Difference between revisions of "Emudenik"

Emudenik

Tavesik va toloy ayik tidlanis van int disukeyer. Battan moe okol lapiyir, bantan laniyir. Sin va gurafa krimpa kal bema kolnayana moe ventakril men domineyed. Kuncayad, vion abdulanison koe nolda vanmiae raporka moe datafa letafa azekexa. Kontomon, okol dikuon iraltodayar. Men zo gilteyer voxe gantamimara batviele divnisa va pezolkeem zo wiyir. Tan ayik, icle, va gola grupeyer. Sin sledayad beka mali konak viel batakafa is zionafa bada va kelda al besayar. Tavesik patavayar da abdi bartivlik moe venta me di tigiyid. Fenteyer ; in va bema ta narira va arbul kolaniyir.

Va mekafo is fentapafo pulaxo remlaniyir. Moe ebeltawafra balemoy bost ke Franca, zovdayan kan balemoyi afoltki dem amidafa kseva, van reca mali barka traspuyud. Laizon al noldayar ba lik ke saneaksat, moi anyustaksatafa roduca, voldo zeviandasa muvara, nume mon tol-sanoy bemik irubas koe yona tcastafa wida moe azekexa mea piyid. Sazany zo gokeyer. Daru va tanafa olkoba tadlesa va intafa vreda anton wan tuidulayar, va vreda keve pulaxo is fenkuwesa vane ronefa azekexa. Dilk, bro telyon ke pulaxo, vane geexo dere disukeyer. Batlizu, bema tigiyir arte konaka decitmetra lize azekexa van geeka toz titniyir. Viele aftayar, kadulafa flava ke meftavaf sekol zo rokozwiyir lize tuvel ke letaxo fenkuweyer.

Tuidulamayanu Daru van dilk dimpiyir lizu va toloy ayik taneon al kozwiyir. Sin mea zo rowiyid. Kle va krimpa al bokayad. Kelt tiyir ledorikaf : koe miel, al ten noldayar. Gazda mo zionafi afi kolaumamasa darpe tidnira ke rujodpij tidniyir. Ba tole rielbartiv, vielcek anton nutozuweyer. Vexe batcoba vodar loon dam bat baroy viel viele aname teniskaf mielak von noldayar, ton yona sukagrablerama botcesa va jontolaf tuvel ke pula. Daru bak yon bartivap koe mawa bam keyer lizu ta lanira vlev lutiz is ropera va wileem is lirdera vanmia yeldeksa anton divlaniyir. Anye, genama ke Tadjid, lenteon lopokefa wida, ba tolka abdi olyastera va kobligara al vanbureyer. Arti balem-sanoy bartiv co-tolpitir.

In ta levgira va deblamera va umcoba diyir, dem yon denteyelt tervas va mawama is balikun gan ristula ta anamzilira pu telyon bemik ke yasa kosafa gu roduca. Geltron, volkaluca va kottan al vanolayar larde kottan tiyir wawaf. Kotvielon Daru va vace pu kot rumeik anamziliyir. Ine bak batyon viel va sin al graceyer, inu grupeyer. Rotir tane gadikye oku berapikye batsielon co-pitir nume inu gu yon olk co-rokobligatar. Delara gu radimifa warolara zo gonaskiyir, ae. Dentatota mal Franca re artniyid, lodolge kadimeon tiyir. Vexe vulkura va bata copuca co-titir volfakafa, va bata ervolia dem flormaf tacedik krabes leve awalt, va yona azekexa aksataksaton tukalkana, va tawa loloon brumewesa, pustapana, dem kote ye roidase ton gopa lev nuga. Namulol jondeciton awalkeyed, is dere konak ayik, batlize ok banlize, jontikviele megrupenon.

