Difference between revisions of "Don Diliodaf Bost Luz03"

Taneafa neva, taneaf pak, bareaf luz[modifier]

Grigori mal nasielcek dimpiyir moi taneafa dankara ke wilye. Dakela ke kacayan bwird is rodafa rucka va zeria malstiyir.

Va maga nuguulon kolaniyir, va int basvageyer, va nokkirafa kapavielafa rija trumon morumkanyar, aze senyayar. Mo azeba, gamda ke dilk va moavukafi is kenibedasi afi ke tael walgabeyer. Sizuntaja ke dilgavaf brijeem koe alava, leve yona fidenafa fozdema. Vamoe ilava, keve gum, funyena nefta tankomon felkuyud.

In fu liuger viele velik ke berikye toz boreyer koe burmotaxo.

Kova dwedayar dum tusumajayana lima. Darya modesapudon puskaceyer :

– Fu stivawel, ikorik ! Va meka tildewera isu modara grupé. ~ Aze zijnon toz dankayar :

– Koloda-duda

Va tokcoba batlize askiyil ?

– Okolsura

– Va tokcoba zo ziliyir ?

– Va okol do milost

Do moavagileem

Grigori, komodesi remi formafa dwedara ke kova, trakuyur : « Eldeon, Petro ta rekola fu mallakir. Dacka zavzatar antafa do velik. Voldo in godolistetev ».

In va taka koe idulanyaf takak kosuxedayar, voxe danka stingason koespaweyer :

– Toklize rinaf okol ?

– Kadime tuvel.

– Toklize tuvel ?

– Lava divburer.

Wevdafa okoliera askiyir da in ve vagrableyer. In va ervookol ke Petro kagrupeyer.

Kan yon gelt glagaf gu modara, va klaim vion tialteyer aze riwe tolkomodeyer, kovdanon gan utard ke danka :

– Toklize goyol tid ?

– Vanmia gralka.

– Toklize gralka tid ?

– Gan fanikya zo dolisted

– Toklize fanikya tid ?

– Do kurenik

– Toklize kurenikye tid ?

– Ko geja.

Modaranyani, Grigori ko okolxe laniyir aze askiyir da okol ko nuda divlaniyir. Vartebak va inafa gexata ve alamayar ise modara ve griawiyir.

Taelkelda mo runteem, meviele sistayana gan kontan, va Don dadstiyir. Sel vamoe bost ise tidepon yon bitej dum li plebotolk. Okol kadime Grigori obrason mo sid krizaykayar. Krimpa tiyir rotafa. Kaike lava, nudol ieyed ; poke domega nubaro tcabanyeso va kabayam koe drem xadaloron rwodeyer.

Grigori kene lava zavzapayar. Dakela ke abdarafa is kerovafa zaxawera va domega titustiyir. Soriafa belaxama va kutceem ke okol tidustiyid. Grigori koe takra va dreldafa vlardaca pestaleyer. Kieweyer, va mecoba trakuyur. Tidlanison, van ronexo itayar : faltafa riwizga al solelaweyer.

Poke okolxe, in va gadikya kakeveyer.

– Rin, Gricka ?

– Artel co-rotir ?

– Al askil da okol al ulir ?

– Gue, ~ Grigori erajon dulzeyer.

Ton kadimon taka, gadikya koe nyonda va yoni « kiziak » wameyki ta teyanteyara burer, va lebaf is krameyaf nugeem ke guazikya impadimar.

– Golanil nume va Astaxov divmodal. Stepan do minafo Petro djumallakiyir.

Feduca va Grigori kostir, sotcena siuva vamoe in yarter. In tir wilalmakoraf. Va baroy avlak ke mamtaf rapsay dene Astaxov tidvulteyer. Tuvel tir mebudeyen. Koe burmotaxo, moe divatceyenu modivatcesiku, Stepan keniber, ton taka ke kurenik moe epita. Reme tapeducama, Grigori va klaim kavlepeweyes vamoe abade ke Aksinya wir, is va volwerkon divpaklayan nimateem batakaf dum cirdataal. In disukemer nume va turodawes art is taka adeesa kali jenukkamamasa pestaler.

Dum dubiesik itajar. Cegapudon, ier :

– Ex ! Win ! Ranhac !

Aksinya breson divmoder.

– Eim, va tokcoba ? Toktan batlize ?

Vradon uzeustar. Lebafa ma va nimat titnir, va klaim impar. Fiannikimi nyuni bak kenibera moe takak zavzar ; ayikya gazdon gamion somodar.

– Jin. Gadikya va jin stakser enide divmodá…

– Moion…Deneon me rozekav… Golde kunoya pinga moe sid gokenibev. Stepan, ranhal, gildel ?

Yoke pudinda, Grigori diepiler da in zo funyer nume in kalion divlanir.

