Difference between revisions of "Movura ke ayikya"

Abegaf nik, al erul da va yon loblif setikeks ke jinafa tira pwadé. Tí guazapikya, vuwiskafa, nazbeiskafa ; batdume tí nuyaf da pu rin movú. Anton abdiplekul da meviele va jinaf yolt razdatal.

Al zo renapayá, efe grupel ; dere jontikviele al rená. Tiyí listapaf ; rokalí larde mecoba re zavzar. Rena tiyir tove jin bli ke gloga, milinde gael tir bli ke alto. Va awalk lodam krenugiskafa tira is voldo modovara va jin co-abdualbayá. Jontiktanya sokespud da kan gijarotiucarsa ke takra anton tanon renad ; batcoba jontikviele al sokir da tizapon kaikrenayá eke foliyí da albaratena co-tir merotisaca. Wori ina kotviele tuwavon tenanteyaweyer, dum tey viele inta gracar.

Pu rin va taneafa jinafa stuva re fu kalí. Tiyí guon volgunapaf vexe ina va kotara di gotuyur.

Aklafa jaxadara ke bat prazdaf selasikionyik ke Pecq va piza pu jin al malsetiker, va mayakafa piza volins tcokena. Darekeon. Mali tanda tí kurenik ke kulikye, ke Hervé de Ker-, ke guazazaavaf breizik, arse jinon merenan. Rena, tela ageltafa, icle tce, va nuyuca is lirk miledje sokolegar. Koaykana rena, kagrupena gan mwa, kumzilina gan gertik, kas tir rena ? Mwedafa kutcara va dubiena kutcara me sovodar.

Kurenik tir ontinaf is glabaf is jiomapaf gu laviuca. Vexe va gruuca gracir. Cuon pulvir, va imizkoron gabes trakuray divplekur. Inafa swava tir kotrafa gu parmaf trak, plekuyun ko in gan gadikeem miv gis vey abdigadikeem. In me soklabur, icde kotcoba davon is takelon boyar, metoktemenon is megildason da konara trakurinda rotir. Pestalé da bata taka tir budeyena, da meka rieta koofir, meka rieta toltuwarzasa is tugalasa va swava milinde suka va mona koonir viele dilk ik tuvel zo fenkur.

Lamone lize irubav koe letaxorso tigir. Gabentafe xepe, koxutanafe gu yon aalap dem tij modovas va batakaf lukast ke guazik. Aname lurd vas arse aalxo, aludevaf kelor yoltan gu « saut de loup » tigir ; ise arteon, vane vayka, va toloya tourka kotrafa gu edgarda is ezas werd digiv. Waleon, kene katanasa voama, kurenik va kirkama ta zeltara va govitaf nudol al volmiv vegedur.

Valev gubef kwikeem, va susikye, ficikaj abidas va kurenik kali awalkera, is va mawakwikyama, riwe nik lidixon lotis va jin, dikiv. Weti alubda mal Espana va ina al vanstá. Jovleyen rumeik. Ina gu Gitano yikya zo narur, yoke ebeltaf biak is orikaf iteem is usuk aludevaf dum aalxo is tanion broewes aname jo. Tir san-tevdaf voxe nuvelar tol-sandaf.

Toza ke muvugal. Jontika tcabanera, onton dene vegungik, onton dene cin ; ise va yikye, va C- bermik lolonobon woras va lamone, katcalá. Azon ine mea pir, pune mea vaon trakú ; vexe sonké da kurenik tove jin tilabetar.

Nuvelar mustaf is abdikerelen, va jin me kutcar ; ise beka ko jinafa mawa dare rion kolaniyir, lecen al diné da mawa me gotir keve inafa enide ant rovoblimí, va anyerkafa bora kal jinaf tuvel vox illanisa arti konaka wexa jontikviele mielon gildé.

Larde jinaf dilk moe sidot tigir, va izga mwarnesa aname lamone jontikviele fogildé. Pu kurenik kalí, in va jin konakveraston modisuker, aze dulzer :

— Loxe, susikye.

Okie, lansielon, viele ten sielestuv, Hervé zulton nutise kolukapafe, ton yotafa itupuca, pu jin erur :

— Kas pitcarafa tiskira va baroy bartiv, ta atara va bresitol kotsielon pis is estus va jinyon wil, va rin co-puver ?

Zo akoyé : klabú ; vexe in larde manon linveson krafiar, tere dulzé :

— Efe gue, nanye.

Gokalí da bro ayikye va idatcol ik wafibol gitcabané. Acum dragera va bata pitcara tir tuwavaca.

Vexe kurenik ve nutir divulon noglotaf ; nume sielcekon tegulawer, gronon vozon ranyason azu debanyason.