Lente bata copuca, inu riwe blisu dum tucpastik koe bata artefa bema, soe valeaf gu intafa abiccoba is bata figafa blira, al pesteyer jiomaik, do boltenaf rebaveem is vwepafa saxa is yon batakintaf vegemoy is lird is safteafa kobligara gu lava is sinka. Vexe, laizon, bata noldara, voldo walzera, voldo griatcera ke muva. Gola tiyir manafa, udutafa gu blira, dace ayikiskafa kore olkik mekon vanbenplekuyud. Vexe Daru batlize al kobliyir. Arkotlize pesteyer divblinu.

Divlaniyir aze mo tawila lente bema abdulaniyir. Toloy ayik art lik ke krimpa dure tigiyid. Inu va okolik kagrupeyer, va Balducci, va guazaf batultik jontikedje grupen. Balducci va kadimelanis arabik ton gluyayan nubeem is joomas arte wazdel giyir. Batultik kiavazatcayar voxe Daru me dulzeyer, varon disukeyesu va arabik vagekiraf gu dare faltaf sewek, ton averdkiraf nugeem vox dem vukuleem kum rilafa baynapa, ton taka dem vwepaf is trelaf delor. Sin vanlaniyid. Ta mebakara va arabik, Balducci va okol guboralanisayar nume lospa vion abdulaniyir.

Arte puda, Balducci ieyer : « Tanoy bartiv bad lanira vas baroy decitmetrolk mal El Ameur batliz ! » Daru me dulzeyer. Trelafu is alnafu koe arbulap, va sin tidlanis disukeyer. Meviele arabik al takamadayar. « Kiavá, ~ Daru kaliyir viele mo tawila artlaniyid. ~ Kolanic aze va int tuidulac ! » Balducci va okol porton titlaniyir, menyuson va wazdel. Pu tavesik leve broewesa nyoxa kiceyer. Orikaf itameem, ilepaf leve tubertrayano jo, is plozkiraf art, pu ini va obrasafa is vetcoyesa tiva ziliyid. Daru va fexa nariyir, va okol van lutiz stayar aze van toloy ayik dure kes koe bema dimlaniyir. Askiyir da sin ko mawa kolaniyid. « Va pulaxo fu tuidulá, ~ inu kaliyir. ~ Lotrabiangon titit ! » Viele ko mawa gire kolaniyir, Balducci moe saxa debanyeyer. Va wazdel do arabik al ilgluyayar nume bantan poke bending al kurdayar. Ton nubeem ware gluyayan is delor dure kadiyis, van dilk disukeyer. Daru va inaf kutceemap, kotraf, gasitaf, riwe ebeltazaef, taneon anton wiyir ; pez wori tiyir rontaf, iteem orikaf vozakirapaf. Delor va takelafo jo nisayar, ise, leve tolburmenafa alma vox griksevamayana gan fent, kotafa gexata nutiyir guyafa is tcumivafa ; batcoba va Daru pedrayar viele arabik van in takaskarayar aze modisukeyer.

― Kaiklanic, ~ tavesik kaliyir, ~ va eskayeladaxa mu win fu egá.

― Grewá, ~ Balducci kaliyir. ~ Mana yega ! Boreon va bliratildera !

Aze arabavon gukoeson va gralomenik :

― Pil, rin !

Arabik ranyayar aze, kabdueon gison va zokeveyen nubaskeem, va bema vion kolaniyir.

Do yeladaxa, Daru va rova vanbureyer. Vexe Balducci moe taneafa pulazega ixam feliyir ise arabik kev cag ke tavesik lente bending wale baza is dilk al kurdayar. Sotceson va galema dem yeladaxa pu gralomenik, lent zokeveyen nugeem Daru ve klabuyur. « In zo rodimgluyar, rotir. » « En, ~ Balducci kaliyir. ~ Batcoba tiyir ta koyara. » Ini nuranyayar. Voxe Daru, aykayason va galema mo sid, pok arabik al badeyer. Bantan, mekon kalison, ton vozes iteem va inu askisu disukeyer. Ton tunuyayan nugeem, in va kot adeenaf nubask belcon pragayar aze va galema dem yeladaxa nariyir aze va anteyasa plawa gelavayar, ton yon kaliaf laridacekam.

