Difference between revisions of "Faltalukastkirikye"

Reiz : Faltalukastkirikye[modifier]

Lekepon konviele tiyir ayikye digise va konaka listafa mona koe widava is tawaday, va moavafa porma isu dilgavafa, va yono sadjanafo guto is konako moavayafo diremuko. Vexe, aje, bat ayik tiyir faltalukastkiraf. Batcoba va in tuevakayar ise tueaftayar cugeke kota ayikya iku yikya wison otceyed.

Tana vegungikya, porik, va toloya listapafa nazbeikya dikiyir. In ta kurera va tana eruyur, iskeson da ina va bata zilitina oku bana narayar. Meka sina kuraniyid, nume pu sint dimtakseyed, me rogorason va kurera do faltalukastkirik. Ostik zo idayad kire in va konaka ayikya ixam al yerumayar, ise metan va sinafi radimifi bali grupeyer.

Faltalukastkirikye, ta rungrupera, va sina do inafa gadikya is baroya ok balemoya lokiewafa nikya is konak vegungik ko tana inafa tawadaykodia jupayar lize kot sin anyustkon tiskiyid. Anton tiyid gozara ik tcabanera ik onara, stute is tcunke, estura. Mielon metel kenibeyer ise sin va sint deaseyed ; adim kotcoba dilizenyeyer eke tel toleanazbalik toz trakuyur da kodiafeliik mea tiyir lifaltaf gu lukast ise tiyir telapik.

Vani dimlakira ko widava, kurera zo zolteyer. Arti aksat, Faltalukastkirikye pu kurenikya kaliyir da ko winka ta arientapa icle tevsafton di gokoyayar ; acum pirdayar da bak gracera in di relandeweyer ; va intyon nik di roganeyer ; ko tawaday di rojupayar ; kotlize di tcunkeyer.

— Batse tselkeem, ~ ine kaliyir, ~ tselka ke koto toloyo gutosuxo ; batse tela ke zaninsinsa moavafa porma isu dilgavafa ; batse tela ke jinyon koldey lize jinafa aka tigiyid ise batse griaz va kota kraba. Luxe bana tselkama, batse tela ke ilput arte lupaxapa ke titefa kraba : Va kotcoba lfenkul, kotliz lanil ; vexe, luxe ban ilputam, kalpoú da kolaní nume poú inde ede va in co-fenkutul, va jinafa volsaasa ziderapa abdigitil.

Ina va tageltafa tarkara va triosureem abdiplekuyur, aze moi dablura, ine va diremuko rundanyayar aze ta koyara mallakiyir. Vegungik is napik me keyed da al zo eruyud nume den jotafa kurenikya laniyid, braldepeyeson, enide va kotafa kuluca ke mona di wiyid, lecen bak tigira ke kurenikye golde inaf kovudas faltaf lukast al me rovepiyid.

Sin va kota maga isu ilput isu gemxo vere exuled, va kota bonta lolistafa is lokulafa bata dam bana ikz-. Azon kal gutosuxo tidlaniyid lize va ota is listuca ke storn is ilava is saxatca is ilput is tconark is azega is elza dun mafelayad. Va tulon yona elza kane kontan va int takanugon rowiyir, is dem kadoma, kum triva is dilgava ik moavayafe sirende, tisa mevielu lolistafa is locuisafa. Sin va kaluca ke intaf nik dun luyud ise dun djumayad. Vexe in gan wira va batyona kulaca me zo deaseyer, yoke intafa larvera ta adim fenkura va titefa kraba.

In tiyir soriapaf gu rilituca eke va krulas fogelomam batliz titolaniyir, vox iperson eke va bergajoara tanon ok tolon kivayar.

Lent tuvel ke ilput tiskimiyir, modovason va kalpoura ke kurenikye is krupteson va kasafa volkaluca golde dimvegera ; vexe zoera tiyir popofa eke me rokagiyir : kle va tselkama nariyir aze va tuvel ke ilput skotcason fenkuyur.

Va mecoba taneon wiyir kire dilk tiyid budenaf. Artimon, toz wiyir da azeba tiyir besanafa gu biecanaf fortey ise koe bat fortey alto ke konaka awalkikya gluyedayana bene rebava tcazedaweyed : sino tiyid telo ke kurenikya ke Faltalukastkirikye. Ine va sina darpeon al laridagabeyed.

In vudeson ve fogesawalkeyer, nume divludotayana tselka ke ilput tidu nuba lubeyer. Dimdiyison va pesteem, in va tselka treduyur, va tuvel dimbudeyer aze ta dimdira va mawa tidlaniyir ; vexe golde kontega me jupekayar. Katcalayason da tselka ke ilput gan fortey zo kretsayar, in tolon ok baron bosolayar ; vexe fortey me griawiyir : kore va kretsa tcateyer ise kan bixe ik yoot dace pragayar, abic fortey zavzayar, kire tselka tiyir diolafa, ise mekane koton zo rotucuayar : viele fortey batlizu zo deswayar, banliz dimpiyir.

Faltalukastkirikye mal koyara resielon dimlakiyir, aze kaliyir da va twa givasa da intafa arienta joke ine su zo tenukeyer lakison al kazawayar. Kurenik cugon askiyir enide va wivera va inafa wilufa dimlakira vrutayar.

Direvielon, ine va tselkeem dimeruyur ; nume in ziliyir, vox skotcapason eke ine va sokiyisa coba vere diepilerseyer.

— Tokdume, ~ kaliyir, ~ tselka ke ilput do kotara me tigir ?

— Tce tideon moe azega al iské.

