Abdipulviks
Ta renara va ageltuca is tuelimara va bata, batyon tcilk koe Wittenberg zo tcilkatad, yoltoe taneatira ke Martin Luther Poran Partik, augustinus veemaf antorik, yanbadobkirik, tavesik is belisik va Tumtafa Alkopa. Battel va yontel gracatas num doon me rokeyaksetes bliker da sin twon askitid. Yoltoe Iesus Christus minaf feliik. Tir.
Tcilkeem
1. Kalison : Dulkotec !, Iesus Christus minaf Feliik al kuranil da kotrafa blira ke sagik tir dulkotera.
2. Bata pulva me rosugdalar va tubaerdara va dulkotera inde in gan partik zo skur, trabe movera is rwavera.
3. Soe dere me sugdalar va antafa koefa dulkotera ; bata tir meka ede va jontika cotkranavurinda diveon me warzer.
4. Batdume pursara lidam bogara va int jijar, ageltafa koefa dulkotera, trabe kali koara va keltgazaxo.
5. Papik va pursara ara dam tana koaykayana gan intafa rictula ok lovarictula me djumarevlar ise rotarevlar.
6. Papik va pursara rotarevlar anton dakteson is gruyeson da Lorik al arevlar ; vaxede tana inafa balikenaca tir. Tan vligus va inafi roti icde man pilkovaf tod koe troba zavzar.
7. Lorik va kontan meplukeson is metuomason kabdue intaf kaatoesik partik me faler.
8. Dulkoteraloveem pu blisik anton zo rorewar ; ise sedme in mecoba pu awalkik zo gokoaykar.
9. Batdume papik kare Tumtaswava tegir kotviele divzawason va teliz icde awalk is teliz icde adruca koe yoni intafi kexi.
10. Partik, levi awalkera, balikes va dulkoteraloveem mu Karlexo, tegijir ise linular volgruf.
11. Artazukara va lovapursara ton karlexopursara tir rata faytaweyena viele tujradik kenibeyer.
12. Lekeon abdi vols radimi falera lovapursara zo koaykayar, wetce posara va enafa iregliera.
13. Awalkera va kotcoba divgluyar ; sedme loveem awalkesik tir awalkeyes nume mea tir rozomen.
14. Mekotrafa lorbuca ik mekotunafa renara va mokivarapa pu awalkesik vrebon nasbad. Lolopinafa renara num lologijafa crakera.
15. Bata crakera, bata vudera, luke yonara pursara, ta da va pursara ke Karlexo tadler, ixam tir uma, kire va kultuca ke volpokolera tel loon vanar.
16. Nuvelar da wale Kusto is Karlexo is Fuda batcoba tir lidamidafa dam wale volpokolera is mepokolera is musuca.
17. Nuvelar da dene gloga ke Karlexo tulogijawera ke Rena lidam tulopinawera ke kultuca gotid.
18. Me nuvelar da kan kona lazava ok Sutekseem me rowazdet da gloga ke Karlexo va batcoba me roriwer oke koe sodegura grulaumar.
19. Dere tir mewazdeyena da kota gloga ke Karlexo tir lanapafa gu tierduca beka min miv en tit lanaf.
20. Kle, pulvison va varafa arevlara va kota pursara, papik va miv koaykayana pursara vols beta pursara anton gildar.
21. Batdume abdikalisik va Driaca coewer viele kalir da driaca ke Papik bas kota pursara va ayik tunuyar nume giwar.
22. Kire Papik pu gloga ke Karlexo va pursara duxayana, remi bata blira kare loveem, anton gruparevlar.
23. Ede kotrafa arevlara va kota pursara meviele zo rogetcar, antafa arevlara mu yon lokotunaf ayik, trabe leote, zo roskur.
24. Batinde bata cuisafa is tamefa abdiplekura va arevlara va kota pursara mewaltrakuson ziliyina pu kottan, va sanelok vrebon coer.
25. Milafi roti jadion rodini gan Papik icde Karlexo, kot tujradik koe intafo tujradaxo is kot partik koe intafo partaxo pilkovon digid.
26. Papik askinhir meixeson nope roti ke medigina marna vols kan dastruberacave.
27. Tan espus da erba koe inaf yult mamar mali da gloga va Karlexo tidar, va ayafa redura tujder.
28. Lanafa tir viele erba mamar, totciduca is fliwuca tulogijawed. Luxeon gorara ke Uja va seroluca ke Lorik anton rupter.
29. Toktan gruper ede kota gloga ke Karlexo zo djutunuyar : ton vrutaks, coba munestena icde Severinus Tumtik is Paulus Pascalis Tumtik.
