Difference between revisions of "Iskemaks"

Darekeon. Serbois Weltikye isu Weltikya ten miafizestud, brigon, battan lente bantan.

Serbois Weltikya, latkikam dem raltaduka alma is faltaf iteem is krenugafa zatca, metakamadason vion estur, dumede gabentafa is linvesa trakura va ina onkar.

Serbois, ontinaf is pof dem favori lukast, ton tiva ke eldik ok arientik, nutir noglotaf is guyaf.

Adim, dum pu int pulvison, dakter :

— Efe, batcoba tir kivapasa !

Kurenik erur :

— Tokcoba, nanye ?

— Da Vaudrec va mecoba pu min al isker.

Serbois W^-ya ve tukerawer, dumede raltadukaf italk ben inafa alma laridagexaton al vere besawer, nume kalir :

— Rotir bafela dene tegivsutesik tigir. Men co-grupet.

Ise, tire, ina nugruper ; Serbois under :

— En, rotir. Lecen, efe bat ayik tiyir lokiewaf nik, ke min. Va mona me buluyur, batlize kottolkon sielestuyur. Grupecké da pu rin yalepeyer ise batcoba tiyir bro bask ta dodera va minafa luveduca, vexe ae, viele kontan va nik milaf gu min dikir, va in bafelason sotrakur. Efe, ede pesteyé akolaf, pune va koncoba mu in co-askiyí kore til jinaf tuwavaf konolesik.

Serbois W^-ya itomar. Aze, edje kurenik va wil walgaber, va int tiojer, milinde kontan boreson gitiojer.

In ware kalir :

— Ae rotir dene tegivsutesik bafela num iskemaksam mu min tigid. Va abiccoba, va lotiks co-kralí, va anton lotiks, va levtrakura, anton enide in co-wazdeyer da tiyir vadulaf gu min.

Bam kurenik klabuson tiyar :

— Ede djumel, vani miafizestura den Lamaneur W^‑ye lapitit, batinde va askiks di grupetet.

In dakter :

— En, va batcoba djumé.

Ise larde va fozdema aname berga al webokar enide taruter da valt ben vage co-mimar, bevular pulvis bastakanik dem listaf favori lukast ebelton wexayes mo batakafa grita is inafa vola ke kwokilik ke kodianya.

Viele sin va tegivsutexe ke Lamaneur W^-ye kolanid, lizirama vanmiae unenikeem dilizer ; aze viele Serbois W^-ye va int yoltar, beka zo grupecker, tel taneaf tcicesik ekeyupuson ranyar edje tel toleaf kicer.

Aze kurenikeem ko ilput ke tilik zo kostar.

Inye tiyir anamkaf ayik, anamkaf gu koti altoki. Taka nutir fixu moe aru fixu burenu gan toloy nimat pinapaf, dere trelapaf eke va toloyu fixu miv riwe vektad.

Kiavar, va toloya deba bazer, aze maneson va grufa disukerama pu Serbois W^-ya kalir :

— Tire pu win fu suté enide ko jinafe tegivsutexe di pic nume va bafela ke Vaudrec W^-ye di kogrupedá, va dana icdesa va win.

Serbois W^-ye me roweyonar da tiyar :

— Ax ! Vantrakuyú.

Tegivsutesik loplekur :

— Va bat olkom, va ostik trelapaf, pu win fu belí.

Va kabdueon eluxaxa narir aze tiyar :

« Jin, titeon miv sugdas, Paul-Emile-Cyprien Vaudrec, altogales is swavagales, va jinaf ironokaf kuranireem batliz muxá.

» Larde awalk va jin betvulon rodivjupar, pune va sutera va jinafa bafela abditrakuson djuxelká, nume bata den Lamaneur W^-ye di zo daykar.

» Larde va mek rontif konolesik dikí, va jinafa kotrafa tufa, ton yona velitafa vodaxa vas balem-vuntoy franc talolk is yona bokiewega vas riwe tevoy vuntoy franc talolk, pu Claire-Hortense Serbois W^-ya, dem mek vaj iku kreda. Bliké da ina, va bat ziliks ke awalkaf nik wetce wazdexa va abidasa is tarkasa vadulucapa, naleter.