― Bam, ~ Daru kaliyir. ~ Xeim tokliz lanic ?

Balducci div yeladaxa va nyoxa kaimpayar :

― Batliz, nazbeye.

― Atedaf ravesik ! Batlize fu kenibec ?

― Me. Koe El Ameur fu dimlapiyí. Voxe rin, ko Tinguit va pusik bildetel. In koe aotcadota zo ker.

Balducci ton nafa kicerama va Daru disukeyer.

― Va tokcoba kareizul ? ~ tavesik kaliyir. ~ Va jin sil ?

― Me, nazbeye. Batse benplekura.

― Benplekura ? Me tí…

Daru klabuyur ; va guazaf Corsicik me djupuidayar.

― Adim, me tir jinafa exava.

― Ex ! Va tokcoba batcoba sugdalar ? Bak geja, kota exava zo ksuber.

― Battode, va gejadaktera keté !

Balducci kan taka vanovayar.

― Ae. Vexe benplekura tir ise va rin dere icder. Debala maltowar, nutir. Borefa kevmadara zo pulvir. Laninde zo tixat.

Daru gutakelaweyer.

― Terektal, nazbeye, ~ Balducci kaliyir. ~ Va rin albanyá, gogildal. Koe El Ameur, ta fiera koe tawavomo ke utcapa, mon san-toloy tiv ise godimlapí. Okilik al kalir da va bat tozekik pu rin gonodiá aze fure di dimlapí. In banlize me zo rosuyur. Inafa wida tegulaweyer, sin va in djudimnariyid. Ko Tinguit eldeon gostatal. Mon tol-sanoy decitmetrolk pu poik dum rin me fu kovudad. Azon, batcoba al tenuweter. Va rinaf ravesikeem is bliranya katrasitil.

Kadimu rebava, okol kligas is intockadendas zo gilder. Daru rem dilk disukeyer. Saz ape tidniyir, afi moe noldafa azekexa tumantaweyer. Viele nolda al kaljeter, awalt gire gazatar ise va raporxo warzon anteyatar. Bak konak viel, ware, meroatalen kelt va intafi rodafi afi mo antiafe divatce malgimatar lize mecoba va ayik tusetikenayar.

― Adim, ~ in van Balducci rwodeson kaliyir, ~va tokcoba in al askir ?

Aze eruyur, abdi da batultik va art di co-fenkuyur :

― In francavur ?

― Me, meote. Mali tanoy aksat zo kaaneyayar, vexe zo preyutayar. Va intaf kosayik al atar.

― Kev min tir ?

― Me folí. Voxe metan en rogruper.

― Tokdume in al atar ?

― Golde yasarienta, folí. Battan va olk pu bantan danuyur, nutir. Batcoba me tir aftafa. Adim, tcilon, in va kosayik beroason al atar. Grupel, dum tori namulol, zip !...

Balducci va nubara va imiz mo larida zatcezayar nume arabik, ton jekuna obrara, va in bemuamon disukeyer. Daru kev bat ayik, kev kot ayik is inafa ikorajuca is yona inafa merotargana bogaca is inafa oviskuca gu fortey ve zideyer.

Vexe lembiesiko moe bending dankayar. Inu pu Balducci va yeldaxa tolzanoluyur, klabuyur, aze pu arabik gire zanoluyur. Bantan toleon pegon uliyir. Inaf levmadan meem va sewek dure fenkumuyur nume tavesik va mazdaf is reltkiraf ast ve kozwiyir.

― Grewá, jotye, ~ Balducci kaliyir. ~ Vere golapí.

Ini ranyayar aze va arabik vanlaniyir, va wazdelam divucomason.

― Va tokcoba askil ? ~ Daru rodon eruyur.

Balducci, titickeni, va wazdel nediyir.

― Me zegal.

Guazaf batultik klabuyur :

― Dum kuranil. Tce, til ervokiraf ?

― Va tcabanyerazelt dí.

― Toklize ?

― Koe biloxa.

