Difference between revisions of "Guboyyama"

Reiz : Guboyyama okon guvengama kum triva[modifier]

Lekepon konviele poroluik va tela localgafa is lodoklafa parmon wiyina ayikya toleon kureyer.

Inya va toloya guon milaflicafa nazbeikya dikiyir, ise sina koton vektayad.

Kurenikye, luxeon, va tanoya jotafa nazbeikya dikiyir, voxe ina tiyir zijnapafa is vonapafa : vey gadikya tiyisa tel lokiewik ke tamava.

Vani vidia, ikagadikya va intafa aflicaja vinustasiyir : va dugeemany ke bat velik me tabiyir, va dugeem ware loeke turoboganas va nazbeikyeem. Va in gu kot loparodjaf lag ke mona vajgeyer : battel va porma is zoratc gotcateyer, va mawa ke weltikya is tela ke kot nazbeaf weltoc pragayar. Tide mona, koe olkxo moe bapladaja, senyeyer, edje berikya koe myezakirafa mawa tigiyid lize va urmapafa ilava dadiyid, is va elzawa kane va int takanugon wiyid.

Kimtikya va kotcoba keon mejeyer ise me rovetemeyer gu gadikye lecen ine co-buuyur kire gan kurenik kottode zo boweyer. Moi kobara, ina alavon ic keldega tigiyir ise vanmia guboy debanyayar, batdume koe mona gu Cucendron gu zo yoltayar. Vexe toleafa berikya, tisa losintaafa dam taneafa, va ina gu Guboyyama yoltayar.

Wori Guboyyama, nekev vageje, zavzayar listafa decemon loeke dam toloy berik kore sin cuison blucteyed.

Konviele nazbeikye ke gazik va sirta ziliyir nume va kot porik koganeyer. Toloya weltamikya dere zo kozideyed kire koe gola porapon zo grupeyed.

Sina tid sensapafa nume va narara va lodojenias vageeem isu divatcetakarindeem viunsud. Warzafa puidera ke Guboyyama kire va grita ke berikeem gutcayar ise va ewazalteem soakseyer. Antafa vagerinda zo keyakseyed.

— Jin, ~ taneik kaliyir, ~ va jinafe kerapiakofe vage is englafa udasaca diskití.

— Jin, ~ toleik kaliyir, ~ va jinafa gubefa gratca anton diskití ; vexe va jinaf aboz dem moavayafa imwa is duzkirafo amoto gablenon vageté, ise batcoba tir volbrunafa.

Divatcetakasik zo aneyayar enide va toloya emakirafa cornette divatcetaka di madayar, ise lesou zo lusteyed. Toloy berik va Guboyyama rozayad enide va inafa boyara di eruyud kire ina va grivanya dadiyir. Guboyyama va sina lokiewon pirdayar ise dace djudivatcetakayar. Sin divatcetakanon kaliyid :

— Guboyyama, kas titil valeafa ede ko sirta co-lanitil ?

— Kax, weltikyama, va jin nulec. Me mancoba mu jin.

— Ovel, zo co-kipegatal ede man Cucendron ko sirta co-lanir.

Kontan metis Guboyyama co-divatcetakajayar ; vexe ina tiyir vonafa nume divatcetakanyar. Sin moni tolda meestuson zavzayad kire jontikeke zo tudaavayad. Tre licara ta loeke tutiguara va fonta, loa santoleafa cuala zo joayad, ise lente elza kotedje tigiyid.

Adim kalaf viel sokiyir ; sin mallakiyid ise Guboyyama cugedje itasuzdayar. Viele mea wiyir, toz boreyer. Povakikya, wison va ina ikuzasa, eruyur va coba sokiyir. « Co-dju… co-dju… » Ina boreyer eke me rotenuyur. Povakik, tis diolik, kaliyir :

— Ko sirta co-djulanil, mex ?

— Kax ! gue, ~ Guboyyama repaleson kaliyir.

— Ex ! kas titil kiewik ? povakik kaliyir. ~ Fu askí da lakitil.

Va ina ko mawa stayar aze kaliyir :

— Ko matela lanil nume va sariala di vanburel.

Guboyyama vere laniyir aze va tela lolistafa trasina sariala yestayar aze pu povakik vanbureyer, me rodiepileson kane bata co-rotaskiyir da ina ko sirta di lakiyir. Povakik va enga suxayar aze iskeson va antaf almuk, ve taksultazeyer. Nume sariala gu listafo moavayafo diremuko vere zo betayar. Moion, ko slakolak disukeyer lize va tevoy blis slakol trasiyir. Kaliyir enide Guboyyama va xinta ke slakolak di madamayar, azon va kot divlanis slakol ve taksultazeyer nume in gu listaf okol vere zo betayar : turkon sorka dem tevoy slakolukanyaf okol di tiyir. Povakik nueyer kane va diremstasik di askiyir :

— Fu wí, ~ Guboyyama kaliyir, ~ ede kon tovol koe tovolak co-tigir enide va diremstasik di askit.

