayá, nume va jinon askiyina coba disukel. Mana eaftafa volkalaca arpumad da va min tazed ede va Buddha al kantá.
:− Me dwil Gadik, va rinon firviyin zaday pu int tiskatá, nasbeikya ve karavalduyur.

Eldeon abdi dimodera ke gadikye, Shimchong laniyir aze va okilik va dolekikaf toteem ve wiyir.
:− Batliz tí enide pu Munestiko Gazik va int firví, vexe ikaon va 300 eyeltcek dem zaday pu dopewa yoltoe jinafe gadikye gofirvil.

Dolekaf okilik ve zo tudaavapayar kire Munestiko Gazik, gazas va ronefa bira kev in is toteem zideper nume va rotara is zivotcara tsentesa is tubelxasasa va kota tota van Sinia me ten stakseter. Ta grizidesara dolekik va listapafa ketikya pu in gowetayad vexe va yasa gadiafa gu wetara va tan nasbeik men al trasiyid.

Dolekaf okilik va bata dragera kle ve naleyer, nume radimi bulura do Shimchong moe tota, askiyir da zaday ko dopewa zo stakser.

Oxam baon guazik va bali ke nasbeikya ve givuyur nume oye da va wia me al dimdrasuyur ise mecoba tudaavayar, ko nigerapa boreon flayduyur.

Titi koyara bira tiyir vumeltafa vexe boreon kelt tulukopaweyer ise dratceyer. Lava taneon perzapafa boreon toz lembieweyer remi da div yon rujodaj koafima bimileyed ise suka va italeem kolpayar. Detceem is ekastarodeem golde oratizuca empaweyed. Dolekaf okilik mo za va Shimchong vagekiraf gu kureragem bam vanstayar ise, beka in al karavalduyur da ko runta va int miv co-impar, in va inaf nubeem isu nugeem acon al gluyayar. Kabdue kot birik mafelason bores icde inafa takreluca isu nasbealorbuca, Shimchong va blikera aulon negayar aze ko bira ve zo divtotayar. Viele ko runta ve zo ilwiyir, bira dimon ve tuvumeltaweyer.

Simchong tit fentafa lava vanludevaweyer. Remi da lolodaludevon lubeyer, lava anameon laizon ve tujebesaweyer nume ve vofayar da grugandiyir. Mafelapas anamon disukeyer solve da zanisik ke Munestiko Gazik va in vanpujeyed. Div gluyasikieem va in ve tunuyaweyed aze kal inafa cuisafa levebirafa berma fuzodeyed.

Batlize in kalaf sokeyer kire kalit da swava ke inafa gadikya dere sokeyer. Vexe arti rekola, va welfatamava is abegafe gadikye ve djutolwiyir. Intafa itupuca tugabentaweyer nume Munestiko Gazik di katcalayar. Konviele va in ve tupisayar enide kalir :
:− Kaikion tabí da va rin gabentaf wí, Shimchong. Al vofá da rinafa yasalorbuca isu abidara tid logijafa dam tela ke bet grupen awalkolik. Wira va mana rinafa abdikerelera icde kimtafe gadikye va jinafa takra konter. Acum ta grablera va abidanhara ko welfatamava va rin fu dimstaksé. Nume Munestiko Gazik ton nilumimwa va Simchong ve artazukayar.

Nume gulafa nilumimwa arte kuksa kene krimt ve zo trasiyir, nume onasik woen gan inafa listuca ve gorayar da pu gazik yaler. Battan malimon tiyir nhobraf ise kottan grupeyer da in tiyir wareskapaf. Acum kottan pokoleyer da bata ribiegafa imwa va in dimon co-tudaavar.

Va imwa taneon wison iteem ke gazik mafelason ve jebeyer. Va onasik dison ve gableyer aze ve askiyir da niluma ko pilkovafa maga zo inker lize in jontikbartivon rozavzayar ise va inafa listuca kexon romafelayar. Ise kotmielon Shimchong va imwa divlaniyir aze ba vanafiz dimon kolaniyir. Ugal remiayar voxe skewera ke gazik me tulegijaweyer.