Moni sane bartiv pu jin levgon kalir :

— Til gadiaf ?

Ranyá. Aze viele va zelt pu jin miv vanburer, erú :

— Kas gu vilt ok chevrotine digxa govajoté ?

Zavzar akoyen, azon kalir :

— Ox ! gu chevrotine digxa anton, batcoba stapeter, til lanaf !

Azon, vani konak verast, manakomon loplekur :

— Rosiskel da en til wontapaf !

Toz kipé.

— Jin ? tokinde ? wontaf ta atara va bresitol ? Vexe va tokcoba modoval, nanye ?

Aze melorason mallaniv, reme lurd. Varafa mona keniber. Taelars va guazafe xe dem afigasa kepaita gu blafote nubiar. Toloy vakrilef rasekam va toloya afifa pozla moe verol bured, ise mek lor va amlit ke bat aftaf is gabentaf miel skalter, ke zijnaf is rusagaf miel nutis awalkaf. Meka gaelsusta, meke gemuie, meka murtoybrera ; grenyafa tuglagara va kotcoba al luber.

Ba cinafa artlanira lev aala ke lurd, fedara va jin konarir, is dakela ke lubeyesa toa. Kurenik mekon kalir voxe kalterektar, ulijdar, koe izga nugriter, takanugon narin gan skeura va tcabanera.

Va tourkadoma fure zomev.

Inaf usuk dem gralka zavzar mezekawes, meka sukara santar ; vexe biwe ropestalena liziwera va lava koenid. Dile tanoyu u welmon kaliziwer, nume batlizu ivamumu ilnid, oltavafu gu li afif ploz dun tugijawes.

Zomeson va kirka ke skayera, kurenik askir da va int taneon inké, azon va zelt vion ervoar, aze levgafa ermitawera ke lizibela va divulaca den jin warzer. In pestaler da bupá ise erur :

— Kas, xuye, bata yotcara va rin puver ? Battode, mallanil.

Akoyepen, dulzé :

— Meinde, me al pí enide fure dimlaní. Atedul, resielon ?

In prejar :

— Inde kuranil.

Nume zavzav mezekawes.

Arti monion bartivlik, larde mecoba va rusagafa is aftafa auluca ke bat muvugalaf miel, omapon kalí :

— En lanel da in batlizo gilanir ?

Hervé botcewer dumede va rin al bugdá, aze, art ko jinafa oblaka :

— Lané, gildel ?

Aze gire amlit.

Toz liugé viele kurenik va jinafa ma licar ; aze inafa puda, azdasa, betana, tiyar :

— Kas va in wil, banlize, leve aala ?

Kore kaldisuké, va mecoba solwí. Aze vion Hervé ben epita va zelt plekur, va jin modisukerseson. Ta zeltara va int gugadiá, aze levgon, arti bar-sanoya bora male cin, ko afirsi ayikye awir, kaliaboron vanlanise, ton xowaso alto dumede co-yater.

Zo akoyé cugeke tizon kizoyú ; vexe abdida rorwodé, teyka va jinaf iteem kabduonir, edavara va jin spikonar, aze va ayikye tanamuse moe sid, dum idatcol kazawayan va vilt, wí.

Opon malié, kovudan, tuoviskawes ; bam yatkafa nuba, tela ke Hervé, va jinafa larida narir. Zo agvundú aze ko inaf prastaf meem zo malnarir. Va jin tideon gison, van alto senyeso moe werd vulter, aze vamoon mimar, tizon, dumede va jinafa taka co-djumempar.

Pesté buktaf ; va jin fu atar ; ise ixam va buuk vamo jinafo jo madar, viele silukon zo mar, zo trovgar, teka va sokira dure grupé.

Levgon ranyá nume, moe in, va abadeson Paquita jinafa kwikya xodawesa dum yatkaf karvol is malkewesa is lidixafa soltioltesa va lukast is nyoxa is gexatalma, wí.

Azon, ina dumede gan ara rieta ve konarir, pune ve ranyar aze moebiduson va awalkoda mapar, mo iteem az art kutcason, fenkuson kan kutceem va inaf awalkaf kutceem, koon aneyason va kona sukera, is va santarapa ke fertikeem.

Kurenik, ranyes, disuker. Gildar, aze tit jin lubeson :

— Ox ! ixel, abegya, va rin al uculé voxe va fertik ke battelya al atá ; susik va jin al kalcoer.

Jin, va yona divulafa kutcara va ban awalkik is ke bat blisik ; is boregara, ke ina, is yona vagrablera ke inafa gripokoleyena rena.

Nume batvielu, al gildá da tití volsagaf gu kurenik.