Mon bar-sanoy kazakik tori alubeaksatafa rekola va wida buluyud. Kabelcara moe viga dilizeyer. Poki pereaf bartiv, gefnakirafa ckanta al artniyid, do konake lanise ok lakise ayikye vageyene gu stamapaf blinazbalugalklaim is koton rabandeyene.

Petro, moe rapsay va empanafa fexa keyuson dimasadayar. Panteley Prokofievitc va okol ke nazbeik anamelaniyir, ko wird va granja loplekuyur, kontomon ieyer :

– Dunyacka, va smeem al weloral ? Ise umta al zo tueipar ?

Kerapafa, Dunyacka, dum edgabia, mal burmotaxo kal mona va kusk remvulteyer ise va kota bibera ke gadik kipeson djerkayar.

– Va int viunsul, Gadye, va eruilteem ke berikyeme welorá maninde mecoba kal Tcerkask zekatar.

– In me ten estur ? ~ Petro nedison va okol takumason eruyur, kan fianni va fem tuabdarason.

– In dun roxanyar, ~ gadikye goreston dulzeyer, ageltason va milosttcalist kan tcurtafa nuba. ~ Plekam, kelk, baplakimi keve tcalist va okolge arti tanoy greelt rokoforteyar.

– Viele Bertrik ten estutur, Gadye, va ulira di zilitil.

– Gricka ken Don va in vanjupatar. Ex, Grigori, va okol dostal !

Ontinaf is mazdaf Donets okol, dem batakaf bitej moe jo, grabledason mallaniyir. Kaike tuvel ke kusk, Grigori va inafa metsa taltenubon uzamayar aze mo ge grableyer aze sorepeson mallakiyir. Tide krimpa, djukagiyir voxe okol ve dimborayar nume tcepason titvulteyer. Vadimon trovgani, riwe seni moe ge ke okol, Grigori va muktusa ayikya titlanisa va krimpa awiyir. Va kelda divlaniyir aze va lava ve kolaniyir, div goparujod.

Aksinya nimatnimaton sespaweson titlaniyir ; pu in sumuon ieyer :

– Degrik ! Rin oviskaf ! Galova, va jin kan okol al me selul ! Kel, pu rinafe gadikye va rinafa lakira fu kalí.

– Ox, ox, vegungik, me mibuwel. Rinaf kurenik ta rekola mallakir, den rinafa exoma rotir co-rozaná.

– Tokinde va rin djuzanil, oretlik ?

– Nakugal tir boref, batse rin pu jin erutul, ~ Grigori kipeson kaliyir.

Aksinya va speray tidlaniyir, ko muktu tite bunca va lava oblion lirdeyer, aze treduson wale abadeeem va sukadeena gratca, va Grigori itayar.

– Bam, in gadiaf, rinaf Stepan ? ~Grigori eruyur.

– Tokinde batcoba va rin dulapar ?

– Maninde til… Me robibel, me ?

– Gue, in gadiaf, nume ?

– Nume, rin, fu zavzal antaf, mex ?

– Gue, en.

Okol ve kamadayar, talgadweson va lava div kutceem roxanyadayar, aze tigison vane bana temba, kan vabduefa inya va lava ve dendayar. Aksinya va banu muktu kolavayar aze tiolteyer ; porfeon mo epiteem va bunca plekuyur aze va krimpa sespawemeson toz tidlaniyir. Grigori va okol ve uzayar aze radimlakiyir. Suka va gratca ke Aksinya tuezasayar, va inafa yosafa kendama keve nenenafa berga tutcastayar. Usuklicasiki fidenafi gu ksevafo leso moe buvdapa teykayar ; raltukaf klaim kake gratca, va rontafe ge is kotraf epiteem mesoakseson cupayar. Lanison, Aksinya vabduon xowayar nume xufe suxe iste ge kake klaim awiyir. Grigori va bertraca leve darmeem moe furovebasksevanaf lay wiyir ise kan iteem va kota inafa liziwera dositayar. Gu in ware djugapulviyir.

– Tí lanaf da golde kurenik fu wental ? Mex ?

Aksinya wan lanison ve takaskarayar, kiceyer :

– Denon ! Kurel (in dimkagaelayar nume medrikon pulviyir), kurel nume witil ede va renanik me wentatal.

In va okol platiyir, kal in artlakiyir aze ko iteem disukeyer.

– Dere tid ayikya valeafa gu mallanira ke kurenik. Dene cin, Darya sotulosudawer viele Petro gracar.

Aksinya kagaelapayar, ton bupas pezolkeem, vanbenplekuson va usukeem kaliyir :

– Ayikye me sotir perake voxe soe forteybupkur. Rin, boreon zo kuretel ?

– Me grupé, batcoba va gadikye rupter. Tce moi zanirarekola.

– Til ware jotaf, me kurel !

– Tokenide ?

– Batcoba anton sotudwisar.

