Difference between revisions of "Xanta ke Iguaçu stoyeem"

Lanugale, lekepon, amerindiaf grelt irubas kene Iguaçu kuksa tiyir. Kaigang grelt, tiyir intaf yolt, do vegungaf grelteem dilion bliyir ise va onara is tcabanhera is gedrafa midura se tuwavon anduna gan kuksa malgestuyur. Koe bata tawavafa fudama, greltik va mecoba is metan vols rotir nasbeik ke Thurpa Perake Lorik Mboy kivayar.

Batdume kotilanon, ta seotara va nendara is boduca ke tawa, tela lolistafa yikya ke wida kloason zo wetayar. Okie ba bata ilana, tela lolistafa tiyir Naipi, tanaf nasbeik ke greltokilik Igobe. Igobe tiyir gabentapaf gu trakura va wetara va nasbeikya, vexe tiyir okilikanh nume me rotsuneyer. Kuranon lanison vexe ton ikuzasa takra, icmilon dam prostewa dineyer, ko kiray dive wida va nasbeikya ve vanstayar. Bata miga noveyer da abdi wetara yikya va int tukarar aze tison ketafa gu kota derka lent lorik va int atoer.

Aname Igobe, widikeem va in sendayar da va jonte listafa nasbeikya abdivatasa va diwedaja in diyir. Igobe levkipeyer voxe va intafa puidera medrikon palseyer. Antafe yikye, budaf gejik yoltkiraf gu Taroba, gripokoleweyer ise va bata baliuca vewayar. Naipi is Taroba va sint sumion renayad. Nume rieta da va aguntanik fu tazdayar va Taroba tunigoviskayar. Radimi burdugal ve gorayar da tegir nume va davon koskun azed gestayar. Bak eldeviel ke wetara, pok kiray lize Naipi keyer ve kildegayar aze ve guldeyer. Belcon, kan widka moo aulafa lava yo ke Iguaçu kuksa.

Eldeon, koe wida, tiyir jadifa yonara : griawira ke Naipi sugdalayar da mea tiyir firviks tori nendas lorik Mboy. Viele perake lorik ve laniyir ise va intaf firviks pu widokilik ve imaxuyur, antafe Igobe va int ve atoeyer aze va ageltuca puon ve taveyer. Mboy bam ve tuzidapayar nume batcoba va kot widik ve kovudayar : rotapstara mo sin fu baliewer.

Perake lorik ko sidkroye ve kildegayar aze toz adeeyer ise adeepeyer… Xuvapanon gan bate perake va dane sid daletoe mea grukoegiyir, sid gedeyaweyer aze rusunon ve edavayar. Iguaçu kuksa, gelkeon aulapafa, bam ve tumerogrupenaweyer. Kene konak decemmetrolk pelkafa roda dem stoya se, tana lowoesa dam ara, daletoe ikaon tiyir.

Otces fertikeem va yatkuca ke oreem boreon mea grulhumayar. Va sin kozwison, Mboy va eaftafa jaxadara davon ve koskuyur : Naipi ton piaal ve zo artazukayar ise Taroba ton rapor.

Batugale, va conhuteem ke bat fertikeem daletoe narmon solparsanaf ware rokozwit.

Batinde Iguaçu stoyeem ve kobliyir : male biuna renara estena gan jaxadas lorik.