Wira va klita ke Pone ke mawakwikya Luz03

{{TextQuality|100%}}
<div style="margin-top:1.2em;font-size:140%;"> <center>'''Pone ke mawakwikya'''</center></div>


{{Teliz_toza}}

==Bareaf luz==

<div align=right>Remi 18 ke lerdeaksat.</div>


Regazdon, taneavielon, va mista tcokeyé.

Ixam dakteyé da, beka me abidaf, soe tiyí alkafamaf… Bettan ae rokalijir ike rotaskijir, voxe alka zavzar alka. Kulik rotir rofiander, voxe alka govetir dene korik dum min… Ae grupé da pilkovik va ina atedon kouned, da jontik adlutik isu tucpastikya me kload… Me zolonafa. Viele kontanya tir volkalafa ~ ise koe bata exava, lofereon dam bettan, ~ anton batcoba kokenibesa va puidera… anton batcoba… is rena… En, vexe rena, tir ara vinurinda… Acum, dace koe vollorbafa mona, va mista meviele gracayá. Taneon, mista, tir didara, deasera, ugal wan gu yone vieleafe arge ke monaja… Nelkon tir yon kakeven palik ik yona levravena rupa ik yona rungrupesa katecta… Ax ! ede, ba divlanira va amuda ke Assomption, va konak guazaf weltik oblakatintes va kon vosentaj co-djuterektayá, batlize revielon rotir me co-tigí !…

Revielon, dimkiewar. Awaltanyar, tan braf awalt tuplinas va avlara is tulegamias va gabentuca… Me grupé dume, turestan gan bat faltaf is moavukaf rielcek, tí kolukamaf gu takra…

Arte uja vas decit-alub-decemoy metrolk sokev. Stasa kelda tir agralafa… vristafa binkama wale yona gleida isu govitafa raneta isu batakafa divdaakenyesa toresta…Jin, va batakafa toresta albá. Va konakcoba remsetiké, viele tiyí velik… Rade batcoba, tawaday tir dum bet tawaday… mekon tconges. Mantaf krant, az banlize arte krant, yona datca. Koe krant kuksa traspur ; moe datca aalxo tigir… kotcoba besana gan italk ke remawisa is moavukafa bra, eron gu jin preyutarsas va patectoy.

Atedafa, va int gu breizafa tuwava gusagá… Koe fortey va ina dí. Meka nutir lilistafa, meka va gloga loeke pulvir. Dace vanmiae yon lokulaf is losudaf normandaf tawaday, tí beviaf gu vayka is bata folvafa is wafafa bira lize kobliyí… Ise bat levgon divrozan setikeks mo kolukuca ke bat rielcekany va kexaf rujod plekur.

Moo kelda, va yona ayikya isu ayikya kakevé… Do adlutaxoikye leve ma, sina, dum jin, va mista dere lanid : yon burmotasik iku mawakwik iku kuskik, vaf is gamiaf is vion lanis dum viklas bonol. Maninde tid vagekirajaf, ton kapaboz, man eruiltkorik ! Va kola pezitcapon divdaaked, ise koe Paris tire me al zanivad… Sina va jin riliton disuked, kan belcon budasa is luntafa rilituca… Va jinafi edji isu krus gem isu flemafa buxitca isu kevuluva tanameyena koe dugak kum kusafo leso, djumason pintad. Jinaf vageeem vas weltikya va sina gevar, ise nelkon, ape, jinafa ekoltafa is glabafa burerinda. Sina va sint ladavad, va itapeem did, kimiskon artfenkud, pu sint nedison va jinafa tapega iku krinay. Nume laní, kafkedas is oriwaf is bagaf, ton ontinavukuda uulafa, ise ton laofa zatca kamadason va gem loras dum lupuno leso mo vlevef gratcot… Va tokcoba co-kalil ?… Jin, mafelanon tí valeaf.

