Difference between revisions of "Listikya decemdon kenibesa"

Reiz : Listikya decemdon kenibesa[modifier]

Konviele lekepon tiyid gazikye is gazikya. Muteskapaf da va mek nazbeik dikiyid, i cugeke muteskaf. Den cugo apkazuxo isu befoltaxo isu abidaxo nobayad ; kotcoba zo koskuyur voxe mecoba daskiyir.

Adim soe Gazikya ve genazbalayar, aze va nazbeikya radekayar : ailkeranya dilizeyer ; wetce povakikya va kota diolikya trasiyina koe gola (peroya tiyid), Sersikyama kazawayar ; sedme batugale diolikafa orpa, kota sina va gruta goziliyir nume Sersikya va cuga kotunaca batkane di diyir.

Moi fipteem ke ailkera, varaf dositikeem ko gazafa berma dimlapiyir, lize durgapa mu diolikyeem dilizeyer. Kabdu kota sina va cuisaf zoratc zo rundayar, do moavackaf xos, dem foria is irigot is moavaf wed udanaf gu duz is kradifta. Vexe edje kottan benazegayar, guazafa diolikya kolaniyir, i meblikeyena kir medivlaniyisa va rasek num folinon awalkeyesa ok diwedayana.

Nume Gazikye va zoratc volmiv ziliyir, vexe kevie kotara va moavackaf xos me mbi ziliyir lecen anton peroy mu peroya diolikya al zo iayad. Guazikya foliyir da zo vliguyur, nume va konaka dratcera wal talgeem puskaceyer.

Tana jotafa diolikya pokeon tigisa va ina gildeyer, nume malyedason, da bantan va kona grutaja pu sersikyama di co-ziliyir, moi estura kadim storn va int preyutayar enide ironokon di pulviyir nume va askitina rotura ke guazikya batkane cugon di rodimempayar.

Wori diolikya va gruta pu sersikya toz ziliyid. Tela lojotafa getcayar da ina di tiyir tel listik ke tamava ; toleafa da ina di tiyir taskafa dum pumkik ; bareafa da ina va kuca mafelafa ta kotcoba askitina di diyir ; balemeafa da ina kotunon di stuteyer ; alubeafa da ina dum perca di dankayar ; ise teveafa da kan kot gor kotunon di lexuyur.

Siluk ke guazafa diolikya sokis, ina takawidlason kaliyir, aundeson loon dam golde guazuca, da sersikya va nuba kan jepkeda volins di remruyur nume di awalkeyer.

Bata eaftafa gruta va varafa dosita bupasiyir nume kottan toz boreyer.

Bam jotafa diolikya kadimu storn divlaniyir aze va batyona ewa ontinapudon kaliyir :

— Zo karavalduc, Gazikye is Gazikya, nazbeikya me awalketer : tire tí gijarotinsif enide va askiks ke savsikya koton rogriaskí. Efe Sersikya va nuba kan jepkeda volins remrutur, vexe lodame awalketer, decemdon anton komodeper, ise artion nazbeikye ke gazik lakitir aze va ina divmodatar.

Gazikye, ta tarutera va volkaca dakteyena gan guazikya, va piskot davon volins sanegayar, kane gakeson va awalkesira, va femura is deneon digira va jepkeda pu kottan kalpouyur.

Arti sanalubda ok santevda, edje Gazikye is Gazikya koe tane sinafe tildexe tigiyid, lanviele jotafa Sersikya koe lamone vulteyer, aze mawamawon ticlanison, kal ticak ke trava xuye laniyir, lize koe rinkam guazikyacka va frust antion femuyur. Bantan va meka pulvira va poura ke Gazikye icde femura kan jepkeda al gildeyer.

— Va tokcoba batlize askil, eyyanya ? ~ Sersikya kaliyir.

— Femú, sardya, ~ guazikya me grupesa va ina dulzeyer.

— Ax ! Batcoba tir listapafa, ~ Sersikya dakiyir, ~ tokkane askil ? Zilil enide di wí kase liote co-skú !!

Moida va jepkeda al nariyir, ise larde tiyir blipafa is gariandamafa, ison diolikaf yarduks batinde abdibenplekuyur, ina va nuba volins remruyur nume ve krezeyer.

