Biblia Koxelet Blokey12

Kristevafa Biblia : Guazafa Bafela

Koxelet neva, santoleaf blokey Vexe va rinaf redusik bak jotugalaf vieleem setikel, abdi da vielaj yo fepoad ise ilana se vanad viele kalitil : jin me puvegú ; abdi da awalt is afi is tael is bitej yo tuorikawed, ise da rujod yo radimi muvara tolpid, ugal viele monasusik skotcar, viele poik tulivawer, viele tugoasik ten tugoar kire cuer, viele tan disukes kan dilk zo tuorikar, viele tuvelurifeyeem keve nuda zo fenkur viele lor ke gatcewa tuomawer, viele ba sveridank min ranhat, viele kota yikya ke dank tuaxawer, viele ontinaca zo craker, viele min lanison zo tuvudat, viele soyoraal imwer, viele jaya turusagawer, ise viele vuritc mea tegir, kire ayik van intafa parmafa oga mallanir, ise boresik yo va nuda koolanid ; abdi da dilgavawazdelam iliksantuwer, ise moavatrig empawer, ise muktu moe klita joawer, ise krafol moe bukelta arbewer ; abdi da goa ko tawa dimpir, milinde tiyir, ise swava van doziliyis Lorik dimpir. Greciaca vanmiae greciaceem, Koxelet kalir, kotcoba tir greciaca. Valev da Koxelet tiyir proyik, va opa pu sane dere va jontiki restali al taver ise al rinder ise al bralar ise al tuaftar. Koxelet al sugar da va agralafa pulva se trasir ; ise ronkaf kaliks yo tid ageltucafa pulva se. Pulva se ke proyik tid dum iwaz yo ; ise kabelcayana ko larm, tid dum taplekuyuna cepta se, ziliyina gan tanoy feliik. Ostik, nasbeik, male batcoba ravel ; ede kontan va jontika neva co-djumaskir, me co-tenuketer, ise vayarapa tir altocuera. Va dewitcatena terktat : Va Lorik kival ise va inafa dirgara se tarkal. Kottan va batcoba gonaskir. Kire Lorik ta malhera va kota tegira statar, icde preyutana kiewafa ok rotafa kotcoba.

Xanto   Vergumvelt Biblia, Vetus testamentum Sutesik Katalikafa Uja Piskura Vulgate siatos Ava Latinava Evla   Kalkotavara   Vergumvelt Biblia, Guazafa Bafela Kalkotavasik Mixail Kostov Piskura - Evla 2001   Krentduga   Webesik Troubadour Krentduga Gotuenan

Kristevafa Biblia : Guazafa Bafela Koxelet neva ← Koxelet 11 - 12-eaf blokey - Koxelet 12  →