Difference between revisions of "NyagaceemScapin Nakileem01 Nakila04"

Xanto
Vergumvelt	Les fourberies de Scapin
Sutesik	Jean-Baptiste Molière
Piskura	-
Ava	Francava
Evla	1671
Kalkotavara
Vergumvelt	Nhagaceem ke Scapin
Kalkotavasik	Staren Fetcey
Piskura	-
Evla	2006
Klita	Kalkotavaks
Krentduga
Webesik	Vieux Daniel
Krentduga	Gotuenan

Taneaf nakileem, balemeafa nakila

Argante : Kontan va mana miltafa tegira ixam al gilder ?

Scapin : In va arienta ixam al vangruper, ise inton zo sikapburar maneke vaon poon pulvir.

Argante : In manon tir rulokapaf !

Scapin : Va in gildemet.

Argante : Va coba rokalitina icde bata kurenhera co-djugrupé.

Scapin : Va batcoba al trakut.

Argante : Kas va meura va coba yawatad ?

Scapin : Me, me vaon trakut.

Argante : Oke va skalera yovatad ?

Scapin : Va batcoba, rotitir.

Argante : Kas va coera va jin krenjason lwitid ?

Scapin : Rotir.

Argante : Kotaf rinaf dewitceem titir mefavlaf.

Scapin : Fu wit.

Argante : Va mecoba nhurnatá.

Scapin : Va mecoba vogal.

Argante : Va jinaf randayejes nasbeik co-djukonendatá.

Scapin : Va batcoba namhetet.

Argante : Ise Silvestre facilik, va in vordavapá.

Silvestre : Zo co-gevá ede va jin al vulkuyur.

Argante : Ax, ax ! Batse rin, proyaf yasagadesik, bowenhesik va yikeem.

Scapin : Weltik, tolwison va dimpis rin zo felbé.

Argante : Va rin kiavá : va jinaf dirgareem en maninde al tarkal, nume bak jinafa gracaca nasbeikye al linular proyanhaf.

Scapin : Vinhil, rabaté ?

Argante : Vimí. (pu Silvestre :) va mecoba kalil, facilik, va mecoba.

Scapin : Rinafa koyara al tir kiewafa ?

Argante : Lorik ! Kiewapafa. Iskel da aulon motcamá.

Scapin : Djumotcal ?

Argante : En, djumotcá.

Scapin : Va toktan, weltik ?

Argante : Va bat facilik.

Scapin : Tokdume ?

Argante : Va sokine viele tiyí gracaf me al gildel ?

Scapin : Va abiccoba al gildenhé.

Argante : Tokon abiccoba ! Mana tegira ?

Scapin : Rin ovemel.

Argante : Mana laoaca ?

Scapin : Ageltafa.

Argante : Nasbeikye kurese nekev mefinera ke intafe gadikye ?

Scapin : En, tir koncoba gokalina lent batcoba. Vexe co-boyá da me loral.

Argante : Me baton boyá, jin, ise en djulorapá. Va tokcoba ? Me kruptel da va koti zidesi vrati dí ?

Scapin : En. Viele va coba al grupé, dere al boyá, aze tori rin va rinaf nasbeik motcason al dulapé. Pu in va tok jinaf vorceks erul ise da icde acafa tarkara va gadikye ke dane in va bora co-gokutcar va in al codá ? Lokiewafa pulvira pu in me rotir, kore co-askil. Vexe en ? Al dostenhé ise al krupté da, rigon, in me kiover lidame co-rofolit.

Argante : Va tokcoba pu jin pwadel ? Cwade kureson va megrupenikya in me kioveper ?

Scapin : Va tokcoba rokalil ? Bali va in al kalplatir.

Argante : Ax, ax ! Batse tana lolistafa lazava ke tamava. Rogestanon rogomilat, coet, dubiet ise skaleweson kalit da bali al kalplatir !

Scapin : Lorik ! Ton trakopik va jinafa pulvira rin narursul. Sugdalá da in va bata arienta balion al zo-koar.

Argante : Voxe tokdume vaon al koayar ?

