Wira va klita ke Taidju is velikestusikya dem abrotcaf oblakeem

{{TextQuality|75%}}
<div style="margin-top:1.2em;font-size:140%;">
<center>'''Taidju is velikestusikya dem abrotcaf oblakeem'''</center></div>
<center>''Mongolafa vunda''</center>


{{Teliz_toza}}

Lekepon koe Altay mevtava tcabanhesik yoltkiraf gu Taidju is Boroldoy berikya bliyid. Koe skiderna kalon bliyid ise va mecoba graciyid kire Taidju tiyir tcabanhesikanh ise wivgeem tiyir aultoves.

Konviele, dum gilton ta tcabanhera Taidju mallanir. Abdi mallanira pu berikya kalir :

– Dimpití viele awalt al baron komodeter ise divmodeter. Va minaf tey rubanhal ise moekote vaon en gutegiral.

Aze va tidawaltaxo vanlanison in va pemaxo bulur.

Boroldoy va tey tolkon jilion rubar, vexe bak bareaf mielcek megestuson va tey dan tenanteyawer, komoder.

« Va tokcoba fu askí ? » eruwer. « Berikye batvielon fu dimpiyir nume fu mibuwer ».

Boroldoy bam gorar da ko mevtava lanir ise va kontan trasir aze va tey puon erur. Abrotcipon lanir aze kabdue ebeltapafa skiderna va guazikya va int tuidulasa poke tey artion trasir.

Boroldoy va in bliker da abic tey puon zo zilir.

– Vaon naril, nasbeik, guazikya dulzer.

Boroldoy div tey va teyesa gama deswar aze ta da va skiderna kolanir keyuwer. Moion artlaniyison, ko teyak va gama plekuyur ise ta tulotegirara va tey va gamot yo loplekur.

Laizon, katcalar da fem tir bene gem, fem divimpawes koe aalxo. Bam setiker da intafe berikye kev velikestusikya dem abrotcaf oblakeem konlize blisa koe aalxo is estuyusa va jontiktan al walzeyer.

Boroldoy zo kovudar, va fem soltiolter aze va tidawaltara vanvulter, pokoleson da moo dimlanirakelda va berikye kazokeveter.

Bakon, velikestusikya dem abrotcaf oblakeem va abrotcaf fem ixam tanameyayar nume va skiderna ke Borodoy artlaniyir. Vexe velikestusikya va metan trasir ; soltioteyen fem moe sid  rosokeyer.

Velikestusikya toz zider nume pu ilava ier :

– Tokliz Boroldoy al mallanir ?

Ilava zavzar amlitafa kire tir ilava ke Borodoy.

Bam velikestusikya va rekleda koerur :

– Tokliz Boroldoy al mallanir ?

Vexe rekleda zavzar amlitafa kire tir rekleda ke Borodoy.

Velikestusikya gorar da pu tey erur :

– Tokliz Boroldoy al mallanir ?

Bam tey dulzer kire tiyir tey ke velikestusikya dem abrotcaf oblakeem :

– Boroldoy va tidawaltara al vanlanir.

Velikestusikya mallanir ta da yikya onkar. Kalion vulter maneke va Boroldoy ixam sumon wir. Kaliapon, vaon fu vebidur nume van inafa berga va kotcakiraf nubeem toz sotcer viele Taidju dimpisu mal tcabanhera awir.

Velikestusikya gan tcabanhesik zo kovudar nume ton okol va int artazukayar. Vexe gan intaf abrotcaf oblakeem zo relmer nume Taidju va tceka vanon graskar. Velikestusikya ton slakol va int bam betar vexe abrotcaf oblakeem ware relmer ise Taidju ixam al tcekar. Bam velikestusikya ton libakol artazukar kire libakol tir dem abrotcaf oblakeem, vexe tceka ke Taidju va inaf jivot tagelton batgemelton remrur.

Inon estuyun jontiktan va jivot ke aklafa velikestusikya ve divlaniyid.

Konaktan icde tunuyara va Taidju al grewad, volse artan se vaon al sated kire koe jivot tiyid idulanhaf ise me gokobayad.

Coba se fereon baton dilized, kagrupenuca me tir giseotana gan kottan.

Radimi bata stuva, Taidju is Boroldoy ve mallaniyid ta da koe sinafa skiderna aulon blid dum narmon al askiyid.

|style="vertical-align: top;"|
{{Krent_Iyelt
| xanto_vergumvelt = '''Taidju et l’ogresse aux longues oreilles'''
| xanto_sutesik = -
| xanto_piskura = -
| xanto_ava = [http://www.kotava.be/xadola/pmwiki.php?n=Rekluexo.Mongolava Mongolava]
| xanto_evla = -
| kalkotavara_vergumvelt = ''Taidju is velikestusikya dem abrotcaf oblakeem''
| kalkotavara_kalkotavasik = Sabrina Benkelloun
| kalkotavara_piskura = -
| kalkotavara_evla = 2007
| webesik = [[Favesik:Sab|Sab]]
| krentduga = [[Image:75%.jpg]] Gotuenana
| kseva1 = #B79EDA
| kseva2 = #D9BBFF
}}
|}


[[Loma:Kuda]]
[[Loma:Vunda]]
[[Loma:Vunda ke Mongola|Taidju is velikestusikya dem abrotcaf oblakeem]]
[[Loma:Ayoltaca yo|Taidju is velikestusikya dem abrotcaf oblakeem]]