NyagaceemScapin Nakileem01 Nakila03
Taneaf nakileem, bareafa nakilaHyacinte : Ax ! Octave, tir ageltafa coba Silvestre pu Nérine su kalir ? Da rinafe gadikye tir dimpise ise va rin djukurer ? Octave : Gue, listafe Hyacinte, ise bat warzot va jin uduton vanolad. Vexe va tokcoba wí ? Ikuzal !? Tokdume bat ikuzeem ? Gu kona volsagaca va jin uculel, kalil, voxe icde jinafa renara va rin me lanel ? Hyacinte : Volgue, Octave, lané da va jin renal ; voxe me tí da kotedje renatal. Octave : Ex ! Va rin co-rorená ede artion me co-renatá ? Hyacinte : Al gildé da rinaf ledam jinaf milikrik jontikedje renar ise da lujuca ke ayikye tir tey tenuweyes fakon lieke nazbalar. Octave : Ax ! Abegafe Hyacinte, jinafa takra me tir mila gu tela ke artan, ise pestalersé da kali naboxa va rin renatá. Hyacinte : Djufolí da pestalel va rinaf kaliks, ise me etraká da rinaf pulveem tid puraf ; vexe va roti lyumatasi va rinaf krenugaf pestakeem mu jin koe takra kivá. Va gadikye djukurese va rin do artan ruptel ; ise lané da awalketé ede mana volkalaca co-sokir. Octave : Me, listafe Hyacinte, me tir gadikye rostegese enide va rinafa folira grací, ise co-gorá da va vo lodam rin co-bulú ede mancoba co-olegar. Jinafa balikenikya va jin idapar kore vaon meviele al wí ; ise, metison udutaf, co-jugemé da bira vaon batlizu mevieli ilnir. Me ikuzal, vay, jinafe neciafe Hyacinte, kire rinafa borera va jin atar ise me rowí teka jinafa takra zo remrur. Hyacinte : Larde djumel, va borera djubosolacká, aze va jinafa coba goratana gan kelt taniiton keté. Octave : Kelt va min progeter. Hyacinte : Me co-rovolproger, ede co-til sagaf gu jin. Octave : En tití. Hyacinte : Acum tití kalaf. Scapin : Inya me tir lifitulafa, en ! Ise sedme jin nuvelar vumpamafa. Octave : Batse kontel kotron ropomapas va jin, ede co-djumer. Scapin : Al vruzapá da va tamava mea fornatá ; vexe ede va jin blikepec, rotir… Octave : Ax ! Ede ta seotara va rinafa pomara gobliké, va rin ogolepé enide va minaf tiv kojupal. Scapin : Ise rin, va mecoba pu jin kalil ? Hyacinte : Va rin ogolé, tulon gu in, kan rinafa lodabegafa kotcoba, enide va cinafa renara djukalzanil. Scapin : Zo gocené ise tí ayikevaf. Djay, mu win djutegí. Octave : Folil da... Scapin : Kay ! Mallanic aze tildewec. Voxe rin, va int egal enide va domune gadikye acon di likel. Octave : Pu rin welidá da inafa domura va jin abdion skotcasir, ise tuwavon merocenenon tí vazaf. Scapin : Wori ba taneafa vordava gonuvelal acaf, edeme, golde rinafa axuca, in di gorar da va rin lidam rumeik co-jupar. Batlize, va ponara vayason lagal. Til laockaf ise yovatal da icde inaf rotis kaliks elvon dulzetel. Octave : Cugeke askití dum grupaskití. Scapin : Kle, yawamat, ta vangiltara va rin. Va rinafa yorda tolkalimit, nume wit ede askickitil. Djay ! Elvafa siva is rontafa taka is frendafa disukera ! Octave : Batinde ? Scapin : Ware loon. Octave : Baton ? Scapin : Ae. Gestil da tí rinafe artpise gadikye, ise pu jin acon dulzel, dumede pu in co-askil. « Tokon, rotuxasik, webdik, krizik, volbagaliaf nazbeik ke man gadik jin, rin eblel da kabdu jinaf iteem awil, radimi rinafa gruspewera, kaikida viele tiyí gracaf vaon nyukon al randayel ? Kas ilt ke jinaf trumaceem, tozekik ? Kas ilt ke jinaceem ? Tarkasuca va jin zo-daner ? Tarkasuca va dana pu jin videl ? Tetce. Rin til jlokaf, yotik, da mekeson va jinafa gadafa finera viltel, da birgoton kokurel ? Pu jin dulzel, facilik, dulzel ! Va rinaf vratieem disukecket. » Ox ! Va tokcoba ! Rin zavzal stivawes ! Octave : Kire gestí da tir gadikye gildene. Scapin : Ex ! En. Batdume me rotil dum volgunik. Octave : Fu tí lodelvaf nume acon dulzeté. Scapin : En ? Octave : Gue. Silvestre : Batse rinafe pise gadikye. Octave : Ey kelt ! Tí buktaf. Scapin : Xolo ! Octave, zavzagil ! Octave ! In otcer. Man kimtik ! Me askit da tel guazik di ker. Silvestre : Va tokcoba pu in kalití ? Scapin : Iskel aze pu in kalití ise dum jin askitil. |
| |||||||||||||||||||||||||||||||||||||||
 Taneaf nakileem |
