Dakteks va Ayikaf is Wideyikaf Rokeem

Dakteks va Ayikaf is Wideyikaf Rokeem

Vanikatcun gan Tadlesa Koka ba 26 anhusteaksat ke 1789. Kaatoesikeem ke francafe sane, tadlen koe Vedeyafa Koka, torigis da volgrupera ik vulkura ik vligura va ayikrokeem tid tela antafa lazava yo ke sanef volkalaceem is avonanuca ke bowere se, al gorad da wonad, koe fawokafa Daktera, va tuwavaf is meroripindan is baerdaf ayikrokeem, ta da bat Dakteks, tanion noelaf tori kot seltik, puon tanion askir da in va inaf rokeem isu gonieem setiker; ta da tegira se ke mwasi roti is tela se ke skusi roti, kotviele rodolinhena do enid ke kota gaderopafa vila, yokeon loon zo tarkad ; ta da imaxura yo ke wideyik se, daletoe omavawesa moe opelaf is volrotaklen rigot se, va nubagira va Tadlemwa is kottanafa kaliuca kotviele atced. Acum, Vedeyafa Koka kagruper ise dakter, do anoeluca is nendara ke Tel Ilamik, va vlevef ayikaf is wideyikaf rokeem : I-eaf Teliz Ayik se koblid ise zavzad nuyaf is miltaf koe rokeem. Seltafa amidaca yo anton zo rorigavad kan dofa favluca. II-eaf Teliz Enid ke kota gaderopafa gesia tir videra va tuwavaf is merotenuwes ayikrokeem. Bata roka se tid nuyuca is pilkuca is septuca is acagira va ristara. III-eaf Teliz Nelkot ke nafaluca koe vedey sosoker. Meka lospa iku olkik va rictula me ariekon maletisa rofunter. IV-eaf Teliz Nuyuca va askira va kotcoba medasasa va artan niter; baton funtera va tuwavaf rokeem ke kot ayik anton zo kimar kan rokeem ke ar milseltik yo. Kimara se anton mwon zo rogotud. V-eaf Teliz Mwa rokar da va dasara yo va selt anton pour. Kotcoba mwon mepousa me zo roweyonar, ise metan zo rosteger ta da askir va mwon mebenplekuna koncoba. VI-eaf Teliz Mwa tir muxara ke jadifa kuranira. Kot wideyik rokar da miv ok gan intaf kaatoesik yo va inafa tazukara paker. Mwa gotir milafa tori kottan, ont da nendar, ont da ester. Kot wideyik, varzeon tis miltaf, milton tir rodosten ko kota sanefa bagaliaca iku rundak ik une, kare intafa rotaskisuca is anton tuamidanon intaf ceakaceem isu fitceem. VII-eaf Teliz Kontan zo ronumar ike zo rotazavzar ike zo rodagir anton koe mwafa gotunaca yo isu tazuk yo. Tel va wavidafa vura se yanes ik divtunses ik skus ik tuskunas zo gonumar; volse kot wideyik rozan ok vangis nope mwa davon roveger; in acagison tugunawer. VIII-eaf Teliz Mwa anton gonexoner va enadrafa pursara yo, ise metan anton zo roveger nope mwa exoneyena is riguyuna abdi fuga is mwon rewana. IX-eaf Teliz Kottan zo abdiyer da tir volgunaf kali di zo dakter gunaf. Ede en dirgulafa da in zo soper, kota nustaca, dana me co-tir adrafa ta stujera va in, bokson mwon zo gorujar. X-eaf Teliz Metan zo gonaneyar golde intafa trakula se, gon tela alkafa, wari da exaksara va sin me skalter va mwon exonena sanefa vunuca. XI-eaf Teliz Nuyafa golera va trakeem is trakuleem tir tana lotciamafa ayikroka : kot wideyik kle nuyon ropulvir ise rosuter ise rorubiar, vaxede va bata nuyaca rofaver, koe mwafa gotunaca yo. XII-eaf Teliz Ravaldura va ayikaf is wideyikaf rokeem tuadrar va sanefi ji : bati kle zo kizer ta kottanaf gunt vols pilkovafa favluca ke tel se pu dan zo nafer. XIII-eaf Teliz Ta kiewagira va ji is mistulixalara se, dofa webera en tir adrafa. In zo gowalmuner wale kot wideyik se kare sinaf rotisaceem. XIV-eaf Teliz Kot wideyik rokar, miv ok gan intaf kaatoesik yo, da va adruca ke sanefa webera rabater, da va bata nuyon finer, da va unera va bata eninter, ise da va wiz ik dimdira ik jijacek ke bata gotur. XV-eaf Teliz Selt rokar da va bet intaf sanef ristulik fabur. XVI-eaf Teliz Kot selt lize ozera va rokeem me zo ravaldur meie rotisolparsara zo gotuyur, va Tadlemwa me digir. XVII-eaf Teliz Pilkuca tisa merotaksana is baerdafa roka, pu metan zo rozelar, vaxede mwarabandeson is krede malhafa is abdilafa stemokara sanefa adluca denon diner.

Xanto   Vergumvelt Déclaration des Droits de l’Homme et du Citoyen Sutesik Francafa Tadlesa Koka ke 1789 Piskura - Ava Francava Evla 1789   Kalkotavara   Vergumvelt Dakteks va Ayikaf is Wideyikaf Rokeem Kalkotavasik Mixail Kostov Piskura - Evla 2002 Klita Kalkotavaks   Krentduga   Webesik Axel Krentduga Gotuenan