― Pok ilava co-goplekul.

― Tokdume ? Va mecoba kivá.

― Til mamlenaf, nazbeye. Ede sin kevmadatad, metan titil bravakiraf, kottel koe mil eyelt tit.

― Va int rojutú. Va ugal dí inde va sin artlanis rowí.

Balducci toz kipeyer aze nyoxa va ware batakaf talgeem laizon ve besayar.

― Va ugal dil ? Ae. Batinde kaliyí. Kotedje sotil ludzotenamaf. Batdume va rin albanyá, jinafe nazbeikye tiyir dum rin.

Va dierk miledje impayar aze mo baza aykayar.

― Va in sul, kal El Ameur va toloyo ervo me olegá.

Dierk mo ebeltaf ling ke azega jebeyer. Viele batultik van in rwodeyer, tavesik va inafa dakela dem lelt is okol peziyir.

― Terektal, Balducci, ~ Daru laizon kaliyir, ~ kota batcoba va jin boiker, is rinaf fanik taneon. Vexe va in me zurteté. Lyumatá, en, ede gonotegití. Voxe me va batcoba.

Guazaf batultik kabdue inu tigiyir ise bokson disukeyer.

― Va kwestaca raplekul, ~ vion kaliyir. Jin dere, va batcoba me albá. Va plekura va wazdel pu ayik, nekev yona tanda, me giltavé, ise dace, en, tí kinokaf. Vexe me rotisket da sin askid.

― Va in me zurteté, ~ Daru tolkaliyir.

― Tir benplekura, nazbeye. Tolkalí.

― Ae. Va jinaf kaliks pu sin tolkalil : va in me zurteté.

Balducci lavion lagundeyer. Va arabik is Daru disukeyer. Adim gorayar.

― Me. Va mecoba kalití. Ede va cin djunyul, ae, va rin me ranketé. Jinafa benplekura tir bildera va gralomenik : skú. Va eluxaxa pu jin dure fu sugdal.

― Me favlafa. Me meutú da pu jin al iskel.

― Me til ikoraf tori jin. Grupé da agelton kalitil. Til ke bata gola, til ayikye. Vexe gosugdal, tir verta.

Daru va klint fenkuyur, va lujoraf tiracam dem kadulafa sida impayar, is va bruxak kum kerafa inta dem sergent-major bruxa zanudasa va conyukara va suterateza, aze sugdayar. Batultik va eluxaxa skudason soayar aze ko vobor plekuyur. Aze van tuvel laniyir.

― Va rin fu dositá, ~ Daru kaliyir.

― Me, ~ Balducci kaliyir. Va doluca me zegal. Su bagel.

Va millize yalestaf arabik itayar, nigeson espedaweyer aze van tuvel va int danteyer : « Done, nazbeye », kaliyir. Tuvel kadimuon alieweyer. Balducci kabdu dilk gepoyteyer aze griawiyir. Inafa bora gan nolda zo belkuyud. Okol kadime nyikoy tegulaweyer, wil ciwaweyed. Vanion, Balducci impason va okol kan fexa va dilk gire kabduelaniyir. Van krimpa merwodeson abdulaniyir, taneon griawiyir aze okol radimelaniyir. Raporkapa tulwon tanamuyur. Daru van mezekayas gralomenik dimlaniyir. Bantan va inu kan iteem me buluyur. « Kel ! » tavesik arabavon kaliyir, aze va mawa vanlaniyir. Ba remlanira va pikay, dimboyukeyer, van baza laniyir, va dierk nariyir aze koucomayar. Azon, merwodeson, va mawa kolaniyir.

