Difference between revisions of "Kudeem ke Aisopos : Wegidol"

Stutes wegidol

Wegidol gonostutes golde feliik kalir : » Va kuca stuteson grací voxe dere dace viele avlá.

Bata kuda icde koti volkafi tegi zo royazgar.

Wegidol is fuzol is jidol

Sulemeem va kiblara va gazik builtayar. Wegidol is fuzol va int drageyed ise va vek keviduyud, djupokabdualbatanon yoke lumap is po. Vexe jidol ve dakteyer da kottol vol rodegazayar : «  wegidol, ~ kaliyir, ~ kire kev tozekik somezider, ise fuzol kire rokivat da bulol, sulem craken gan in, va min rodilfutur. »

Bata kuda nedir da lazavama va vansara va unepe dile buder.

Wegidol is Zeus

Wegidol, rabateson da jaftolye va int gu noleem abdivodar, djumar nume dere lion roseotar. Batdume va Zeus kevlanir aze bliker da in va noleem di kozilir. Vexe Zeus, pan da in va int gu ontinaltopo is po me keldaskir ise ware loon galper, osk va loplekura va noleem vewar, voxosk va toloyi oblakaki dace gaber.

Batinde jontiktan warkon is djumason va artan disuked, me vofad da va intaf gunteem drasud.

Wegidol vlasteyes ko voa

Wegidol va soist remlanir. Vlaster aze va ogola kabduoon divburena gan saltap fure wir. » Tokinde ? ~ divier ; ~ coba kadime jin tigiyir, va remnisa kabduo jin dure wí ! »

Bata kuda sorazdawer koe soka lize ironokik ik fitulik ika pestorik mofelid.

Taneatomon win wegidol

Viele ayik wa wegidol taneatomon wiyir, pune vudeyer nume, pedran gan ontinaltopo, yateyer. Vexe darpeon sonkeyer da in sotir zijnaf, pune tulaoweyer ise vanlaniyir. Azon, vofason da sulem somezider, in vliguyur eke fexayar ise ta jupara pu rumeik nafeyer.

Bata kuda nedir da giltira va kivara ke mayakaca sotuvumeltar.