In va in vlevuon ve itayar ; kutcnaavon kicemeyer. Voxe Grigori va volwerkafa peguca ke inaf cotapaf kutceem taneatomon katcalayar.

Torleson ton wepa va yinaxeem ke okol, kaliyir :

– Me djugakuré. Tce co-tir artelya va jin renatasa.

– Ixam al trasil ?

– Me gonovaneyá… Stepan mallanir…

– Me letcal !

– Va jin co-aliel ?

– Pu Stepan va pulvirama kalití

– Luxe jin, rinaf Stepan…

– Obral, lureskal, batcoba ton ikuzara tenuleter.

– Va jin me lakovudal, Aksinya !

– Me lakovudá. Va kona kaelikya viunsul. In mu rin va tiojesiki fideter, volson, va jin mea disukel.

– Dovoron askití, en disuké.

– Bax, disukel.

Aksinya nepaleson ve kiceyer ise djukuranamolanison va okol va keldama divlaniyir. Grigori ve keldoblayar.

– Iskel da remlaní, Gricka !

– Me !

– Me linulal kwestik, va arienteem ke kurenik fu gonegá.

Grigori kiceyer, va okol lulayar ; in va Aksinya kev kiria abdulanison licayar.

– Iskel da remlaní, rotik, korik banlize tid. Ede va min wid, va tokcoba di trakud ?

In kovudanon anamitayar aze muston merwodeson remlaniyir.

Moe rapsay, Petro va yasa divkiavayar. Grigori va okol milostayar. Petro, ton nuba moe nubay ke abalt, va avlakeem titvulteyer aze benu nuba ke Grigori va dirkey ve nariyir.

Okol, va vawa pestaleson, volkeon pudapeyer, fiannipumason va miltior zekan koe art. Petro, ton nuga koe sudot, ise kan nuga bene milostfixu va int gison, pu gadikye kaliyir :

– Va jaftolye me kobaracuul, Gadye ! Titi muvugal va sin godolet. Ise pu Grigori va okol golustetet. Ise obral, va rijustwerd me dolel : va titisa nakziliduranya miv grupel.

– Lorik kumzilir ! Va koyaranya ! guazik va int gamdason kaliyir.

Ton liziwera giltafa gu inafo alnafo alto, Petro mo milost ve grableyer, aze keve ge va soakseem ke klaim lican kake anamba impayar, aze van tuveli mallakiyir. Nubay ke inaf abalt tiyir gaapaf koe awalt ise ba okollanira stuteyer.

Darya kadimeon konakboron laniyir, do nazbeik koe meem. Gadikya, iste kusk ranhesa, kan ewazalt va iteem is kan alava ke nyonda va tukeran pez bosoloyar.

– Beryeme ! Va zomak ! Va zomakxa vulkul ! Va vrazkirafa zomakxa !…

Dunyacka dum deaxolam van tuveli ve welveyer

– Tokdume batinde ijel, kwestik ? ~ Grigori zunenon ieyer.

– In va zomakxa-aaa al isker, Dunyacka breyer, bene tuvelikarniz va int zobeson ; ikuza keno inaf anteyawes is ingajen tcoreem az tidu tcoreem mo kobarawem traspuyud.

Ton nuba vamoe iteem, Darya va batakaf klaim illakis kadime gopitalk radimefiyir. Panteley Prokofievitc va tan lyexaf nimat ke tuveli botceyer aze va Grigori disukeyer.

– Va tuveli dimflisal ise va gerot koe alava rigaval !

Kaiki underama, loplekuyur inde warzotbildeyer :

– Petro su mallakir.

Reme zunda, va Stepan va int egas ta mallanira Grigori wiyir. Aksinya, enide nutiyir listafa, va kusafa baynagratca al plekuyur ; va inaf okol vanstayar. Stepan pu in va koncoba kiceson kaliyir. Mekeyuson, ton yona zatca ke feliik, va kurenik kutcayar ise va inafa nuba moe intafa epita supuyur. Bata nuba tubertrayana gan awalt is kobara divetiyir, ebeltafa dum yeld, moe batakaf awem ke Aksinya. Stepan gee Grigori tigiyir nume, reme zunda, in va tipokenyeyen delaf kapray is lubemes epiteemap is (viele in van kurenik xowayar) tidef gudukaf nhoxuuleem rokozwiyir.

Aksinya va kaliks kipegayar voxe dameuson takabotceyer. Ebeltamaf okolap va intaf okolik moe sudoteem ve levmadayar, aze stibuskayar aze va tuveli kaliaboron divlaniyir. Stepan nutiyir lotinaf moe milost. Aksinya pokeon laniyir, sudotgison, ise dum vakol va feliik disuker, inya va in ko iteem renason is jugemepeson disukeyer.

Sin va vegungafa mona batinde kabduolaniyid aze viankon ico kelda ve griawiyid.

Grigori ton yalestafa disukerapa va sin kadimefiyir.