Wira va klita ke Vund va miel

{{TextQuality|75%}}
<div style="margin-top:1.2em;font-size:140%;">
<center>'''Vund va miel'''</center></div>
<center>''Reiz ke Motalava (Vanuatua)''</center>


{|width="100%"
|-
|rowspan="4" style="background:#FFFFF5; border:1px solid #F0F2CE; vertical-align:top; padding-left:1em; padding-right:1em; text-align:justify; width:100%;"|

Lekeon saneeem ke Bankis ewaleem tiyir, lekepon.

Sin va mwa men digiyid, me grupeyed lize Lorik tigir ; va tanoy lorik anton grupeyed, i va intaf : Ikpwet.

Kle Ikpwet tiyir sinaf lorik. Kire in, Ikpwet va kota ewala ke Bankis al reduyur.

Aze moi redura va tamava, batlize mone Bankis, va ayik reduyur aze mo ewaleem plekuyur.

Ta plekura va ayik mo ewala, va kon reduyur aze yoltayar, azon va ar reduyur aze arinde yoltayar.

Teni redura va ayikeem, va yolteem ziliyir, aze in Ikpwet va intafa yerumanikya reduyur, i va Roley. Ise yolt ke intafa gadikya tiyir Kpwatgoro.

Batinde in va intikeem reduyur. Anameon, sin tiyid san-toloy : sinaf yolt tiyid, ede setikecké, Bliswava Dositik is Diuztoa Dositik is Viaswava Dositik is Lectik Dositik is Grupeik Dositik is …

Ison, va konak yolt al vulkú.

Sin konakedje zavzagickiyid, grupenseson va coba di rotaskiyid.

Me grupeyed inde miel tiyir, inde afiz tiyir ; nume larde batlize volaskison zavzagiyid, Ikpwet van sin rwodeyer aze kaliyir : « Ex, nik !! Me zekac !! Va koncoba fu aneyá enide mielatar ise afizatar. »

Talton pujeyer, kal Avap ewala, lizu va wilye is trivabafi raporki vanstayar.

Moi dimpira do bata kotcoba, do trivaba, va berikeem gukoeyer, kalison : « Kle, fu terektac va coba fu kalí. Fu jupá da …

~ En, fu vulkú, in va trivabafi raporki is wilye is dere Miel al aneyayar. Va Miel al aneyayar.

Moi dimpira, dakteyer : « Miel tir !! Afiz tir !!»

Sin erud : « Vexe, va tokcoba “ Miel tir !!” ewa sugdalar ?»

Nume bas in : « Fure, viele pestaleyec da luxe winaf iteem, tokinde rokalí, koncoba sokir, pune gonitabudetec aze gokenibetec. »

Fure miel vanfir.

« Vexe kle, tokinde divmodetev ?»

In dulzer : « Me dwic !! Maera tir : bate wilye. Viele ine va ''kotkotkor'' zania iegatar, sugdalá viele toz ieter ise va ''kotkotkor'' zania toz iegatar, gemelt titir ta winafa divmodera. »

« En, gildacká » : kalid.

Ba titfira ke siel ware debanyeson va estura tenuked, aze laizon sonkeyed :

« Ox ! ox ! ~ kontan ke sin diviegar. ~ Tokcoba tove jinaf iteem sokir ?»

Ikpwet kalir : « Itabudel !!» Nume bantel askir.

Bam divmoder nume pestaler da pez toz iptoker !

Azon larde batcoba lanedje wan tiyir, pune kot sin areldon komodeyed. 
Batinde jontikedje kenibeyed, jontikedje, vieli Ikpwet di divmodeyer ise va wilye dankase gildeyed. ''Kotkotkor'' ! ''Kotkotkor'' !

« Djay !! Bartiv ta winafa divmodera !! Kle divmodec !!

Nume divmodeyed.

Batviele Ikpwet va trivabafi raporki vangiyir aze va Miel koton toz sollipayar. 
Va ticeon kelt sollipayar.

Ise edje va miel koton sollipayar, toz afizayar. Ise tire, cinaf muxaks koe cinafa ava ke Bankis tir : « afiz sollipawer » ika « toz afizayar »; bas Ikpwet, kire in ba bat viel va kelt al sollipar.

Azon, moida va tapeduca batinde al sollipayar, pune toz afizayar ise wilye gin dankayar.

Batse, tena tir, aze sinafa blira batinde wan tiyir.

|style="vertical-align: top;"|
{{Krent_Iyelt
| xanto_vergumvelt = '''Iqet mi-tin̄ nō-Qōn̄'''
| xanto_sutesik = Taitus Lolo
| xanto_piskura = [http://alex.francois.free.fr/AF-mtv-mythe-e.htm Alexandre François]
| xanto_ava = [http://www.kotava.be/xadola/pmwiki.php?n=Rekluexo.Mwotlapava Mwotlapava, malfrancavavaks]
| xanto_evla = 2005
| kalkotavara_vergumvelt = ''Vund va miel''
| kalkotavara_kalkotavasik = Yurani Andergan
| kalkotavara_piskura = -
| kalkotavara_evla = 2014
| webesik = [[Favesik:Yurani|Yurani]]
| krentduga = [[Image:100%.jpg]] Tuenayana
| kseva1 = #B79EDA
| kseva2 = #D9BBFF
}}
|}


Xantoxa : [[MTP_Vund_va_miel|mwotlapavaxa]]

Klita is fineyeso piskusikafo internetxo : [http://alex.francois.free.fr/AF-mtv-mythe-e.htm Alexandre François]

[[Loma:Reiz]]
[[Loma:Vunda ke Vanuatua|Vund_va_miel]]