Pokolaninon, gildé da sina pu sint tinteson kalid : 

― Inya, warzik ke Prieuré…

Lantanya, trelafa, pwertafa, kerajafa, gaflakolafa is porton nuburesa va dataf jivot moe grestkoron divpaklan nimateem, tce ta lokiewafa buyara, va jin kiceson domur, ton vafa is sobondafa kicera moe kutceem ke guazaf ulisik.

― Rin, warzafa mawakwikya ke Prieuré ?… Rinaf yolt tir Célestine ?… Mal Paris weti balemka artlapiyil ?…

In va kotcoba ixam gruper… va kotcoba grupenyar, milinde dam jin. Voxe mecoba relander, moe bato jivotkirapafo alto, moe bata avlemodafa vorpa, tulon bati Mousquetaire edji, edjipi kum ebeltafa pota dem bruxa sespawesa koe upa.

In wan kalir :

― Jin, yolt tir Rose… Rose weltamya… Dene Mauger W<sup>-ye</sup> soké… poke win… savsaf redakik… Va in rotir ixam al wil ?

― Me, Weltamikya…

― Co-rowiyil, vamoo gleida solparsasa va toloy pilkot… In koe matela kotviele tigir, dun matelas. Wan tir listikye, grupel !…

Lovion laniv, edeme Rose weltamya laxubelkur. Dum kuncanaf bonol mal larida azdar… Ba kota kagaelara, inaf ast adeer aze kaluber, azon gire adeer… Kuftosason va kot ravlem, ina kalir : 

― Deoné… Ox, maneke tamava re mejer… merofolina !

Azon, wali azdara is krumkara, va jin koldar :

― Fiste lanitil enide va jin witil, kiewaya… Ede va koncoba co-olegal… va pirdanya, va betcoba… me vustel… Va jotikeem albá, jin… Va galemacekam dem oglukxa ulitit, flideson… Jontikbata weltamikya den win lanid…

Ina abicedje waljoar, gaeloyer, aze kan lodomafa puda, odiaxakomon :

― Ise djay, Célestine weltamikya… ede djumel da rinafa twa den win zo maned ?… Batcoba co-tir loproyafa… Va pirdanya ke jin pu rin… Lanlaire W<sup>-ya</sup> va twa belir… va kota twa… Maneke gan malyesik zo laxulanyayar… Tolkalí… Me vustel.

Va ina grewá aze wan laniv. Beka inafo alto tislar ise tanamur, dum guazafa tota moe pofa bira, Rose Weltamikya dure lodrikon nukagaelar… Ise laniv, begarduson.

― Ax ! Va betara batlize trasitil, tire… Taneon, kiewaya, dene Prieuré, meka mawakwikya jontikedje zo sur… arse… Viele me tir Weltikya dimstaksesa, batse Weltikye genazbalasise… Eaftikye, Lanlaire W<sup>-ye</sup>… Va listikya, va vollistikya, va jotikya, va guazikya… nume ba kota toma, artion, nazbeik !… Ax ! mona zo gruper, benje… Ise kottan pu rin kalitil va coba kalí… Unenik zo sinkajar… va meka nuyuca dadir… gu ol zo anyar… Ise gu yona culimera, kotedje, gu yona minjara… En kusto, arse !… Opelon va rin wison, agralaf is dolapaf inde til, ape me til ta tiskirapa dene man totcidikeem…

Va kotcoba pwadeyena gan asadaronyikya, Rose Weltamikya pu jin gire pwader, dem loportaf arapeniks. Inafa godekalira tir tizapafa maneke inya va mejera ilgruper. Ikoruca va inafa gafla mocenyer… Ise ewotara va monikeem fipir, aotcenon gu koekaf arienteem ke kola. Beka va kotcoba ixam grupé, yona rupa ke Rose tid ebeltafa is gripokolesa maneke dimon tí gabentapaf. Nué kase lokiewon co-gomallapí… Tokdume va bagala co-goyová lize zo abdicenyé ?