Jontikedje, moe saxa zavzayar senyes, disukeson va loloon budes kelt is terektason va amlit. Batse bat amlit nuvelayas portaf bak konak taneaf viel ke intafa artfira, kaiki geja. Va play koe widavama tite sekol solparsas va letaxo gu tidefa azekexa al eruyur. Batlize, pistafa rebavega, kusafa is ebeltafa lenteon, raltukafa ik kadulafa geeon, va jowa ke kotabaf idulugal tcalayad. Inu gu lolentef play moe azekexa al zo yoltayar. Tozion, moe batyon niaaf taway anton irubanaf gu rapor, antiuca is amlit al tiyid olgaf sedme in. Konaklize, bourga va nutisa midura askiyid, vexe ta malnarira va lan rapor zeitaf gu vegedura al zo suxayad. Ziara batlize anton tiyir ta warolara va ye. Arviele, konaki tawaki badenafi koe yona suxaca zo fasiayad ; batkane mazdafa widafa matela zo kosudeyed. Ae, antaf rapor va baroya balemeaca ke bata gola besayar. Widava batlize nazbalayad, jebeyed aze griawiyid ; ayik remfiyid, va sint renayad ike ben larida va sint bugdayad, aze awalkeyed. Koe bato letaxo, metan, in mei emudenik, tiyir koncoba. Voxe soe, dive bato letaxo, inu lidam bantan me co-roblinyiyid ; Daru grupeyer.

Viele ranyeyer, mek lor va pulaxo malfiyir. Gan bata ronjafa daava ba antafa trakura da arabik al rotoceyer nume inu fu zavzayar antafu mekon gogorason, zo gevayar.Vexe gralomenik batlize tigiyir. Anton wale bending is baza kenon al senyayar. Itafenkuyuson, va pij disukeyer. Ton bata tirka, inaf vaf kutceem tudrusas moekote zo rowiyid. « Pil ! » Daru kaliyir. Arabik ranyayar aze kadimlaniyir. Koe mawa, tavesik va rova poke azega vleve dilk nediyir. Arabik wan disukeson va Daru va int rundayar.

― Aelel ?

― En, ~ gralomenik kaliyir.

Daru va toloy zoratc inkeyer. Va regelta is punta nariyir, koe azekol va cowega feredjayar aze va tiecadekama vanteyayar. Edje cowega burmeweyer, ta vanburera va bluda is konako ato isu kemke is tuekamayan vrod vlevu lutiz, inu divlaniyir. Viele cowega al burmeweyer, inu mo kadoma ke dilk ta tufentara rundayar, aze va tuekemayan vrod tuidulayar aze, tenion, va ato ton vubilte alieyer. Bak tana intafa lizira, va dierk luvevon ice ronef ucom ve klantayar. Va ekeda aykayar, va pulaxo kolaniyir, aze va dierk ko klint ke baza plekuyur. Viele ko mawa dimpiyir, miel lubeyer. Koafiyir aze pu arabik zanoluyur : « Estul ! » kaliyir. Bantan va cowegaki nariyir, ko art kirepton bureyer voxe azavzaweyer.

― Voxe rin ? ~ kaliyir.

― Radimi rin. Dere estutú.

Kutcapeem fenkuwemeyer, arabik klabuyur aze ko cowega elvon talgayar.

― Moi estura, arabik va tavesik disukeyer.

― Til malyesik ?

― Me, va rin kalieldeon sú.

― Tokdume do jin estul ?

― Aelé.

Bantan ve stivaweyer. Daru ranyayar aze divlaniyir. Va pemarilava mal lutiz vanbureyer, wal azega is bending bide intafa ilava divatceyer. Kou zolpapa ranyesa koe alava is zanudasa va vegemoy dem vargi, va toloyu modivatcesiku impayar aze mo pemarilava rundayar. Porfeon azavzaweyer, pesteyer kliwafu, mo ilava debanyayar. Mea koncoba zo gonaskiyir ise zo gonegayar. Inu va bat ayik godisukeyer. Acum disukeyer, lagestason va bata gexata tuyatkawepesa. Me jupekayar. Va orikafa is jebesa disukera is sulemaf art anton wiyir.

― Tokdume va in al atal ? ~ ton puda dem akoyesa plabuca kaliyir.

Arabik va disukera ve danteyer.

― In al otcer. Kadimvulteyé.

Van Daru itamadayar, ton kotrafa volkalafa koerurinda.