Guazikya, toktepena, iegason greledayar : korik kotlizu artlanid, lava mo vola ke sersikya zo mimar, ina zo gricualar, intaf nubeem zo tazer, myetceem kan lava ke Gazikya ke Magyara zo pragar ; vexe mecoba va ina divmodayar.

Bam Gazikye, ticlaniyise yoke lor, va diolikaf abdikaliks setikeyer, ise rabateyeson da batcoba al sokiyir inde diolikya al larbudayad, va Sersikya ko tela lolistafa kraba ke berma, mo ilava dem moavafa is dilgavafa fidexa, volmiv rundayar. Ina nuvelayar pumkik, loeke tiyir listafa ; lecen krezera va blifa kseva ke inaf biak me al deswayar : tcoreem tiyir cotkeraf, ise kutceem dum drak ; ina anton itabudeyer, voxe gildenon gandimiyir, nume batcoba nedickiyir da ina me tiyir awalkafa.

Gazikya dirgayar da kottan di iskeyer da ina keniber, vieli bartiv ke divmodera artfir.

Diolikyanya bligiwayasa lanzayason da ina decemdon keniber, koe Mataquin Gazaxo tigiyir, arte san-tol-decitoya lieue soluma, viele Sersikya zo waltayar ; vexe ina gan klodikam fure zo walzeyer ; bantan tiyir vagekiraf gu stazeem vas peroya lieue soluma (tanboron rodefaskis va peroya lieue soluma).

Diolikya vere mallapiyir, aze arti tanoy bartiv koe teyesa edava impana gan konako munestiko artlapiyir. Gazikye ba divdiremara va nuba atoeyer. Ina va kotcoba askiyina vanovayar ; vexe larde tiyir xelkasapafa, trakuyur da viele Sersikya di divmodeyer, antafa koe bate guazafe lamone, di zo toktepeyer.

Acum ina askiyir : kan taksul va kotcoba tigisa koe bate lamone (vaxe Gazikye is Gazikya) uzayar : va kot gaasik isu poroluikyama isu mawakwik isu oluik isu fayik isu kwokilik isu burmotasik isu rekledik isu givaburesik isu susik isu swizik isu oluasardik isu dositakwik ; va kot okol tigis koe okolxe dere uzayar : va dere doon kot okolropesik isu vakolap ke kusk is Pouffe, vakolyama ke Sersikya pokeon tigisa moe ilava.

Biwe al uzayar, pune kot sin ve komodeyed ; bro milviele Sersikya oxam di divmodeyed enide batinde di djuprozaniyid viele ina di olegayar. Dace fokev kotraf gu tcol is tovok iste tey ve komodeyed, is dere tey. Kotcoba va vulama tiskiyir : diolikya sotiyir tcilafa gu kobara.

Bam Gazikye is Gazikya, dabluyuson va abegaf nazbeik medivmodeyes, va lamone divlakiyid, aze va pourayarduks volmiv sanegayad enide metan di govanlaniyir. Mana poura me tiyir adrafa, lecen aname lurd bad bartivamu, jontika aala isu indiva is yona aotcafa toresta atripiyid eke mek sulem ok ayik co-remlaniyir ; batinde konak ticak ke rasek ke lamone wan zo rowiyid, is anton pokuon. Metan etrakayar da diolikya va exavasega al skuyur enide Sersikya, edje di kenibeyer, va mecoba gu kon rilitik di kivayar.

Arti decemda, Nazbeikye ke gazik batugale gazas is tis vey yasa arafa gu tela ke kenibesa sersikya, moneon tcabaneson, eruyur dacoba tiyid batyon rasek rowin vamoe vapafi mikacipi ; kottan sedme intyon gildeks dulzeyer oke me.

Konaktan kaliyid da sin tiyid ke guazafe lamone lize swaviko dimfiyid ; artan da diwedikeem ke coyunta va koka batlize kabelcayar. Tel lonobaf trakuray tiyir da gulamoledjik sokeyer ise va kot rogralomben rumeik batliz vanbureyer enide delvejon di rotestuyur, ise metan va in rotonkayar lecen ant in va aalxo gruremlaniyir.

