Difference between revisions of "KanakafaVunda Batakik"

VI : Batakik

Batakik, toklizu pil ? Va jontik almuk ta layera va wilteem ke rinafe guema al olegal ; va jontik aal ta suxara.

Toka gijarotiaca va rin gu rinaf kiray al solimpar kire sumupon al pil ?

Kire pil losumuon dam lize ayik irubad, leve fentafa tupaokasa awaltara.

Ede va grupena ewala co-mallapiyil, wilteem ke rinafa guema zo-lupumuyud, volse in tir lamenaf gu suka milinde ben sfi sanon co-sukayar.

Batakik, va tokcoba pu cin kalitil kire sumupon al pil ?

Koe rinafo vo, kottan kotvielon sokestur kire gazdafa getinera va rin co-nufunyeyer ; va tok pak ke bat kulaceemap pu cin zilitil ?

Batakik va mecoba sonegar ; va mecoba sozilir. Batakik do yon dositik ko patecta va int al inker ; sin va yon fay sinkas va paokafa zaava faytaweyed aze mu int suyud !

Vielu batakik al pid, mea patav ote sfi al zo warolar ; mea kapav, va koncoba mea patav.

Viel fid dum lavaki ke uzdapa ; tokdume co-sabev larde wiltafa guema ke batakik va domega kotedje kalsuyud.

Sin va Kunye dem paokafa anamba ; va Nji dem molaf usukeem ; va kotcoba al narid.

Mea konviele ewalik titir daavaf ; mea konviele moe domega do biraskael.

Guazik ke Kunye batinde kaliyir, vexe yik toz kipeyed, do yona batakikya stuteyed ise va yon gadikyaf furotaflek ziliyid ; do yon ayik ke guemapa va yona gadikyefa raporkufta gu zelt ke batakik ikaziliyid.

Aze kan sfieem moe domega va biraskael tazukayad.