― Vudel ?

Bantan ve tritaweyer, itaskarason.

― Batcel ?

Arabik va inu disukeyer, artfenkuson. Lavion, me gildayar. Zunera va Daru wayar. Miledje, pesteyer fofkafu is rusionafu koe altopo, rebokan wale toloya ilava.

― Batliz senyal, ~ volkeon kaliyir. ~ Batse rinafa ilava.

Arabik me zekayar. Va Daru rozayar.

― Kalil !

Tavesik va in disukeyer.

― Batultik eldeon dimpitir ?

― Me grupé.

― Do cin pitil ?

― Me grupé. Tokdume ?

Gralomenik ranyayar aze ton nugeem van dilk mo divatcesiku senyayar. Afi ke tralafa tudala ko iteem ronton lubeyer nume vere itabudeyer.

― Tokdume ? ~ Daru tolkaliyir, ~ ranyesu kabdue ilava.

Arabik leve tuwiiskasi afi ve itafenkuyur aze va inu disukeyer lamegutazekason.

― Do cin pitil, ~ kaliyir.

Isti mielcek, Daru me wan kenibeyer. Varon basvageyeson ko ilava va int al plekuyur : lebon gikenibeyer. Vexe koe mawa ve tir vageiskafu, klabuyur. Pesteyer rozaganu, zoeson va tolvagera. Aze epitumayar ; va ar konaktan al wiyir, nume ede co-gonaskitir, va kevelik fuxetolon co-empatar. Male ilava, va in ware titickenaf is itabudes leve tizafi afi rodizveyer. Viele Daru runafiyir, mielak ve nutuopraweyer. Abicabicon, koe dilk lize bitejiskaf kelt kaliziwemeter, miel gire tublisaweyer. Tavesik va kabdueon senyeso alto fure solwiyir. Arabik mea zekayar voxe nuvitafenkuyur. Bagafa suka aname bema mwarneyer. Va rujodeem rotir fu co-aloyayar nume awalt di co-dimfiyir.

Bak mielcek, suka tugijaweyer. Wil tegulawemeyed aze stivaweyed. Arabik mo kril rwodeyer, atoeson va ge pu Daru fogildesu va brera. Inu va inafa gandira tulopoaweyesa is tulovexaweyesa azon pitcayar. Va bata lipokefa sukewera terektayar ise merokenibeson klokeyer. Koe mawa lize mali tanda antafu kenibeyer, bata tigira funyeyer. Vexe dere funyeyer kire ina pu inu va berinda battode vewana is grupenyena koaykayar : ayik, walzilis va mila mawa, sayakik ok gralomenik, va divulafa gluyara sozubid milinde, iskeyes va pertor do vageeem, vamoe intaf amidaceem ko guazafa doda ke modovara is cuera, kotsielon va sint kazokeveyed. Vexe Daru va int botceyer, va manyona kwestaca me albayar, gokenibeyer.

Vanion wori, viele arabik meroremwinon zekayar, tavesik men kenibeyer. Ba toleafa liziwera ke gralomenik, ve tutritaweyer, eloganon. Arabik moe meem vion madagiyir, ton riwe keniberafa liziwera. Debanyes moe ilava, mezekason keyer, van Daru metakaskarason, milinde co-kalterektayar. Daru me zekayar : su trakuyur da dierk koe klint ke baza wan tiyir. Vere gotegiyir. Va gralomenik wori wan dizveyer ; bantan ton mila puntakirafa liziwera mo sid va nugeem aykayar, aze gire keyer, aze vion toz madagiyir. Daru fu powayar viele arabik toz laniyir, batviele tuwavon, vox zulton amliton. Va ludevaf tuvel vane lutiz vanlaniyir. Va arelta xelkason nubayar aze kadimon malplatison va tuvel vox mebudeson divlaniyir. Daru me al zekayar : « In yater, ~ inu anton trakuyur. ~ Kiewaxe ! » Soe oblakasotceyer. Wil mea zekayad : bantan kle tigiyir moe azekexa. Acaf lavalor va inu bam artfiyir, voxe va coba anton ve grupeyer viele arabik wal tuvel gire blonjaweyer aze obrason budeyer aze loriskon dimsenyayar. Bam Daru geon rwodeyer aze komodeyer. Gire vanion, ludevon icu kenibera va yona anyerkafa bora aname bema fogildeyer. « Kloké, kloké ! » pu int tolkaliyir. Aze kenibeyer.