Konaktanya va int gu cin zokeved, rilitafa is kactasa, vandositasa va kota razdara ke Rose gu votcukaf « Dire ! » divieks, ke Rose leleon divviavase is wan pulvidase :

― Vonik, Mauger W<sup>-ye</sup>, ise, antafe, kiewaya…Okon tí feliik… Arse !… savsaf redakik… tuwavafa, mex ? Mantel me grupofer… va exomaceem mekon gildar… zo djukaroper, zo djukadumper… albar da inafa grita zo kiewaginyir… da inaf nizdeeem zo tarkanyar… va estuksany… Ede dirnunik pokeon me co-tigir, in co-isker da gan bettel is bettan zo ortar… Tire, ey Lorik, dubiesik batlize me gracad !

Komay ke inyon gaben blayak is miabuditara pu jin va inafa tageltafa debala dene mona ke Mauger redakik ten razdad…

― Oyox !… Mex ?… Antafe ayikye wan rietese… Ison, soe dere kobara tir… Nume ta pomara, va oyikye fu segev… 

Ine tir falakirafe, bate Rose… Jin dere, jontikviele, dene guazikye djupozaní… Boikesa… Vexe, icle, aulafa, ise enipa tir… Ae in, lan redakik wan rietes, tir dinenses… Ise maninde gotir atedafa, kottol, leve krinca !…

Va widega koolanit… Ax en !… Me listamafa… Ina va Malesherbes bedom mekon vektar… Yona zionafa is vwepafa is vristafa vawila, is yona viga lize mona tid alestafa, mona ranyeson metigisa, mona ebeltafa, kum savsafa zaxanafa inta, dem ontinafu widlasu ragu is jivotkoraf zemosekaf vegem, kerdelon gu savsugal… Korik koolanis tid evakaf, prazdaf, ise va meke listafe yikye al kozwí… Raba ke widega tir vukunay. Lo vukunayiasik, me robildeyes va saftafa warzera pu iaxe, wan kobad… Ise, kadime loa ralpa, va yon kimtaf rabetaf lesay, va yone xowase ge, va yona ebeltafa nuba aliedasa va leltlegeja, wí…

Batcoba gu brigafa gabentuca ke xo ware loplekur… Ino co-nutir flint.

Batse asadaronyikya, pikayon ice tuvel, pu cin kicesa is kiavasa…

― Ta mista ba anyuste bartiv lanic ?… Jin, ta mista ba pere al laní… Va ugal ware dadic… Me djukolanic, abicedje ?

Rose grewar… Va jin gu asadaronyikya elogar, gu bata ikorikya rotakalisa va kottan… gu filpikaj, arse !… Azon va ceakaceem ke intaf feliik is zijnaceem ke une gire sisker… Erú :

― Kle, redakik va meka yasa dikir ?

― Va meka yasa ?… ine divier, exukese… Volgue, kiewaya, roklel… Ax ! volgue, in va yasa dikir, vox parvuajafa !… Jontika nutikya isu kosayikya… buldesik, erbiskik, jastrik… va in ortas… dubies… loeke… kottan rosonkeyer !… Relkafa… Acum, trakul da battode en vupuyú… va kotbata suroga gu mona aloyayá… Vexe, abegafa weltamikya, arbe jin, redakik moe bapla re co-senyer… Ax ! kimtye !… Tir valeapaf gu batcoba, re, en…

Beonakoron karaké, voxe ine me gildar :

― Nume ape, Rose weltamikya, in va rin kobafelatar ?…

Xeyon, ine ildulzer :

― Weltikye askitir inde kuranitir… tir nuyafe… Tire me turestá… Va mecoba erú… va dodera va jinafa kuba dace me erú… Numon dene ine abidason tigí… Vexe ine va blira gruper… va yon korik renas is erbafimon ropes is dumpes gruper… Me folil da tir likwestafe milinde konaktan espud, Lanlaire W<sup>-ya</sup> taneon… kalisa va mancoba icde cin !… Ine vepokik, volson, Célestine weltamikya… dadise va intafa kuranira… Arse !…

Moi bata uiveafa rojulara va redakik, va uja artlaniv.