Sersikye me grupeyer va coba gofoliyir, viele guazaf tawadayik kopulviyir, kalison :

— Sersikany, weti loon alubsanda, al gildé va gadikye kalise da koe bate lamone tela lolistafa sersikya ke tamava tigiyir, ise da decemdon di kenibeyer aze gan ickrileyembe gazafe nazbeikye zo divmodatar.

Jotafe sersikye yoke bata dewitca ve pesteyer teykirapafe ; meklabuson ve laneyer da va bata stuvanya di tenekayar ; ise vanplatine gan rena is aliuca, gorayar da va tira ke coba vere wiyir.

Van aalxo biwe abdulakiyir, viele kot aalap isu indivolk isu toresta miv mangiyid enide di roremlakiyir. Van lamone wine arte ikpapa lakiyir aze kolaniyir. Zo akoyemer wison da mel inaf dositik al roradimelaniyir lecen, moida inafa remlakira, aal va sint al vanniyid.

Kle wan laniyir : jotaf is renas sersik sotir laspedaf. Ko taneaf kusk kolaniyir lize kotcoba taneon wina kovudason rotoprasiyir : tiyir kultaf amlit, ewava ke awalk kotlize awiyir, ise kotlize senyeso alto ke ayik nutis awalkeyes oku sulem tigiyid. Wori, yoke sinaf geiltanaf pez is sirendaf lesay, karavotayar da swizik anton kenibeyed, ise bilaga, lize konak vorolk wan tigiyid, nedickiyid da ulison al komodeyed.

Va kuskap lumekiraf gu trilna kaiklanir, va fogelom ticlanir, ko susikafa bonta kolanir lize susik gleidakoron tigid, ton ervo keve epita, ise iptokapad. Va konaka mawa remlanir, i va kotrafa gu kenibese ranyese ok debanyese oluikye isu oluikya ; ko moavayapafa mawa kolanir, aze moe ilava dem koton fenkuyuna marwida, va batvieli tela lolistafa disukexa wir : va sersikya nutisa sanalubdafa ok santevdafa is dem draydesa sizunta dimstaksesa va afie is lore.

Skotcason is mafelason vanlaniyir, aze pok ina badenyayar. Bam larde tena ke diweda su sokiyir, Sersikya ve divmodeyer ; aze kan krenugarsaf iteem damo taneafa wira, va ine disukeyer :

— Kas til, rin, jinaf Sersik ? ~ kaliyir, ~ al askil da jontikedje ké.

Sersikye, mempene gan batyona ewa is moekote sinafa kalirinda, me grupeyer kane va intafa daava is muntuca rovrutayar ; ravaldayar da va ina lodam int renayar. Inafa dewitca zo slemajar, nume loon puveyer : uiveansafa vox jontika rena. Loon dam ina zo toktepeyer, ise me zo gevat ; va coba kalitina gibemodovayar, lecen lavion ( beka rupa mekon icdeon pulvir ) diolikyanya va puve va modovaranya remi inafa keniberapa al tiskayar. Adim sin mali balemoy bartiv pu sint pulviyid voxe va acku ke kotcoba gokalina men al kaliyid.

Wori varafe lamone milvulon gu sersikya al divmodeyer ; kottan anton trakuyur da va intafi fli goksubeyer, vexe larde me tiyir renas, aelawalkeyer ; Poroluikya, kerujafa dum kot artan, braldeyer, nume pu sersikya ontinapudon kaliyir da atela su zo zanoluyur.

Sersikye pomayar enide sersikya ranyayar ; tiyir koton is cuisapon vageyena ; vexe ine vol djukaliyir da ina tiyir vagekirafa dum veygadikya, ise da va bergokap diskiyir : soe tiyir listafa.

Sin ko elzabonta laniyid aze sielestuyud, zanin gan konak fayik ke sersikya ; dingelt is bamka va yona guazafa vox donafa lexaxa zirseyed, beka mali mon decemda sina mea zo zirseyed ; aze kaiki sielestura, meaeskeson, Gertapik koe amuda ke lamone va sin kureyer, aze Poroluikya va ilavamarwida impayar. Sin abicedje kenibeyed : Sersikya me godekenibeyer, ise Sersikye mali gazda va ina buluyur enide ko widava di dimlakiyir, lize gadikye golde ine goneveyer.