Viele divmodeyer, kelt al nisaweyer ; rem zokevejeyen dilk fentaf is karaf gael kostiyir. Arabik kenibeyer, dure apcas vleve modivacesiku, artfenkuson, va int jovlepeson. Vexe viele Daru botceyer, in eafton vagrableyer, disukeson va Daru voxu mekagrupeson, ton oviskaf iteem is muxara kovudana maneke tavesik va bora radimon askiyir. « Me vudel. Jin. Gonestul ! » Arabik takabotceyer ise va ene kaliyir. Vumeltuca mo gexata su dimfiyir voxe inafa muxara wan tiyir gracafa is meobrasa.

Fadxa tiyir gadiafa. Sin uliyid, kottol debanyes moe pemarilava, talgason va yoni cowegaki. Azon vlev lutiz Daru va arabik vanstayar aze va kelli nediyir lize va int tcateyer. Ko mawa dimkolaniyir aze va toloyu modivatcesiku is pemarilava soayar aze va intafa ilava is olkoba vuyur. Mo tawila koo bema bam divlaniyir. Koe faltaf kelt tidawaltayar ; mildafi is blifi afi va letafa azekexa vamolavayar. Moe krimpa, nolda konaklize jeyer. Rapor gire fu awiyir. Kurdason kene azekexa, tavesik va letafe divatce nyaseyer. Va Balducci trakuyur. Va ini al puidayar, al dimstakeyer, laninde, dum ede koe mil eyelt me djutiyir. Va done ke batultik wan gildeyer, nume megrupeson tokdume, divulon pesteyer nedafu is rozaganu. Vere, kaike bema, gralomenik bobayar. Daru terektayar, riwe nekev int, aze, yatkafu, va ye ve mimayar ; ine koo rid azdayar aze ko nolda vanludevaweyer. Zersulaf gomil ke bat ayik va inu kevieyer, wori zurtera vol tiyir porafa : antafa trakura oviskon plukeyer. Nume inu va intikeem stakseyes va bat arabik is battan rovebatayas is megrupotceyes belcon rotapsayar. Daru ranyayar aze moe tawila anamelaniyir aze keyer, yaleston, aze va bema kolaniyir.

Arabik, xowas van sid kum umava ke lutiz, kan toloy gelt va talgeem tcateyer. Daru va in disukeyer, aze : « Pil ! », kaliyir. Ko mawa kolaniyir, kabdue gralomenik. Va tcabanyerafemla mo arbul sarduyur aze va avlaraperfejuleem vukuyur. Ranyeson keyer kali da arabik va delor is averdeem al tolplekuyur. Va bema koolaniyid aze tavesik va divlanira pu dositik nediyir. « Lanil ! » kaliyir. Bantan me zekayar. « Pí », Daru kaliyir. Arabik divlaniyir. Daru va mawa kolaniyir aze va eruilt dem beg is kemke is bota askiyir. Koe pulaxo, abdi da divlaniyir, kabdue baza tanveraston klabuyur aze va pikay ke bema remigayar aze arttuvelayar. « Batlizo », kaliyir. Van ronexo vilteyer, kadimelaninu gan gralomenik. Vexe, abicon poke bema, va acaf lor kadimeon fogildeyer. Dimlaniyir aze va monexo ke mona kodisukeyer : metan tigiyir. Arabik va inu askisu disukeyer, numegildason. « Lanit ! » Daru kaliyir.