Pwertafe Rose va jin me bulur… Vebar da va rova poke tela inafa nará, aze va yona blikera toz kalidar, toz abadedayar ise toz gamdasugdadar… Ax, bata uja ! Dem duskaf levgis renteem reme yolkasa galza, va baplaxe vektar ; dem saneg, bobas, putces, glas va yona starka, impadimas va yona rova, dere nutir widafe disukexaxe. Va yon lesay tuficayan gan megrupesuca anton wí, va yon viskkiraf art malken gan bogara… Anton tid saf tisik erus pu Lorik va koncoba kev kontan… Me rozimpá ise va fentinda titstisa ko jin isu keno pestalé… Rotir meka zopoka koe bata uja dace tigir ?… Kas atedafa ? Voldo zopoka me robliké… Zopokadank, in va jinaf ast az uvoona tukotrar… va jin konterser… dum koe rena. Ede va zopokapuda kotviele co-gildé, folinyí da meviele co-trobá… Batviele, ika zopoka, guazikya koe tama, dem faltafo wezo is ebeltaf sedokamaj moe epiteem, va rizafa is medolantiyina klawinda porton aliedar... Ise ware yon korik bobadas is putcedas, lor ke tiokadakola besas va blikedara ke gertik is yona dulzera ke rumeatcicesikeem. Ison mana divdaakeraja !… yona aotcena dakela ke cielka ik jaftolxe is tawa ik eeftafa bapla ik abdaf lelt… ik lurdiaweyesa drewa… Tire, sin tid gaariskapaf koe winka !

Mista divimpawer nume argawé… Moekote zo natcú tigison vanmiae lidunaykafa is lidevakafa tamava obransasa va jin. Meka listafa disukexa, mek listaf vageeem liz va trakura co-rotildé… liz va iteem co-rotukoluká… Meviele dum re lokiewon narú da tí tori glabuca is krinay… Lodame ilamsiskewé, dum bak mista koe Paris, jinaf kantayan pesteem kevotcer… Ta deasera, va kota lizira ke tujborus gertik obrason kakdisuké. Bofox, volgue ! In tir godjikap, jotapaf, dem zugiafa norkaraltukafa altoza. Kan inaf kograf usuk, is prijust ke wivga, is pegaf kutceem, is wolyaf itameem, is tuebeltayan guteem, va in kalion al malyé… Manote va sinka, bene azega, ape fixar, battan !…  Ise koe movexo, tce pwox… manote va zionaca kalir ise va gratcot kavleper, ape !… Rose, sonkeson da va in disuké, van jin xowar, aze, omapon, kalir :

― In warzaf ikaadlutik… Pu rin juiké. Mek artan dum in va ayikya romover… Adlutik W<sup>-ye</sup> tir tumtik, ae… vexe kruptev da in boksarsaf… Solve warzaf ikaadlutik…

Ine ve yoyermitar aze gire toz bliker, ton taka xowasa van blikerarova.

Buox, warzaf ikaadlutik, va jin me co-puver. Nutir zionaf is fikaf… Va limastasik lodam gertik vektar… Jin, va gedeluca, va ezlopa… ke kaikexo… is batakaf nubeem olegá. Albá da ayikye tir zijnafe is krinaykirafe, milinde Jean weltamikye tiyir…

Moi mista, Rose den blotdolesikya va jin doimpar… Kan abic bulaf ravlem, pu jin pebur da va in goskedanyav, nume kota kwikya anameon tandeper…

Ware fixukorikyama, ae, bata widega tipir dem pwertikya… Inafa gexata tir ayelanafa gu blakere, riaf is spupiaf gemajkoraf latkaf usuk va yon rowin oriapak isked lize usukmucuga bro tsentam tideon atedon broewer. Ba beta lizira, moueem, leve ulimey kum beretraf dualt, dum plawa koe tirac, zekar… Iteem, anamef gu kerafu ivamu, divpaklawer, ise oruzaf art va kicera gu konejara artazukar… Rose va jin atoer :

