Difference between revisions of "Madagasikarafa prostewafa kurera"

Prostewafa kurera[modifier]

Vanmiae selteem ke Madagasikara, orpa icde kurera tid amidafa, vexe toloya dofa kerdela krulded : erura va nuba ke yikya is zoltera va kurera kan yalera pu inaf gadikeem. Toloya kurerinda rotid : vanbenplekuna kurera isu dofinena. Ede pakoik va taneafa tcilkad da yasakiewega den divefa ebava me zo godear, nume zoltera va yona milforteyafa kurera dem savekaf keskeem, in gan toleafa loloon ikapir vexe soe wan lapter.

Icde prostewafa kurera, gotarkana abduaxa tir milafa koe varafa patecta, ton baroy gosopun greelt. Taneaf tir ilafa dopulvira wal toloya gadikya, aze radimi rupera va toloy yasoceem, ede dogildura sokir, toleaf zo aykar, tela kurererura. Ba bazen viel, ba jadion alubeaviel, dosten dum zeitaf gu zoltera va mana arientinda, espusikye is inafa yasa va gadikeem ke yikya ta erura denlanid : bata godelara va fiantranoana trogarn rozur ise jadion arti sanalubka ok aksat, fipta ba alubeaviel dilizer. Ba bat viel, mpaka ayik, trabe teixa dem yikye is konak yasoc, va stekef kurenik denlanid ise bak fipta katanasa va toloya yasa, dewitcasik yoltan gu mpikabary, uiveopik, vanpid ikapulvisik ke kot pak. Kan sin kota yasa va kredeem va bata kurera tugrupenar : tulon tela ke yikya bazer da todon gu megildura wal jotaf kurenikeem, ~ coba galpena gan metel, ~ diner da inya, spafa, den intaf gadikeem zo dimstatar, ise ben kureraf motc meka altofa tizaca zo rewatar, nume ban pak naler. Moi yona kumzilisa pulva tiyana gan tcokerasavsik pu toloy yik, bulkara va vodiondry (vadimee ke namulol) sokir, tegira tcalasa va keskeuca ke kurera kire gu zubi gluyasi va toloy yik zo torigir. Lekeon, atela ke bat pak ke namulol pu gadikeem ke kurenikya zo firviyir, vexe tce lovrendon bat yal kan lana erbitaya zo ikaplekur. Bata lecavodakorafa ko yoni webokayani is moaykayani lujorafi layki ton gluyedayan eruilt zo kobuder ; batcoba tir leca kire sugdalar da zoltena kurera livoldrikon dam bat firviks rogriaskitir. Teni estura bundana gan intafa yasa, jotafa kurenikya va gadafa oga bulur aze va kurenik is ikayasa denlanir, aze arti sanalubka ara estura dene gadikeem ke battelye batviele zo grustar. Koe prostewafa kurera, meka exonera va tegiv koe dotaxe is meka kumzilira koe atayxo vols witafa kurera tid. Voxe enide orpa me zo joar, firvira va vodiondry namulolki pu yasa ke yikya va kota miga vegodafa gu kota fiptara kalidure paker.

Madagasikarafa urima kalir :

– anambadiam-konamana, iteraha-hodimby ~ kurera ta dositik is radimif xantoceem.

Bata rieta tir omava ke stravok va kurera koe madagasikaraf selt ise ede tana abdilafa divrozana kreda me zo kotaskir, gluya di zo joad. Kottan gu kurera va koblira ke tanoy ok konak nazbeik gononkatas va yasagama ton gelukuca mu velikye radimifitise pu gadikye is govevebatase va yasakiewega arse ker. Gracara ke nazbeik koe exoma va in turantar nume, battode ayikya kruptena wetce tanaf gunik va iltiskuca ke tolonga, antafa bexoda ke mana kurera sotir dofinesa solkurera ; zambenikya va intaf rokeem ronopojar, trabe va dimdigira va bareaca ke kiewega dourlickeyena gan tolonga bak dofa blira. Ta vura va bata orpapa, Andrianampoinimerina gazik al vertayar dakteson da kurera ton licapayana weboka volsu nyudafa me zo sogluyedar, trabe in todon gu volgildura koe tolonga betviele zo rogriaskir. Andrianampoinimerina va kota tizaca kev battolya djubulusa va tolongoga ta dimlanira ko gadikeem dere al mopour, kire me rogindese va rodjera ke intafa kurera, lane kurenikye va kurenik talgempason ik itasemason alieyed. Kore rietava sokrupter da kurera tir dum bruxeem anton iliksantuwes sol wil ba awalkera, sedme grupepena urima, kurera gu dolexo zo dolunyer nume todon gu megildura kottol va intafa kelda tolon exuler.