Wira va klita ke NyagaceemScapin Nakileem03 Nakila03

{{TextQuality|100%}}
<div style="margin-top:1.2em;font-size:140%;"> <center>'''Nyagaceem ke Scapin'''</center></div>


{{Teliz_toza}}

==Bareaf nakileem, bareafa nakila==

''Zerbinette'' : Ax, ax ! Diveon djugaelemé.

''Géronte'' : Pu jin dodetel, movogá !

''Zerbinette'' : Ax, ax, ax, ax ! Puvesa rupa ! Man ortasik bat guazik !

''Géronte'' : Mecoba puvesa batlize ; nume me gokipegal !

''Zerbinette'' : Va tokcoba ? Va tokcoba sugdalal, weltik ?

''Géronte'' : Sugdalá da va jin me gobalgel.

''Zerbinette'' : Va rin ?

''Géronte'' : En.

''Zerbinette'' : Tokinde ? Toktan va rin djubalger ?

''Géronte'' : Tokdume batliz lanil aze ben jin kipegal ?

''Zerbinette'' : Batcoba va rin me icder, ise va reiz ant kipegá, va reiz biwe gilden is memperses. Me  grupé kase batcoba tir larde zo icdé ; vexe va randayera ke nazbeikye va gadikye ta ebidura va erba  atedapon gikrupté.

''Géronte'' : Ke nazbeikye va gadikye ta ebidura va erba ?

''Zerbinette'' : Gue. Zobe va jin xuval, pune va arienta djuprokalitickí, ise gan pwadera va kota grupena  rupa zo gilomgá.

''Géronte'' : Va bata rupa kalil, vay !

''Zerbinette'' : Finé. Kalison va ina, va vugcoba arpumá, ise bata stuva jontikedje me rozavzar birgafa.  Xuye tigiyí vanmiae blay dem korik yoltan gu misrik, dan winkawinkon mwarneson va falanya gikareizud ise  konakviele va ara jontikcoba pwaded. Artlanison va bata widava, yikye va jin ve wiyir aze va renara va jin  envayar. Batvielu, va jinafa tira isu kota lanira suver, nume linular dum bete yikye folise da beta  pulvira staper, da nope bet tiyaks inafa arienta malskuwer. Vexe dimdunumuyur ise va intaf taneaf  trakukseem turontamayar. Va intafa skera pu yontan dagis va jin razdayar, nume rabateyer da va jin ika  lana itaya djuprogiskeyed. Vexe arge ke arienta tiyir da jinaf fertik tiyir sokon gu cug yasanazbeik,  trabe dem abica erba ; ise va totcidik nek kulik gadikye dikir, va tel vugaf strik ke tamava. Kel ! Kas va  inaf yolt me co-setiké ? Aix ! Va jin pomamal ! Kas va kontan ke bata widava rodasugdal, va kontel fotis  tel vugaf totcidik ?

''Géronte'' : Me.

''Zerbinette'' : Tir dem bat yolt Ron… Ronte. Or… Oronte. Me. Gé… Géronte ; gue, Géronte, tire ; batse tel  strik, al trasí, bat ridolik inde kalí. Icde jinafa rupa, tegisik va bata widava re al djumallanid ; ise  jinaf fertik golde erba va jin co-tazdayar ede, ta levimpara gu gadikye, gan tegisaf zanisik me zo co- greleyer. Va yolt ke zanisik, grupepé : in tir Scapin. Tir merodolunenik ise va kota rozilina siskera  soriwer.

''Géronte'' : Ax ! Scapin, man facilik til !

''Zerbinette'' : Batse inaf zanudayan suzenk ta restera va kosik. Ax, ax, ax, ax ! Setikeson kalkipé. Ax,  ax, ax ! In va bat totcidikaj al kevlanir, ax, ax, ax ! Aze al kalir da gozason kene molt do nazbeikye,  ix, ix, sin va trukafa efruda al wiyid liz zo djukolaniyid ; jotaf turkik al fariuyur, ax ! aze edje  estuyud, efruda va grocela al kallapiyir ; aze jotaf turkik va ant in kal domega kan tivam al dimstakseyer  enide in pu gadikye ke intaf feliik gokaliyir da nazbeikye ko Alzajaira zo co-maljupayar vaxede alub- decemoy erbolkap fure di zo co-maneyed. Ax, ax, ax ! Bat ridolik, bat strik polepeyer ; ise krenuguca mu  nazbeikye va divulafa aliera gu totciduca torler. Alub-decemoy erun erbolkap tire tid alub-decemoya  nubemara va jin. Ax, ax, ax ! In va bata itaya gu intaf koepak me lajumalnarir ; nume inafa puidera askir  da in va decemoy kipeaf mergil guzekar enide va nazbeikye di dimnarir. Ax, ax, ax ! Mo grocela kal efruda  ke turkik va malyerot djustakser. Ax, ax, ax ! Va zanisik yaner enide in va int gu nazbeikye di ikarundar  vieli in va medjuzilina erba al flavatar. Ax, ax, ax ! Ika alub-decemoy erbolkap va balemoye ok aluboye  guazafe vage vodafe gu leon bar-sanoy divgir. Ax, ax, ax ! Zanisik va volebokuca ke inyon drageks kottode  danedir, ise kota undera gu djam « Oyox, tokdume mo bata efruda in al lanir ? » ok « Rotapsana efruda ! »  ok « Turkik relmesik ! » djamae, kranaveson zo zokever. Tere, bantan jontikedje al brer ise al repaler…  Vexe va jinafa rupa me nukipegal. Va tokcoba icdeon kalil ?

''Géronte'' : Kalí da bate yikye tir webdik, jlokik esteten gan gadikye gu puon randayeraja ; da misrikya  tir volstropik, ebledjik, viele va porik lutsagar ; da bantel grupaskitir da ina va gruspera va  porayasanazbeik parmon someguzekatar ; ise da zanisik tir gomiliik stakseten gan Géronte abdi direviel mo  kumba.

{{NyagaceemScapin_iyelt}}


{{NyagaceemScapin_krent
| nakileem_otuk = Bareaf
| nakila_nakila = 3<sup>-eafa</sup>
| nakila_abduenakila = [[NyagaceemScapin_Nakileem03_Nakila02|2<sup>-eafa</sup> nakila]] 
| nakila_radimenakila = [[NyagaceemScapin_Nakileem03_Nakila04|4<sup>-eafa</sup> nakila]] 
}}

{{NyagaceemScapin_lomeem}}

[[fr:FR_NyagaceemScapin Nakileem03 Nakila03]]