― Gouin Weltikya, va warzafa mawakwikya ke Prieuré vanstá…

Blotdolesikya va jin obrason dizver ise inafa disukera va jinafa fonta isu jivot stingason funyeson suver… Ton batakafa puda kalir :

― Weltamikya tigir dum dene int, batlize… Weltamikya tir listik… Weltamikya tir parisik, ape ?…

― Gue, Gouin weltikya, kou Paris… 

― Batcoba zo wir… batcoba zo wir, vere… Me tolon godisuké… Va yona parisikya albapá… sina va enblira gruped… Jin dere koe Paris zaniyí, viele tiyí jotaf… dene radekasikya ke Guénégaud vawila, dene Tripier W<sup>-ya</sup> zaniyí… Rotir grupel ?…

― Volgue… 

― Loxe… Ax ! oyox, jontikedje… Vexe en kolanil, Célestine weltamikya !…

Ina ko fuista va cin fipton star lize aname anamkafa azega balemoya kwikya ixam tigid… 

― Ax ! va tokte en levgatal, temana weltamikya… firvison va deba pu jin blotdolesikya brer… Me lecen lamoneikeem va koncoba gu jin mea narir… vexe rokalí da xo tir kustofa mona… kustofa… Weltamikya win, mex ?…

― Arse !… ~ balemoya powana kwikya tanboyon dulzed, ton oltavafa zatca isu koneja…

Gouin Weltikya wan kalir :

― Grewá !… Va kotedje dolebas korik me co-djudafú, va korik ies dum telibol, iegas va dubiera, iegas va ortara… Manyon korik rolanid liz djulanid, pwox...

Tama dem kwikya tolkalir :

― Efe sin rolanid liz djulanid.

Gu batcoba, lopilkovon gukoeson va Rose, Gouin W<sup>-ya</sup> acakomon loplekur :

― Rin va sin me onkal, kalil, Rose weltamya ?… va Lorik grewá, va sin me olegat, mex ?

Rose anton epitumar plekuson ko bata zatca va inaf kotaf tuekaman visk is eksaceem is vligura… Ise granafi Mousquetaire edji, yoke vuriskafa lizira ke ebeltaf bruxeem, va fa ke bat tizaf pestakeem tulopoar.

Azon, moi amlitam :

― Benje !… Va batyon korik me pulvit… Kotviele pulví, jivotroté…

Ebeltamajikya, wiputafa, dem tovolaf pezay is jo imwano gu jontik brink is furovas iteem, isti yona kipera divier :  

― Tire, va sin lanlize en giv… 

Numon, yona rupa, yon begard, gire… Mewaljoawesa vraka dem dorita wuptena gan batyon gabentaf art, dum div grok… Ae fuista zo alitasir… Porton lité larde olkoba lize tigit tir orikafa nume vola tacukon zo iltazukad… Bata olkoba kan tanoy dilkam vane saljaf is abdaf kusk, vane lirdinda koe rebaveem viban gan almakolaf tij, zo afiar… Eipomafa dakela ke kacaweyesa rostela ik vikizenaf aaltuk aname min linver, kodororasa va kote vage… Me rogindena… Bam, kotbat tisik, vingewes moe rova dum eruilt dem zionafa grita, va pwadera va straca, va bilita, va gomilera, eloder…Nyukon do sin lakicé, do sin lataxá, voxe va kona meromotidanaca satolé, va coba dum kultafa boikera… Merla va jinafa takra katacer, kal larida ginukaf tidfir, va art tukerovar, va myetceem licar… Co-djumallanir… Me rolanir nume batlize tiskí, kwestaf, vingewes dum sin moe rova, zatcason milinde dum sin, batlize zavzá akoydon terektason va batyona eeftafa puda nuvelasa pormalava sedme jin ; lava ifapoliesa is basplawawesa koo lavakeda is yaxay…

