Difference between revisions of "Nagib Maxfuz"

Nagib Maxfuz (نجيب محفوظ‎ arabavon).

Suterotafa klepa ke Nagib Maxfuz do izva ke witaf berpot koe Misra is arabaxo manton gojewer. Teni XIX^-eafa decemda, arabavaf berpot va selt is araya kosmasa va bato suterotxo kan kalarabavara va yon decemdaf europaf berpot toz kofir. Bak 1920 sanda, Muxammad Xusayn Xaykal suterotik is gaderopik waster va nasbara va vedeyaf suteroteem kan yona europafa teza enide misrikeem koeon wir da tir lodabduef dam Talteka, ise rotir da tir lokaikef dam in koe seltayind. Metel lokiewon dam Nagib Maxfuz va man abdumimaks artstatar.

Bak 1911 koe glastedafa yasa ke Alkaira Nagib Maxfuz koblir. Koe Alkaira kotla (Fuad kotla) vayar ise bak 1930 sanda koe konaka suterotafa virda va yon taneaf suteravord sanegar. Aze va flibikaf play seotar ise gorar da ta berpotafa tolsutera va izva ke Misra va int di ektur. Rodjam ke yon taneaf berpot, dilizes koe faraonafa Misra, is rotir orkakwituca (yoke toza ke Toleafa Tamavageja Misra jebeper) joke negara va davafa izva gan in askid da va man abdumimaks ebgad. Daletoe, koe milsarefa Alkaira inaf berpot sokid. Va inaf seltaf ropplekuwereem geltrevon pimtar (Zukak al-midak, 1947 ; Bidaya wa-nixaya, 1949).

Vexe sanefa kiewatca is malyoparafa kagrupenuca gaveped. Bak 1952, kaiki da tenuyur va berpotap vanpitis Bara (Bayn al-Kasrayn, Kasr al-Cauk, Al-sukkariya), joke nios (ledolukafa vols lododesa sutera) va berpotafa sutera Maxfuz malisker. Sanegara va Bara bak 1956-1957 va in basetrakar. Tison 45^-daf in adim zo kagruper. Kan bat yasaf bwoy dere tis izvalenopara va Misra, mali 1919 artowara kali ironokaf tandeem ke gazaroti, Maxfuz tir nesidaf gu tela warzafa gaderopafa debala male vertumabetara ba 1952 is gu suterotaf is yanbaf lizor gogolas va kottazukafa geltreva.

Soe in kan Aulad Xaratina azaf berpot (1959) ilon ilawé; tir viank koe klepa is izva ke arabavaf berpot. In va kulafa prostewa ke purdasorda keskeon tolwebokar enide voner va malhopara va ginukaf dantereem ke vertuma ke Nassir, aze va rotatrakurevafa undera va roti voner. Koe Al-Axram fela skulton sanegayanon, gan yon ulemik karolas da in tir lamtas tel berpot zo dilfur aze koe Misra zo levpour (bak 1967 koe Beirut zo sanegatar). Milsareon bilita va inafa sposuca weber ise va flibaklepa me vanolar. In sanegapar : va yon warzot koe feleem is mon tanoy tandaf berpot, lopokon dimpison va malyoparafa geltreva (Tartara fauk al-Nil bak 1966, Miramar bak 1967), oke palseson va intafa staksa koe yon tselkkrent (Al-lis wal-kilab bak 1961, Al-tarik bak 1965). Nelkaf geltrevaf berpot tantaton elpatopon zo zaled, acum va logijaf saneg dam tel suterotaf en vansar.

In tir pokefis va yon jotaf zidaf suterotik tidfis remi lembiekafa rekola moi 1967 egale, aze koe yon radimif berpot va yon sinaf listucaf tuwarzaks balte miv nareter. Vexe tir viele do intafa gelukafa koswasa klita (guazafa Alkaira ke rumeuca) in tolwebokar da tide yanba en tir (Xikayat xarati-ba bak 1975, Malxamat al-Xarafic bak 1977).

Zavzason lisagaf gu nuyevaf gaderopaf minieem is intafa envara va suterot, bak 1980 sanda in tir feliik tarkan tuke lidadugeem is vanburepera pu arabavaf berpot, vexe golde yon gaderopaf ikatcuks (tulon zobera va misrayisraelafi dili) fereon zo akler. Ba 1988 pu in Nobel Poradro zo ziluker. In tir tel taneaf arabavaf suterotik batinde gableyen, acum va tamavadolebela di vansar (konak decemoy remsuteks kal konaka sanda dem ava batvielon zo ropatad). Vexe, orkon gu tizafa likera wale roti is yona lugavevaca ke islamevaf kevusikeem, is dere koe lidafa is alkafa tutritawera riwe icdesa va kotyona bada ke misraf selt, motc icde Aulad Xaratina zo toltitfir. Golde wedasa lapisonara gan toloy islamevaf jotaf ukik (1994) Nagib Maxfuz galovon moblir.