Sersikye pu in kaliyir da tcabaneson koe aalxo al egluyur, aze koe kirka ke yeldiasik al kenibeyer, da va ebeltabeg is bluda al estuyur. Gazik gadikye, tise kiewik, foliyir, vexe gadikya zo kobuivenseyer, aze rabateson da ine ta tcabanera riwe kotvielon mallakiyir ise kotviele va kona lazava nekisa va mielafa tiskira dive lamone trasiyir, mea etrakayar da ine koninde fiaeyer : kire remi loa toloya tanda do sersikya bliyir, nume va toloy nazbeik veyon dikiyir : taneaf tiyir velikya, yoltkirafa gu Aurore ( Vanawalt ), ise toleaf pinikye, yoltayane gu Jour ( Afiz ) lecen nutiyir listarsaf loon dam berik.

Enide inaf nazbeik adim co-pebuyur, Gazikya konakviele kaliyir da ageltuca sotir tela zolonaca ke blira, vexe in va intafa birga meviele rovebodiayar ; va ina kivayar neke renayar, lecen ina tiyir ke gulamoledjikafa zaava, ise Gazikye anton yoke inaf kiewegeemap al kureyer ; konak aboyik omapudon dace kaliyid da ina tiyir zoedjafa dum gulamoledjik, nume wison va pokolanis rumeik, giflecupuyur da vaon me moebiduyur ; batdume Sersikye meviele djuwelidayar.

Vexe viele Gazikye ve awalkeyer, arti tolda, nume ine vanpiyir feliik, va intafa kurera saneon dakteyer, aze va kurenik ko inafe lamone fiptapon kevlakiyir.

Cuisafa kolakira va keluwidava zo askiyir liz ina wale toloy nazbeik koluyur. Vanion, Gazikye ta geja kev Cantalabutte ginik vegungik mallakiyir. Va ikagazara va gazaxo pu Gazikya gadik iskeyer ise va intaf kurenik isu nazbeikeem juikepeyer. Va kotaf idulugal gejason tiskiyir, voxe moida al mallakiyir, Gadagazikya va ikanazbeikya is nazbeikeem ko trapovama koe aalxo stakseyer enide va intafa kultafa djumera lodrikon di rogardieyer.

Arti konak viel lapiyir aze, lansielon, pu intaf kwokilik kaliyir :

— Ba sielestura va velafe Aurore direvielon djumestú !!

— Ax ! Weltikya, ~ kwokilik kaliyir.

— Djumé, xay !! ~ Gazikya kaliyir (kalison kan gulamoledjikaf kom djumestus va iewaf cot), ~ ise va ine valton gu Sauce-Robert djumestú !!

Bat kimtik, zolteckeson da va gulamoledjik me di rotafuyur, va wedap nariyir aze va mawa ke velafe Aurore ticlaniyir : ine batviele tiyir balemdafe ise grableson is kipeson ben inafa berga ipeyer ise va fage eruyur.

Ine toz boreyer nume wed kou nuba lubeyer ; acum ko wilxo laniyir aze va larida ke namulolocam gabeyer ; aze va kiewapaf valt epuyur eke Gazikya ravaldayar da va lokiewaf estuks mevieli al estuyur. Miledje in va velafe Aurore al ilbureyer aze pu kurenik al ziliyir enide bantelya ko intafa vreda ludevon ice wilxo di palseyer.

Arti anyustda, ikorafa Gazikya pu kwokilik kaliyir :

— Ba sielestura va velaf Jour djumestú, xay !!

In me fargukayar, elvaf da va ina dum daretomon fu ortayar ; va velaf Jour kevlaniyir, nume va in nubegas va dugam is va int funtes do pwertaf jidol nek tis anton bardaf, trasiyir. Va in pu kurenik palses do velafe Aurore, bureyer. Va mildapaf deaxolocam ikaon ziliyir. Gulamoledjikya di krupteyer da in tiyir kiewapaf.