Grupenyé da va int gu feliik gorojuv… ise me tí ironokaf gu bata askira, tire… Voxe me… batlize… lexe, batcoba kaike gesta… Bata ayikya tid vitcafa gu jin ; va sina akladá, ise pu int omapon kalí da mekon tí dof gu sina… Gaanuca is sekara va yon krinayik is giltira va yona listaca is belira va berpot ke Paul Bourget va jin gu batyona kinokaca al giwad… Ax ! yona listafa is relandesa trukaca ke yono parisafo zanivaxo, tid sumifa !…

Rose va tela lokiewafa kiewatca tire seotar… Ton gutumas iteem is kutceem abdaf gu tci pwader :

― Kotcoba tir abica kapbure Rodeau W<sup>-ya</sup>… kurenik ke tegivsutesik… Ax ! Mancoba dene inya dilizer…

― Abdigrupeyé… ~ kontanya kalir.

Artanya slemar, miledje :

― Kore inya tir vanmiae adlutikeem… kotvielu trakú da tir nuyukajik…

Kota disukera tir kireptafa, kota berga van Rose, toz pwadese : 

― Veyarinton, Rodeau W<sup>-ye</sup> ko tawaday drowigon al mallakiyir, afizcekon…

Enide ine icde debala ke Rodeau W<sup>-ye</sup> koafiar, tori jin runwalzagar :

― Nistikye… katalikevansaf tegivsutesik, bate Rodeau W<sup>-ye</sup>… Ax ! manyon butc koe inafa dolta… maneke askiyí da redakik va daykayana erba di deswayar… En, oyox !… Vexe detce me dure tir Rodeau W<sup>-ye</sup>…

Moi walzaga, va lojadifa kerdela gu nega gire askir :

― Rodeau W<sup>-ye</sup> koe tawaday kle tigir… Va tokcoba lion jontikviele ko tawaday askir ?… Oyox, pwox… metan gruper… Kle ko tawaday al mallakir… Rodeau W<sup>-ya</sup> kadimion askir da tcicesikam… Justin fanikyeme… ko inafa mawa… tidlanir… yonton gu tsentera… Ae atedafa tsentera, win dositik !… Inya tiyir riwe lebafa, ton atedaf iteem, dum tcabanyesa vakolya. Va inye pise van int askir… kutcá… santá… aze, kalison da va inaf pingeem fu aneyar, en basvager… Aze bam, grupec va coba ve askiyir ?… Ae, vere, va int mo inye mimayar, bata degrikya, aze kan po nariyir… kan po, en, win Weltamikya… Ise ede co-grupec tokinde ina nariyir ?…

― Tokinde nariyir ?… ~ ebeltamajikya kirepton koerur, ke dana tovolaf pezay tuabrotcar ise zekar…

Kottanya tir wesidafa… Vexe, tuboksawese is tuwerkawese, Rose dakter :

― Batcoba pu kona weltamikya me zo rokalir !… 

Yon « ax ! » agaleradivieks va bata dulzera radimifid. Rose, pane az kontene, dakir :

― Sanalubdik… lexe !… Is listaf, listaf dum renanik… is volgunaf, awalkexikam !… Metarkara va rumeik… mana fogra koe fortey, en !… Dimdenlanison… in nuve skotcayar… skotcayar… boreyer… boreyer… pumkye… eke glogaludzeyer… Va tokcoba icdeon kalic ?…

Exukerafa edavara tir, doritaravlemkirafa kootara… Rose va dimon amlit ker… Wan kalir :

― Gadikya va arienta pu jin al pwader… Jin, al pirdá, trakunyuc, da va tegivsutesik is kurenik gobuntur.