» Sutelan koe Paris ba 15 ke teveaksat ke 1883.

» Sugdan gan VAUDREC. »

Serbois W^-ya joomar aze zavzar merolizisa, edje kurenik mal tegivsutesik kal ina woltendanon itatanamer.

Arti amlitki Lamaneur W^-ye gire pulvir :

— Tire, Weltikye, Weltikya va bat iskemaks rade rinafa finera me ronaler.

Serbois W^-ye ranyar.

— Va underugalam erú, ~ kalir.

Tegivsutesik, kiceson is rovamon, va int blagar :

— Abegafe weltikye, va wegayera rotaskisa da klabul, gildá ; jontiktan dile rotubgon gimalyedad. Kas gire djupil, eldeon, ba milaf bartiv, enide va rinafa dulzera pu jin vanburetel ?

Serbois W^-ye va int blagar :

— Gue, Weltikye, eldeon.

Fipton kiavar, pu kurenikya kerafa loon dam ariuta is mingason itomason va ma firvir ; aze divlanir, ton granapafa tiva loeke tcicesik zo ciwad.

Moida sin al dimdenlanid, Serbois W^-ye, budeyeson va tuvel, fikon tiyar :

— Al til fertik ke Vaudrec.

Kurenikya, deswasa va edji, botcenon rwoder.

— Jin ? Ox !

— Gue, rin !… Kontan va kotrafa tufa pu ayikya someiskel, vaxede …

Ina al tuzwaweper, ise djuvaniksantuson va abrotcaf vinotceem ta me impadimawera, inaf nubeem skotcamar.

Arti underugalam, ina kalir :

— Benje ! til oviskaf… til oviskaf… kas rin, sure, me pokoleyel da in… da in… va abiccoba co-isker ?…

— Volgue, in va abiccoba rotisker… pu jin… pu jin, gildal, vols rin…

Ina va in aludevon is manon kaldisuker, dumede va koncoba aneyar, dumede va bate somekostane megrupene ke Tise djukosmar, va diepilense bad abic kaliaf verast, bak manyona vula ke mesura ok jovlera ok meobrara tisa dum tuvel gubudenaman vane bulaf koeaceem ke gloga ; nume vion arder :

— Wori tce… jontiktan va iskemaks vas mana zolonuca icle lieke divulon co-krupted… pu rin.

In, ton bliuca ke ayik moxan gu kereem, levgon erur :

— Tokdume batcoba ?

Ina kalir :

— Kire… ~ aze takaskarar dumede gan tokte zo co-wayar, aze stivawer.

In borapon toz avlar. Dakter :

— Va batcoba me ronalel ?

Ina brunon dulzer :

— Efe. Acum va eldeviel me ket, va Lamaneur ^W‑ye vere rowalzet.

Serbois lente ina vukir aze sin ton iteem ko iteem konakvulon zavzad, tolke poke sint, lawison, lagrupeson, va sint lagildason, va sint bralason kal naav ke trakura kan tanbata lujafa is apulvafa bibera ke toloy tisik, dan belcon blis, sokafanad vox va sint uculed ike va sint grited ike va sint dun pitcad.

Aze levgon, in ko gexata pu ina omon prejar :

— Benje ! welidal da tiyil fertik ke Vaudrec ?

Ina epitumar : 

— Kas til bonaf ?… Vaudrec va jin renayar, tce, vexe meviele al seder… meviele.

In nugalier :

— Rotuxal. Anse !

Ina aulon kalir :

— Batinde, wori.