Batvieli kotcoba al guyundeckeyer, vexe lansielon bata ikorafa gazikya pu kwokilik kaliyir : « Va jotafa Gazikya do milaf valt dam inaf nazbeikeem djumestú, xay !!» Bam kimtaf kwokilik gripokoleyer da di rovoresteyer. Jotafa Gazikya tiyir loon tolsandafa, mepatason va kenibeyesa decemda : inafa alma tiyir olgamafa nek listafa is batakafa ; ise tokkane in va lidolgaf bonol vanmiau sulemxo di rotrasiyir ?

Ta giwara va intafi bli gorayar da va gazikya di laridagabeyer, nume ko mawa ticlaniyir, xialason da meundeson davon di klibuyur ; va int yatkon lulayar, aze do wedok koe nuba ko mawa kolaniyir. Wori me djumakoyeyer, acum va intafa dirgara kazawayana gu Gadagazikya tarkapason kaliyir.

— Va intafi goni koskul, ~ ina takasotceson kaliyir ;~ va rinafa kazawayana dirgara skul !! Va jinaf nazbeikeem batinde tolwití, i va kimtaf nazbeikeem cugeke renayan ! ~ lecen foliyir da sin tiyid awalkeyes kalida mekalimbon al zo kigdeyed.

— Me, volgue, Weltikya, ~ tukrenugapayan kimtaf kwokilik dulzeyer, me awalketel, nume va abegaf nazbeikeem rotolwil, vexe batcoba dene jin titir lize va in al palsé, ise jupason da ina va wocolya ika rin estutur, va Gazikya dere ortatá.

Va ina kal mawa fure stayar, ise edje ina va toloy nazbeik kutcayar ise do sin boreyer, va wocolya vandelvejayar. Gazikya ba sielestura estuyur, kan mola milafa gu tela co-tisa ede va jotafa Gazikya co-askiyir. Tiyir valeapafa gu intafa udutuca, ise egadayar da pu Gazikya ba dimlakira di kaliyir da akolerses idatcol va Gazikya is toloy nazbeik al estuyud.

Lansielon, edje koe yon kusk ke lamone isu wilxo gilaskison mwarneyer enide va kona iewafa atela lasengeyer, kou omafa bonta va velaf Jour ve gildeyer, i va bores lecen gazafa gadikya va in tiyis ikoraf volmiv djumustayar, ise va velafe Aurore ixedase va berikye dere gildeyer.

Gulamoledjikya va puda ke Gazikya isu ke inyon nazbeik pilkomodayar, nume yatkafa da al zo tafuyur, kan puda skotcasisa va kottan, direrielon dirgayar da va bletap ist kusk di zo vanbureyer. Gu gemu is zamyala is kwala is jontikare perake volmiv kopleyer, enide Gazikya is inaf nazbeikeem is kwokilik is inaf kurenik isu zanisik di zo komimayad : al granseyer da ton nubeem gluyayan kadime ge zo vanstayad.

Batlize tigiyid, ise tiglik va sin djuprokobletayad viele Gazikye, mekene ixam, va kusk moe okol kolakiyir ; aze akoyepene eruyur va coba bata kultafa disukexa sugdalayar ; metel va ine rovegivayar, viele Gulamoledjik, riyomes wison va mancoba, ton taneon taka va blet miv ipeyer nume gan aklaf sulemeem inton plekuyun tanvulon zo vumbeyer.

Gazikye volins zo rovemibuyur lecen in tiyir gadikya ; vexe do listaf kurenik is nazbeikeem fure vinuweyer.

LIDOK
Ede kontan ta kurenik konakedje ker,
I ta kulaf is ubaf is durimaf is zijnaf,
Mancoba tir tuwavackafa,
Vexe ede decemdon ker, ise kenibeson,
Va ayikya kenibesa lieke aulon,
Mea re di trasir.
Kuda pu min dere nusugdalar
Da konakviele webokanya ke rena,
Tid kalapafa nek obukayana,
Ise kontan keson volwar ;
Voxe ikra va kurerasok
Lujapon djukutrasir,
Eke va meko po isu takra dí,
Dume me tujdé va bat lidok.