― Arse… ax ! en…

― Voxe, Justine klabur… lecen is kire… Turkon, me kuranir… Tce adlutik W<sup>-ye</sup>, safteon sielestuse dene Rodeau, al walpir… Sopron, ine vuder… ae !… Ax ! ede co-tí… Efe, tí alkafamaf… vexe bet adlutik co-tir… Co-askí da sin va erba putceped… va decemoy is decitoy… is kunoy franc… 

― Arse… ax ! en… 

― Va mana katecta co-gracá ?… Volson !

Aze Mousquetaire edji dum broca leve xefto ermitawer…

Blotdolesikya va mecoba kalir… Zo nufunyer… Va tegivsutesik ape dafur… Va guncara ke Rose oblion waljoar. 

― Pokolé da Célestine weltamikya va dabgexama do batyon weltamik fu djunalel ?… Is rin, Rose weltamya ?…

Bata ganera va kota zidera tuvumeltar, aze, edje ina va tirac is konaka galema div brost divnarir nume Rose mo azega aykar, iteem vanteyawed ise tigaf yoy va delfajaf kutceem moonid…

Ba mallanira, blotdolesikya, neciafa is kicesa, pu jin kalir :

― Me obral, kire rinaf feliikeem va mecoba den jin narir… Gire govopitil nume va jin witil…

Do Rose ten givase va jin gu lizukafa ugalda dimdenlaní… Co-foliyí da inaf dotay dem krizaca co-tiyir puskenaf… Meinde… Ine va yona warzafa is lomayakafa trasir… redur… Inaf rob ta emogara tir lumiskaf… Ise yoy miledje guyunder, meviele tutenason… Kottan va rupa koofir oke dimkofir. Gevasa inde, koe winka, bad abica wexa jontik korik zo rogriporad… Ine kal polku ke Prieuré va jin dimstar… Batlize, me lajubulur… wan pulvir… me ten pulvir, aneyar da va jin anamplekur ise kan nuca is abidara spikonar… Luxe jin, taka gan kotaf gildeks zo empayar nume wira va Prieuré va divtakrelarinda gu jin askir… Ax ! bata imwiskafa preimapa !… Is bata kolnapa nutisa sayakaxe ok flint lize disukera kadime kot dilk tce ulijdar !…

Awalt tir lodidulaf, mea bra, ise patectoy, banlize, loon tucuawer… Kaike azeka, bene datceem, va yona widama tumoavayawesa leve afi, tuitupana gan keraf kepaiteem, kozwí ; kuksa koo blafotafa is kusafa azeka batlize is banlize koe yona dilgavukafa livaca afigar… Ise konak rujod va kelt gu inafa bagafa is mempesa lenopa ziked… Vexe nyaseson va batcoba va meki tci satolé… Jinafa ironokafa galpera iku kuranira iku dustulera tid otcera il bat awalt isu azeka isu datceem isu mona isu pwertikya ke dana ikorafa puda va jin tuovar ise naker.

Adim, ina va jin fu isker… va jinafa nuba narir ise, koe tobakiraf geltapeem, krenugon licar. Kalir :

― Ise, kiewaya, grupel, Gouin weltikya tir necianyik… is oblinyik… Jontikviele zo goworatar…

Ina wan vangaver… aze lobulon :

― Inya va jontika yikya al kiazar, en !… Vielu koncoba zo vofar… ina zo gowir… Me winon mei grupenon… Zo rodirnur… arse, kalí… Tir grupeikya… grupeapikya…

Ton lojebes iteem is disukera bene jin, kan divulafa giuca, ina tolkalir : 

― Grupeapafa… is oblifa… is tixolafa !… Levnendasik ke utca… Tetce, kiewaya, me vulkul ise den cin berde pitil… Ise den Gouin weltikya jontikviele lanitil… Me ireglietel… Boreon… boreon !… 

Ina su mallanir… Va granafa ina illanisa ton tanamusa bora wí, aze ina va rebava az gleida kenolanir… aze ko kelda levgon vanludevawer lizo ilwí…

Va Joseph, matelamidusik/diremstasik olvezas va gaest, kabduolaní… In pu jin tce fu pulvir ; me di pulvir… Anton blaguton disuker, ton manafa muxara riwe vudesisa…

― Rerielon, kiewar, Joseph weltikye…

Joseph va koncoba wale talgeem bular… Tir yatkaf da  koo olvezan gaest su rovebavlá…

Man fanajik, is manote voldolaf… Ise tokdume va jin meviele gukoer ?… Ise tokdume meviele dulzer, dere, viele pu in pulví ?