30. Metan tir lanaf gu ageltuca ke intafa iregliera ; ware leon gu kotrafa arevlara.
31. Trasira va kontan lustes va ageltafa driaca tir liriafa dam trasira va endulkotes kontan.
32. Battan trakus da driacatwa va giwara ravaldar, do bantan taves va batcoba parmon zo nayatar.
33. Va tan kalis da driaceem ke Papik tir droiskaf zil ke Lorik tuke dan ayik va in zo tunobar, kalobrat !
34. Kire mana dozilira va driaca icde pursara, kizeyena gan ayik, va tubaerdarafa keldaskira anton zo rorewar.
35. Tan taves va meolegana dulkotera ta dimlustera va gloga ke Karlexo ok seotara va movurafizud, va kevkristevaca tujder.
36. Kot enireglies kristevik va kotrafa arevlara va pursara is troba rokar, dace a driacatwa.
37. Kot kristevanhik, awalkeyes ok blis, tuke Lorik a driacatwa va kota kiewega ke Christus is Uja paker.
38. Soe kava ke Papik vol zo govligur ; kire, inde al kalí, batcoba tir dakteks va ixera ke Lorik.
39. Ilamsiskera va driacafi roti kabdu sane lidam gruyera va adrafa dulkotera tid voldrikapaca, dace gan tel lodeksaf alkopik.
40. Ageltafa dulkotera va pursara sokaneyar ise sokalbar ; driaca, yoke intafa abrotcuca, vaon sogrikter ise konakviele tuboganar.
41. Papafa driaca tranodon zo gotujder enide sane sopron me gestir da mancoba tir lokiewafa dam sodeganhara.
42. Coba da koe xialara ke Papik lustera va driaca do segayerinda meinde zo rodolunher, pu kristevik zo gotaver.
43. Coba da tan zilis pu wawik ik beitas pu copik lokiewon tegir dam ede va driaca luster, pu kristevik zo gotaver.
44. Kire kan sodegara, sodegara tulogijawer nume ayik tulokiewawer. Kevoke driaca tulekiewar ; bas pursara anton tunuyar.
45. Coba da, tan, wison va vuranaf berik iskedar kire va driaca luster, va driuca ke Papik vols exukera ke Lorik me luster, pu kristevik zo gotaver.
46. Coba da goni tir favera va digikseem ta mona lodam lustera va driaca, rade slekafa kulaca, pu kristevik zo gotaver.
47. Coba da lustera va driaca tir nuyaca vols vrebaca, pu kristevik zo gotaver.
48. Coba da Papik olegas va blikera lodam erba, walzilison va erba va yona zardafa blikera lodam erba erur, pu kristevik zo gotaver.
49. Coba da driaca ke Papik tir kiewafa tode in va int me odiar volse tir awalkedapafa tode in va kivara va Lorik goldeon drasur, pu kristevik zo gotaver.
50. Coba da ede Papik va yona lonjera ke yon driacatujdesik co-gruper, acum co-abdualbar da Sanctus Pietrus abala zo kalvilar lodame kan cot is fortey is niskeem ke yon inaf namulol zo kolnar, pu kristevik zo gotaver.
51. Coba da Papik, gonisagaf, va kotrafa intafa kiewega co-walzilir ike va Sanctus Pietrus Uja co-doler tode batcoba co-tiyir adrafa, pu kristevik zo gotaver.
52. Odiara va giwara va int pu driaca tir korcafa, kore papaf ramisavik ok miv Papik va intafa gloga co-koed.
53. Tid volnik ke Christus is Papik malpous va tujdera va pulva ke Lorik koe ara uja golde tujdera va driaca.
54. Unera va ugallok ta tujdera va driaca lodam daktera va Pulva ke Lorik koe fanha tir lutsagara va bata Pulva.
55. Trakura ke Papik denon gotir : ede tanoya biota iku poraca iku fipta zo co-vanzilir, bam Evangil kan decemoya biota iku poraca iku fipta zo co-kotgruper.
56. Ujajwa lizu Papik va yona intafa driaca impar, zo tentunsud ise gan kristevikeem zo grupensed.
57. Bata jwa medenon tid ugaca ; kire tujdesik va driaca va ugaca flavad lodame volson anamzilid.
58. Dere me tid riwetcaca ke Christus is yon tumtik ; kire sin, luke Papik, va kava is gamda is awalk is kusto koe koef ayik rundad.