Scapin : Djumel da in tir loproyaf dam rin ? Yik tir jotaf is me lixeyaf dam gotir ovakiraf : tula, minafe Léandre dane, nekev kotaf jinaf tavereem, ware loroton al askir dam rinaf nasbeik. Co-djugrupenhé ede rin me al til jotaf ise dum artan bansareon va bonaca yo me askiyil. Al gildé, jin, da lekeon til dositik vanmiae ayikyeem ise da va tana bansarefa durimikya se fiaeyer ise da va kottana arton onkayal.

Argante : Batcoba tir ageltafa, dotrakú ; vexe kotviele al tí durimanhaf ise me al askí bateke in al askir.

Scapin : Va tokcoba djumeyel da in di askiyir ? In al wir va jotikya muon djumesa va kiewe (kire vey rin tir battel renan gan kota ayikya). Krupter da inya menpesa. Va in worar ise agralon dokalir ise durimon repaler ise linular skewes. Inya pu in kaldunur. Va fala in platir. Voxe batse gan inaf gadikeem doon zo onser, podratceson steges da in va inya gokurer.

Silvestre : Batse deksaf nhagik !

Scapin : Kas co-djumeyel da in iskeyer da zo atayar ? Kurera lodam awalkera vodar.

Argante : Arienta pu jin me baton al zo negar.

Scapin : Pu in kre erul : in pu rin me volson kalitir.

Argante : In al stegevanon kureyer ?

Silvestre : En, weltik.

Scapin : Kas pu rin co-djurotuxá ?

Argante : Ko tegivsutesik in va tizuca davon co-gokevotceyer.

Scapin : Batcoba me al djumaskir.

Argante : Batcoba pu jin ta kurerajoara va lo drikuca co-ziliyir.

Scapin : Joara va bata kurera !

Argante : En.

Scapin : Me joatal.

Argante : Vaon me joatá ?

Scapin : Me.

Argante : Tokon ? Kas va gadarokeem me digil ? Ise yoke tizuca varze nasbeik va dimkurera me seotatá ?

Scapin : Va batcoba in me dotrakutur.

Argante : Me dotrakutur ?

Scapin : Me.

Argante : Jinaf nasbeik ?

Scapin : Rinaf nasbeik. Djumel da in mover da tiyir kivas ise da va batcoba stegevanon al askir ? Va mancoba vol ebler da welidar. Batcoba va int co-kiovar linulason volbagaliaf va man gadik rin.

Argante : Va batcoba sí.

Scapin : Fistir, ta inafa is rinafa poruca, da koe widava in kalir da va inya eron al kurer.

Argante : Voxe, jin, kuraní, ta intafa is inafa poruca, da volson kalir.

Scapin : Me, tí lanaf da in me askitir.

Argante : Va in en vebatá.

Scapin : In me askitir, pu rin kalí.

Argante : En askitir, edeme va in baskonoleté.

Scapin : Rin ?

Argante : Jin.

Scapin : Kiewafa.

Argante : Tokinde, kiewafa ?

Scapin : Va in me baskonoletel.

Argante : Va in me baskonoleté ?

Scapin : Me.

Argante : Me ?

Scapin : Me.

Argante : Tetce ! Atedafa : va nasbeik me baskonoleté.

Scapin : Me, pu rin kalí.

Argante : Toktan va jin weyonatar ?

Scapin : Miv rin.

Argante : Jin ?

Scapin : Jin. Me titil manon nuedajaf.

Argante : En tití.

Scapin : Rin krandel.

Argante : Me krandé.

Scapin : Gadafa krenuguca askinhitir.

Argante : Va mecoba askitir.

Scapin : En, en.

Argante : Pu rin kalí da batcoba titir.

Scapin : Grewej.

Argante : Va grewej me gokalil.

Scapin : Lorik ! Va rin grupé, tuwavon til vonaf.

Argante : Me tí vonaf vols ikoraf viele kuraní. Va bata viskzunesa dewitca tenut. Bulul, facilik, lanil ta da va jinaf nasbeikaj aneyal remi da lanití ta da va Géronte jiomaik kakeveté aze va jinafa volporaca di pwadeté.

Scapin : Weltik, ede ta koncoba ropí favlaf, va jin dirgal.

Argante : Va rin grewá. Ax ! Tokdume in tir tanafe nasbeikye ! Ise da batvielon me tir nasbeikya deswayana gan kelt, dana co-tir jinaf konolesik !

Nyagaceem ke Scapin (Molière) Taneaf nakileem ← 3-eafa nakila - 4-eafa nakila - 5-eafa nakila →