Dene mona, Weltikya me tir valeafa… Va jin rotapon kazawar, nokier :

― Dire, me manedje diveon tiskitil !…

Djudulzavá, kire zo zuné, zo tunoglatá, zo nyaté… vexe anye va int kagí… Anton ajolemé.

― Va tokcoba kalil ?… 

― Va mecoba kalí…

― Anye… Ise, va rin kopoú da do zanisikya ke Mauger W<sup>-ye</sup> gozal… Inya tir grupenikaj dolge rin… Wil… kotcoba rerielon gaver, golde rin…

Koeon divié :

― Tcax !… tcax !… ise tcax !… Va jin kostrul… Pu djupulvimb bettan pulvití… va puves bettan wití… Va mwa gu jin me askitil, ikorikaj !…

Opelafa gildera va inafa eeftafa puda, antafa dimtrasira va ikoraf iteem is kalsteges benplekureem, numon literaja, literaja vas boikera burena mal mista is blotdolesikya is Rose, vere zo sulayar… Rose is blotdolesikya oved ; asadaronyikya dere over… kot sin oved… Nume pu int abdiplekú da va Rose wití, da jontikviele wití, da va blotdolesikya gire denlanití… da askití da bata asadaronyikyaja vanpitir napikya… larde Weltiya pu jin pour… Ise ton govitafa fa, koeon tolkalí :

― Ikorikaj !…ikorikaj !…ikorikaj !…

Vexe lokiewon zo co-kiazayá ede co-tiyí takrelaf nume va bata lutsaga, ist lesay, co-mimayá, co-iegayá…

Bak afizcek, vani miafizestura, Weltikye is Weltikya kan direm divlakiyid. Tcatexo, kota mawa, bazaxo ke Weltikye, kota rastoka, kota tinida tid tselkon budenafa… Kas me kaliyí ?… Ax paax… pwox !… Belira va twa, mekon… tredura va kon plek, meinde…

Acum, koe mawa tiskiyí… Pu gadikya, pu Jean weltamikye, suteyé, aze va « ''En famille'' » berpot beliyí… Mana listafa neva !… Maneke al zo sutenyeyer !… Gevasa, kore… va yona nuyukaca djukagildé… volse djukabelí… Va boresisa neva anton albá…

Ba sielestura, pot-au-feu burmotaks zo zanolur… Weltikye is Weltikya wal sint tce tiyid fentafa. Weltikye va ''Le Petit Journal'' fela pistoleson daxidon beliyir… Va eluxa lupuyur, tanameson va buskaf is zijnaf itanyeem… Dace viele zider, iteem ke Weltikye guzijnawer ise guvazawer. Tere, ta bokara va prilara ape, Weltikye, ton pez ware moe fela, divieyer :

― Djay !… Gire gabiyeyena ayikya…

Weltikya va mecoba dulzeyer… Tritapafa, rontapafa, soyutafa koe gem kum ebeltafo leso, ton soakseno jo is olgafa disukera, wan modovayar… Va tokcoba ?…

Rotir golde jin, Weltikya va Weltikye drur...

{{Teza:Mirbeau (Octave) iyelt}}
|}


{{Pone ke mawakwikya_krent
| luz_luz = 3-eaf
| luz_abdueluz = [[Pone ke mawakwikya_Luz02|2-eaf luz]]
| luz_radimeluz = [[Pone ke mawakwikya_Luz04|4-eaf luz]] 
}}

{{Teza:Mirbeau (Octave) lomeem}}