Sin tanbartivon avlayad aze poke kalkafa wafanzinda va int tildeyed. Nolda lolokalion jeyer, awalt va kota warulla fure lejayar, va azekexa abicabicon turodawesa is yartedasa dum gael wilupon tucuayar. Moe kelda lev sinafa bora sid re mamayar. Konaklize, kabdue sin koni zveri daavon ieson darkaludzeyer. Daru va fedafi afi uliyir, gelavapason. Ilamsiskerinda koe in lente yastafa darkapa, dure riwe varon blafotafa, leve iskora ke faltaf kelt, kobliyir. Sin tanbartivon wan laniyid, geon. Va tuazekayana kesiinda kum nuligaf rapor artlaniyid. Maleon, azekexa roneon vane omafa azeka titfiyir lize sin va konak mazdaf aal rosolwiyid ; geeon raporafa flava va olyastena kerdela gu patectoy askiyid.

Daru va toloya nia kodisukeyer. Arte zida awalt anton tiyir, mek ayik nediweyer. Inu van arabik rwodeyer ; bantan megildason disukeyer. Daru va eruilt pu in atceyer : « Naril ! ~ kaliyir. ~ Tid kemke is beg is bota. Tolkon roslatal. Ise dere va decitoy franc. » Arabik va eruilt is erba konariyir vexe va kotraf nubeem keve ast suyur, dum ede me grupeyer va coba icde bat ziliks gonaskiyir. « Dure disukel, ~ tavesik kaliyir nedison va ronafa nia, ~ batse vawa van Tinguit. Toloy lanirabartiv. Koe Tinguit, ristula is ardial tigiyid. Sin va rin ked. » Arabik ronon disukeyer, keveon wan kagison va eruilt is erba. Daru va inafa ma nariyir aze askiyir da in geon balemeon rwodeyer. Tite bria lize sin tigiyid, laviamafa kelda zo rodiepileyer. « Batse sleda remo azekexa. Batlizu arte tanoy laniraviel, va yono baspexo isu taneaf lamasik trasitil. Sin va rin emudeted ise kare intafa mwa bravatad. » Arabik van Daru re rwodeyer ise radeyinda moe gexata madaweyer : « Terektal », in kaliyir. Daru takabotceyer : « Me, va int stival ! Vere va rin iské. » Geaskarayar, va toloya borapa van bema askiyir, va yalestaf arabik kruton disukeyer aze dimmallaniyir. Konakwexon, va intafa bora mamtafa moo fentafa tawa anton gildeyer, ise va taka me danteyer. Arti gemelt, wori, rwodeyer. Arabik batlize wan tigiyir, kene venta, ton re rumkawes meem, ise va tavesik disukeyer. Daru va larida webokawesa pestaleyer. Vexe volkeon ve vogadayar, sugdadapayar aze mallaniyir. Sumeon ixam tigiyir viele gire azavzaweyer aze disukeyer. Moe venta metan wan tigiyir.

Daru klabuyur. Awalt re tiyir tidenyaf koe kelt nume va inafo jo toz vumbeyer. Tavesik radimlaniyir, taneon melanon, aze elvon. Viele va ventama artlaniyir, furovepeyer. Kaliapon tidlaniyir aze, divviavan, moe ontine azavzaweyer. Taya dem pist, geeon, mo faltaf kelt cuon zovdaweyed, vexe vamo azeka, roneon, idulwibra ixam tidstiyir. Ise koe bata bagafa wibra, Daru, ton licana takra, va arabik vion lanis moe kelda van flint kosmayar.

Vanion, tigis kabdue dilk ke pulaxo, tavesik va jotafi afi welvesi mal tideda mo kotafa welma ke azekexa mewison disukeyer. Kadimeon, moe ebeltawafra, wale gonoyeem ke yon francaf bost, inon beliyin bendeks conyukayan kan afolt gan medeksafa nuba stokeweyer : « Va cinaf berik su bildel. Dodetel. » Daru va kelt is azekexa is kaikon merowino tawavo kale bira disukeyer. Koe bata albapayana patectapa, tiyir antafu.