— Ovel, ~ povakik kaliyir, ~ lanil nume wil !!

Guboyyama va tovolak vanbureyer lize baroy tovolap tigiyid. Diolik va tan dis va lukastap nariyir, aze uzason va in gu pwertaf diremstasik dem lolistafa wina nyoxa betayar. Azon kaliyir :

— Ko matela lanil, va tevoya zoxa kadime rustolesiki trasitil : va sina vanburel.

Moi vanburera, povakik va sina gu tevoy zanisik betayar. Sin dem pasiolese vage kadim diremuko vere titlaniyid aze ranyeyed dumede remi blira va arcoba meviele al askiyid.

Diolik pu Guboyyama bam kaliyir :

— Ex ! batse umcoba enide ko sirta di lakil. Me til sensaf ?

— En, vexe kas batinde lakití, dem jinafe vageje ?

Povakik va ina opelon ve taksultazeyer nume miledje vageeem gu moavaf is dilgavaf akakirapaf ar ve zo betayar ; azon va guvengeem kum triva, va tel lolistaf ke tamava, ziliyir.

Batinde ingayana, ina va diremuko kolaniyir ; vexe povakik loeke juikeyer da ina kaiki miamiel me di tiskiyir, kalwalzeson da, edeme, diremuko dimon di co-vanpiyir sariala, okol dimon slakol, zanisik dimon zoxa, is inaf vageeemany va taneaf tazuk dimon di co-nariyir.

Ina pu povakik abdiplekuyur nume va sirta abdi miamiel en di co-divlaniyir. Daavakirapafa mallakiyir. Nazbeikye ke gazik, walzeyene da megrupena sersapikya su artlakiyir, vulteyer aze va ina emudeyer. Ba divlanira va diremuko nubaziliyir aze ko sirtaxo stayar lize ganenikeem tigiyir. Amlitap ve sokiyir ; kottan ten stuteyer ise dingelt ve stivaweyed, kottan cugeke mafelas va listapaceem ke bata megrupenikya. Anton gojon loramayar.

— Ax ! Mana listikya !

Dace gazikye, wori guazapafe, va ina dun disukeyer ise pu gazikya omon kaliyir da va mana listafa greciikya vlevion me al wiyir.

Kota porikya tiyid trumafa ise va inafa divatcetaka isu vageeem krafiad enide va milaf direvielon di digiyid wari lilistafi tayi is deksapaf dodelik co-tid.

Nazbeikye ke gazik va ina mo tela loporafa runda koinkeyer, azon ta stutera stayar. Ina kapon stuteyer maneke ware loeke zo mafelayar. Voltarapa zo vanbureyer,vexe jotafe sersikye me estuyur maneke va ina dun torigiyir. Ina pok intaf toloy berik laniyir aze debanyayar ; pu sin va kunoya kava maneyer ; va yone kramte ziliyine gan sersikye isu vobe firviyir, nume sin zo gevapayad kire va ina me grupeyed.

Edje sin batinde prilayad, Guboyyama va mamlara vas santane bartiv is balem-sanoya wexa ve gildeyer ; va dosita vere gidukayar aze defreon lokalion mallaniyir.

Moi artlakira, va povakik trasiyir, aze, grewayason, kaliyir da ko sirta gire direvielon di co-djulakiyir, larde nazbeikye ke gazik al moeruyur.

Edje va kotcoba sokiyisa remi sirta pu povakik pwadeyer, toloy berik tuvelklantayad ; Guboyyama fenkuyur.

— Jontikedje al mallaniyic ! ~ ina kaliyir, wirkason is itapragason is va int divimpason dumede opelon su divmodeyer.

Wori me al djukenibeyer batvielu sin va sint al buluyud.

— Ede koe sirta co-tigiyil, ~ tan berik kaliyir, ~ me co-argaweyel. Lolistafa sersikya, tela lolistafa rowina nuve, al pir ; pu cin va kunoya kava al maner ise va yone kramte isu vobe al zilir.

Guboyyama pesteyer daavapafa. Va yolt ke bata sersikya eruyur, vexe sin dulzeyed da metan va ina grupeyer, da nazbeikye ke gazik puidepeyer nume va kotcoba en di co-ziliyir enide va inaf yolt di grupeyer. Guboyyama kiceyer aze kaliyir :

— Ina kle tiyir listapafa ? Lorik ! Kas va jin me co-rowí ? Kax ! Javotte weltikyama, va blafotafe vage pu jin beital, va tele rinon kotvielon diskine.