Bak talapas mielcek, remi da gazik me rokomodeyer nume koe berma krabeyer, ve vofayar da poke maga dem nilumimwa tiyir. Ko maga ve kolaniyir enide leve taelaftara va niluma mafelar voxe wiks tiyir loribiegapaf, ayikya listafa maneke rinafa kagaelara ve zo gabeyer.
:− Toktan til ? in ve eruyur. Kas til tacedikya pisa enide va jin webel oke til geltraf ?
:− Anton jin, Shimchong ve kaliyir, jin blis koe gulafa imwa.

Werkapaf, in ve yovayar da va int preyutar vexe viele ve rwodeyer nilumimwa al griawiyir.

Batinde Shimchong ve vanpiyir gelukik ke gazik. Cuisafa kurera sokiyir aze kalapon belcon di bliyid. Vexe gazikye va gabentapaca ke warzafa gazikya peztaleyer. Acum, konviele va in bores koe matela trasison ve eruyur :
:− Abegaf kurenik, tabí da va rin ikuzas wí. Va rinafa galpera, va beta, kalil nume kozilití.
:− Va antafa coba jugemé, Shimchong ve dulzeyer. Va sanef lorotap ta kapara va minafa kurera grustal ise va kot wiiskaf wipitesik ke gazaxo ganel enide va kapara paked. Batcoba va jin tukalatar.

Gazikye va divulafa erura ke intafa gazikya ve vansayar acum kotlize koe gazaxo ta lorot va kapara va kurera kot wiiskaf wipitesik ve zo ganeyed. Barvielon uliyid ise estuyud ise kotvielon kadimu marwida iayana koe remawiso kir gemapafo leso warzafa gazikya va sin disveyer, pokoleson da ironokaf wiiskik co-tir gadikye. Vexe batcoba tiyir giopafa.

Bak ironokaf viel, solve da tuvel zo fenkuyud ise gazikya va kota pokolera al drasuyur, lorapayar. Zanisik va gavef wiiskaf wipitesik aloyayad. Ise nemon viele tuvel zo fenkuyur, ironokon itason gazikya ve vofayar da leve gopa ke abrotcifa koyara is kolpanafe vageje guazikye me tiyir artan dam gadikye.
:− Gade, Gade ! in ve divieyer, in tir jinafe gadikye, iskec da in kolanir !

Guazaf Shim, ergayen gan bata yastapafa puda, ve yolkayar.
:− Aigo ! Shimchong ! va in ve rozayar, kas tir tacedik ok awalkik dimblir ? Jinaf nasbeik ! Kas en tir rinafa puda ? Iskel da va rin disuké !

Wareware, koe seramuca, guazaf Shim va intaf sok ve vulkuyur.  Ve itafenkupuyur, vulkuson va wiiskuca acum batinde ve vofayar da dimon gruwiyir. Kabdueon tiyir nasbeik lolistaf dam meviele al gestiyir. Shim ve daavaboreyer ise va in ve dabluyur ise in dere daavaboreyer. Boreon galovapa ve sokiyir kire batvielon kot tis wiiskik djukozwis va Shimchong va wia davon ve dimtrasiyid.

|style="vertical-align: top;"|
{{Krent_Iyelt
| xanto_vergumvelt = '''La fille du pauvre aveugle'''
| xanto_sutesik = 
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Koreava Koreava]
| xanto_evla = -
| kalkotavara_vergumvelt = Nasbeikya ke wawaf wiiskik
| kalkotavara_kalkotavasik = Damien Etcheverry
| kalkotavara_piskura = -
| kalkotavara_evla = 2008
| webesik = [[Favesik:Troubadour|Troubadour]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}
|}


[[Loma:Reiz]]
[[Loma:Vunda ke Korea|Nasbeikya ke wawaf wiiskik]]
[[Loma:Ayoltaca yo|Nasbeikya ke wawaf wiiskik]]