Difference between revisions of "Teyzveri is Vasilisa sersikya"

Rwaltreiz : Teyzveri is Vasilisa sersikya[modifier]

Darekeon. Koe sumefa patecta, konlize arte tamava, gijarotipaf gazik tigir. Va tructaf trusik wetce zanisik digis va ilamtaf okol dikir.

Lanviele, trusik moe okol ko aalxo tcabaneteson lakir ; edje va vawapa moelakir, va sizuntapasa bruxa ke teyzveri trasir. Okol kalir :

— Va bata moavabruxa me naril ‼ Lecen ina va rin co koxakar !

Laspedaf trusik klabur. Ede va bruxa tredur aze pu gazik bulkar, battode mantukon zo gableter ; ison gazafa kava zo gomeikudar… Trusik va pirdara ke okol me terektar, nume va bruxa tredur aze firvitison pu gazik lakir.

— Grewá ! ~ bantel kalir. ~ Vexe larde va bata bruxa al seotal, pune va inafi zveri pu jin tiskal ‼ Edeme jinaf dug va rinafa taka gabeter !

Trusik ikuzar aze va okol kevlanir.

— Tokdume borel, felisik ?

— Gazik dirgar da va teyzveri tiskar.

— Wori al abdiwalzeyé da bata bruma va rin koxakayar ! Rotaxe, me kival, va int me erolal ‼ Batcoba soe tir xakama ! Erul da gazik va decemoy eyelt dem fay mo azeka eldeon di mopler.

Batcoba kaliyina, batcoba askina. Gazdon direvielon, laspedaf trusik ko azeka lakir, isker da okol nuyon sorer ise kadime aal va int palser. Levgon, aal lorar, runta koe bira madagid, teyzveri arttalar. Va int mosidar aze va fay toz volper. Okol vanlanir, va kriza mo inaf wilt plekur aze keve sid gir ; trusik divu palsexo gepoyter, vanvulter, va zveri gluyedar, mo milost rundanyar aze van berma tcepar.

Va teyzveri pu gazik vanburer. Bantel zo vecar, grewar, tuoluar aze va ar lag pu in vebar :

— Larde va teyzveri al grugralomel, pune va aguntanik pu jin vanstal ‼ Sumeon, sumepon, arte tamava, Vasilisa sersikya zavzagir. Va ina kuraní. Ede vanstal, pune gu moava is dilgava zo adonetel ; edeme jinaf dug va rinafa taka gabeter !

Trusik ikuzar aze va okol kevlanir.

— Tokdume borel, felisik ? ~ in erur.

— Gazik dirgar da va Vasilisa sersikya vanstar.

— Me borel, me dwil ‼ Batcoba soe tir xakama ! Va broca dem moavukafa otsa is estuks is uliks ta koyara pu gazik erul ‼

Batcoba kaliyina, batcoba askina. Trusik mo okol rundanyar aze ilapon lakir. Stekeon, artlakir lize moe faltafa bira toz awaltanyar. Batse Vasilisa sersikya koe dilgavaf tiv dem moavafo vingo moolapir. Trusik va baspetes okol moe kusafo werdxo isker, aze va broca tiendur, va estuks is uliks daykar, debanyar aze keson va sersikya va int voltar.

Ina va broca dem moavukafa otsa katcalar, vankrir, va tiv volrundanyar aze va listafa broca mafelar.

— Kiavá, va Vasilisa sersikya ! ~ trusik kalir. ~ Zegal da va jinafa zergera isu yon vor grivutel ‼

Sersikya va broca kolanir ; sin estupud ise ulipid. Uliyison va galemacek dem vor, sersikya, izakamafa, aludevon komoder. Trusik va okol vere vanlakis luijer. Va broca deswar, mo milost do sersikya modasa rundanyar aze ton kalie ke tceka dimlakir.

Va gazikye dimvanlakir. Ine zo felber wison va sersikya nume va trusik grewar, gu kulaca adoner aze va semekap kserar. Sersikya divmoder, zo givar da sume faltafa bira tigir nume boreper, mumbesa is ton solponana gexata. Gazikye lasuvinur. Viele jukur, pune ina kalir :

— Battan vanstayas va jin kal faltafa bira golakir aze levu pistokap va jinaf kureragem di narir, edeme somekuré !

Gazikye va trusik kreme foxier :

— Kaik zida kalion lakil lize awaltanyar. Koe faltafa bira, leve pistok, kureragem ke Vasilisa sersikya tigir ; va bat gem naril aze dimburel. Govokuré ‼ Ede jupekal, pune loon dam abdion gableté. Edeme jinaf dug va rinafa taka gabeter !

Trusik toz boreper voxe va okol kevlanir. « Retomon fu xonuké, » trakur.

— Tokdume borel, felisik ? ~ okol erur.

— Gazikye dirgar da ludevon icu bira va kureragem ke Vasilisa sersikya di gonarí.

— Kas me al kaliyí da moavabruxa va rin di koxakayar ! Voxe zo karavaldal ‼ Batcoba ware tir xakama ! Mo milost rundanyal ‼ Van faltafa bira mallanit…

Arti konak viel, laspedaf trusik va zida kaiklakir aze drume bira vukir. Okol va granafa warmoletra terigesa moe bixe wir aze va gamiafa kriza mo inaf ault plekur. Warmoletra voser :

— Va jin umbel, me atal ‼ Va kotcoba rinon djumena askití !

Okol dulzer :

— Iste bira pistokap tigir lize kureragem ke Vasilisa sersikya leveon al zo palseyer. Va in vanburel ‼

Warmoletra mamton kaber ; kreme bira tegulawer. Data warmoletra kotliz artlanid ! Ba dirgara ke okilik, ko lava estobad aze, arti tanoy bartiv, ludevon icu bira va vidiagem ke sersikya vanbured.

Trusik do gem va gazikye dimdenlakir, vexe Vasilisa gadikya groler :

— Va rin me kureté, ~ pu gazikye kalir, ~ liedje me al dirgatal da trusik ko lembiewesa lava va int gokolavar.

Gazikye va jenukafa gadela gu lava volmiv tukotrar liz trusik moi lembiera zo mimatar. Kotcoba tir gadiafa, lava lembiegapar. Kimtaf trusik zo vanstar. « Batse xakacka ! ~ in trakur. ~ Ax ! Tokdume va moavabruxa ke teyzveri al tredú ? Tokdume va jinaf okol me terektayá ?» Trakuson va okol, djudonekiavar. Pu gazikye kalir :

— Gazikany ! Novel da abdida fu xonuké va jinaf okol rodonekiavá !?

— Ae, lanil ‼

Trusik va okol kevlanir aze boreper.

— Tokdume borel, felisik ?

— Gazikye djumer da ko lembiewesa lava va int kolavá.

— Me kival, me borel, titil vawelaf ‼ ~ okol kalir, aze wiluon tudiolar enide ine me zo lembieter.

Vielu trusik va okolxe divlanir, pune gan yon kwik zo konarir aze ko gadela zo titosiper ; va int tolon vanludevar voxe dimdivlanir, tison listapaf eke mecoba roreizur oke ropimtar. Wison da in maneke tir listaf, gazikye djukumilaskir ; ko lembiewesa lava va int akoydon plekur nume ve xonuker. Vani caxa, trusik wetce gazik ikaon zo libur. Azon va Vasilisa sersikya kurer aze remi jontika kalafa tandapa doon blir.