— Gue, ~ Javotte weltikyama kaliyir, ~ tí milboyaf ! Va intafe vage pu prazdaf Cucendron cwade beitá ! Co-gotí oviskapaf.

Guboyyama va bata vewara gestipiyir, nume tiyir sensapafa kire di zo co-tokteyer ede berik va vage co-djubeitayar.

Direvielon, toloy berik ko sirta lakiyid, nume Guboyyama dere vexe ingayana ware loon dam ba taneafa toma. Nazbeikye ke gazik poke ina kotedje tiskiyir ise va yona zijnaca dun kareizuyur. Jotafa weltikyama me argaweyer nume va juikera ke povakik vulkuyur ; acum va mamlara ke taneaf vordig vas miamiel gildeyer, folison da ware tiyir santane bartiv. Ve ranyayar aze bagon lion dam wocolya otceyer.

Sersikye va ina radimevulteyer voxe me rotebiduyur. Tana guvenga kum triva ve lubeyer aze gan ine trumapon zo treduyur.

Guboyyama den int artlaniyir, gaeloyiskafa, voldo diremuko, voldo zanisik, is dem vageje ; mecoba ke inafa kulupuca al zavzayar, anton tana guvengama, milafa gu bana lubesiyina.

Susik ke tuvel zo koeruyud kase va divlanisa sersikya me al wiyid. Kaliyid da va metan divlanis vox anton vagekirajafa yikya nutisa tawadayik lodam weltik al wiyid.

Viele toloy berik mal sirta dimlaniyid, Guboyyama eruyur kase al zo deasepeyed ise listikya al tigiyir ; gue kaliyid, vexe ina al otceyer ba mamlara ke miamiel, ise wilupon dume tana inafa guvengama kum triva al lubeyer, tela lolistafa ke tamava ; da nazbeikye ke gazik va ina al treduyur aze remi ark ke sirta al disukeyer, da ape tiyir renapase va listikya dem guvengama.

Sin agelton kaliyid ; lecen, arti abic viel, nazbeikye ke gazik sokruson volmiv sanegayar da va tela ayikya dem nuga gu guvenga va int entutageltasa di co-kureyer.

Guvenga ben kota sersikya azu dacikya az kotaf aboyikyeem toz zo lwiyir, vox mefavlon. Den toloy berik zo vanbureyer. Sin va intafa nuga ko guvenga laplekuyud voxe me jupekayad. Guboyyama, disukesa, va intafa guvenga kagrupeyer, kipeson kaliyir :

— Rowí ede ina va jin co-dojeniar.

Berik toz kipeyed ise nuleyed. Oluik lwis va guvenga, trumon disukeson va Guboyyama is va ina listapafa krupteson, kaliyir da batcoba tiyir tageltapafa ise va lwira va guvenga gu kota yikya mbi kalbenplekuyur.

Askiyir da Guboyyama debanyayar, aze vanplekuson va guvenga gu inafa nugama, rabateyer da bata kotunon vadjeyer ise koeon tigiyir dum sebeka. Gevara ke toloy berik ve tiyir gijafa vox ware logijafa viele Guboyyama va bana guvengama divucomayar aze ben nuga plekuyur. Moion povakik arttalayar, va vageeem ke Guboyyama ve taksultazeyer nume in loeke dam kotar ve tucuisaweyer.

Batviele toloy berik va ina wetce listikya wiyina bak sirta kagrupeyed. Ixereruson luxe kota sinafa askiperaja kev ina titon ve moebiduyud.

Guboyyama va sin kariwayar aze kaliyir, dabluson, da nuedon ixeyer, ise ganon zo djumalbanyayar. Den jotafe sersikye zo stayar, batinde diskiyir. Ine va ina lolistafa dam meviele krupteyer ; aze arti konak viel kureyer.

Guboyyama, tisa livonafa dam listafa, ko berma va toloy berik volmiv vistaleyer aze gu toloye aboyajiomikye dace revielon kureyer.

LIDOK

Listuca, ke ban ikrik, tir riafa jwa.
Inafa mafelara meviele argar ;
Vexe coba yoltana gu kuca
Tir droiskafa, ise lodroe vodar.
Tove Guboyyama povakik askiyir,
Va ina gaason, taveson,
Cugeke va gazik askiyir :
(Lecen batinde icde bat reiz tulidason).
Listuca, bata gruta loon dam divatcetaka tir :
Ta waltera va takra, ta jupekara,
Kapuca tir grutanya ke diolikya ;
Arbeon mecoba rotir, kanon kotcoba rotir.