Dume biralava tir eipkirafa
| ||||
|---|---|---|---|---|
| Vergumvelt | Pourquoi l'eau de mer est salée | |||
| Sutesik | - | |||
| Piskura | - | |||
| Ava | Sinava | |||
| Evla | - | |||
| ||||
| Vergumvelt | Dume biralava tir eipkirafa | |||
| Kalkotavasik | Sabrina Benkelloun | |||
| Piskura | - | |||
| Evla | 2007 | |||
| ||||
| Webesik | Favesik:Sab | |||
| Krentduga |  Gotuenan
| |||
Sumion koe Sina toloy berik bliyid.
Taneanasbalaf Wang tiyir tel lopof ise va nastolik trenon nherayar. Ba awalkera ke gadikye, coba se me di xodiayad nume gan nastolaf Wang blira tumerogedinaweyer. Taneanasbalaf Wang va varaf gadaf konoleks ve getuyur : va monanha is ayadol is kotaf kiewegeem. Nastolaf Wang va mecoba ve seotayar nume copuca denon boreon di inkeweyer.
Konviele, va tanoy zadoyolk mea digiyir. Me rotestuson, bam, ve gorayar da den taneanasbalaf berik lanir.
Artlaniyison, vaon ve kiavayar ise batinde ve kaliyir :
– Taneanasbalik, pu jin va abic zaday miazilil.
Vexe totcidapafe berikye va pomara krulon ve vewayar nume nastolik ve dimlaniyir.
Va gonaskine me grupeson, nastolaf Wang ta onara ken bira ve mallaniyir. Fala me doon tiyir kire me ve kiewaskiyir da va tanoy kabay ebidur.
Ton vlardaf nubeem is gamiafa takra dimdenlaniyir viele laizon iste vawa va tugoasiki ve kozwiyir.
– Batcoba konviele rozanudatar ! va tugoasiki treduson ve trakuyur nume denon ve divbureyer.
Mali da kurenikya va in ve kozwiyir eruyur :
– Al onanhal ? Va jontik kabay vanburel ?
– Me, kurenikya ! Me tir kabay. Pu rin va tugoasiki al vanburé.
– Ax, nastolaf Wang, rin grupel da va rotugoana mecoba digit : deneon mea tir tanoy zadayolk.
Nastolaf Wang mo sid va tugoasiki ve aykayar aze aundeson vaon ve nugayar. Tugoasiki toz lhaliziweyer ise loloon ise toz tugoayar. Nume eip, jontikote, vaon divayar. In lolokalion lhaliziweyer nume eip loloon divayar. Nastolaf Wang is kurenikya tiyid valeapaf gu bat ervay vexe tugoasiki lhaliziweyer, loloon, nume eipesba tulogijaweyer, loloon.
Nastolaf Wang toz vudeyer nume eruweyer kane va tugoasiki co-rotazavzar. Trakuyur ise undeyer ise patavayar ise va mek mergil trasiyir. Laizon adim ve rieteyer da va in trovgar. Acum in ve azavzaweyer.
Mali bat viel, kotviele koncoba deneon zo graciyir, nastolaf Wang kan nuga va tugoasiki platiyir nume va eip seotayar, va eip vindan ika inaf olegaks yo. In is kurenikya baton bravon gu olegara ve bliyid.
Vexe taneanasbalafe berikye kalion ve raveyer kane intaf nastolik va kaluca al trasiyir nume ve djumapayar. Ta da wir va berikye ve piyir aze ve kaliyir :
– Nastolaf berik, va rinafi tugoasiki kle miazilil.
Nastolik co-abdualbayar da mu int va trasiks sur, vexe va intaf taneanasbalafe berikye tarkapayar nume va vewara me ve ebleyer.
Taneanasbalaf Wang tiyir soriaf ta divburera va tugoasiki maneke, ta pebura kane bati zo rotazavzayar, nastolaf Wang va mek ugal ve diyir. Viele puon ve djupulviyir, battan ixam tiyir sumef, divbures va gojeks.
Taneanasbalik tiyir kalapaf. Va tugoasiki denon ve kobureyer aze kan nuga ve platiyir. Tugoasiki toz lhaliziweyer nume va eip toz tugoayar. Metenon is lolokalion tugoayar. Eipesba metenon loloon tulogijaweyer. Va kepaita ke mona kalion ve zomeyer. Rebaveem ve twaweyer. Mona fu atitsuyur.
Taneanasbalaf Wang ve vudeyer. Me grupeyer kane va tugoasiki rotazavzayar. Ve rieteyer ta da div mona tidu venta vaon tanamer. Tugoasiki va krimpa ve titayar, kal bira ve tanamuyur aze ve belxayar.
Malion batugale trenar da ludevon ice bira lhaliziweyer ise da va eip tugoar.
Batdume biralava tir eipkirafa.