Aze in gire toz avlar, aze, gire vukison :

— Pebul, battode, tokdume in va kotrafa tufa pu rin iskel ? Pu rin…

Ina grutcion tiyar :

— Opelapafa. Inde batrielon kaliyil, intaf antaf nikeem tiyir min, in dene int lidam min bliyir, nume ba sutelara va intafa bafela, va min al modovar. Azon, durimon, mo eluxaxa va jinaf yolt al plekur, lecen jinaf yolt lev bruxa al gepoyter, tuwavon, milinde pu jin al giyaleyer, vols rin, mex ? Va imwa pu jin givanbureyer, kotaksaton ba alube va orilga ziliyir, kire ba lane alube ke teveaksat al rungrupeyev. Grupeckel. Pu rin va mecoba vugviele ziliyir, me trakuyur. Kurenikya vols kurenikye va lotiks mbi gifirvid ; kle, va intaf ironokaf lotiks pu jin vols rin al firvir, acke.

Ina tir aulapafa, tuwavapafa, eke Serbois klabur.

In gire pulvir :

— Ae, voxe batcoba co-tir keskajafa. Kottan va coba co-folir. Me ronalet.

— Kle, me nalet, abegye. Koe minaf ucom, tan-celemoy franc leon titid, ae.

In toz pulvir, milinde kontan pulvir viele va koncoba tidon rumkar, ise gukoenseson va kurenik.

— En, tanoy celemoy, batcoba volrotir, minafa ereskluca zo co-tazdar, rotaxe, in va lik co-goziliyir, pu jin, batcoba va kotcoba co-vanvur.

Aze in debanyar, nimatgamdar aze va favori lukast toz zejar milinde remi kobrapas bartiv gilaskir.

Serbois W^-ya va intaf asadarak al fenkur ; va fidexaki impar aze toz kobason kalir :

— Jin, me kralí. Rin gonundel.

In jontikedje me dulzer, aze klabuson :

— Kle, rotir lankane, va lik ke konoleks pu jin xaadal, kan zilira wal toloy blisik. Va mek nazbeik dikit, roskul. Batkane, art ke lotan zo budeter.

Ina goreston erur :

— Winsí inde art zo budeted ?

In levgon mibuwer :

— En til akoydaf. Kalitit da likon al konolet ; ise batcoba titir ageltafa. Me gopebut da bafela tiyir leve inaf yolt.

Ina va jin remruson gire disuker :

— Ae, inde djumetel, egadá.

Bam, in ranyar aze gire toz avlar. Gire nuklabur, beka gexata ayewar :

— Me… rotir co-gokalebgat… batcoba loon bagaliafa… wori… batkane va mecoba co-gokalitit… Wegayesik cugote co-govexaatad… En, batcoba va kotcoba vanvur…

Kabdu kurenik vukir :

— Kle, ede djumel, Abegya, den Lamaneur ta rupera W^-ye ant fu dimlakir aze va coba pebutú. Kalití da va batcoba al abdualbal, xarion, enide metan robulbinar. Larde va lik ke bat konoleks nalé, tire va jinafa askira lané, va debala grupená, grupé da tela tir cupafa is telapafa. Dumede co-kalí : « Dere nalel, abegya, larde jin, rinaf kurenik, nalé. » Aron, ageltafa, me co-tir bagaliafa.

Serbois W^-ya opelon tiyar :

— Inde djumetel.

In gire kalir, aultoveson re pulvison :

— En, walzilison va konoleks batcoba drikapon zo ropebur. Gu nik medjumexoneyes va amiduca wal min, batinde medjukaliyis : « Va battel lodam bantel kaiki awalkera abdualbá, milinde remi blira al abdualbá. » Gu bat nik konolet. Ise lanel da, ede in al modovayar, batinde co-askiyir. Me al under, va danekseem me al abdiwir. Milinde kalinyiyil, pu rin giyaleyer. Pu rin va ironokaf lotiks al djufirvir…

Ina va in kemeson azavzar.

— Seylon. Al gildá. Manote me govepebul. Den tegivsutesik vere lakil !

In tukerawes is levgon gojaf tcipar :

— Ovel. Lakí.

Va edji narir, aze vanlanison va ina kutcsotcer ise prejar :

— Boreon, abegya.

Ina va jo firvir aze va kutcarapa kazawar edje intaf tcoreem gan favori lukastap zo alamar.

Azon in daavackon divlanir.

Ise Serbois W^-ya, lubesison va fidexa, toz borer.