Klokara ke Tao
| ||||
---|---|---|---|---|
Vergumvelt | Le rêve de Tao | |||
Sutesik | - | |||
Piskura | - | |||
Ava | Sinava | |||
Evla | - | |||
| ||||
Vergumvelt | Klokara ke Tao | |||
Kalkotavasik | Sabrina Benkelloun | |||
Piskura | - | |||
Evla | 2007 | |||
| ||||
Webesik | Sab | |||
Krentduga | ![]() |
Koe widapa ke Sina, poke Nanjing widava, yoltkiraf gu Tao yik bliyir. Tiyir wawapaf vox tuwavavonaf nekev copuca is kotviele engadiaf ta pomara va artan. Metan pu in konviele giopon gukoeyer.
Konviele awalt ixam kelttideon jebeyer, Tao izgon gu aal kenibes moe baplaxa gan kontan tizamon ve zo divmodayar. Akoyenon ve itafenkuyur nume va lukoptavagekirik kabdueon ve wiyir.
– Divmodawel, Tao !, bantan ve kaliyir. Gazikya va rin ker !
– Gazikya, Tao ve gevaweyer. Vexe va meka gazikya grupé !
– Inya, volse, va rin gruper, lukoptavagekirik ve trenayar. Ise ta da va rin kwiton aneyá in va jin al stakser. Pil, va jin kadimelanil
– Vexe toktan kle til ?, pu staksenik Tao ve eruyur. Va rin meviele al wí !
Bantan ve tidepitayar :
– Ede va jin ixam co-wiyil ise va jine co-grupel, va tokcoba co-zanudar ? Gazikya va rinafa pomara olegar. En til Tao, battan pu bettan va intafa pomara meviele vewas ?
Tao mea ebleyer da biber. Va baplaxa kalion va dimsoayar aze va bantan kadimelaniyir.
Sin abrotcion laniyid aze viele in foliyir da va ironokafa mona se ke wida zomeyed, va datafa widava lize kevefa kota mona se va divulamaf tazuk nuvelas yastamaf atoed, kabdueon ve kosmayar.
Bantan va tana loglupafa is lokulupafa dam kot ar ve kolaniyir. Tao va in ve kadimelaniyir.
Ko datafa bonta lize listapikya moe ilamkaf uskej debanheyer sin ve artlaniyid. Koe usukeem inya va deciton jowikaso amoto bureyer.
– Va rin grewá da al pil, ve prejayar. Jinafo gazaxo zo kowupeper ise til tel antik vaon grugiwas. Tao kiavapason ve blagaweyer.
– Titir jinafa porapaca, Gazapik, in ve tcipayar.
– Pu jinafa nasbeikya va rin fu atoé, gazikya zijnapudon ve trenayar. Va kot jinaf sedenik dum jinaf nasbeik torigí, vexe va nasbeikya lodam jin lotipí.
Tao ve foliyir da va konaka decitoya moavabiotama gildeyer aze dere listapafa yikya va bonta ve kolaniyir. Inafa gexata tiyir zwafa dum tcuma ise ebeltaf usukeem kene ge stoyakoron lubeyer. Ton engabentafa tiva, pok gazikya mo moavarova ve debanhayar.
Nemon inkeweyes viele divviavayana aboyikya evieson ve kolaniyir :
– Rostaza ! Rostaza !
Gazikya ve ranhayar.
– Batse volkalaca pu rin kaliyina. Va rin vosé, Tao, va jinafa nasbeikya pomal ! Ta tolvegedura va kelu in zo vuidar vexe a in, meviele kiewaskitir.
Tao, vol klabuson, kan nuba va yikya ve nariyir aze va berm belcon tixolon ve buluyud.
Konakbartivon, sin mesukeranarison vulteyed. Va decitoya vristafa nuda koolaniyid voxe va wida ke Tao arldon ve artlaniyid. Batlize ve rosukewemeyed.
– Manon tir vumeltafa batlize, Nilumimwa ve repaleyer. Keskeon yolt ke jotafa sersikya tiyir bat.
– Daletoe sume bete wupe min tit, Tao ve kaliyir.
– Toklize va warzafu kelu fu kolnat ?
– Va kelu ?, Tao grupenseyeso viele gazikya koe berm kaliyir ve eruyur. Vexe va kelu mekane grukolnatá. Batcoba merotisa ! Jin anton tí copaf tawadayik. Va roti is erba me digí.
Gazikya va in ve disukeyer nume tit tcoreem ikuzapa yo ve tanamuyud.
– Vexe rin neke til Tao, tan kotviele tis gadiaf ta pomara va artan, in ve breyer. Antaf rin grupaskil
– Me, jin…, in fu kaliyir viele ve divmodeyer.
In lanon al kenibeper kire awalt noelkeon tiyir omapaf arte zida. Beka divmodanafo, Tao va nuvelasa ilasa puda ke Nilumimwa ware gildeyer.
Agelton, tiyir blatglemi. Blat se nuvelayad eglunaf nume va imwa se ke matela beton anametalayad. « Kimtaf bonol se », Tao ve trakuyur. Sin va blatak me digid ! Va tanoy torion fu iá !
Aze den senkiasik davon ve laniyir.
Jin eruwé lizu bat blat se manote ropid ? in ve trakuyur viele ve wiyir da beza yo va warzafe gelbe ekeyuson naleyed.
In ve mallaniyir ta da koe wida gestar. Va ironokafa mona artlaniyison, koe matela va jovlenaf blatak ve kosmayar.
– Dene jin va blat yo al trasí, pu ayik batlize sokis in ve kaliyir. Kas ke rin sin co-tid ?
– Batcoba rotisa, ayik ve dulzeyer.
– Sin lanon al otced, tiolteson va modivatcesiki ke blatak in ve loplekuyur.
Ba da in xowayar, va perake koeon ve kosmayar :
– Ox ! Rostaza ke klokara… ! ve kaliweyer.
Denon dimlapiyison, Tao koe matela va konak nuxaf blatak ve inkeyer. Kotlizu blat se arttalayad. Va inafa imwa yo toz virumnayad nume ika inafa nendara va kolt firviyid maneke Tao vonik boreon tukulaweyer.