Wira va klita ke Ploda is astol is peya

{{TextQuality|75%}}
<div style="margin-top:1.2em;font-size:140%;">
<center>'''Ploda is astol is peya'''</center></div>
<center>''Euskadiafa vunda''</center>


{|width="100%"
|-
|rowspan="4" style="background:#FFFFF5; border:1px solid #F0F2CE; vertical-align:top; padding-left:1em; padding-right:1em; text-align:justify; width:100%;"|

'''Darekeon'''. Lekeon, koe lana mona, baroye nazbeikye tid. Lanviele tele taneafe pu gadikya kalir  :

-  Gadya, va yona begxama kalion epul enide va tufa azon di aneyá  !!

Gadikya va begxama epur aze nazbeik ilon mallanir. Edje batinde koyar, va Jesus jiomik is Petrus tumtik kene kuksa kevlanir. Jesus jiomik va in rozar aze kalir  :

-  Kalil, yik, kas ika gablera va cin kaikplekutul  ?

-  Gue efe  !

Nume yik va sin kaikburer. Kle Jesus jiomik va ploda wetce gablera zilir ise kalir  :

-  Gil, va bata ploda naril  !! Kotviele aeletel ike siputetel, anton gokalitil  : «  Ploda, va int divatcel  !!» Nume, mo bata ploda, va kotafa adrafa ulira isu estura vere daditil. Tison valeapaf da ixam al tufawar, yik va kelda kal mona fure dimdenlanir. Aze lanir, gin lanir. Lansielon va yorida artlanir. Ba moilavara, va tciamafa ploda pu tilikeem ke yorida nafer ise kalir  : 

-  Vay, pu ploda me laxukalic  : «  Ploda, va int divatcel  !!»

-  Gue, efe  !

Vexe edje yik moe ilava biwe tigir pune gidatilik pu ploda kalir  : «  Ploda, va int divatcel  !!»

Acum vere, ''xamp'', ''xump'' (  dum kan diola  ), cug blot isu ulida mo ploda aykawed  ! Va trakura va ciwara ke kotbat korik iské  ! Eldeon moida mil aelepes yik va yorida al illanil pune va ploda valev aal divatcer aze kalir  : «  Ploda, va int divatcel  !!»

Vexe kore kalir aze dun tolkalir, kimtafa ploda zavzar vlardafa. Nume vonegepes kimtik dimdenlanir neke me al tufawar. Fure moion tel toleaf nazbeik pu gadikya kalir  :

-  Gadya, va yona begxama enide azon di tufawá  !!

Gadikya va begxama epur aze nazbeik ilon mallanir. Arte mila kuksa, va Jesus jiomik is Petrus tumtik dere kevlanir. Jesus jiomik luijer  :

-  Kalil, yik, kas ika gablera va cin kaikplekutul  ?

Jesus jiomik, bam, ta gablera, va astol zilir, kalison  :

-  Gil, va bat astol naril  !! Kotviele va erba olegatal, pu bat astol kalil  : «  Kobal, jinaf astol  !!» nume bat astol va jontika is cuga moava pu rin vere zilitir.

Mil yik, valeapaf gu mana tufawara, mo kelda vere dimdenlanir. Va mila yorida dam berik sielon artlanir. Bam, ba moilavara va astol nafer, kalison  : «  Vay, pu ploda me laxukalic  : ”  Ploda, va int divatcel  !!“»

-  Vay, pu bat astol me lakalic  : «  Kobal, jinaf astol  !!  »

-  Gue, efe  !

Vexe edje yik moe ilava biwe tigir pune gidatilik pu astol kalir  : «  Kobal, jinaf astol  !!»

Nume astol va jontika is cuga moava me dun epur. Nume ciwarapa ke kotbat korik. Sin va bat astol gu ar koton milaf betad, aze va int amlitapon moilavad. Eldeon, vanida mil yik va yorida al illanir pune pu astol kalir  :

-  Kobal, jinaf astol  !!

Vexe, va ewa skalec  !!, astol wetce jontika moava va bana arcoba epur (  ise va coba tisa diepileckec  ). Nume mil yik, awuzan gan mana voltufa, muteskapaf di dimdenlanir.

Fure moion, tel bareaf nazbeik pu gadikya kalir  :

-  Gadya, va yona begxama kalion epul  !! Jinaf siluk ta tufawara  !

Gadikya va begxama epur aze nazbeik ilon mallanir. Arte mila kuksa, va Jesus jiomik is Petrus tumtik dere kevlanir. Jesus jiomik erur nume in va toloy sin kaikburer. Nume Jesus jiomik va peya wetce gablexa pu in bulkar  :

-  Tazel, Maria, tazel  !! nume… di wil va coba di wickil  !

Yik grewar ise kiavar. Sielon ko mila yorida artlanir lize toloy berik al zo elaked. Moilavason, pu toloy tilik kalir  :

-  Vay, va bata peya mu jin kali diregazda suckuc  ?! Vexe ta winafa giwara, pu ina vol djugakalic  : «  Tazel, Maria, tazel  !!»

-  Gue, efe  ! Vol  !

Vexe moida yik al moilavar, tilik va peya narid aze kalid  :

-  Tazel, Maria, tazel  !!

Bam vere peya toz tazer, ''krak'', ''kruk'', elodeson va bet plek isu ayik is dratceson da va kotcoba fu arber. Nume tilik toz bred, aix  ! batviele, axc  ! banviele. Va peya vol rotazavzad. Ina tazer ise dun tazer  ! Maninde sopron golde rondara yik senyar. Tuoviskan tilik iegad  :

-  Vay umbedav  !! Va peya azavzal  !! Ise ploda, va int divatcel  !! Kobal, jinaf astol  !! Va kotcoba pu rin dimdubietev  !

Mil yik kalir  :

-  Azavzal, Maria, azavzal  !!

Nume va peya azavzar. Azon, moe ''Kobara'' Astol, dem ''Va int divatcel'' Ploda is ''Tazel Maria'' Peya koe nuba, va mona dimdenlapir. Do gadikya is toloy berik, kulon di blir, ant Lorik gruper edje  ! Ise kle ede sin en al blid, pune arse radimion al awalked.

|style="vertical-align: top;"|
{{Krent_Iyelt
| xanto_vergumvelt = '''La nappe, l'âne et le bâton'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Euskarava Euskarava]
| xanto_evla = -
| kalkotavara_vergumvelt = Ploda is astol is peya
| kalkotavara_kalkotavasik = Damien Etcheverry
| kalkotavara_piskura = -
| kalkotavara_evla = 2014
| webesik = [[Favesik:Troubadour|Troubadour]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}
|}

[[Loma:Vunda]]
[[Loma:Vunda ke Euskadia|Ploda is astol is peya]]
[[Loma:Ayoltaca yo|Ploda is astol is peya]]