Difference between revisions of "KanakafaVunda Taneafa estura va ayacot"

X : Taneafa estura va ayacot : toleafa vunda

Bata vunda radimi tela va bertrafa Paila gitir, ise ede kanakaf reizusik jontikviele abdion plekud, batcoba vanmiae grupeikeem va meka motcara askoar ; dene mane sane, kon cultim roglebas va gunik oku kizey men tid.

Jin, va abdifa plekura abickane wí, larde izva ke nazbeikeem ke Paila en tir ; sin va mancoba krafiansad.

Ugale Ingien ewala tiyir tolon frofanafa, gu veynazbeikeem ke Tamabo, kottan tiyir vonaf ise meka rotura ke ayik moe tawava tiyir.

Kotilanon mali rumeugal ke nazbeik ke Tamabo, sfi al zo sokapayar ; manote toma vol zo patayad.

Lo lerd-sanon (lerd-sanoy doca cha cananeuneuderi jijacek) tiyir.

Batvieli kote ayikye tiyir budafe, kota ayikya ceakafa ! Kot rumeik listaf.

Kottan daavon va intafa kelda askiyir ; kota ewala va kota sutkafa iltinda lidam kota domega va kabay dem fraf cot sobundayad. Bilka bene aal tulukrayar ; kottan va runda leve izga is leve awalt dilion deraykayar ; kottan, guazaf ok jotaf, va intafi warolakski sorokayar.

Okie konviele rumeik va berik tazeyer kire in tiyir lodacaf, aze soltiolteson va ilt buren ko art, va in kabdueon di estuyur.

Va batcoba wison, tele guazikye ke grelt, yoltkiraf gu Kue (tidkraytara), va in rozayar aze kaliyir : « Rumeik, obral, ede rotul, mejetel dum bettan, nume rinaf yolt zo rotapsatar ! »

Voxe rumeik va in kipeson disukeyer aze tolon dratceson va berik, va kelda trenayar.

Inaf yolt tiyir Tecea, dan va rotik batvielu sugdalar ; bantel tiyir Keru, danu va kiewik batvielu sugdalar.

Ise batvielu va sfi sandon taplekuyur voxe mecoba zo betayar ; oxam toloy berik al tuontinaweyed.

Guazafe Kue va Tecea me al vulkuyur, volse rumeik va guazik.

Bak bata ilana, kaiki muvugal vleve piaalap kapa dilizeyer ; edje guazik dewitcayad ise yik ton warolarastute stuteyed, Tecea, ontinafa is pofa dum mek artan meviele al kruldeyer, do konak yik pof dum int illaniyir.

Keru is yon dositik daavaon stuteyed, mamadason dem imwafa bakiola. Va sin do diuzafi loitesiki nugon ic djukurena yikya mimayad. Ede in va int gu loitesiki ingayar ise va int va imwa sonayar, erura zo plieyer (batcoba batinde ko jontika ewala wan dilizer).

Bak varaf afizacek Keru klabuyur, me rovemimason va imwa is loitesiki nugon ic renanikya, kire battelya tiyir Kamea, nazbeik ke Paebo, listafa eke gu awalt al zo yoltayar.

Levi siel ve gorayar, kontegeson loon dam unaykon kabuson va zminta, va loitesiki is imwa nugon ic Kamea mimayar.

Listafa nazbeikya ke gejik va diuzaf talgak kiceson treduyur aze ko usukeem aykayar ; va int gu batakafa imwa isu kerafa sonayar.

Bam stutera ve azavzaweyer aze yik va aguntaradanka kaliyid :

« Stutera vleve kusaf aal tir kiewafa, viele bitej jebed dum kunoya teyita vanmiae gameem !

Abdigadik, komodepeyes, levu tawa takamadad, divmodan gan kaladank, ise va int mo abade zobeson, anamterektad.

Yikye va loitesiki is imwa nugon ic aguntanik al mimar ; in daletoe koe kiray va imwa gu ilt betatar.

Moi bat bokayan dank, Tecea do lospa, mo yon yik flavodason lubeyer.

Dum ciwani zveri, yikya van orikaf krant ieson mallaniyid. Kamea is Anohanda berikya do berikyeeem kevalieyed.

Lyumara tiyir gulafa, mek stutesik va ervo giyir, vexe ta kalrojura va yon rapor iku klova iku gama treduyud aze tcazon blidoleyed.

Boreon, kottan flavodanon zo seyer.

Antafa Kamea isu Anohanda wan bliyid.

Tecea is yon dositik van intaf kiray va sin poason divbureyed, kire djuyerumayad ise aguntara ke Keru va lyumara al titosipeyer.

Bat ikorik va yono alto senyeso moe sid kan nuga platiyid, me mimason va yon kusafa gama ke piaal mo sin ton sugawalkaca.

Tecea va mecoba gu culimera ke Kamea dulzeyer ; tiyir tel lopof nume wayar.

Tel lopof kaike in, Daguvi, va Anohanda guoteyer.

Batedje gejik ke grelt, belcon estus kadime mevtava, gildeson va lor ke doaliera, ranyayad ise ko kiray va ervo aneyayad, vexe gaverson artlaniyid, nume batvielu gejik va ervo mea bulud.

Va yon seyen awalkik moe runda isu lubeyes ilt isu imwa wiyid, va sid besayan gu fortey ; va gripokolenuca ke kota yikya terektayad nume vanvulteyed, vexe battode dere, gaversafa. Kamea is Anohanda, nazbeikya ke budik ben djiga al ipeyed.

Liz ora aludevon sobanger eke metan rodedimpir.

Guazafe Kue fu awalkese senyese koe kiray, ba lor takaskarayar aze, setikeson va Tecea, ilblison vangrupeyer nume va tel taneon divgimas va fortey rotapsayar. Gejik va gunikeem remo aalxo is vanmiae mola is moe mevtava di onkayad ; bak kotraf taelcek battinde aneyayad enide va intaf vuwikeem co-jaxadayad.

Lyumara vol gosauyur.

Vexe gejik argaweyed : jontiktan tiyid guazaf ; tuacaweyesa ma va gamiafa flavoda tiujuyud ise va zminta lepoon kabuyud. Acum viele moe piluda ta tildera al debanyeyed, dositik ke Tecea va sin ipeyed nume kalcenyeyed.

Bam warzaf tael va koncoba meviele ixam wiyina wiyir.

Poik, cenyeyes, durgayad ; voxe va imboza koe intaf kralkeem ik ricol solzan wale bilkatoa vols ayacot me estuyud !

Ivamuon debanyes, pudamon dankayad, zanieson va yoni lofrafi altoki djeyeni gus fi is awolbapayana wela.

Jontolafa zminta va toloya taka ke Tecea is Daguvi ve tazeyer : guazafe Kue, ilblison va po ta jaxadara al trasiyir, ise lekefa swava va in al pomayad aze do sin divstayad.

Kottan ranyayad aze artlaniyid lizu zminta al malniyir, voxe va guazafe Kue senyese awalkeyese moe uling : inafi varafi bli tanoulon al puskeyer.

Tecea gu gomilara al zo esteyer ; vexe ayik grivuteyes va ayacot is uliyis va ayafortey, di sodjumestuyur ise di sodjumuliyir.

Batinde taneafa estura va ayacot tiyir.