— Me vulkul da rielon di zilil, ~ Faltalukastkirikye kaliyir.

Arti konaka obukara, in va tselka govanbureyer. Faltalukastkirikye, va ina torigiyison, pu kurenik kaliyir :

— Tokdume fortey moe tselka tigir ?

— Mekon grupé, ~ kimtik dulzeyer, zwaf loon dam awalk.

— Mekon grupel ! ~ Faltalukastkirikye tolkaliyir ; ~ grupenyé, jin. Va ilput al djukolanil ! Kle, weltikya, fu kolanil ise pok yona wiyina ayikya rundanyatal !

In mo nugeem ke kurenikye va int mimayar, aze ixereruson is en ireglieson va intafa dimvegera. Va pistok co-tukrenugayar, listaf is vanmanarsan, vexe Faltalukastkirikye va takra lodolgafa dam pist diyir.

— Gonawalkel, weltikya, ~ ine kaliyir, ~ fure.

— Larde gonawalké, ~ in disukeson va ine is ton ikuzapas iteem dulzeyer, ~ ta blikera va Lorik va ugalam zilil.

— Va sanoya wexa kozilí, ~ Faltalukastkirikye bam kaliyir; ~ vexe va meka wexa loon.

Viele in ve tiyir antaf, va berikya rozayar aze kaliyir :

— Anne berik, ~ lecen tiyir inaf yolt, ~ va rasek tidlanil, vay, enide di rowil kase berikye pid : sine al abdiplekud da ta wira va jin re pitid ; ise ede va sine wil, nubumal enide di keyud.

Anne berik va rasek tidlanil ; ise kimtaf vanmananik pu in tomatomon iegayar :

— Anne berik, kas va koncoba pisa wil ?

Voxe Anne berik dulzeyer :

— Va tugopas awalt is tukusawes werd anton wí.

Wori, Faltalukastkirikye, gise va wedokap koe nuba, pu kurenik popoon iegayar :

— Kalion titlanil edeme tidlanití !

— Va ware gemelt, vay, ~ kurenik dulzeyer.

Nume vere omapon iegayar :

— Anne, Anne berik, kas va koncoba pisa wil ?

Voxe Anne berik dulzeyer :

— Va tugopas awalt is tukusawes werd anton wí.

— Kalion titlanil, ~ Faltalukastkirikye ieagayar, ~ edeme tidlanití !

— Mallaní, ~ kurenik dulzeyer aze iegayar :

— Anne, Anne berik, kas va koncoba pisa wil ?

— Wí, ~ Anne berik dulzeyer, va batliz vannisa gopapa…

— Kas tid berikye ?

— Kax ! volgue, berik : milkava dem namulol…

— Me djutitlanil ? ~ Faltalukastkirikye kaliyir.

— Va ware gemelt, ~ kurenik dulzeyer aze iegayar :

— Anne, Anne berik, kas va koncoba pisa wil ?

— Wí, ~ in dulzeyer, ~ va toloy batliz vanlakis okolik voxe ware sumeon tigid.

— Va Lorik grewá ! ~ in moion divieyer. ~ Tid berikye ; cugeke ekeyud !

Faltalukastkirikye toz ieyer loeke kotafa mona ve skotcayar. Kimtikya titlaniyir aze borepesa is kograpafa tit in ebuduyur.

— Batcoba en tir mefavlafa, ~ Faltalukastkirikye kaliyir. ~ Gonawalkel !

Azon, va ina kan bata nuba narison is va wedok kan bana madason, mo taka fu balieyer. Kimtikya, van in rwodeson is kan awalkes iteem blikeyer da in va gemeltam ta zimpara di co-ziliyir.

— Me, me, ~ in kaliyir, ~ va int pu Lorik juikenyel ! ~ ise madason va ma…

Vere, tuvel popon zo klantayar eke Faltalukastkirikye ve vukiyir. Tuvel ve zo fenkuyur nume toloy okolik kolaniyid. Sin va dug ko nuba nariyid ise van Faltalukastkirikye rontion vulteyed.

In ve kagrupeyer da sin tiyid berikye ke kurenik, battel okolsayakik is bantel zeltsayakik, batdume kremer otceyer enide di va int lagiwayar. Vexe toloye berikye pokepon onkayad inde va in levi rapsay di ebiduyud. Kan dug va alto remruyud nume in ve awalkeyer. Kimtikya tiyir awalkafa riwe lion dam kurenik nume va meko po ta dablura va toloye berikye diyir.

Xuye Faltalukastkirikye va konolesik me dikiyir, nume batdume kurenik di zavzayar digis va kotafa kiewega. Va pak ta kurera va Anne berikya gu vlevion renas jotaf oluik faveyer ; va ar pak ta lustera va redakikaf rundak mu toloye berikye ; is va ark ta kurera va int gu sintaapikye di askiyis da va ugalaj tiskiyin do Faltalukastkirikye di ilsetikeyer.

LIDOK

Rilituca, nekev intafa sumpara,

Loviele va batcera daskir ;

Kotviele va kunoya tula rowit.

Batcoba, damo ikra, tir tcinsi ;

Vielu zo narar, ten tir.

Ise kotviele tir tcazarsafi.

AR LIDOK

Zobe kontan tir pestoraf

Ise jontiktan va diolaneva gruped,

Wipit da bata rupa

Tir lekeugalaf reiz.

Mea sotir lideaftaf kurenikye,

Eruse va volrotise :

Kore co-tir volvaleafe is lickafe.

Mone kurenikya linular zijnafe ;

Ise beta kseva ke lukast co-tir,

Romalyenset kase tol tir feliik.