Difference between revisions of "Va sutuca rovilat Hugo"

Va sutuca rovilat !

Weltikeem, me tí dum kontan folis da mejera koe bata tamava zo rosular : mejera tir lorafa mwa ; voxe tí dum kottan trakus is ruyes da sutuca zo rovilar.

Katcalackac, Weltik, me kalí : rotirutat, oke rotupinat, oke rokimat, oke rotanamkodet ; kalickí : rovilat. Sutuca tir akola ke dreem dum libakakola tiyir akola ke ayalto ; sutuca rogriawir milinde libakakola al griawir. Va sutuca rovilat ! En, batcoba tir rotisa ! Mwasik is bowesik vaon dun gomodovad ; kire mantode, liedje rotira me tir askiks, goni me zo kotaskir.

Sutuca, Weltik, va uumav dure rué, kas djugrupec lize sutuca tigir ? Djugrupec liz ina rofir, liz fir, me kalí koe Eirea, me kalí bak klaamialugal, kalí koe Franca, kalí koe Paris ise batugale ? Va askiks djumec ? Lorik, me klabú da va batyon askiks ozwá. Sin tid gabentaf vox goverazdan ; ise tetce, ede va koekafa trakura gokalí, co-djumé da fawokafa kogruparapa va debalacka ke kobas is mejes puleem koe Franca di zo gorar, ostik batkase ariekon fu co-dragé. Co-djumé da kot askiks di vinustar. Tokkane rotok zo co-djufrasker ede eepta me zo bralad ?

Batse kle askiks. Koe Paris, koe batyona gasta ke Paris gelkeon drikapon kevmadana gan suka ke muska, yona nuda isu mona isu vard lize yasa, kotrafa yasa, aotcon blid, ayikya is ayikye is yikya is rumeik, kot dadis wetce ilava, wetce modivatcesiku, ~ riwe co-kalí : wetce vage, ~ anton dadis va yon yicaf kacawes felay treduyun div dibla tite ninkealava, div bata cielkinda ke widava, lize ayaf tisik blickis va int gikosuxedad enide va fentugal di divvawad. Batse tanoy askiks.

Batse tanar. Sure, ayikye, Lorik, kimtaf suterotik, lecen sutuca va takakobasik lidam nubakobasik someumber, kimtaf ayik al awalkaeler, rusunon, larde moi awalkera coba zo rabateyer da in mali tevka al me estuyur.

Kas va arcoba loon kranavafa djumec ? Dareaksaton, bak warzafa atrira ke beyolakola, gadikya is balemoy nazbeik, aneyas va sinka vanmia atcuxafi is vrotsondafi awalkodaki ke Montfaucon cotxo, al zo trasid !

Kle, weltik, kalí da bata coba me gotid ; kalí da selt va koto po, va kalobrara, va kotafa gruuca, va kuranirarsa gonixalar enide mancoba vol gotir ! Kalí da koe seltaykirafa patecta man askiks va jiluca ke kotraf selt koed ; da pesté dofugaf gu batcoba isu gotuskaf, jin pulvis, ise da man askiks tid vetuigara va ayik vox loeke gomilara dolge Lorik !

Batdume zo kobuivé, batdume va kottan terektas gu zolonucapa ke atoen drageks co-djumobuivé. Batcoba anton tir taneafa bora, voxe gorukafa. Co-djumé da bata koka, dem volkareon lok is lek, ~ jin va mek lok ik lek mantode grupé, ~ co-djumé da bata koka va tanoya gloga dir, ta bat enidap, ta bata cuisaca, ta bata lugodaca, ta kosulara va sutuca !

Ise, weltik, osk va winafa vonuca gukoé, voxosk va ekeme ke gaderopaf trakuray ke mwasikeem gukoé ! Ise icdeon, va ironokaca : batliz tenutú.

Weltik, inde sure kaliyí, garveldanon gan surervolia is ervolia is koto blifo po ke patecta, va soka gire widlayana su tuacac. Lent meka iyela al dimefic, lent meki goni al klabuc. Va vertaf selt is mwedafe bowere is kizeyeem is sanefi dili is dace seltay al giwac. Va torigiraca al askic… Kle ! Va mecoba al askic !

Va mecoba al askic, va batcoba karaké, liedje ugafa vura me tir omavakirafa gu ilempana lidafa vura ! Va mecoba al askic liedje sane mejer ! Va mecoba al askic liedje valeveon saneki gripokolewer ! Va mecoba al askic liedje kontan godjaf gu klaa is gikobas rotir begiskaf ! Liedje guazik kobayas rotir ditsiskaf ! Liedje erbafamarsafa beitara va minaf tawaday vumber, liedje kontan koe minyona widava rotawalkaeler, liedje berafa mwa men tid, kristevafa mwa kotlizu kopomasa va sutaf telaf yaseem, va tawadayikanyeem, va dodelikanyeem, va aboyikeem ! Va mecoba al askic liedje swava ke artowara tir pelafa gu sanefa mejera ! Va mecoba al askic, va mecoba, liedje koe bata vilasa is mielakafa tegira, flovon wan dilizesa, ikorik va volkalik gu baliaf dokobasik dikir !

Victor Hugo