59. Laurentius Tumtik al kalir da ujajwa tid intaf wawikeem. Batinde kan avot ke intafe sare al pulvir.
60. Min rulokiskon kalit da bata jwa tid marna ziliyina pu Uja gan riwetceem ke Christus.
61. Keskeon denafa da arevlara va pursara is balikenaca, roti ke Papik tir dik.
62. Ageltafa ujajwa tir tumtapaf Evangil dem aliuca is kava ke Lorik.
63. Voxe bata jwa gwenon tir bogaks kire goldeon taneik vanpir ironokik.
64. Driacajwa gwenon zo aneyar ; kire tukeon ironokik vanpir taneik.
65. Jwa ke Evangil tid dona kan dana lekeon kulafamapaf ayik zo onayad.
66. Driacajwa tid dona kan dana kulaca ke ayik dure zo onad.
67. Driaca, ke dana tujdesik va yona riwetcaca sisker ise ilamsisker, va guntap did da erbazilidud.
68. Dolunheson do kava ke Lorik is lorbuca ke gamda, kava zilina gan driaca tid kimtafa.
69. Goni ke tujradik is partik tir tarkafa dostera va ramisavik va grekafa driaca.
70. Vexe inafi goni loon tir itafenkura is oblakafenkura enide sin va intafa klokara ika dirgura ke Papik me tujded.
71. Zo rotapstar tan pulvis kev ageltuca ke grekafa driaca !
72. Volse zo kumzilir tan dwis va gruspenuca is yona okridaca ke driacatujdesik.
73. Milinde Papik va tan kafas va intafa driaca malhon muneltar,
74. Va tan kafas va tumtafa sodegara is ageltuca, yontason va morojura va driaca, tolke loon djumuneltar.
75. Ilamsiskera va driaca ke Papik loeke espuson da in va ayik co-boeyes, merotisa, va gadikya ke Lorik co-divgluyar, tir yokara.
76. Volson esput da , icde gunuca, driaca va tela lopinafa trobama me rotarevlar.
77. Kalira da Pietrus Tumtik, ede in dure tiyir papik, va logijafa kava me co-gruzilir, tir lamtara va Pietrus Tumtik is Papik.
78. Volson kalit da in ok bet papik va yona lodontinafa kava digir, tulon : va Evangil ik ceakaceem ik fraskeragruta ikz- (sedme 1 Co XII).
79. Kalira da gamda dem papafa leca va gamda ke Christus miltar, tir lamtara.
80. Tujradik is partik is alkopik, iskes da kabdue sane manyona pulva zo tiyad, zo fabutud.
81. Bata voltranodafa tujdera va driaca tuvoldrikapar da ayik, dace kurmapaf, va poruca ke Papik kev emodara is dere arlafa bibera ke suptik djurojud.
82. Tokdume, sin kalid, tokdume Papik va kota gloga ke Karlexo, yoke tela lomalhafa danda, tumton sodegason, forendason va inafa mejera, tanon me tunuyar, solve da va jontiktan yoke barlipapafa danda ok volbagaliafa erba ok ta vegedura va intafa abala gronon tunuyar ?
83. Tokdume isker da yone zane isu ilanuk ke awalkik lapted ? Tokdume va yon viley muon kizeyen me dimzilir ike me nover da sin zo dimplekud, larde goblikera mu dimlustenik tir memalhafa ?
84. Ise dere : toka tir bata warzafa tumtaca ke Lorik is Papik ? da, ika erba, sin va roti ta tunuyara va lorbafa gloga renana gan Lorik pu mefolisik ik volnik zilid volse va bata lorbafa is renana gloga forendason va mejera is renon is faston me djutunuyad ?
85. Ise dere : tokdume rokapudojayana is awalktenuweyesa dulkoteralova tir erbon ok kan driaca rokalustena milinde wan co-tir drumkafa ?
86. Ise dere : tokdume Papik kan intafa erba lodam erba ke wawaf sagik va Pietrus Tumtik abala me kolnar ? Larde inafa kuluca tir logijafa dam tela ke tel losivakaf ayik.
87. Arcoba : tokdume Papik va troba arevlar oke askir da tan, ixam seotayas va varafa arevlara is kotrafa pakera va batyona kava, va inafa kavara gopaker ?
88. Arcoba dere : kas logijaf gunt ke Uja me co-tir ede Papik va yona intafa driaca decemon vielon is pu kot sagik lodam tanon is pu kon co-anamzilir ?
89. Batdume ede kan driaca Papik va glogagiwara lodam erba aneyar, tokdume va driacatwa inton lekeon ziliyina tutinar , larde mana tir lirirafa ?
90. Tizafa djugruidera va batyona potcafa dusiva ke suptik, ute soptera kan rekeranha, tir konedira va Uja is Papik pu volnikafa kipera ise tir tuvolkalara va kristevik.
91. Kevoke, ede driaca sedme swava is peztaka ke Papik zo co-tujdeyer, dulzera kev kotbata kevbenura co-tir drikafa ; mana kevbenura dace me zo co-askiyir.
92. Kle griawir kot katcilik kalis pu sane ke Christus : « Dili, dili » voxe dili me tir !
93. Volson tir drumbaf katcilik kalis pu sane ke Christus : « Gamda, gamda » nume gamda me tir !
94. Kristevik zo gokoldar ta da lagar da rem puida is awalk is kusto va intaf Christus okilik radimear.
95. Ise da kaiki jontika keldonara va kelt koar lodame moe musuca ke rolafi dili va int tilder.
